(༡ སེམས་བསྐྱེད་ཚུལ།)

དང་པོ་སེམས་བསྐྱེད་ཚུལ་ནི། སྔོན་བྱུང་བ་འདས་པའི་དུས་སུ་རྒྱལ་པོ་གསལ་གྲགས་ཞེས་བྱ་བ་ཞིག་བྱུང་ངོ་། །དེའི་འཁོར་གླང་པོ་ཆེའི་འདུལ་སྦྱོང་ཤེས་པ་ཞིག་ལ་གླང་པོ་ཆེ་ཞིག་འདུལ་སྦྱོང་བྱེད་དུ་བཅུག་པས་དེས་གླང་པོ་ཆེའི་འདུལ་སྦྱོང་ལེགས་པར་བྱས་ཏེ་རྒྱལ་པོ་ལ་གསོལ་བ་དང་། རྒྱལ་པོ་ན་རེ། ཁྲིད་ཤོག་གསུངས་ནས་ཁྲིད་ཕྱིན་པ་དང་རྒྱལ་པོས་ཞོན་ཏེ་ཕྱིན་པས་གླང་པོ་ཆེ་བ་ལང་མོ་འདོད་ཆགས་སྐྱེས་པའི་དྲི་ཚོར་ཏེ་གཅོང་རོང་དང་ནགས་ཚལ་ཐམས་ཅད་ལ་ཐོགས་པ་མེད་པར་རྒྱུགས་པས་རྒྱལ་པོ་སྐྲག་སྟེ་གླང་རྫི་ལ་ཅི་བྱ་དྲིས་པ་དང་། གླང་རྫི་ན་རེ། ཤིང་གི་ཡལ་ག་ལ་འཇུས་ཤིག་ཟེར་ནས་འཇུས་སོ། །དེ་ནས་ལྷུང་སྟེ་བརྒྱལ་བ་ལ་གླང་རྫིས་བརྒྱལ་བ་སངས་པར་བྱས་པ་དང་རྒྱལ་པོ་ཁྲོས་ཏེ་གླང་པོ་ཆེ་མ་ཐུལ་བཞིན་དུ་ཐུལ་ཟེར་བ་འདི་བཙོན་རར་ཆུག་ཅིག་ཟེར་བ་དང་། གླང་རྫིས་སྨྲས་པ། བདག་གིས་གླང་པོ་ཆེའི་ལུས་ཐུལ་ཡང་སེམས་མ་ཐུལ་བ་ལགས་སོ་ཞེས་སྨྲས་སོ། །རྒྱལ་པོ་ན་རེ་ཁྱོད་ཀྱིས་ལུས་ཐུལ་བའི་རྒྱུ་མཚན་ཅི་ཡོད། དེས་སྨྲས་པ། ད་ཞག་བདུན་ནས་གླང་པོ་ཆེ་ལོག་ནས་འབྱུང་དེ་ནས་ཤེས་པར་འགྱུར་རོ། །ཞེས་སྨྲས་ནས་ཞག་བདུན་ལོན་པ་ན་གླང་པོ་ཆེ་བྱུང་བ་ལ་ལྕགས་ཀྱི་ཐོ་ལུམ་བསྲེགས་ཏེ་རབ་ཏུ་འབར་བ་མདུན་དུ་བཞག་ནས་གླང་རྫི་དེས་ཁ་ཁ་ཞེས་བརྗོད་པ་དང་གླང་པོ་ཆེ་དེ་མི་

༄༅།        །བཟོད་བཞིན་དུ་ཟ་བར་རྩོམ་མོ། །དེ་རྒྱལ་པོ་ལ་བསྟན་ཏེ་བདག་གིས་འདིའི་སེམས་མ་ཐུལ་ལོ་ཞེས་སྨྲས་པས་རྒྱལ་པོ་ཡིད་ཆེས་ཏེ་སེམས་བསྐྱེད་ཅིང་སྨོན་ལམ་བཏབ་པ། སྦྱིན་པ་འདི་ཡིས་ཤཱཀྱའི་རིགས་སྐྱེས་ཏེ། །ཡོན་ཏན་རིགས་རུས་མཉམ་པའི་སངས་རྒྱས་ཉིད་གྱུར་ཏེ། །ཚངས་པའི་བར་གྱི་ཉམ་ཐག་འཆིང་བ་རྣམས། །ཞི་བ་རྒྱ་ཆེན་འཇིགས་མེད་སྒྲོལ་བར་ཤོག །ཅེས་སྨོན་ལམ་བཏབ་སྟེ་སེམས་བསྐྱེད་དོ། །