(སྤྱི་དོན་གསུམ་པ། ཆོས་ལ་ཉན་བཤད་ཚུལ་ཇི་ལྟར་སྒྲུབ་ཅིང་ཉམས་སུ་བླང་བ།)

གསུམ་པ་ལ་བཞི་སྟེ། བཤད་བྱ་ཆོས་ཀྱི་ཁྱད་པར། སློབ་དཔོན་གྱིས་འཆད་ཚུལ་གྱི་ཁྱད་པར། སློབ་མས་མཉན་ཚུལ་གྱི་ཁྱད་པར། གཉིས་ཀས་ཆོས་ཀྱི་དོན་སྒྲུབ་པར་གདམས་པའོ། །

(དང་པོ། བཤད་བྱ་ཆོས་ཀྱི་ཁྱད་པར།)

དང་པོ་ནི། སྤྱིར་ཤེས་བྱ་ལ་མཁས་པར་བྱ་བའི་ཕྱིར་བསྟན་བཅོས་སྣ་ཚོགས་ལ་བསླབ་དགོས་ཏེ། འདུལ་བ་ལས་ཀྱང་། ཕྱི་རོལ་པའི་བསྟན་བཅོས་ལ་སོགས་བའང་བསླབ་བར་གསུངས་ཤིང་བྱང་སེམས་ཀྱིས་ནི་ཁྱད་པར་དུ་ཐམས་ཅད་ལ་བསླབ་པར་གསུངས་སོ། །འོན་ཀྱང་གཙོ་བོ་ལམ་དུ་འགྲོ་བ་ནི། སངས་རྒྱས་ཀྱི་བསྟན་པ་ལ་བཤད་ཉན་བྱེད་དགོས་ལ་བསྟན་པའི་ངོས་འཛིན་ནི། འོད་ལྡན་ནས། བསླབ་པ་གསུམ་ནི་རབ་སྟོན་ཅིང་། །ཕྱག་རྒྱ་གསུམ་དང་ཡང་དག་ལྡན། །ཐོག་མ་བར་དང་མཐར་དགེ་བ། །སངས་རྒྱས་གསུང་དུ་མཁས་པས་རྟོགས། །ཞེས་བསྒྲུབ་བྱ་བསླབ་བ་གསུམ། ལྟ་བ་བཀར་རྟགས་ཀྱི་ཕྱག་རྒྱ་གསུམ་སྟེ། ཆོས་ཐམས་ཅད་བདག་མེད། འདུས་བྱས་ཐམས་ཅད་མི་རྟག །ཟག་བཅས་ཀྱི་འདུ་བྱེད་ཐམས་ཅད་སྡུག་བསྔལ་བ་སྟེ་གསུམ་སྟོན་ཅིང་ངོ་བོ་ཐོག་མཐའ་བར་གསུམ་དུ་དགེ་བ་ལ་བཤད་དོ། །སོ་སོ་ཐར་པར། སྡིག་པ་ཅི་ཡང་མི་བྱ་

༄༅།        །སྟེ༏ ༏དགེ་བ་ཕུན་སུམ་ཚོགས་པར་སྤྱད། །རང་གི་སེམས་ནི་ཡོངས་སུ་འདུལ། །འདི་ནི་སངས་རྒྱས་བསྟན་པ་ཡིན། །ཞེས་གསུངས་སོ། །མདོ་ལས། དམ་པའི་ཆོས་ནི་ཐོག་མར་དགེ་བ། བར་དུ་དགེ་བ། ཐ་མར་དགེ་བ། དོན་བཟང་པོ་ཚིག་འབྲུ་བཟང་པོ་མ་འདྲེས་པ་ཡོངས་སུ་རྫོགས་པ་ཡོངས་སུ་དག་པ་ཡོངས་སུ་བྱང་བ་ཞེས་གསུངས་ཤིང་ཐོག་མཐའ་བར་གསུམ་དུ་དགེ་བ་ནི་ཐོགས་མེད་ལ་སོགས་པས་ཐོས་བསམ་སྒོམ་གསུམ་ལ་བཤད། ཁ་ཅིག་མདོའི་མགོར་གླེང་གཞི། བར་དུ་མདོ་དངོས། མཐར་མཐུན་འགྱུར་ཡི་རང་སྟེ་གསུམ་ལ་འཆད། སློབ་དཔོན་དགེ་བའི་ལྷས་བསྟན་བཅོས་ཀྱི་ཐོག་མར་མཆོད་བརྗོད། བར་དུ་བསྟན་བཅོས་ཀྱི་ལུས། ཐ་མར་བསྔོ་བ་གསུམ་ལ་བཤད་དོ། །འདིར་རྣམ་བཤད་རིགས་པ་ལྟར་བཤད་ན། ཐོག་མ་དང་བར་དང་ཐ་མ་ནི་ཚུལ་ཁྲིམས་དང་། ཏིང་ངེ་འཛིན་དང་ཤེས་རབ་ཀྱི་ཕུང་པོ་ཡོངས་སུ་ཉམས་པ་མེད་པས་དགེ་བའོ། །དོན་བཟང་པོ་ནི་ཕྱིན་ཅི་མ་ལོག་པས་བརྗོད་པར་བྱ་བ་ཕུན་སུམ་ཚོགས་པའོ། །ཚིག་འབྲུ་བཟང་པོ་ནི་གོ་བར་བྱེད་པས་རྗོད་པར་བྱེད་པ་ཕུན་སུམ་ཚོགས་པའོ། །མ་འདྲེས་པ་ནི་གཞན་དང་ཐུན་མོང་མ་ཡིན་པའོ། །ཡོངས་སུ་རྫོགས་པ་ནི་ཉོན་མོངས་པ་ཐམས་ཅད་ཀྱི་གཉེན་པོའི་ཕྱིར་རོ། །ཡོངས་སུ་དག་པ་ནི་རང་གི་ས་བའི་ཉོན་མོངས་པ་ལས་རྣམ་པར་གྲོལ་བས་ངོ་བོ་ཉིད་རྣམ་པར་གྲོལ་བའོ། །ཡོངས་སུ་བྱང་བ་ནི་ས་གཞན་གྱི་ཉོན་མོངས་ཀྱི་བག་ལ་ཉལ་སྤངས་པས་རྒྱུད་རྣམ་པར་གྲོལ་བའོ། །དེ་དག་དང་ལྡན་པ་ནི་དམ་པའི་ཆོས་སུ་རྟོགས་པར་བྱའོ། །མདོར་ན་སངས་རྒྱས་ཀྱི་བསྟན་པ་དམ་པའི་ཆོས་ནི་འཕགས་པའི་བདེན་པའི་མདོ་སྡེ་ལ་འཇུག་ཉོན་མོངས་པ་འདུལ་བ་ལ་སྣང་། རྟེན་འབྲེལ་གྱི་ཆོས་ཉིད་དང་མི་འགལ་བ་ཞིག་ཡིན་པར་ཐེག་པ་ཐུག་མོང་བའི་ལུགས་ཡིན་ཞིང་། ཐེག་ཆེན་གྱི་ལུགས་ཀྱིས་རྒྱུད་བླ་མར་སྔར་བཤད་བ་བཞིན་ནམ། མདོ་སྡེ་རྒྱན་ནས། དད་དང་

དགའ་དང་བློ་རྣམས་ཀྱི། །རྒྱུ་ཕྱིར་ཆོས་འདི་དགེ་བ་ཡིན། །དོན་རྣམ་གཉིས་ལྡན་གཟུང་སླ་དང་། །ཡོན་ཏན་བཞི་ཅན་ཚངས་སྤྱོད་སྟོན། །གཞན་དང་ཐུན་མོང་མ་ཡིན་ལྡན་པ་དང་། །ཁམས་གསུམ་ཉོན་མོངས་རྣམ་སྤོང་རྫོགས་བྱེད་དང་། །ངོ་བོ་ཉིད་དག་དྲི་མ་དག་པ་སྟེ། །ཚངས་སྤྱོད་ཡོན་ཏན་བཞི་ལྡན་ཡིན་པར་འདོད། །ཅེས་པ་ལྟར་རོ། །ཐེག་ཆེན་ཐུན་མོང་མིན་པའི་ལུགས་ཀྱིས། ཇི་སྐད་དུ། སྟོང་ཉིད་སྙིང་རྗེ་དབྱེར་མེད་པ། །གང་ལ་སེམས་ནི་རབ་སྒོམ་བྱེད། །དེ་ཉིད་སངས་རྒྱས་ཆོས་དང་ནི། །དགེ་འདུན་གྱི་ཡང་བསྟན་པའོ། །ཞེས་པས་སྟོང་ཉིད་སྙིང་རྗེའི་སྙིང་པོ་ཅན་སངས་རྒྱས་ཀྱི་བསྟན་པར་བཤད་དོ། །དེ་ལྟ་བུའི་བསྟན་པ་བཀའ་འམ་བསྟན་བཅོས་ཁྱད་པར་ཅན་དེ་ཡང་ཚིག་དང་དོན་གྱིས་གཉིས་སུ་དུས་ཏེ། མདོ་སྡེ་རྒྱན་ལས། ཇི་ལྟར་མནམ་ན་རབ་དཀུ་ལ། །མྱངས་ན་ཞིམ་པའི་སྨན་བཞིན་དུ། །ཆོས་ཀྱང་དེ་བཞིན་གཉིས་སུ་གནས། །དོན་དང་ཡི་གེར་ཤེས་པར་བྱ། །ཞེས་གསུངས་སོ། །དོན་ཕུན་སུམ་ཚོགས་པ་ནི། ཚངས་སྤྱོད་ཡོན་ཏན་བཞི་ལྡན་ལ་སོགས་པའོ། །ཡི་གེ་ཕུན་སུམ་ཚོགས་པ་ནི་མདོ་སྡེ་རྒྱན་ནས། བསྟན་དང་དེ་བཞིན་བཤད་པ་དང་། །ཐེག་དང་མཐུན་དང་བདེ་བ་དང་། །གྲགས་པ་དང་ནི་ཅི་རིགས་དང་། །ངེས་པར་འབྱུང་དང་མཐུན་པའི་ཕྱིར། །དེ་མདོར་སེམས་དཔའ་མཆོག་རྣམས་ཀྱི། །ཡི་གེ་ཕུན་ཚོགས་ཡིན་ཞེས་བྱ། །ཞེས་སོ། །རྣམ་པར་བཤད་པ་བསྡུ་བ་ལས་ཀྱང་མདོ་སྡེའི་ལུས་ནི་རྣམ་པ་གཉིས་ཏེ་ཚིག་འབྲུ་དང་དོན་ཏོ། །དེ་ལ་ཚིག་འབྲུ་ནི་གནས་ཡིན་ལ། དོན་ནི་དེ་ལ་གནས་པ་ཡིན་པར་རིག་པར་བྱའོ། །དེ་གཉིས་ཀ་བསྡུས་པ་ནི་ཤེས་པར་བྱ་བ་ཡིན་ནོ་ཞེས་པ་དང་། ཆོས་མཆོག་ཆུང་ངུར་ཡང་རབ་ཏུ་བྱེད་པའི་ལུས་ནི་རྣམ་པ་གཉིས་ཏེ་སྒྲ་དང་དོན་ཏོ། །ཞེས་སོ། །དེས་ན་བཤད་བྱའི་ཆོས་ནི་སངས་རྒྱས་ཀྱིས་གསུངས། སྡུད་པ་པོས་བསྡུས། མཁས་གྲུབ་རྣམས་ཀྱིས་བཀྲལ། ལོ་པཎ་སྐྱེས་

༄༅།        །མཆོག་རྣམས་ཀྱིས་བསྒྱུར། བླ་མ་བརྒྱུད་པའི་མན་ངག་དང་ལུང་དང་ལྡན་པའི་རྒྱུད་སྡེའམ་མདོ་སྡེ་བཀའ་འམ་བསྟན་བཅོས་མདོ་སྡེ་མངོན་པ་འདུལ་བའི་སྡེ་སྣོད་གང་ཡིན་པ་འདི་དང་འདི་འཆད་ཅེས་བྱའོ། །