(དང་པོ། སྤྱིར་བསྐལ་པ་གང་ལ་སངས་རྒྱས་བྱོན་ཚུལ།)

དང་པོ་ལ། སྤྱིར་བསྐལ་པ་ལ་སྒྲོན་མའི་བསྐལ་པ་དང་མུན་པའི་བསྐལ་པ་གཉིས་ལས་སྒྲོན་བསྐལ་ལ་སངས་རྒྱས་འབྱུང་གི་མུན་བསྐལ་ལ་སངས་རྒྱས་མི་འབྱུང་ངོ་། །སྒྲོན་བསྐལ་བསྐལ་པ་བཟང་པོ་ལ་སངས་རྒྱས་སྟོང་ངམ་སྟོང་དང་ལྔ། དེ་ནས་མུན་བསྐལ་བསྐལ་པ་ཆེན་པོ་དྲུག་ཅུ། དེ་ནས་སྒྲོན་བསྐལ་བསྐལ་པ་སྙན་པ་ཆེན་པོ་ལ་སངས་རྒྱས་ཁྲི། དེ་ནས་མུན་བསྐལ་བརྒྱད་ཁྲི་འདས་པ་དང་བསྐལ་པ་སྐར་མ་ལྟ་བུ་ཞེས་བྱ་བའི་སྒྲོན་བསྐལ་ལ་སངས་རྒྱས་བརྒྱད་ཁྲི༏ དེ་ནས་མུན་བསྐལ་སུམ་བརྒྱ། དེ་ནས་སྒྲོན་བསྐལ་ཡོན་ཏན་བཀོད་པ་ལ་སངས་རྒྱས་བརྒྱད་ཁྲི་བཞི་སྟོང་འབྱུང་བར་བསྐལ་བཟང་ནས་བཤད་དོ། །