(དང་པོ། སངས་རྒྱས་ཀྱི་རང་བཞིན་ངོས་གཟུང་བ།)

དང་པོ་ལ། སངས་རྒྱས་ཀྱི་ས་ཐམས་ཅད་རྟེན་སྐུ། བརྟེན་པ་ཡེ་ཤེས། མཛད་པ་ཕྲིན་ལས་གསུམ་དུ་འཆད་པ་དང་། སྐུ་གསུང་ཐུགས་ཡོན་ཏན་འཕྲིན་ལས་ལྔར་འཆད་པ་དང་། སྤངས་རྟོགས་འཕྲིན་ལས་གསུམ་དུ་འཆད་པ་དང་། ཕུན་སུམ་ཚོགས་པ་གཉིས་སམ་གསུམ་དུ་འཆད་པ་ལ་སོགས་པ་བཤད་ཚུལ་མང་པོ་གསུངས་ལ། སངས་རྒྱས་སའི་མདོ་ལས། ཤིན་ཏུ་འདུས་ཆོས་ལྔས་སངས་རྒྱས་ཀྱི་ས་བསྡུས་ཏེ། ལྔ་གང་ཞེ་ན། ཆོས་ཀྱི་དབྱིངས་རྣམ་པར་དག་པ་དང་མེ་ལོང་ལྟ་བུའི་ཡེ་ཤེས་དང་མཉམ་པ་ཉིད་ཀྱི་ཡེ་ཤེས་དང་སོ་སོར་རྟོག་པའི་ཡེ་ཤེས་དང་བྱ་བ་གྲུབ་པའི་ཡེ་ཤེས་སོ་ཞེས་གསུངས་ལ། སྐུ་གསུམ་མམ་བཞིར་ཡང་གསུངས་པས་འདི་ལ་ལྔ། སྐུ་གསུམ་གྱི་ངོ་བོ། ངེས་ཚིག །གྲངས་ངེས། གང་གི་ཡུལ་ཡིན་པ། དབྱེ་བ་དང་ལྔའོ། །