(བྱང་ཆུབ་སྙིང་པོར་གཤེགས་པའི་མཛད་པ།)

བྱང་ཆུབ་སེམས་དཔས་ལེགས་སྐྱེས་མའི་བྲན་མོ་གྲུམ་མ་ཞེས་པའི་རོ་གསོ་རས་ཀྱིས་དཀྲིས་པ་དེ་བླངས་ཏེ་ལྷས་ལག་པ་བརྡབས་པའི་རྫིང་དུ་བརྒྱ་བྱིན་གྱིས་བཞག་པའི་རྡོ་ལེབ་ལ་བཀྲུས་སོ། །དེ་ངལ་ཏེ་རྫིང་ནས་འབྱུང་སྙམ་པ་ལས་བདུད་ཀྱིས་གད་པ་མཐོན་པོར་སྤྲུལ་པ་ལ་ཤིང་གི་ལྷ་མོས་ཡལ་ག་སྨད་པ་ལ་འཇུས་ཏེ་བྱུང་ནས་ཤིང་སྒྲུབ་བྱེད་ཀྱི་དྲུད་དུ་ཕྱག་དར་ཁྲོད་ཀྱི་སྣམ་སྦྱར་བསྒྲུབས་ཤིང་གནས་གཙང་མའི་ལྷས་ཀྱང་གོས་ངུར་སྨྲིག་ཕུལ་བ་བཞེས་ཏེ་སྤྱོད་ཡུལ་གྱི་གྲོང་དུ་ཞུགས་སོ། །དེ་ནས་ལྷས་སྦྲན་ཏེ་ལེགས་སྐྱེས་མས་བ་སྟོང་གི་འོ་མ་ལན་བདུན་དུ་ཉིང་ཁུར་བྱས་པ་དང་། འབྲས་དང་འབྲུ་གསར་པ་ཡང་བླུགས་ཏེ་བཙོས་པས་དེའི་ནང་དུ་དཔལ་བེའུ་ལ་སོགས་པའི་བཀྲ་ཤིས་པ་དག་སྣང་བས་དགའ་སྟེ་མཚན་མཁན་གྱིས་ཀྱང་བདུད་རྩི་ཐོབ་པར་ལུང་བསྟན་ནོ། །དེ་ནས་བྱང་ཆུབ་སེམས་དཔའ་མགྲོན་དུ་བོས་ནས་འོ་ཐུག་སྦྲང་རྩི་ཅན་གྱིས་གསེར་སྣོད་བཀང་སྟེ་ཕུལ་བ་བཞེས་ནས་ནེ་རཉྫ་ནའི་འགྲམ་

དུ་སོང་སྟེ་ཟས་དང་ཆོས་གོས་བཞག་ནས་ཁྲུས་མཛད་པས་ལྷས་མཆོད་ཅིང་ཁྲུས་ཆུ་ལྷས་ཁྱེར་ལ་སྐྲ་དང་ཨག་ཚོམ་ལེགས་སྐྱེས་མས་ཁྱེར་ཏེ་ཆུ་དེའི་ཀླུ་མོས་ཕུལ་བའི་སེང་ཁྲི་ལ་བཞུགས་ཏེ་འོ་ཐུག་གསོལ་ནས་གསེར་སྣོད་ཆུར་བོར་བ་ཀླུའི་རྒྱལ་པོ་རྒྱ་མཚོས་ཁྱེར་བ་ལ་བརྒྱ་བྱིན་གྱིས་བླངས་ནས་སུམ་ཅུ་རྩ་གསུམ་དུ་ཁྱེར་ནས་ལོ་རེ་བཞིན་སྣོད་ཀྱི་དུས་སྟོན་བྱེད་དོ། །བྱང་ཆུབ་སེམས་དཔས་ཁྲུས་བྱས་ཟས་ཟོས་པས་ལུས་མཐུ་དང་ལྡན་པས་བདུད་ལས་རྒྱལ་བའི་ཕྱིར་བྱང་ཆུབ་ཀྱི་ཤིང་དྲུང་དུ་སྐྱེས་བུ་ཆེན་པོའི་སྟོབས་ཀྱིས་ཆས་སོ། །རླུང་དང་ཆར་སྤྲིན་གྱིས་ལམ་འཕྱགས་ཤིང་ཆག་ཆག་གདབ། །རི་དང་ཤིང་ཐམས་ཅད་དང་བུ་ཆུང་བཙས་མ་ཐག་ཐམས་ཅད་ཀྱང་མགོ་དེ་ཕྱོགས་སུ་སྟོན་ནོ། །སྟོང་གསུམ་གྱི་བདག་པོ་ཚངས་པ་དབང་བསྒྱུར་གྱིས་འཁོར་ལ་བྱང་ཆུབ་སེམས་དཔའ་དོ་ནུབ་བྱང་ཆུབ་སྙིང་པོར་འགྲོ་ཡི་མཆོད་པའི་ལས་གྱིས་ཤིག་ཅེས་བསྒོས་ནས། མཆོད་པའི་བཀོད་པ་བསམ་གྱིས་མི་ཁྱབ་པ་སྤྲུལ་ལོ། །བྱང་ཆུབ་སེམས་དཔས་འོད་བཀྱེ་སྟེ་ཉོན་མོངས་དང་སྡུག་བསྔལ་ཞི་ཞིང་སྣོད་དག་པར་སྦྱངས་ཏེ་ཀླུ་ནག་པོས་བསྟོད་དོ། །དེ་ནས་ལམ་གྱི་གཡས་ན་རྩྭ་ཚོང་བཀྲ་ཤིས་རྩྭ་བརྔ་བ་ལ། བཀྲ་ཤིས་རྩ་ནི་ང་ལ་མྱུར་དུ་བྱིན། །དེ་རིང་ང་ལ་རྩྭ་ནི་དོན་ཆེན་འགྱུར། །དཔུང་དང་བཅས་པའི་བདུད་ནི་བཅོམ་ནས་སུ། །བྱང་ཆུབ་དམ་པ་ཞི་བ་རེག་པར་འགྱུར། །ཞེས་གསུངས་པ་དང་། དེས་ཀྱང་རྩྭ་སྔོ་ལྗང་ཡིད་དུ་འོང་བ་ཕུལ་ཏེ་ཁྱེར་ནས་བྱང་ཆུབ་ཤིང་ལ་ལན་གསུམ་བསྐོར་ཏེ་རྩྭ་རྩེ་མོ་ནང་དུ་བསྟན་ནས་རྩ་བ་ཕྱིར་བསྟན་པ་ལ་ཤར་ཕྱོགས་སུ་བལྟས་ཏེ་འདུག་ནས་ལུས་དྲང་པོར་བསྲང་དྲན་པ་མངོན་དུ་བཞག་ནས། སྟན་འདིར་བདག་གི་ལུས་ནི་བསྐམས་ཀྱང་རུང་། །པགས་པ་རུས་པ་ཤ་རྣམས་ཞིག་ཀྱང་རུང་། །བསྐལ་མང་རྙེད་དཀའི་བྱང་ཆུབ་མ་ཐོབ་པར། །སྟན་འདི་ལས་ནི་ལུས་བསྐྱོད་མི་བྱའོ། །ཞེས་ཡིད་དམ་བརྟན་པོར་བྱས་སོ། །དེའི་ཚེ་ལྷ་རྣམས་

༄༅།        །བྱང་ཆུབ་སེམས་དཔའ་བསྲུང་བའི་ཕྱིར་ཕྱོགས་བཅུར་འཁོད་དོ། །བྱང་ཆུབ་སེམས་དཔས་ཀྱང་བྱང་ཆུབ་སེམས་དཔའ་སྐུལ་བ་ཞེས་བྱ་བའི་འོད་བཀྱེ་སྟེ་ཞིང་དཔག་མེད་སྣང་བར་བྱས་ནས་བྱང་ཆུབ་སེམས་དཔའ་མང་པོ་བསྡུས་ནས་མཆོད་པ་བྱེད་དོ། །