(༡. སྙིང་རྗེ་པད་མ་དཀར་པོའི་རྗེས་སུ་འབྲངས་ཏེ་སངས་རྒྱས་སྟོང་དང་ལྔ་འབྱོན་ཚུལ།)

དང་པོ་ནི། སྔོན་བྱུང་བ་འདས་པའི་དུས་ན་འཇིག་རྟེན་གྱི་ཁམས་འདིར་བསྐལ་བ་ཆེན་པོ་འཛིན་པ་ཞེས་བྱ་བ་ལ་གླིང་བཞི་པ་འདི་ཉིད་དུ་འཁོར་ལོས་སྒྱུར་བའི་རྒྱལ་པོ་རྩིབས་ཀྱི་མུ་ཁྱུད་ཅེས་བྱ་བ་བྱུང་ངོ་། ༐དེ་ལ་སྲས་རྒྱལ་བུ་མིག་མི་འཛུམ་པ་ལ་སོགས་པ་སྟོང་དང་། རྒྱལ་ཕྲན་བརྒྱད་ཁྲི་བཞི་སྟོང་དང་བཅས་པ་མངའོ། །དེའི་མདུན་ན་འདོན་གྱི་གཙོ་བོ་བྲམ་ཟེ་རྒྱ་མཚོའི་རྡུལ་ཞེས་བྱ་བ་སྲས་བརྒྱད་ཅུ་དང་སློབ་མ་བྲམ་ཟེ་སྟོང་དང་བཅས་པ་ཡོད་དེ། དེའི་སྲས་བྲམ་ཟེ་རྒྱ་མཚོའི་སྙིང་པོ་ཞེས་བྱ་བ་མངོན་པར་རྫོགས་པར་སངས་རྒྱས་པའི་མཚན་རིན་ཆེན་སྙིང་པོ་ཞེས་བྱ་བར་གྱུར་ཏོ། །དེ་ནས་འཁོར་ལོས་

བསྒྱུར་བའི་རྒྱལ་པོ་རྩིབས་ཀྱི་མུ་ཁྱུད་ཀྱིས་ཟླ་བ་གསུམ་དུ་སངས་རྒྱས་ལ་བསྙེན་བཀུར་བྱས་སོ། །དེ་ནས་དེའི་སྲས་རྒྱལ་བུ་སྟོང་གིས་ཟླ་བ་གསུམ་གསུམ་བསྙེན་བཀུར་བྱས་ཏེ་ལོ་ཉིས་བརྒྱ་ལྔ་བཅུ་དང་ཟླ་བ་གསུམ་འདས་པ་དང་། ཡབ་བྲམ་ཟེ་རྒྱ་མཚོའི་རྡུལ་གྱིས་ལོ་བདུན་དུ་བསྙེན་བཀུར་བྱས་ཆོས་མཉན་ནས་རྨི་ལམ་བརྟགས་པས་རྒྱལ་པོ་རྩིབས་ཀྱི་མུ་ཁྱུད་ཀྱིས་སྲོག་ཆགས་མང་པོ་ཟ་བ་དང་སྟག་ལ་སོགས་པ་གཅན་གཟན་གདུག་པ་ཅན་གྱིས་རྒྱལ་པོ་དེ་ཡང་གསོད་པར་གྱུར་པ་དང་། བློན་པོ་ཁ་ཅིག་ཤིང་རྟ་བདེ་བ་ལ་ཞོན་ནས་ལམ་གོལ་བར་འདོང་བ་ལ་སོགས་པ་རྨིས་ཏེ་སངས་རྒྱས་ལ་ཞུས་པས། རྒྱལ་པོ་རྒྱལ་སྲིད་ལ་ཆགས་ཤིང་མི་དགེ་བ་སྤྱད་པས་ངན་སོང་དུ་འཁོར་བར་ལུང་བསྟན། བློན་པོ་དེ་དག་ཉན་རང་དུ་ལུང་བསྟན། གཞན་མང་པོ་བྱང་ཆུབ་ཆེན་པོར་འགྱུར་རོ་ཞེས་རྨི་ལྟས་བསྟན་ནོ། །དེ་ནས་བྲམ་ཟེ་རྒྱ་མཚོའི་རྡུལ་གྱིས་རྒྱལ་པོ་ཆེན་པོ་ལ། རྒྱལ་པོ་ཆེན་པོ། མིར་གྱུར་པ་ཡང་རྙེད་པར་དཀའ། སངས་རྒྱས་འཇིག་རྟེན་དུ་འབྱུང་བའང་རྙེད་པར་དཀའ། དམ་པའི་ཆོས་ཉན་པའང་རྙེད་པར་དཀའ་ཡི་བླ་ན་མེད་པའི་བྱང་ཆུབ་ཏུ་ཐུགས་སྐྱེད་ཅིག་ཅེས་བསྐུལ་བས། རྒྱལ་པོ་ན་རེ་ཁོ་བོ་བླ་ན་མེད་པའི་བྱང་ཆུབ་ཏུ་སངས་རྒྱ་བར་མི་འདོད་དོ་ཞེས་རྒྱུ་མཚན(འཁོར་ལོ་དབྱེ་ན)དང་བཅས་པ་སྨྲ་ཞིང་སེམས་བསྐྱེད་དུ་མ་འདོད་པ་ལ། བྲམ་ཟེས་ལན་གཉིས་ལན་གསུམ་གྱི་བར་དུ་བསྐུལ་བས། སངས་རྒྱས་པའི་སངས་རྒྱས་ཀྱི་ཞིང་བཟང་པོ་འབྱུང་ན་བསྐྱེད་དོ་ཞེས་ཁས་བླངས་སོ། །དེ་ནས་སངས་རྒྱས་རིན་ཆེན་སྙིང་པོས་མེ་ལོང་བཀོད་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་སངས་རྒྱས་ཀྱི་ཞིང་གི་བཀོད་པ་བསམ་གྱིས་མི་ཁྱབ་པ་བསྟན་ནས་གང་བཟང་བ་ལ་འདམ་དུ་བཅུག་པས་རྒྱལ་པོའང་དད་ནས་རང་གི་སངས་རྒྱས་ཀྱི་ཞིང་གཟུང་བའི་ཕྱིར་ཁབ་ཏུ་ཞུགས་ནས་སྐྱེ་བོའི་འགྲུལ་བཅད་དེ་སེམས་པར་བྱེད་དོ། །དེའི་རྒྱལ་

༄༅།        །བུ་སྟོང་ཡང་རང་རང་གི་སངས་རྒྱས་ཀྱི་ཞིང་གཟུང་བའི་ཕྱིར་ཁང་པར་ཞུགས་ཏེ་སེམས་པར་བྱེད་དོ། །དེའི་བར་ལ་བྲམ་ཟེ་རྒྱ་མཚོའི་རྡུལ་གྱིས་སྲོག་ཆགས་མང་པོ་དགེ་བ་རྒྱ་ཆེན་པོ་ལ་བཀོད་དོ། །དེ་ལྟར་ལོ་བདུན་འདས་པ་དང་། རྒྱལ་པོ་འཁོར་བཅས་ལྷས་བསྐུལ་ནས་ལངས་ཏེ་སངས་རྒྱས་ཀྱི་སྤྱན་སྔར་རང་རང་གི་སངས་རྒྱས་ཀྱི་ཞིང་བཟུང་ཞིང་སེམས་བསྐྱེད་པས། རྒྱལ་པོ་ཆེན་པོ་བདེ་བ་ཅན་གྱི་འཇིག་རྟེན་དུ་སངས་རྒྱས་ཚེ་དཔག་མེད་དུ་ལུང་བསྟན་ནོ། །བུ་ཐུ་བོ་མིག་མི་འཛུམ་ནི་ཚེ་དཔག་མེད་མྱ་ངན་ལས་འདས་ནས་སྲོད་ལ་ཆོས་ནུབ་པའི་ཐོ་རངས་མངོན་བར་སངས་རྒྱས་པའི་མཚན་འོད་ཟེར་ཀུན་ནས་འཕགས་པ་དཔལ་བརྩེགས་ཀྱི་རྒྱལ་པོ་ཞེས་པའོ། །དེ་མྱ་ངན་ལས་འདས་པའི་རྗེས་སུ་བུ་གཉིས་པ་ནི་མཐུ་ཆེན་ཐོབ་སྟེ་རབ་ཏུ་བརྟན་པ་ཡོན་ཏན་ནོར་བུ་བརྩེགས་པའི་རྒྱལ་པོ་ཞེས་པར་ལུང་བསྟན་ནོ། །བུ་གསུམ་པ་ནི་འཇམ་དཔལ་ཏེ། སངས་རྒྱས་ཀྱི་ཞིང་དག་པ་རྡུལ་བྲལ་ཡང་དག་བརྩེགས་སུ་སངས་རྒྱས་ཀུན་ཏུ་གཟིགས་སུ་ལུང་བསྟན་ནོ། །བུ་བཞི་པ་ནི། ཀུན་ཏུ་བཟང་པོར་རོ། །ལྔ་པ་ནི། པདྨ་དམ་པར་རོ། །དྲུག་པ་ནི་དབང་བསྒྱུར་དབང་ཕྱུག་རྒྱལ་པོར་རོ། །བདུན་པ་ནི་སྣང་བ་རྡུལ་བྲལ་སྤོ་མཐོ་དབང་ཕྱུག་རྒྱལ་པོར་རོ། །བརྒྱད་པ་ནི། ཡེ་ཤེས་རྡོ་རྗེ་རྣམ་པར་འགྱིང་པའི་དབང་ཕྱུག་ཏུའོ། །དེ་ནས་བར་སྐབས་འདིར་སྲོག་ཆགས་ཁྲི་སངས་རྒྱས་སུ་ལུང་བསྟན་ནས་དེ་ནས་བུ་དགུ་པ་མི་འཁྲུགས་པར་ལུང་བསྟན་ནོ། །བཅུ་པ་གསེར་གྱི་མེ་ཏོག་ཏུའོ། །བཅུ་གཅིག་པ་རྒྱལ་པོའི་ཟླ་བར་རོ། །དེ་བཞིན་དུ་རྒྱལ་བུ་སྟོང་ཚང་བར་ལུང་བསྟན་ནོ། །དེ་ནས་རྒྱལ་ཕྲན་བརྒྱད་ཁྲི་བཞི་སྟོང་དང་། སྲོག་ཆགས་དུང་ཕྱུར་ཕྲག་དགུ་དང་བྱེ་བ་ཕྲག་གཉིས་དང་། དེ་ནས་རྒྱ་མཚོའི་རྡུལ་གྱི་སྲས་བརྒྱད་ཅུ་དང་། དེ་ནས་བྲམ་ཟེ་རྒྱ་མཚོའི་རྡུལ་གྱི་སློབ་མ་བྲམ་ཟེ་སྟོང་ཕྲག་གཅིག་དང་། དེ་ནས་བྲམ་ཟེ་བྱེ་བ་ཕྲག་གསུམ་ལུང་བསྟན་

པས་རྣམ་པར་གཟིགས་དང་། གཙུག་ཏོར་ཅན་དང་། ཐམས་ཅད་སྐྱོབ་ཀྱི་བར་དུ་གྱུར་ཏོ། །དེ་ནས་བྲམ་ཟེ་རིག་བྱེད་ཀློག་པ་སྟོང་གི་དང་པོ་ལུང་བསྟན་ནོ། །དེའི་རྗེས་ལ་རིག་བྱེད་ཀློག་པ་སྟོང་གི་གཉིས་པ་སྐར་མ་སྐྱོང་ནི། བསྐལ་པ་བཟང་པོའི་སངས་རྒྱས་དང་པོ་འཁོར་བ་འཇིག་གོ །གསུམ་པ་ཏམྦུ་ར་ནི་གསེར་ཐུབ་ཏུ་ལུང་བསྟན་ནོ། །བཞི་པ་ཀུན་གྱིས་སྲུངས་ནི་སངས་རྒྱས་འོད་སྲུང་དུའོ། །ལྔ་པ་དྲི་མེད་འོད་ནི་བྱམས་པའོ། །དེ་བཞིན་དུ་དགུ་བརྒྱ་དགུ་བཅུ་གོ་དགུའི་བར་དུ་ལུང་བསྟན་ནོ། །དེ་ནས་བྲམ་ཟེ་རྒྱ་མཚོའི་རྡུལ་གྱིས་རིག་བྱེད་ཀློག་པ་སྟོང་གི་ཐ་མ་ལ་ཞིང་ཟུངས་སེམས་སྐྱེད་ཅིག་ཅེས་བསྒོས་པས་ཅུང་ཟད་བསམ་ལོང་ཡོད་དོ་ཞེས་ཟེར་ནས། དེ་ནས་རྒྱ་མཚོའི་རྡུལ་གྱི་བསྙེན་བཀུར་བ་ལྔས་ཞིང་བཟུང་སེམས་བསྐྱེད་པས་བསྐལ་པ་བཟང་པོའི་སངས་རྒྱས་སུ་ལུང་བསྟན་ནོ། །དེ་ནས་ཐ་མས་དེ་བཞིན་གཤེགས་པ་རིན་ཆེན་སྙིང་པོ་ལ་བསྐལ་པ་བཟང་པོ་དེ་ལ་ཐུབ་པ་ཉི་མ་དུ་མཆིས་པར་འགྱུར། །བཀའ་སྩལ་པ། ཐུབ་པ་ཉི་མ་སྟོང་དང་བཞི་འབྱུང(བཞི་པ་ཤཱཀ་ཐུབ་དང་བཅས་པས།)བར་འགྱུར་རོ། །གསོལ་པ། ཐུབ་པ་ཉི་མ་སྟོང་དང་བཞི་པོ་དེ་དག་གི་སྐུ་ཚེའི་ཚད་དང་གདུལ་བྱ་ལ་སོགས་པ་ཇི་ཙམ་པ་དེ་ཙམ་དུ་གྱུར་ཅིག་ཅེས་སྨོན་ལམ་བཏབ་པས་ལེགས་སོ་གནང་སྟེ་སངས་རྒྱས་གསལ་མཛད་ཅེས་པར་ལུང་བསྟན་ནོ། །དེ་ནས་བྲམ་ཟེ་རྒྱ་མཚོའི་རྡུལ་གྱིས་དགོངས་པར། རྒྱལ་པོ་ཆེན་པོ་ལ་སོགས་པ་སྲོག་ཆགས་མང་པོས་སེམས་བསྐྱེད་ཅིང་སངས་རྒྱས་ཀྱི་ཞིང་དག་པ་ཡང་བཟུང་ཟིན་གྱི། ད་ནི་བདག་གིས་སེམས་བསྐྱེད་པར་བྱའོ་སྙམ་དུ་དགོངས་ཏེ། ཞིང་མ་དག་པ་མི་མཇེད་ཀྱི་ཞིང་སེམས་ཅན་མ་རུངས་པ་མི་དགེ་བ་བཅུ་ཚང་བར་སྤྱོད་པ། མཚམས་མེད་པ་ལྔ་བྱེད་པ་ཤིན་ཏུ་གདུལ་དཀའ་བ་རྣམས་ལ་ཐུགས་རྗེས་ལྷག་པར་གཟིགས་ནས་སྨོན་ལམ་ཆེན་པོ་ལྔ་བརྒྱ་བཏབ་སྟེ་བདེན་པའི་སྟོབས་བརྗོད་པས། སངས་རྒྱས་རིན་ཆེན་སྙིང་པོས་ལེགས་སོ་

༄༅།         །གནང་སྟེ། བྱང་ཆུབ་སེམས་དཔའ་རྣམས་ཀྱི་བརྩོན་འགྲུས་བརྩམས་པ་ནི་བཞི་སྟེ། སངས་རྒྱས་ཀྱི་ཞིང་མ་དག་པར་སྨོན་པ་དང་ཞེས་པ་ལ་སོགས་པ་དང་། ཁྱོད་ནི་པད་མ་དཀར་པོ་ལྟ་བུའི་བྱང་ཆུབ་སེམས་དཔའོ། །གཞན་ནི་མེ་ཏོག་ལྟ་བུའི་བྱང་ཆུབ་སེམས་དཔའོ་ཞེས་བྱ་བ་ལ་སོགས་པ་བསྔགས་པ་བསམ་གྱི་མི་ཁྱབ་པ་བརྗོད་དེ་བསྐལ་པ་བཟང་པོའི་སངས་རྒྱས་བཞི་པ་ཤཱཀྱ་ཐུབ་པར་ལུང་བསྟན། ཕྱོགས་བཅུའི་སངས་རྒྱས་ཐམས་ཅད་ཀྱིས་སྐྱེས་བསྐུར། ལྷ་དང་མིའི་སྐྱེ་རྒུ་ཐམས་ཅད་ཀྱིས་མཆོད་དོ། །དེ་ནས་སངས་རྒྱས་རིན་ཆེན་སྙིང་པོ་མྱ་ངན་ལས་འདས་ན་སྐུ་གདུང་གི་མཆོད་རྟེན་བརྩིག་ཏེ(ལོ་བྱེ་བ་ཕྲག་སུམ་ཅུ་རྩ་དྲུག་ཏུ།)མཆོད་པའང་བྱས་སོ། །བྲམ་ཟེ་རྒྱ་མཚོའི་རྡུལ་ཡང་རབ་ཏུ་བྱུང་ནས་ལོ་ཉི་ཁྲིའི་བར་དུ་ཚངས་པར་སྤྱོད་དོ། །དེ་ལྟར་ན་བསྐལ་བཟང་འདི་ལ་སངས་རྒྱས་སྟོང་དང་ལྔ་འབྱུང་བར་ཤེས་པར་བྱའོ། །