(ངེས་པར་འབྱུང་བའི་མཛད་པ།)

དེ་ནས་ལྷ་ཀླུ་ཁ་ཅིག །མ་ལ། སྐྱེས་བུ་དམ་པ་འདི་ནི་བཙུན་མོའི་འཁོར་དུ་ཡུན་རིང་དུ་བཞུགས་ན། སྣོད་དུ་གྱུར་པའི་སེམས་ཅན་རྣམས་མེད་པར་འགྱུར་ཞིང་དེ་ནས་མངོན་པར་འབྱུང་བར་མི་འགྱུར་གྲང་སྙམ་ཞིང་། གུས་པ་དང་བཅས་པས་མངོན་པར་འབྱུང་ཞིང་སངས་རྒྱས་ནས་ཆོས་གསུང་སྙམ་ཞིང་འདུག་གོ །སངས་རྒྱས་བཅོམ་ལྡན་འདས་རྣམས་ཀྱིས་ཀྱང་། སིལ་སྙན་གྱི་སྒྲ་ལས་སྐུལ་བའི་ཚིགས་སུ་བཅད་པ། སྡུག་བསྔལ་བརྒྱས་གང་སེམས་ཅན་མཐོང་ནས་ནི། །འགྲོ་བའི་མགོན་དང་སྐྱབས་དང་གནས་གྱུར་ཅིང་། །ཕན་བྱེད་མགོན་དང་དཔུང་གཉེན་གྱུར་ཅིག་ཅེས། །ཁྱོད་ཀྱིས་སྔོན་ནི་སྨོན་ལམ་དེ་སྐད་བཏབ། །དགེ་བ་དཔའ་བོ་སྔོན་གྱི་སྤྱོད་པ་དང་། །འགྲོ་ཕན་བྱ་ཞེས་སྨོན་བཏབ་དྲན་པར་བྱོས། །འདི་ནི་ཁྱོད་ཀྱི་དུས་དང་ཚོད་ཡིན་གྱི། །དྲང་སྲོང་མཆོག་རབ་ཁྱིམ་ནས་འབྱུང་བར་བྱོས། །ཞེས་སོགས་ཀྱིས་བསྐུལ་ཞིང་། བཙུན་མོ་རྣམས་ཀྱིས་རོལ་མོའི་སྒྲ་ལས་ཀྱང་སྔོན་གྱི་སྐྱེས་རབས་དག་གླེང་སྟེ། །སྲིད་གསུམ་རྒ་དང་ནད་ཀྱི་སྡུག་བསྔལ་འབར། །འཆི་མེ་རབ་འབར་འདི་ནི་མགོན་

༄༅།        །མེད་པ། །སྲིད་ལས་འབྱུང་ལ་འགྲོ་བ་རྟག་ཏུ་རྨོངས། །བུམ་པར་ཆུད་པའི་བུང་བ་འཁོར་བ་བཞིན། །སྲིད་གསུམ་མི་རྟག་སྟོན་ཀའི་སྤྲིན་དང་འདྲ། །འགྲོ་བའི་སྐྱེ་འཆི་གར་ལ་བལྟ་དང་མཚུངས། །འགྲོ་བའི་ཚེ་སྲོག་ནམ་མཁའི་གློག་འདྲ་སྟེ། །རི་གཟར་འབབ་ཆུ་ལྟ་བུར་མྱུར་མགྱོགས་འགྲོ། ཞེས་སོགས་ནས། སྔོན་གྱི་སྤྱོད་དེ་རྗེས་སུ་དྲན་གྱིས་ལ། །གཏི་མུག་མ་རིག་མུན་པས་བསྒྲིབས་པ་ཡི། །འགྲོ་ལ་ཤེས་རབ་དམ་པ་འོད་བཟང་བ། །ཆོས་མིག་དྲི་མེད་ཉོན་མོངས་མེད་པ་བྱིན། །ཞེས་པའི་སྒྲ་ཐོས་ནས་བྱང་ཆུབ་སེམས་དཔའ་ཡང་རྒྱགས་པའི་སེམས་སྤངས་ཏེ་བྱང་ཆུབ་ཏུ་སེམས་བཏང་ངོ་། །ལྷའི་བུ་འབུམ་ཕྲག་སུམ་ཅུ་རྩ་གཉིས་ཀྱིས་ཀྱང་། འཆི་འཕོ་བ་ནི་ཤིན་ཏུ་བསྟན། །སྐྱེས་བུ་སེང་གེས་ཚེ་ཡང་བསྟན། །བཙུན་མོའི་འཁོར་ཀྱང་བསྟན་པ་མཛད། །ཁྱོད་ཀྱིས་འཇིག་རྟེན་རྗེས་མཐུན་མཛད། །འཇིག་རྟེན་ཆོས་ནི་རྗེས་ཐོབ་པས། །ལྷ་མི་མང་པོ་ཡོངས་སྨིན་མཛད། །མངོན་པར་འབྱུང་བའི་བློ་དགོངས་པའི། །དེ་ཡི་དུས་ལ་དེང་བབས་སོ། །ཞེས་སོགས་ནས། དབྱངས་སྙན་ཅིང་ནི་དབྱངས་འཇམ་པ། །མར་མེ་མཛད་ཀྱིས་ལུང་བསྟན་དགོངས། །ཡང་དག་དེ་བཞིན་མ་ནོར་བར། །རྒྱལ་བའི་སྒྲ་དབྱངས་བསྒྲག་ཏུ་གསོལ། །ཞེས་བསྐུལ་ལོ། །དེའི་ཚེ་རྒྱལ་པོའི་རྨི་ལམ་དུ་བྱང་ཆུབ་སེམས་དཔའ་རབ་ཏུ་བྱུང་བ་རྨིས་ཏེ་ཉུག་རུམ་ལ་བྱང་ཆུབ་སེམས་དཔའ་འདུག་གམ་དྲིས་པས་འདུག་ཟེར་རོ། །དེ་ནས་རྒྱལ་པོས་བྱང་ཆུབ་སེམས་དཔའ་རབ་ཏུ་བྱུང་བའི་ལྟས་སོ་སྙམ་སྟེ། བྱང་ཆུབ་སེམས་དཔའ་ཆགས་པར་བྱ་བའི་ཕྱིར་དཔྱིད་བསིལ། དབྱར་རན། དགུན་དྲོ་བའི་ཁང་བཟང་གསུམ། རེ་རེའང་གྲུ་སྐས་མི་ལྔ་བརྒྱ་ལྔ་བརྒྱས་འཛུགས་ཤིང་འབེབས་པའི་ཚེ་གཞོན་ནུ་སུས་ཀྱང་མ་ཚོར་བར་མངོན་པར་འབྱུང་དུ་འོང་ངོ་ཞེས་པའི་སྒྲ་དཔག་ཚད་

ཕྱེད་དུ་བྱུང་ངོ་། །ལྟས་མཁན་ཀུན་གྱིས་ཀྱང་བཀྲ་ཤིས་ཀྱི་ཆབ་སྒོ་ནས་མངོན་པར་འབྱུང་བར་འགྱུར་རོ་ཞེས་བསྟན་ནོ། །དེ་ནས་རྒྱལ་པོས་སྒོ་འཕར་ཆེན་པོ་སྒྲ་དཔག་ཚད་ཕྱེད་དུ་གྲགས་པ་མི་ལྔ་བརྒྱ་ལྔ་བརྒྱས་འབྱེད་ཅིང་གཅོད་པ་བྱས་སོ། །དེ་ནས་བྱང་ཆུབ་སེམས་དཔས་འདུན་པ་ལ་སྐྱེད་མོས་ཚལ་དུ་འགྲོ་བའི་ཤིང་རྟ་སྦྱོར་ཅིག །འདུན་པས་ཀྱང་རྒྱལ་པོ་ལ་དོན་དེ་གསོལ་ཏེ། རྒྱལ་པོས་གཞོན་ནུའི་ཡིད་དུ་མི་འོང་བ་མི་མཐོང་བར་བྱས་ཏེ་ཉམས་དགའ་བར་བྱས་སོ། །དེ་ནས་བྱང་ཆུབ་སེམས་དཔའ་ཤར་སྒོ་ནས་ཐོན་པ་དང་། ཉིད་ཀྱི་མཐུས་ལྷས་སྤྲུལ་པའི་རྒས་པའི་སྡུག་བསྔལ་གྱིས་ཉེན་པ་གཟིགས་ཏེ། འདུན་པ་ལ། ཁ་ལོ་བསྒྱུར་བ་མི་རིད་ཉམ་ཆུང་ཞིང་། །ཤ་ཁྲག་སྐམ་ལ་རྒྱུས་ལྤགས་ཉི་ཚེས་དཀྲིས། །མགོ་དཀར་སོ་རྣལ་ལུས་ནི་རབ་བསྐམས་ལ། །འཁར་བ་བརྟེན་ཅིང་མི་བདེ་འཁྱོར་འགྲོས་སུ། །དེས་སྨྲས་པ། ལྷ་གཅིག་མི་འདི་རྒ་བའི་ཟིལ་གྱིས་ནོན། །དབང་པོ་ཉམས་ཤིང་སྡུག་བསྔལ་བརྩོན་སྟོབས་ཉམས། །གཉེན་གྱི་སྐྱེ་བོས་བརྙས་ཤིང་མགོན་མེད་གྱུར། །དོན་བགྱིད་མི་ནུས་ནགས་ཁྲོད་ཤིང་ལྟར་བོར། །བྱང་ཆུབ་སེམས་དཔས་སྨྲས་པ། འདི་ཡི་ཆོས་འདི་རིགས་ཀྱི་ཡིན་ནམ་འོན་ཏམ་ཅི། །འགྲོ་བ་འདི་ཀུན་ལ་ཡང་འདི་སྲིད་དེ་སྨྲོས་ཤིག །ཚིག་འདི་ཡང་དག་ཇི་བཞིན་མྱུར་དུ་སྨྲོས་ཤིག་དང་། །ཐོས་ནས་དེ་བཞིན་དོན་ལ་འདིར་ནི་ཚུལ་བཞིན་བསམ། །དེས་སྨྲས་པ། ལྷ་འདི་རིགས་ཆོས་མ་ཡིན་ཡུལ་འཁོར་ཆོས་མ་ལགས། །སྐྱེ་བོ་ཀུན་གྱི་དར་ལ་བབས་པ་རྒ་བས་འཇོམས། །ཁྱེད་ཀྱི་ཡབ་དང་ཡུམ་དང་ཉེ་དུ་གཉེན་ཚོགས་ཀྱང་། །རྒ་ལས་མ་ཐར་འབྲོས་པའི་ཐབས་ནི་གཞན་མ་མཆིས། །བྱང་ཆུབ་སེམས་དཔས་སྨྲས་པ། ཁ་ལོ་སྒྱུར་བ་བྱིས་པའི་སྐྱེ་བོ་མི་མཁས་པའི། །བློ་ངན་གཞོན་པས་རྒྱགས་ཤིང་མྱོས་པས་རྒ་མ་མཐོང་། །ང་ནི་སླར་འགྲོ་ང་ཡི་ཤིང་རྟ་མྱུར་དུ་སྒྱུར། །ང་ཡང་རྒ་ལ་གནས་པས་རྩེ་དགས་ཅི་ཞིག་བྱ། །ཞེས་གསུངས་ནས་ནང་དུ་

༄༅།        །ལོག་གོ །ཡང་ལྷོ་སྒོར་ཐོན་པས་ན་བ་གཟིགས་ཏེ་སྨྲས་པ། ཁ་ལོ་སྒྱུར་བ་མི་རྩུབ་ལུས་ཀྱི་མདོག་ངན་ལ། །དབང་པོ་ཐམས་ཅད་ཉམས་ཤིང་དབུགས་དབྱུང་རབ་ཏུ་དཀའ། །ཡན་ལག་ཀུན་བསྐམས་ལྟོ་བས་དཀྲུགས་ཤིང་ཉམ་ཐག་གྱུར། །རང་གི་གཅིན་རྟུག་སྨད་པའི་གནས་ན་འདུག་འདི་སུ། །དེས་སྨྲས་པ། ལྷ་གཅིག་མི་འདི་ཤིན་ཏུ་ནད་ཀྱིས་བཏབ་པ་སྟེ། །ནད་ཀྱི་འཇིགས་པ་ཉེ་བར་མཆིས་པས་འགུམ་ལ་ཐུག །ནད་མེད་གཟེ་བརྗིད་མ་མཆིས་སྟོབས་ཀྱང་རྣམ་པར་ཉམས། །མགོན་དང་སྐྱབས་དང་གླིང་དང་དཔུང་གཉེན་མ་མཆིས་ལགས། །བྱང་ཆུབ་སེམས་དཔས་སྨྲས་པ། ནད་མེད་པ་ཡང་རྨི་ལམ་ན་ནི་རྩེ་དང་མཚུངས། །ནད་ཀྱིས་འཇིགས་པ་འདི་ལྟ་ཤིན་ཏུ་མི་བཟད་པ། །སྐྱེས་བུ་མཁས་པས་ནད་འདི་མཐོང་ནས་ཇི་ལྟ་པུར། །རྩེ་ལ་དགའ་དང་སྡུག་པའི་འདུ་ཤེས་བསྐྱེད་པར་འགྱུར། །ཡང་ནུབ་ཏུ་ཤི་བ་གཟིགས་ཏེ་སྨྲས་པ། ཁ་ལོ་སྒྱུར་བ་མི་འདི་ཁྱོགས་ལ་བླངས་ནས་ནི། །མི་དག་སྐྲ་བཤིག་མགོ་ལ་ས་ཡིས་འཐོར་བྱེད་ཅིང་། །སྣ་ཚོགས་དག་གི་ཚིག་ནི་བརྗོད་ལ་བྲང་བརྡུང་བས། །ཀུན་ནས་བསྐོར་བ་བྱས་ཏེ་འཁྱེར་བ་སུ་ཞིག་ཡིན། །དེས་སྨྲས་པ། ལྷ་གཅིག་མི་འདི་འཛམ་བུ་གླིང་དུ་གུམ་པ་སྟེ། །སླན་ཆད་ཕ་མ་མཆིས་བྲང་བུ་རྣམས་མཐོང་མི་འགྱུར། །ལོངས་སྤྱོད་ཁྱིམ་དང་མཛའ་གཉེན་ཚོགས་རྣམས་སྤངས་ནས་ནི༏ ༏འཇིག་རྟེན་ཕ་རོལ་མཆིས་ཏེ་སླན་ཆད་གཉེན་མི་མཐོང་། །བྱང་ཆུབ་སེམས་དཔས་སྨྲས་པ། རྒ་བས་གནོད་པར་འགྱུར་བའི་གཞོན་པ་ཅིར་མི་རུང་། །སྣ་ཚོགས་ནད་ཀྱིས་གནོད་འགྱུར་ནད་མེད་ཅིར་མི་རུང་། །རིང་དུ་མི་གནས་གསོན་པ་མཁས་ལ་ཅིར་མི་རུང་། །དགའ་ལ་ཆགས་པ་སྐྱེས་བུ་མཁས་ལ་ཅིར་མི་རུང་། །གལ་ཏེ་རྒ་མེད་ན་མེད་འཆི་བ་མེད་གྱུར་ཀྱང་། །འོན་ཀྱང་ཕུང་པོ་ལྔ་འཛིན་སྡུག་བསྔལ་ཆེ་ཡིན་ན། །རྒ་ན་འཆི་བ་རྟག་ཏུ་འབྲང་བ་སྨོས་ཅི་དགོས། །ལེགས་པར་སླར་ལྡོག་རབ་ཏུ་ཐར་

པར་བྱ་བར་བསམ། །ཡང་བྱང་སྒོར་དགེ་སློང་གཟིགས་ཏེ་སྨྲས་པ། ཁ་ལོ་སྒྱུར་བ་སྐྱེས་བུ་སེམས་ཞི་རབ་ཞི་ཞིང་། །མིག་ཕབ་འགྲོ་ལ་གཉའ་ཤིང་གང་ཙམ་ལྟ་བྱེད་ཅིང་། །ངུར་སྨྲིག་གོས་གྱོན་ཤིན་ཏུ་རབ་ཏུ་ཞི་བར་སྤྱོད། །ལྷུང་བཟེད་ཐོགས་ནས་མི་རྒོད་མ་ཁེངས་སུ་ཞིག་ཡིན། །དེས་སྨྲས་པ། ལྷ་གཅིག་མི་འདི་དགེ་སློང་ཞེས་ནི་བགྱི་བ་ལགས། །འདོད་པའི་དགའ་བ་སྤངས་ཤིང་ཤིན་ཏུ་དུལ་བར་སྤྱོད། །བདག་ཉིད་ཞི་བ་ཚོལ་ཞིང་རབ་ཏུ་བྱུང་བར་གྱུར། །འདོད་ཆགས་ཞེ་སྡང་བྲལ་བར་བསོད་སྙོམས་སྤྱོད་ཅིང་རྒྱུ། །བྱང་ཆུབ་སེམས་དཔས་སྨྲས་པ། འདི་ནི་དགེ་བར་ལེགས་སྨྲས་ང་ཡང་འདོད་པ་སྟེ། །རབ་ཏུ་བྱུང་བ་མཁས་པ་རྣམས་ཀྱིས་རྟག་ཏུ་བསྔགས། །དེ་ནི་བདག་ལ་ཕན་ཞིང་སེམས་ཅན་གཞན་ལའང་ཕན། །འཚོ་བ་བདེ་ཞིང་ཉམས་མཐུན་འཆི་མེད་འབྲས་བུར་འགྱུར། །དེ་ནས་བྱང་ཆུབ་སེམས་དཔའ་ནང་དུ་ཞུགས་སོ། །རྒྱལ་པོས་ཀྱང་དེ་དག་མཐོང་ཐོས་པས་བསྲུང་བའི་ཕྱིར་ར་བ་དང་འོབས་དང་སྒོ་བརྟན་པོ་བཙུགས། གྲོང་ཁྱེར་གྱི་བཞི་མདོར་སྲུང་བའི་དཔུང་བཞག །བཙུན་མོ་རྣམས་ཀྱང་གླུ་དབྱངས་དང་རྩེ་དགའ་སྦྱོར་དུ་བཅུག་གོ །དེའི་ཚེ་བྱང་ཆུབ་སེམས་དཔའ་རབ་ཏུ་འབྱུང་བའི་ལྟས་སུ་བྱ་སྐད་མི་འབྱིན། པད་མ་རྙིང་། ཤིང་ལ་མེ་ཏོག་མི་འཆགས། གླིང་བུ་དང་པི་ཝང་རྒྱུད་ཆད། རྫ་རྔ་ལ་སོགས་བརྡུངས་ཀྱང་སྒྲ་མེད་པར་གྱུར་པས་རྒྱལ་པོ་ཡང་སེམས་ཁོང་དུ་ཆུད་ཅིང་འདུག་གོ །ས་འཚོ་མ་ལ་ཡང་རྨི་ལམ་དུ་ས་གཡོས་པ་ལ་སོགས་པ་རྨིས་སོ། །བྱང་ཆུབ་སེམས་དཔའི་རྨི་ལམ་དུ་རྐང་ལག་གིས་རྒྱ་མཚོ་དཀྲུགས་པ་དང་། ས་མལ་ཆར་གྱུར། རི་རབ་སྔས་སུ་བཅུག །འོད་ཀྱིས་མུན་པ་བསལ། ས་ལས་གདུགས་ཤིག་བྱུང་བས་འཇིག་རྟེན་གསུམ་ཁྱབ། སྲོག་ཆགས་དཀར་ནག་བཞི་དང་བྱ་ཁ་དོག་བཞི་པ་འོངས་ནས་ཁ་དོག་གཅིག་ཏུ་གྱུར་པ་དང་། ངན་སྐྱུག་གི་རི་ལ་འཛེགས་ཀྱང་མ་གོས་པ་དང་། ཆུས་ཁྱེར་བ་བཏོན་པ་

༄༅།        །དང་། ནད་པ་གསོས་པ་དང་། རི་རབ་ཀྱི་ངོས་ལ་སེང་གེའི་ཁྲི་ལ་འདུག་པ་ལ་ལྷ་རྣམས་ཀྱིས་ཕྱག་འཚལ་བ་རྨིས་སོ། །དེ་ནས་བྱང་ཆུབ་སེམས་དཔས་ཕས་མ་གནང་བར་རབ་ཏུ་འབྱུང་བར་མི་རིགས་སོ་སྙམ་སྟེ་ཕའི་དྲུང་དུ་སོང་སྟེ་སྨྲས་པ། བདག་མངོན་པར་འབྱུང་བའི་དུས་ལ་བབ་ཀྱི་གེགས་དང་མི་དགྱེས་པ་མ་མཛད་ཅིག ། རྒྱལ་པོས། ཁྱོད་ཅི་འདོད་པའི་མཆོག་སྦྱིན་གྱི་ཁབ་ཏུ་བཞུགས་ཤིག །བྱང་ཆུབ་སེམས་དཔས་སྨྲས་པ། རྒ་ནད་འཆི་རྒུད་བཞི་མེད་པ་སྩོལ་ཅིག །དེས་སྨྲས་པ། དེ་སྦྱིན་པའི་མཐུ་མེད་དོ། །གཞན་སློངས་ཤིག །བྱང་ཆུབ་སེམས་དཔས་སྨྲས་པ། རྒ་ན་འཆི་བའི་འཇིགས་དང་རྒུད་པར་མི་འགྱུར་བ། །ལྷ་གཅིག་གལ་ཏེ་མཆོག་བཞི་འདི་དག་མི་སྩོལ་ན། །གཞན་ཡང་མཆོག་ཅིག་གསོལ་གྱི་རྒྱལ་པོ་གསན་དུ་གསོལ། །འདི་ནས་ཤི་འཕོས་ཉིང་མཚམས་སྦྱོར་བར་མི་འགྱུར་མཛོད། །དེ་ནས་རྒྱལ་པོས་ཁྱེད་ཀྱིས་བསམ་པ་རྫོགས་པར་གྱུར་ཅིག་ཅེས་སྨྲས་སོ། །དེ་ནས་བྱང་ཆུབ་སེམས་དཔའ་རང་གི་གནས་སུ་སོང་ངོ་། །རྒྱལ་པོས་ཀྱང་དོན་དེ་ཤཱཀྱ་རྣམས་ལ་བསྙད་པས་བསྲུང་ངོ་ཞེས་བགྲོས་ཏེ། སྒོ་བཞི་རེ་རེར་ཤཱཀྱ་གཞོན་ནུ་ལྔ་བརྒྱ་རེ་རེའང་ཤིང་རྟ་ལྔ་བརྒྱ་ཤིང་རྟ་རེ་རེའང་དཔུང་བུ་ཆུང་ལྔ་བརྒྱ་དང་བཅས་པ་བཀོད་དོ། །ཤཱཀྱ་རྒན་རབས་རྣམས་ལམ་གྱི་བཞི་མདོ་དང་ག་སུམ་མདོར་འཁོད་དོ། །རྒྱལ་པོའང་མེལ་ཚེ་བྱེད་དོ། །དེའི་ཚེ་གནོད་སྦྱིན་རྣམས་དང་འཕྲོག་མའི་བུ་ལྔ་བརྒྱ་རྣམས་ཀྱང་དོ་ནུབ་བྱང་ཆུབ་སེམས་དཔའ་མངོན་པར་འབྱུང་གི་མཆོད་པའི་ལས་བརྩོན་ནོ། །རྒྱལ་པོ་སྡེ་བཞི་ཡང་ཆིབས་པ་འདེགས་པར་སེམས་སོ། །སུམ་ཅུ་རྩ་གསུམ་པ་རྣམས་ཀྱང་མཆོད་པའི་ལས་བྱེད་དོ། །བྱང་ཆུབ་སེམས་དཔའ་སྔོན་གྱི་སྨོན་ལམ་བཞི་མངོན་དུ་བྱེད་དོ། །ལྷའི་བུ་ཆོས་སྤྱོད་ལ་སོགས་པས་བཙུན་མོའི་འཁོར་མི་སྡུག་པར་བསྒྱུར་བ་ལ་གཟིགས་པས་དུར་ཁྲོད་

ཀྱི་འདུ་ཤེས་བསྐྱེད་དེ། ཨེ་མ་སྐྱེ་དགུ་དག་ནི་སྡུག་བསྔལ་གྱུར། །སྲིན་མོའི་ཚོགས་ལ་དགའ་བ་ཇི་ལྟར་རྙེད། །འདོད་པའི་ཡོན་ཏན་ཡོན་མིན་ཡོན་ཏན་འཛིན། །གཏི་མུག་མུན་པས་རབ་བསྒྲིབས་བློ་གྲོས་ངན། །དཔེར་ན་བྱ་ནི་བྱ་རྒྱར་ཆུད་པ་བཞིན། །ནམ་ཡང་འབྱུང་བ་རྙེད་པར་འགྱུར་མ་ཡིན། །ཞེས་གསུངས་ཏེ། རྣམ་པ་སུམ་ཅུ་རྩ་གཉིས་ཀྱིས་བརྟགས་ནས་མི་སྡུག་པར་བསྒོམས་སོ། །དེ་ནས་བྱང་ཆུབ་སེམས་དཔའ་ཁང་བཟང་གི་སྟེང་དུ་སོང་སྟེ་སངས་རྒྱས་ཐམས་ཅད་ལ་ཕྱག་འཚལ་ཏེ་བལྟས་པས། བརྒྱ་བྱིན་དང་རྒྱལ་པོ་སྡེ་བཞི་དང་ཉི་ཟླ་གཉིས་ཀྱང་ཕྱག་འཚལ་ཞིང་འདུག་པར་མཐོང་ངོ་། །སྐར་མ་རྒྱལ་ཡང་ཤར་བར་མཐོང་ནས་འདུན་པ་ལ་སྨྲས་པ། ང་ཡི་བཀྲ་ཤིས་འདི་ནི་དོན་ཀུན་གྲུབ། །དོ་ནུབ་གདོན་མི་ཟ་བར་དོན་འགྲུབ་ཀྱི། །འདུན་པ་ཕྱི་བཤོལ་མ་བྱེད་ལ་གོར་དུ། །རྟ་རྒྱལ་རྒྱན་གྱིས་བརྒྱན་པ་ང་ལ་བྱིན། །དེས་སྨྲས་པ། གང་དུ་བཞུད། སྨྲས་པ། མངོན་པར་འབྱུང་བའོ། །དེ་ནས་འདུན་པས་ལན་མང་དུ་བཟློག་ཀྱང་འདོད་པའི་ཉེས་དམིགས་མང་དུ་གསུངས་ཏེ་མ་བཟློག་པ་དང་། ལྷའི་བུ་ཞི་བའི་བློ་གྲོས་དང་བརྩེ་བ་བཀོད་པས་སེར་སྐྱ་བ་རྣམ་གཉིད་ལོག་ཅིང་སྒྲ་མི་གྲགས་པར་བྱས་སོ། །བྱང་ཆུབ་སེམས་དཔས་ཀྱང་འདུན་པ་ལ་རྟ་བྱིན་ཅིག་ཅེས་སྨྲས་སོ། །དེའི་ཚེ་ལྷའི་དབང་པོ་དང་རྒྱལ་ཆེན་བཞི་ཡང་སེར་སྐྱར་ལྷགས་སོ། །འདུན་པས་དུས་མ་ལགས་སོ་ཞེས་སྨྲས་པ་དང་། བྱང་ཆུབ་སེམས་དཔས་སྨྲས་པ། སེམས་ཅན་རྣམས་ཀྱི་དོན་ནི་ཚོལ་བ་ལ། །བྱང་ཆུབ་རྒ་ཤི་མེད་པའི་གནས་ཐོབ་ནས། །འགྲོ་བ་སྒྲོལ་ཞེས་ང་ཡིས་ཡུན་རིང་ནས། །སྨོན་ལམ་བཏབ་པ་དེ་ཡི་དུས་ལ་བབ། །ཅེས་སྨྲས་པ་དང་། ལྷའི་བུ་ཡང་དག་སྐུལ་པོས་བསྐུལ་བ། སྟོབས་དང་བརྩོན་འགྲུས་འཕགས་པ་མྱུར་དུ་བཞེངས། །སྡུག་བསྔལ་ཉེན་པའི་སེམས་ཅན་ཐམས་ཅད་སྒྲོལ། །ད་ནི་མངོན་པར་འབྱུང་བའི་དུས་ལ་བབ། །ཅེས་བསྐུལ་ལོ། །དེ་ནས་བརྒྱ་བྱིན་གྱིས་བཀྲ་ཤིས་ཀྱི་སྒོ་ཕྱེ། འདུན་པས་རྟ་བསྔགས་ལྡན་བརྒྱན་ཏེ་ཕུལ་བ་

༄༅།        །ལ་ཆིབས་ཏེ། རྒྱལ་ཆེན་བཞིས་བཏེགས་ནས་ནམ་མཁའ་ལ་བྱོན་ཏེ་ཚངས་པ་བརྒྱ་བྱིན་གཉིས་ཀྱིས་ལམ་བསྟན། འོད་ཀྱིས་མུན་པ་བསལ། མཆོད་པ་དང་རོལ་མོ་སྣ་ཚོགས་དང་བཅས་ཏེ་གྱད་ཀྱི་ཡུལ་འདས་ཏེ་མཆོད་རྟེན་རྣམ་དག་གི་དྲུང་དུ་ཕྱིན་པ་དང་རྟ་དང་རྒྱན་འདུན་པ་ལ་བྱིན་ཏེ་སླར་ལྡོག་ཅིང་དེར་མཆོད་རྟེན་བརྩིགས་པས་འདུན་པ་སླར་ལོག་པའི་མཆོད་རྟེན་ཟེར་རོ། །