(༡. སྐུ་གསུམ་གྱི་ངོ་བོ།)

དང་པོ་ནི། རྒྱན་ལས། རང་བཞིན་ཆོས་རྫོགས་ལོངས་སྤྱོད་དང་། །སྤྲུལ་པ་དག་གིས་ཐ་དད་འཇུག །འདི་ནི་སངས་རྒྱས་རྣམས་དག་གི །ཆོས་དབྱིངས་རྣམ་པར་དག་པར་བཤད། །སངས་རྒྱས་རྣམས་ཀྱི་སྐུ་དབྱེ་བ། །རང་བཞིན་ལོངས་སྤྱོད་རྫོགས་པ་དང་། །གཞན་ནི་སྤྲུལ་པའི་སྐུ་ཡིན་ཏེ། །དང་པོ་གཉིས་པའི་རྟེན་ཡིན་ནོ། །ཞེས་

པའི་རང་བཞིན་གྱི་སྐུ་དང་ངོ་བོ་ཉིད་སྐུ་དང་ཆོས་ཀྱི་སྐུ་ཞེས་པ་རྣམ་གྲངས་ཡིན་ལ། ཆོས་ཀྱི་དབྱིངས་རྣམ་པར་དག་པ་དང་མེ་ལོང་ལྟ་བུའི་ཡེ་ཤེས་ནི་ཆོས་སྐུའོ། །རྒྱུ་བདག་གཞན་མཉམ་པར་བསྒོམས་པའི་འབྲས་བུ་མི་གནས་པའི་མྱང་འདས་ལ་ཞུགས་པ་མཉམ་ཉིད་ཡེ་ཤེས་དང་། ཤེས་བྱ་ཐམས་ཅད་ཐོགས་མེད་དུ་མཁྱེན་པའི་སོ་སོར་ཀུན་རྟོག་གི་ཡེ་ཤེས་གཉིས་ལོངས་སྐུའོ། །སྣ་ཚོགས་སུ་སྤྲུལ་ནས་སེམས་ཅན་གྱི་དོན་སྒྲུབ་པ་བྱ་གྲུབ་ཡེ་ཤེས་ནི་སྤྲུལ་པའི་སྐུའོ། །རྒྱན་ལས། སངས་རྒྱས་སྤྲུལ་པ་དཔག་མེད་པ། །སྤྲུལ་པའི་སྐུར་ནི་འདོད་པ་སྟེ། །དོན་གཉིས་ཕུན་སུམ་ཚོགས་པ་ནི། །རྣམ་པ་ཐམས་ཅད་གཉིས་ལ་གནས། །ཞེས་སོ། །