༣. ང་རྒྱལ་མེད་པའི་གུས་པ།

གསུམ་ལ་སྦྱོར་དངོས་རྗེས་གསུམ་གྱི་དང་པོ་ལ་གསུམ་ལས། དང་པོ་ཆོས་སྒྲུབ་པའི་བསམ་པ་སྟེ། ཇི་སྐད་དུ། ཐོས་པའི་རྗེས་འཇུག་སྒྲུབ་པ་གཙོ་བོར་བྱེད། །ཅེས་སོ། །གཉིས་པ་གུས་པའི་སྤྱོད་ལམ་སྟེ། སྒོ་གསུམ་འདུད་པའོ། །སྐྱེས་རབས་སུ། རབ་ཏུ་དམའ་བའི་སྟན་ལ་འདུག །དུལ་བའི་དཔལ་ནི་རྣམ་པར་བསྐྱེད། །དགའ་དང་ལྡན་པའི་མིག་གིས་བལྟ། །ཚིག་གིས་བདུད་རྩི་འཐུང་བ་བཞིན། །གུས་པས་བསྐྱེད་དེ་རྩེ་གཅིག་བཏུད། །རབ་ཏུ་དང་ལ་དྲི་མེད་ཡིད། །ནད་པས་སྨན་པའི་ཚིག་མཉན་བཞིན། །རིམ་གྲོ་བསྐྱེད་དེ་ཆོས་ཉོན་ཅིག །ཅེས་སོ། །གསུམ་པ་རྐྱེན་ཚོགས་པ་དགའ་བ་སྒོམ་པ་སྟེ། གསང་བ་བསམ་གྱིས་མི་ཁྱབ་པར། །འཇིག་རྟེན་སངས་རྒྱས་འབྱུང་བ་བརྒྱ་ལམ་སྟེ། །མི་ཡི་ལུས་ནི་ཚེགས་ཀྱིས་རྙེད་པ་ཡིན། །ཀྱེ་མ་དད་པ་དང་ནི་ཆོས་ཉན་པ། །འདི་འདྲ་བསྐལ་བ་བརྒྱར་ཡང་རྙེད་པར་དཀའ། །ཞེས་པ་དང་། རྒྱ་ཆེ་རོལ་པར། མི་དང་སངས་རྒྱས་འབྱུང་རྙེད་དཀའ། །དད་པའང་ཤིན་ཏུ་རྙེད་པར་དཀའ། །མི་ཁོམ་བརྒྱད་

སྤངས་རྙེད་པར་དཀའ། །ཆོས་ཉན་པ་ནི་གཙོ་བོ་ཡིན། །སངས་རྒྱས་འབྱུང་དང་དལ་པ་དང་། །དད་དང་ཆོས་མཉན་དམ་པ་དང་། །དེ་དག་ཐམས་ཅད་ད་རྙེད་ཀྱིས། །བག་མེད་མ་ལུས་རྣམ་པར་སྤོངས། །གལ་ཏེ་བསྐལ་པ་ཁྲག་ཁྲིག་ཏུ། །ཆོས་ཐོས་མི་འགྱུར་སྲིད་པ་དེ། །ཁྱེད་ཀྱིས་དེ་རིང་རྙེད་ཟིན་གྱི། །བག་མེད་མ་ལུས་རྣམ་པར་སྤངས། །ཞེས་པ་དང་། རྣམ་བཤད་རིགས་པར། གསུང་དང་རྣ་བ་ཉིད་དང་ནི། །འདོད་དང་ཤེས་རབ་གེགས་མེད་པ། །ལྔ་ནི་གང་ཕྱིར་རྙེད་དཀའ་བས། །དེ་ཕྱིར་ཐུབ་པའི་གསུང་མཉན་བྱ། །ཞེས་པ་དང་། ལུས་ཅན་འདི་ནས་ཤི་ན་ཡང་། །དམ་ཆོས་དཀོན་མཆོག་འཕྲད་འགྱུར་རམ། །མི་འགྱུར་རྣ་བར་ཐོས་པ་དང་། །སུ་ཞིག་དམ་ཆོས་འཆད་འགྱུར་བ། །དེ་ནི་སུས་ཀྱང་མི་ཤེས་པས། །དེ་ཕྱིར་ཁྱེད་ཀྱིས་འབད་པ་ཡིས། །སྟོན་པའི་གསུང་ནི་མཉན་པར་བྱ། །ཞེས་པ་དང་། སྲིད་པ་ཡོད་ན་གདོན་མི་ཟ་བར་ཚེ་ཐོབ་ལ། །དེ་ཡང་ཕལ་ཆེར་དོན་མེད་པར་ནི་ཟད་པར་འགྱུར། །ལེགས་པར་གསུངས་པའང་ས་སྟེང་འགའ་ན་ལན་འགའ་ཞིག །ཨུ་དུམ་ཝ་རའི་མེ་ཏོག་བཞིན་དུ་སྣང་བ་ཡིན། །ཞེས་སོ། །གཉིས་པ་ནི། ཕར་ཕྱིན་དྲུག་ལྡན་ཏེ། སྒོ་གསུམ་ཆོས་ཀྱི་ཕྱིར་གཏོང་བ་དང་། ཉེས་སྤྱོད་སྡོམ་ཞིང་སྣོད་ཀྱི་སྐྱོན་རྣམས་སྤོང་བ་དང་། གནོད་པ་བཟོད་པ་དང་། ཉན་པ་ལ་སྤྲོ་བ་དང་། སྒྲ་དང་དོན་ལ་སེམས་རྩེ་གཅིག་པ་དང་། རབ་རྟོགས་པ་ལྷག་པ་རྙེད་པའམ། འབྲིང་སྒྲའི་རྗེས་སུ་འབྲང་པས་འཛིན་སྐྱོང་དོན་ལ་སྤྱོད་པའོ། །ཐ་མ་ལ་ཚད་མེད་དོ། །གསུམ་པ་རྗེས་ལ་ནོངས་པ་བཟོད་པར་གསོལ་ཞིང་དགེ་བ་བསྔོས་ལ་གཏང་རག་གི་ཕྱག་བྱའོ། །