(ལྷུམས་སུ་ཞུགས་པའི་མཛད་པ།)

དེ་ནས་དགུན་འདས་ཏེ་དཔྱིད་ཟླ་ཐ་ཆུང་སྐར་མ་ས་ག་ལ་བབ་པའི་ཚེས་བཅོ་ལྔ་ཟླ་བ་ཉ་སྐར་མ་རྒྱལ་(མདོ་ན་འདི་ག་ཡོད་དེ་འགྲིག་པ་དཀའ་འགྱུར་འཆུགས་སམ་གསུངས།)གྱི་དུས་སུ་ཡུམ་གསོ་སྦྱོང་ལ་གནས་པའི་གློ་གཡས་པར་གླང་པོ་ཆེའི་རྣམ་པས་ལྷུམས་སུ་ཞུགས་ཏེ། གསེར་གྱི་དྲ་བས་

༄༅།        །ལེགས་གཡོགས་སྤྱི་གཙུག་དམར། །ཐལ་ཀར་མཆེ་བ་དྲུག་དང་རབ་ལྡན་ཞིང་། །དུང་དང་ཁ་བ་དངུལ་མདོག་ལྟ་བུ་ཡི། །གླང་པོའི་མཆོག་ཅིག་ཁོང་དུ་སོང་སྙམ་བྱེད། །དེ་ཞུགས་ནས་ནི་བདག་གི་ལུས་དང་སེམས། །སྔོན་ཆད་མཐོང་ཐོས་མྱོང་བར་མ་གྱུར་པའི། །གྱ་ནོམ་བདེ་བས་ཤིན་ཏུ་བདེར་འགྱུར་ཏེ། །བསམ་གཏན་མཉམ་པར་བཞག་པ་བཞིན་དུ་གྱུར། །ཅེས་སོ། །རྨི་ལྟས་དེ་བྲམ་ཟེ་རྣམས་ལ་དྲིས་པས་སྲས་ཁྱད་པར་ཅན་ཞིག་འབྱུང་སྟེ། ཁབ་ཏུ་བཞུགས་ན་འཁོར་ལོས་སྒྱུར་རྒྱལ་དང་། རབ་ཏུ་བྱུང་ན་སངས་རྒྱས་སུ་འགྱུར་བར་ལུང་བསྟན་ནོ། །དེ་ནས་ཡུམ་གྱི་ལྷུམས་རྒྱལ་སྲས་ཀྱི་ཉེ་བར་སྤྱད་པ་རིན་པོ་ཆེ་བཀོད་པ་ཞེས་པར་བྱིན་གྱིས་བརླབས་ནས། ཟླ་བ་བཅུར་ཟག་མེད་ཀྱི་བདེ་བ་ལ་ལོངས་སྤྱད་ནས་ལྷ་དང་མིའི་སྐྱེ་དགུ་ཁྲག་ཁྲིག་ཕྲག་སུམ་ཅུ་རྩ་དྲུག་སྨིན་པར་བྱས་སོ། །

(སྐུ་བལྟམས་པའི་མཛད་པ།)

དེ་ནས་མེ་ཏོག་ཁ་འབུས་ཤིང་རྒྱས་པར་གྱུར་པ་ལ་སོགས་པ་ལྟས་སུམ་ཅུ་རྩ་གཉིས་བྱུང་བ་དང་། ལུམྦི་ནིའི་ཚལ་དུ་ཡུམ་གྱི་ཕྱག་ཤིང་པླཀྵ་ལ་འཇུས་ཏེ། ཡུམ་གྱི་གློ་གཡས་པ་ནས་ཡུམ་ལ་གནོད་པ་མེད་པར་ན་བཟའ་དང་བཅས་ནས་བལྟམས་(ྋརྒྱ་ནག་ཏུ་རྒྱལ་རབས་བཞི་པ་ཙིའུ་དབང་ཞེས་པའི་དུས་སུ་ཤིང་ཕོ་སྟག་གི་ལ་ཟླ་བ་བཞི་པའི་ཚེས་བརྒྱད་ལ་རྒྱ་གར་དུ་བཅོམ་ལྡན་འདས་སྐུ་འཁྲུངས། དེའི་འོད་དང་ཆོ་འཕྲུལ་རྣམས་རྒྱ་ནག་ཏུ་མཐོང་བས་སངས་རྒྱས་བྱོན་པར་ཤེས། ལོ་ཉི་ཤུ་རྩ་དགུ་ཁབ་ཏུ་བཞུགས། ཡུམ་འདུལ་བ་ལ་སུམ་ཅུ་རྩ་གསུམ་དུ་བྱོན་པའི་བར་ལ་རྒྱལ་པོ་ཨུཏྲ་ཡ་ནས་མཽ་གལ་གྱི་བུ་ལ་བསྐུལ་ནས་དེས་ལྷ་ཡུལ་དུ་བཅོམ་ལྡན་འདས་ཀྱི་སྐུ་ཙན་དན་ལས་བཞེངས་ཏེ་ཡུལ་དུ་གདན་དྲངས་བཅོམ་ལྡན་འདས་ལྷ་ལས་བབས་ནས་བྱོན་པའི་ཚེ། སྐུ་དེས་བཞེངས་ནས་དབུ་དུད་དེ་ཕྱག་བྱས། སངས་རྒྱས་མྱ་ངན་ལས་འདས་ནས་ལོ་སྟོང་ནས་རྒྱ་ནག་ཏུ་འབྱོན་པར་ལུང་བསྟན་ནོ། །)པ་ན་ལྷས་མེ་ཏོག་གཏོར། ཚངས་པ་དང་བརྒྱ་བྱིན་གྱིས་ཀ་ཤི་ཀའི་རས་ཀྱིས་བླངས། དགའ་བོ་ཉེར་དགའ་གཉིས་ཀྱིས་སྐུ་ཁྲུས་གསོལ་བ་དང་། ཀཽ་ཤི་ཀ་ང་ཐོང་གསུང་སྟེ། ཤར་དུ་དགེ་བའི་ཆོས་ཐམས་ཅད་ཀྱི་སྔོན་དུ་འགྲོ་བར་བྱའོ། །ལྷོར་ལྷ་མི་རྣམས་ཀྱི་སྦྱིན་གནས་

སུ་འགྱུར་བར་བྱའོ། །ནུབ་ཏུ་ང་ནི་འཇིག་རྟེན་འདི་ན་ཕུལ་དུ་ཕྱིན་པའོ། །འདི་ནི་ངའི་སྐྱེ་བའི་ཐ་མ་སྟེ་སྐྱེ་བ་དང་རྒ་བ་དང་ན་བ་དང་འཆི་བ་མཐར་དབྱུང་ངོ་། །བྱང་དུ་སེམས་ཅན་ཐམས་ཅད་ཀྱི་ནང་ན་བླ་ན་མེད་པར་བྱའོ། །འོག་ཏུ་བདུད་དང་བདུད་ཀྱི་སྡེ་གཞོམ་པར་བྱའོ། །སེམས་ཅན་དམྱལ་བ་པ་ཐམས་ཅད་ཀྱི་སེམས་ཅན་དམྱལ་བའི་མེ་གསོད་པའི་ཆོས་ཀྱི་སྤྲིན་ཆེན་པོའི་ཆར་ཕབ་སྟེ་དེ་དག་བདེ་བས་ཚིམ་པར་བྱའོ། །སྟེང་དུ་སེམས་ཅན་ཐམས་ཅད་ཀྱིས་གྱེན་དུ་ལྟ་བར་འགྱུར་བར་བྱའོ་ཞེས་གསུངས་ཏེ། གོམ་པ་བདུན་བདུན་བོར་བ་དང་པད་མ་བྱུང་ངོ་། །དེའི་ཚེ་བཀྲ་ཤིས་པའི་ལྟས་ཕྱོགས་ཐམས་ཅད་སྣང་བས་གང་བ་དང་ཡུལ་ཆེན་པོ་བཞིར་རྒྱལ་ཕྲན་བཞི་བཙས། ཡ་རབས་ཀྱི་རིགས་ལྔ་བརྒྱ། གྲགས་ལྡན་མ་ལ་སོགས་པ་བརྒྱད་བརྒྱ། འདུན་པ་ལ་སོགས་པ་བྲན་ལྔ་བརྒྱ། བསྔགས་ལྡན་ལ་སོགས་རྟེའུ་ཁྲི། རྟེའུ་མོ་ཁྲི་དང་། བ་ལང་ཁྲི་ཡང་བཙས། གླིང་གི་དབུས་སུ་བྱང་ཆུབ་ཀྱི་ཤིང་སྐྱེས། སྐྱེད་ཚལ་ལྔ་བརྒྱ་དང་། གཏེར་ཁ་ལྔ་བརྒྱ་ཡང་བྱུང་སྟེ་རྒྱལ་བུ་དོན་ཐམས་ཅད་གྲུབ་པར་བཏགས་སོ། །དེ་ནས་རིགས་ཀྱི་ལྷ་མཆོད་པའི་སར་ཕྱིན་ཏེ་ཤཱཀྱ་མུ་ཅོར་སྨྲ་བ་རྣམས་ཐུབ་པ་བཞིན་འདུག་པས་ཤཱཀྱ་ཐུབ་པར་བཏགས། ཤཱཀྱ་འཕེལ་གྱིས་ཕྱག་བཙལ་བའམ་ལྷ་རྣམས་ཀྱིས་ཕྱག་བཙལ་བས་ལྷའི་ལྷར་བཏགས་སོ། །ཞག་བདུན་ནས་ཡུམ་ཚེའི་དུས་བྱས་ཏེ་སུམ་ཅུ་རྩ་གསུམ་དུ་སྐྱེས་སོ། །དེ་བྱང་ཆུབ་སེམས་དཔས་ནོངས་པ་མིན་གྱི་སྲས་མངོན་པར་འབྱུང་བ་གཟིགས་ན་ཡུམ་སྙིང་འགས་པར་འགྱུར་བས་ཚེ་ཚད་མཐར་ཐུག་པའི་ཕྱིར་རོ། །མདོ་གཞན་ནས་རི་བོ་ཀུན་འཛིན་ལ་གནས་པའི་དྲང་སྲོང་ཉོན་མོངས་མེད་ཀྱི་ཚ་བོ་མེས་བྱིན་གྱི་བུས་ཤེས་ཏེ། མཁན་པོ། འདིར་ནི་ཉི་མ་ཐམས་ཅད་དག །གཅིག་ཅར་བྱུང་བར་གྱུར་ཏམ་ཅི། །འདི་ལྟར་རི་ནི་ཕུག་བཅས་པ། །འོད་གཅིག་གིས་ནི་གསལ་བར་གྱུར། །ཞེས་དྲིས་པས་ལན་དུ། ཉི་མའི་འོད་ནི་རྒྱུན་དུ་རྣོ། །བུ་གཅིག་སྣང་བའི་འོད་

༄༅།        །འདི་དག །ཡན་ལག་རེག་ན་འོད་བསིལ་བས། །ངེས་པར་ཐུབ་པ་དེ་ཡི་འོད། །ཅེས་སོ། །དེ་ནས་ཉོན་མོངས་མེད་སེར་སྐྱར་ཞུགས་ཏེ། རྒྱལ་ཆེན་བདག་ཅག་འདིར་མཆིས་པ། །ཁྱེད་ཀྱི་སྲས་ནི་མཐོང་བར་འཚལ། །འཇིག་རྟེན་གཙོ་བོ་རྣམ་འདྲེན་པ། །ཐུབ་པ་དེ་ནི་བལྟ་བར་འཚལ། །ཞེས་པ་དང་། མནལ་དུ་སོང་བ་ནའང་སྤྱན་གཟིགས་པས་སྨྲས་པ། རིགས་དང་ལྡན་པའི་རྟ་རྣམས་ནི། །མཚན་མོའི་བཞི་ཆ་ཉལ་བ་ལྟར། །དགོས་པ་དོན་གཉེར་རྣམས་ཀྱི་གཉིད། །མིག་ལ་ཡུན་རིང་མི་གནས་སོ། །ཞེས་སོ། །མཚན་མཁན་དག་འཁོར་ལོས་བསྒྱུར་བར་ལུང་སྟོན་ན་ཅིར་འགྱུར། ས་བདག་རྟོག་པ་པོ་རྣམས་བློ་འཁྲུལ་ཏེ། །རྩོད་པའི་དུས་སུ་འཁོར་ལོས་བསྒྱུར་མི་འབྱུང་། །བསོད་ནམས་མཆོག་གི་ཆོས་ཀྱི་མཛོད་འདི་ནི། །ཉེས་ལས་རྣམ་བརྒལ་སངས་རྒྱས་ཉིད་དུ་འགྱུར། །ཞེས་སོ། །གཞོན་ནུ་སྐྱེ་དགུའི་བདག་མོ་ལ་གཏད་དེ། པང་ན་འཚོ་བའི་མ་མ་བརྒྱད། ནུ་མ་སྣུན་པ་བརྒྱད། རྩེ་བའི་མ་མ་བརྒྱད། དྲི་མ་འཕྱི་བ་བརྒྱད་དེ་སོ་གཉིས་ལ་གཏད་དེ་བསྐྱེད་བསྲིངས་སོ། །དེ་ལྟ་བུའི་ཆོ་འཕྲུལ་དེ་རི་བོ་གངས་ཅན་ན་གནས་པ་དྲང་སྲོང་ནག་པོ་ཞེས་པ་མངོན་ཤེས་ལྔ་དང་ལྡན་པ་ཞིག་གིས་ཚོར་ནས་སྣག་ཚ་མེས་བྱིན་དང་བཅས་པས་རྫུ་འཕྲུལ་གྱིས་སེར་སྐྱའི་གྲོང་ཁྱེར་དུ་ཕྱིན་ཏེ་དེའི་མཚན་བལྟས་པས་དེ་ཇི་ལྟར་འགྱུར་བ་ཤེས་ཏེ་ངོ་མཚར་དང་མྱ་ངན་སྐྱེས་ནས་དེའི་ཞབས་ལ་ཕྱག་འཚལ་ཞིང་བསྐོར་བ་བྱས་ནས་གདོང་མཆི་མ་དང་བཅས་ཏེ་ལུང་བསྟན་པ། བཙས་གྱུར་གཞོན་ནུ་འདི་ཡི་མཚན་ལྟས་ནི། །སུམ་ཅུ་རྩ་གཉིས་མཚན་གྱིས་བརྒྱན་པར་མཐོང་། །འདི་ནི་གཉིས་སུ་འགྱུར་གྱི་གཞན་དུ་མིན། །ཁྱིམ་ན་གནས་ན་འཁོར་ལོས་བསྒྱུར་རྒྱལ་ལམ། །ཁྱིམ་ནས་ཁྱིམ་མེད་རབ་ཏུ་བྱུང་གྱུར་ན། །འདྲེན་པ་གཞན་གྱི་དྲིང་ལ་མི་འཇོག་པར། །འཇིག་རྟེན་འདིར་ནི་མངོན་རྫོགས་བྱང་

ཆུབ་འགྱུར། །གསང་བའི་གནས་མཆོག་སྦུབས་སུ་ནུབ་པ་དང་། །སྤྱི་གཙུག་འགྲོ་བ་ཀུན་གྱིས་མི་མཐོང་བས། །ཁབ་ཏུའང་བཞུགས་པར་མི་འགྱུར་ཞེས་ལུང་ཡང་བསྟན། །ཞེས་སོ། །འོ་ན་ཁྱོད་ངུ་བའི་རྒྱུ་ཅི། ལྷ་བདག་ནི་ཆོས་མཛོད་སྐྱེས་བུ་མཆོག་འདི་དང་༏ ༏ཕྲད་ནས་དོན་མ་གྲུབ་པར་འཆི་འགྱུར་ཏེ། །ཞི་བ་མ་ཐོབ་རང་གི་ཉེས་མཐོང་ནས། །ཡིད་ལ་གདུང་བ་སྐྱེས་ནས་ངུ་བ་ཡིན། །ཞེས་སོ། །དེ་ནས་རང་གི་གནས་སུ་སོང་ངོ་། །