(ཆོས་འཁོར་སྐོར་བའི་མཛད་པ།)

དེ་ནས་བྱང་ཆུབ་ཤིང་གི་ལྷ་ཆོས་སྲེད་ལ་སོགས་པས་སྟོན་པ་ཆོས་ཀྱི་འཁོར་ལོ་གང་དུ་བསྐོར། ཝཱ་ར་ཎ་སི་རུའོ། །དེ་ནི་སྐྱེ་བོ་ཉུང་ཞིང་གྲིབ་མ་ཆུང་བས་གཞན་དུ་རིགས་སོ་ཞེས་གསོལ་བས། བཀའ་སྩལ་པ། བཞིན་བཟང་དག་དེ་སྐད་མ་ཟེར་ཅིག་གསུང་སྟེ། ཐོག་མར་གདུལ་སླ་བ་སུ་ལ་ཆོས་སྟོན་སྙམ་པ་དང་ལྷག་སྤྱོད་འདས་ཏེ་ཞག་བདུན་ལོན། རིང་འཕུར་འདས་ཏེ་ཞག་གསུམ་ལོན་པར་རིག་ནས་ལྔ་སྡེ་ལ་བསྟན་པར་བྱའོ་ཞེས་དགོངས་ཏེ། མ་ག་དྷ་ནས་གསལ་ལྡན་དུ་སོང་བ་དང་འཚོ་བ་པ་ཞིག་དང་ཕྲད་དེ་གཏམ་མང་པོ་བྱས་ཏེ་འཚོ་བ་(ཉེར་འགྲོ།)པས། ཁྱེད་དབང་པོ་ནི་གསལ། པགས་པ་ནི་དག་ན་སུ་ལས་ཚངས་པར་སྤྱད། བཀའ་སྩལ་པ། ང་ལ་སློབ་དཔོན་གང་ཡང་མེད། །ང་དང་འདྲ་བ་ཡོད་མ་ཡིན། །ང་ནི་གཅིག་པུར་རྫོགས་སངས་རྒྱས། །བསིལ་གྱུར་ཟག་པ་མེད་པ་ཡིན། །དེས་སྨྲས་པ། དགྲ་བཅོམ་པར་ཞལ་གྱིས་འཆེ་འམ། བཀའ་བསྩལ་པ། ང་ནི་འཇིག་རྟེན་དགྲ་བཅོམ་པ། །ང་ནི་སྟོན་པ་བླ་ན་མེད། །ལྷ་དང་ལྷ་མིན་དྲི་ཟར་བཅས། །ང་ཡི་དོ་ཟླའི་གང་ཟག་མེད། །དེས་སྨྲས་པ། རྒྱལ་བར་ཞལ་གྱིས་འཆེའམ། བཀའ་སྩལ་པ། གང་དག་ཟག་པ་ཟད་བརྙེས་པ། །ང་འདྲ་རྒྱལ་བར་ཤེས་པར་བྱ། །ང་ནི་སྡིག་པའི་ཆོས་ལས་རྒྱལ། །དེ་བས་ཉེར་འགྲོ་ང་རྒྱལ་ཡིན། །དེས་སྨྲས་པ། གར་བཞུད། བཀའ་སྩལ་པ། ང་ནི་ཝཱ་ར་ཎཱ་སིར་འགྲོ །གྲོང་ཁྱེར་གསལ་ལྡན་སོང་ནས་ནི། །ལོང་བ་ལྟ་བུའི་འཇིག་རྟེན་ལ། །མཚུངས་པ་མེད་པའི་འོད་བྱའོ། །ཞེས་སོགས་གསུངས་པས་དེ་བཞིན་དུ་འགྱུར་རོ། །ཟེར་ཏེ་ལྷོར་སོང་ངོ་། །སྟོན་པ་བྱང་དུ་རི་ག་ཡ་དང་ལྟེང་རྒྱས་དང་ཙན་དན་ལར་དང་གྲོང་ཁྱེར་ཁ་ལོ་བསྒྱུར་ནས་གཾ་གཱའི་འགྲམ་དུ་གཤེགས་སོ། །གཾ་གཱའི་མཉན་པས་གྲུ་བཙས་བླངས་པས་ང་ལ་གྲུ་བཙས་མེད་གསུངས་ཏེ་ནམ་མཁའ་ལ་གཤེགས་སོ། །རྒྱལ་པོ་གཟུགས་ཅན་སྙིང་

༄༅།        །པོས་དེ་ཐོས་ནས་ཕྱིས་རབ་བྱུང་ལ་གྲུ་བཙས་མི་འདོད་པར་བྱས་སོ། །དེ་ནས་ཝཱ་ར་ཎཱ་སིར་བྱོན་ནས་བསོད་སྙོམས་བཞེས་ཏེ་ཟས་ཀྱི་བྱ་བ་བྱས་ཏེ་དྲང་སྲོང་ལྷུང་བར་གཤེགས་སོ། །ལྔ་སྡེས་སྟོན་པ་འབྱོན་པ་མཐོང་སྟེ། དགེ་སྦྱོང་གོའུ་ཏ་མ་ལྷོད་པ་མང་དུ་ཟ་བ་སྤོང་བ་ལས་ཉམས་པ་འདི་འོང་གི །སུས་ཀྱང་བསུ་བར་མི་བྱ་ལྡང་བར་མི་བྱ་ཆོས་གོས་དང་ལྷུང་བཟེད་བླང་བར་མི་བྱ། སྟན་ལྷག་པ་འདི་ལ་འདོད་ན་འདུག་ཅིག་ཟེར་བའི་འོག་ཁྲིམས་བཅས་ཏེ། ཀུན་ཤེས་ཀྱིས་སེམས་ཀྱིས་ཁས་མ་བླངས་སོ། །དེ་ལྟར་སྟོན་པ་བྱོན་པ་དང་ལྔ་སྡེས་མ་བཟོད་ནས་ཁྲིམས་དྲལ་ཏེ་སྟན་ལས་ལངས་ཏེ། ལ་ལས་བསུ། ལ་ལས་གདན་གཏིང་། ལ་ལས་ཞབས་བཀྲུ་བའི་ཆུ་བཤམས་ནས། ཁྱོད་ལེགས་པར་བྱོན་ཏོ། །གདན་འདི་ལ་བཞུགས་སུ་གསོལ་ཞེས་གསེལ་བ་དང་། སྟོན་པས་གདན་ལ་བཞུགས་ནས་ལྔ་སྡེ་དང་མགུ་བར་བྱ་བའི་ཕྱིར་གཏམ་མང་པོ་བྱས་ཏེ། ལྔ་(ཀུན་ཤེས་ཀཽ་དི་ནྱ། རྟ་ཐུལ། རླངས་པ། མིང་ཆེན། བཟང་ལྡན་ཏེ།)སྡེས། ཚེ་དང་ལྡན་པ་གོའུ་ཏམ་དབང་པོ་གསལ་ལ་པགས་པ་ནི་ཡོངས་སུ་དག་ན། ཡེ་ཤེས་མཐོང་བའི་ཁྱད་པར་མངོན་དུ་མཛད་དམ། བཀའ་སྩལ་པ། ཁྱོད་དེ་བཞིན་གཤེགས་པ་ལ་ཚེ་དང་ལྡན་པ་མ་ཟེར་ཅིག །ཡུན་རིང་པོར་མི་བདེ་བར་གྱུར་ཏ་རེ། ངས་ནི་བདུད་རྩི་ཐོབ་བོ། །སངས་རྒྱས་སོ། །ཐམས་ཅད་མཁྱེན་པའོ། །ཁྱེད་ཅག་གིས་འོག་ཁྲིམས་འདི་ལྟར་མ་བཅས་སམ་ཞེས་བཀའ་སྩལ་པས་དེ་དག་དགེ་སློང་དུ་གྱུར་ཏེ། སྟོན་པའི་ཞབས་ལ་གཏུགས་ཏེ་ཉེས་པ་བཤགས་ནས་གུས་པ་བསྐྱེད་དོ། །སྟོན་པས་སྐུ་བསིལ་ནས་གང་དུ་ཆོས་འཁོར་བསྐོར་སྙམ་པ་དང་། ཕྱོགས་དེར་རིན་ཆེན་སྣ་བདུན་གྱི་ཁྲི་སྟོང་བྱུང་བའི་གསུམ་ལ་སྐོར་བ་བྱས་ཏེ་བཞི་པ་ལ་བཞུགས་ནས་འོད་ཀྱིས་སྟོང་གསུམ་སྣང་བར་གྱུར་ཅིང་ས་གཡོས་སེམས་ཅན་རྣམས་དག་པར་བྱས་སོ། །དེ་ནས་ལྷ་རྣམས་ཀྱིས་གསེར་གྱི་འཁོར་ལོ་རྩིབས་སྟོང་དང་ལྡན་པ་

ཕུལ་ནས་ཆོས་ཀྱི་འཁོར་ལོ་བསྐོར་བར་གསོལ་བ་དང་། ནམ་གྱི་ཆ་སྟོད་ལ་ཅང་མི་གསུང་བ་དང་གུང་ཐུན་ལ་ཡང་དག་པར་འཆགས་པའི་གཏམ་དང་ཆ་སྨད་ལ་ལྔ་སྡེ་ལ་བཀའ་སྩལ་པ། དགེ་སློང་དག་མཐའ་གཉིས་པོ་འདི་དག་ནི་རབ་ཏུ་བྱུང་བའི་འཇུག་པར་བྱ་བ་མིན་ཏེ་འདོད་པ་བསོད་ཉམས་དང་ངལ་ཞིང་དུབ་པའི་མཐའོ། །མཐའ་གཉིས་སྤངས་ནས་དབུ་མའི་ལམ་གྱིས་དེ་བཞིན་གཤེགས་པ་ཆོས་སྟོན་ཏེ་འདི་ལྟ་སྟེ་འཕགས་པའི་ལམ་ཡན་ལག་བརྒྱད་དོ། །དགེ་སློང་དག་འདི་ནི་བདེན་པ་བཞི་སྟེ་སྡུག་བསྔལ་བ་དང་ཀུན་འབྱུང་བ་དང་འགོག་པ་དང་ལམ་མོ། །ཞེས་སོགས་དང་། སྡུག་བསྔལ་ནི་ཡོངས་སུ་ཤེས་པར་བྱའོ་ཀུན་འབྱུང་ནི་སྤང་བར་བྱའོ་ཞེས་སོགས་དང་། སྡུག་བསྔལ་ཡོངས་སུ་ཤེས་སོ་ཀུན་འབྱུང་སྤངས་སོ་ཞེས་སོགས་ཏེ་བདེན་པ་བཞི་ལན་གསུམ་བཟླས་པས་རྣམ་པ་བཅུ་གཉིས་ཀྱིས་འཁོར་ལོ་བསྐོར་བས་ཀཽ་དི་ནྱས་དགྲ་བཅོམ་སྟེ་དཀོན་མཆོག་གསུམ་གྲུབ་བོ། །དེ་ལྟར་རྣམ་པ་བཅུ་གཉིས་ཀྱིས། །ཆོས་ཀྱི་འཁོར་ལོ་རབ་བསྐོར་བ། །ཀཽ་དི་ནྱ་ཀུན་(འདི་དགེ་སློང་དུ་གྱུར་པར་གསལ།)ཤེས་ཏེ། །དཀོན་མཆོག་གསུམ་ནི་མངོན་པར་གྲུབ༏ ༏ཅེས་སོ། །ཆོས་ཀྱི་འཁོར་ལོ་འདི་ལའང་གནས་དུས་འཁོར་ཆོས་དགོས་པ་སྟེ་ལྔ་ལྔས་འཆད་གསུང་བས་དང་པོ་ཁོར་མོ་འཇིག་གོ །དུས་ཁ་ཅིག་ལོ་དྲུག་ཟླ་དྲུག་གོ་ཟེར་རོ། །མཆིམས་པ་ན་རེ་ལོ་བདུན་ཟེར་རོ། །ཆག་ན་རེ་ལོ་བདུན་དུ་ཟླ་བ་གཉིས་ཀྱིས་མ་ཚང་བའོ་ཞེས་ཟེར་རོ། །འཁོར་ནི་ཀཽ་དི་ནྱ། རྟ་ཐུལ། རླངས་པ། མིང་ཆེན། བཟང་ལྡན་ཏེ་མི་ལྔ། ལྷའི་འཁོར་མང་པོའོ། །ཆོས་བདེན་པ་བཞི་ལན་གསུམ་བཟླས་པ་རྣམ་པ་བཅུ་གཉིས་ཀྱི་འཁོར་ལོ་སྟེ། མཛོད་ལས། ཆོས་ཀྱི་འཁོར་ལོ་མཐོང་བའི་ལམ། །མྱུར་བར་འགྲོ་སོགས་རྩིབས་སོགས་ཕྱིར། །ཞེས་ཏེ།མཐོང་ལམ་ནི་འཁོར་ལོ་དང་མྱུར་དུ་འགྲོ་བ་དང་འདོར་བ་དང་འཇུག་པའི་ཕྱིར་དང་། མ་རྒྱལ་བ་ལས་རྒྱལ་བར་བྱེད་པ་དང་རྒྱལ་བ་རྣལ་དུ་འགོད་པའི་ཕྱིར་དང་། འཕར་བ་དང་འབབ་པའི་ཕྱིར་ཆོས་

༄༅།        །མཐུན་པས་ཆོས་ཀྱི་འཁོར་ལོའོ། །བཙུན་པ་དབྱངས་སྒྲོག་ན་རེ། འཕགས་ལམ་ཡན་ལག་བརྒྱད་ཀྱི་ལྟ་བ་རྟོག་པ་རྩོལ་བ་དྲན་པ་རྣམས་རྩིབས། ངག་ལས་མཐའ་འཚོ་བ་གསུམ་ལྟེ་བ། ཏིང་ངེ་འཛིན་མུ་ཁྱུད་དང་ཆོས་མཐུན་པས་འཁོར་ལོའོ། །མཐོང་ལམ་ཆོས་ཀྱི་འཁོར་ལོ་ཡིན་ཏེ་ཀཽ་དི་ནྱ་ལ་དེ་སྐྱེས་པ་ལ་ཆོས་ཀྱི་འཁོར་ལོ་བསྐོར་ཞེས་གསུངས་སོ། །ལན་གསུམ་དུ་བཟླས་པ་ནི་འདི་ནི་སྡུག་བསྔལ་ལོ་ཞེས་སོགས་དང་དེ་ཡོངས་སུ་ཤེས་པར་བྱའོ་ཞེས་སོགས་དང་། དེ་ཡོངས་སུ་ཤེས་སོ། །ཞེས་སོགས་སོ། །བཟླས་པ་རེ་རེར་མིག་སྐྱེས་སོ། །ཤེས་པ་དང་རིག་པ་དང་བློ་སྐྱེས་སོ་ཞེས་སྦྱོར་བ་དང་བར་ཆད་མེད་པ་དང་རྣམ་གྲོལ་དང་ཁྱད་པར་གྱི་ལམ་སྐྱེས་པར་བསྟན་པ་ནི་རྣམ་པ་བཅུ་གཉིས་སོ། །འོ་ན་བཟླས་པ་བཅུ་གཉིས་དང་རྣམ་པ་དྲུག་ཅུ་རྩ་བཞིར་འགྱུར་རོ་ཞེ་ན། གསུམ་ཚན་དང་བཅུ་གཉིས་ཚན་དུ་ཆོས་མཐུན་པའི་ཕྱིར་སྐྱོན་མེད་དོ། །བཟླས་པ་གསུམ་པོས་མཐོང་སྒོམ་མི་སློབ་པ་གསུམ་བསྟན་ནོ། །ཞེས་བྱེ་བྲག་ཏུ་སྨྲ་བ་ཟེར་རོ། །དེ་ལྟར་ན་ཆོས་ཀྱི་འཁོར་ལོ་ལན་གསུམ་བཟླས་པ་དང་རྣམ་པ་བཅུ་གཉིས་མ་ཡིན་པར་འགྱུར་ཏེ་མཐོང་ལམ་ཁོ་ན་ལན་གསུམ་བཟླས་པ་དང་། རྣམ་པ་བཅུ་གཉིས་མ་ཡིན་པའི་ཕྱིར་རོ། །དེས་ན་ཆོས་ཀྱི་རྣམ་གྲངས་དེ་ཉིད་ཆོས་ཀྱི་འཁོར་ལོ་ཡིན་ཏེ་ལན་གསུམ་དུ་བཟླས་པ་ནི་བདེན་པ་རྣམས་ལན་གསུམ་དུ་བཟླས་པའོ། །རྣམ་པ་བཅུ་གཉིས་ནི་སྡུག་བསྔལ་དང་ཀུན་འབྱུང་བ་དང་འགོག་པ་དང་ལམ་མོ་ཞེས་པ་དང་། ཡོངས་སུ་ཤེས་པར་བྱ་སྤང་བར་བྱ་མངོན་དུ་བྱ་བསྒོམ་པར་བྱ་ཞེས་བྱ་བ་དང་། ཡོངས་སུ་ཤེས་སྤངས་མངོན་དུ་བྱས་བསྒོམས་ཞེས་པའོ། །བསྐོར་བ་ནི་གཞན་གྱི་རྒྱུད་ལ་གོ་བར་བྱེད་པའམ་ཤེས་པར་བྱེད་པའི་ཕྱིར་རོ། །དགོས་པ་ནི་བཟླས་པ་དང་པོ་ལ་ཀཽ་དི་ནྱ་དང་ལྷ་མང་པོ་ལ་མཐོང་ལམ་སྐྱེས། གཉིས་པ་ལ་ཀཽ་དི་ནྱས་དགྲ་བཅོམ། གཞན་བཞིས་མཐོང་ལམ་

སྐྱེས༏ གསུམ་པ་ལ་ནི་བཞི་པོས་ཀྱང་དགྲ་བཅོམ་སྟེ་དངོས་ཀྱི་དགོས་པའོ། །བརྒྱུད་པའམ་ཁྱད་པར་གྱི་དགོས་པ་གདུལ་བྱ་གང་ཟག་ཏུ་འཛིན་པ་ལས་བཟློག་ནས་འབྲས་བུ་བཞི་ལ་འགོད་པའོ། །