(༢. བཀའ་བསྡུ་གཉིས་པ།)

བསྡུ་བ་གཉིས་པ་ནི། སྟོན་པ་འདས་ནས་ལོ་བརྒྱ་དང་བཅུ་ལོན་པ་ན་ཡངས་པ་ཅན་གྱི་དགེ་སློང་རྣམས་ཀྱིས་རུང་བ་མ་ཡིན་པའི་གཞི་བཅུ། ཨ་ལ་ལ་དང་རྗེས་སུ་ཡི་རང་སྤྱོད་པ་དང་། །བརྟག་པ་དང་ནི་ལན་ཚ་དག་དང་ལམ་དང་ནི། །སོར་མོ་གཉིས་ཀྱིས་རུང་དང་དཀྲུགས་དང་གདིང་བ་དང་། །གསེར་དངུལ་བྱས་པ་འདི་ནི་བར་སྡོམས་ཡང་དག་བསྡུས། །ཞེས་པ་དེ་དག་ཀུན་ཏུ་སྤྱོད་དོ། །དེའི་ཚེ་ཡངས་པ་ཅན་ན་དགྲ་བཅོམ་པ་ཐམས་ཅད་འདོད་ཅེས་པ་རྣམ་ཐར་བརྒྱད་ལྡན་ཞིག་

༄༅།        །སྙིང་ལས་ཆུང་ངུར་འདུག་གོ །གྲོང་ཁྱེར་ནོར་ཅན་ན་དགྲ་བཅོམ་པ་གྲགས་པ་འཁོར་ལྔ་བརྒྱ་དང་བཅས་པ་ལྗོངས་རྒྱུ་ཞིང་ཡངས་པ་ཅན་དུ་ཕྱིན་ནས་རྙེད་པ་བགོད་པ་དང་ཐུག་སྟེ། རྙེད་པའི་སྐལ་བ་ཆེན་པོ་བྱུང་སྟེ་དྲིས་པས་རུང་བ་མ་ཡིན་པའི་གཞི་བཅུ་སྤྱོད་པར་རིག་ནས། ཐམས་ཅད་འདོད་ཅན་ཕྱིན་ཏེ། ཨ་ལ་ལས་རུང་བ་བགྱིད་པར་རུང་ངམ། དེ་ཅི་ཡིན། ཡངས་པ་ཅན་གྱི་དགེ་སློང་རྣམས་མི་མཐུན་པས་ཆོས་མིན་དང་མཐུན་པས་ཆོས་ཀྱི་ལས་བྱས་ནས་ཨ་ལ་ལ་ཞེས་བྱ་བས་རུང་བར་བྱེད་དོ། །ཚེ་དང་ལྡན་པ་རུང་བ་མ་ཡིན་ནོ། །གང་དུ་བཅས། ཙམ་པར་རོ། །གང་ལ་བརྟེན་ཏེ་བཅས། དྲུག་སྡེ་ལའོ། །ལྟུང་བ་ཅིར་འགྱུར། ཉེས་བྱས་སུའོ། །གནས་བརྟན་འདི་ནི་གཞི་དང་པོ་མདོ་སྡེ་ལས་འདས། འདུལ་བ་ལས་འདས། སྟོན་པའི་བསྟན་པ་དང་བྲལ་ཏེ་མདོ་སྡེ་ལ་མི་འཇུག་འདུལ་བ་ལ་མི་སྣང་། ཆོས་ཉིད་དང་འགལ་བ་སྟེ། དེ་ལ་རུང་བར་སྟོན་ཅིང་སྤྱོད་ན་དེ་བཏང་སྙོམས་སུ་བཞག་གམ། དེ་ཅང་མི་སྨྲ་བར་འདུག་གོ །གནས་བརྟན་དེ་ནི་དེར་བས་ན། འདི་ཞུ་བར་བགྱི་སྟེ། རྗེས་སུ་ཡི་རང་གིས་རུང་བ་རུང་ངམ། སྔར་བཞིན་སྦྱར་ལ། སྔར་ལྟ་བུ་ལས་བྱས་ནས་ཉེ་འཁོར་གྱི་དགེ་སློང་རྣམས་རྗེས་སུ་ཡི་རང་བ་བྱེད་དུ་འཇུག་ཅིང་དེས་རུང་བར་བྱེད་དོ། །མི་རུང་སྟེ། ཙམ་པར་དྲུག་སྡེ་ལ་ཉེས་བྱས་སོ། །ཀུན་སྤྱོད་ནི། རང་གི་ལག་གིས་ས་བརྐོས་ནས་ཀུན་ཏུ་སྤྱོད་པས་རུང་བར་བྱེད་དེ། མཉན་ཡོད་དུ་དྲུག་སྡེ་ལ་ལྟུང་བྱེད་དུའོ། །ཚྭ་ནི། ཇི་སྲིད་འཚོའི་བར་དུ་ཚྭ་དུས་རུང་དང་བསྲེས་ནས་སྤྱོད་ཅིང་དུས་རུང་དུ་བྱེད་དེ། རྒྱལ་བའི་ཁབ་ཏུ་ཤཱ་རིའི་བུ་ལ་ལྟུང་བྱེད་དུའོ། །ལམ་གྱིས་རུང་བ་ནི། དཔག་ཚད་དང་དཔག་ཚད་ཕྱེད་དུ་སོང་ན་འདུས་ཤིང་ཟན་ཟོས་ནས་ལམ་གྱིས་རུང་བར་བྱེད་དོ། །རྒྱལ་པོའི་ཁབ་ཏུ་ལྷ་སྦྱིན་ལ་ལྟུང་བྱེད་དུའོ། །སོར་མོ་གཉིས་ནི། ལྷག་པོར་མ་བྱས་པའི་བཟའ་བཅའ་སོར་མོ་གཉིས་ཀྱིས་རུང་བར་བྱས་ཏེ་ཟ་སྟེ། མཉན་ཡོད་དུ་མང་པོ་ལ་

ལྟུང་བྱེད་དུའོ། །ནད་པས་ནི་སྲིན་བུ་པད་མ་བཞིན་དུ་ཆང་བཞིབས་ཏེ་འཐུངས་ནས་ནད་པས་རུང་བར་བྱེད་དེ་མཉན་ཡོད་དུ་ལེགས་འོངས་ལ་ལྟུང་བྱེད་དུའོ། །བསྲེས་པས་རུང་བ་ནི། འོ་མ་བྲེ་གང་དང་ཞོ་བྲེ་གང་དཀྲུགས་ནས་དུས་མིན་དུ་ཟོས་ནས་རུང་བར་བྱེད་དེ། མཉན་ཡོད་དུ་མང་པོ་ལ་ལྟུང་བྱེད་དུའོ། །གདིང་བ་ནི། གདིང་བ་རྙིང་པ་བདེ་བར་གཤེགས་པའི་མཐོ་གང་གིས་འཁོར་བས་གསར་པ་ལ་མ་གླན་པར་སྤྱོད་དེ། མཉན་ཡོད་དུ་མང་པོ་ལ་ལྟུང་བྱེད་དུའོ། །གསེར་དངུལ་ནི། ལྷུང་བཟེད་དྲི་ཞིམ་པོས་བསྐུས་ཏེ་དགེ་སྦྱོང་གི་མགོའི་སྟེང་དུ་ཁྲིའུ་སྟན་དང་བཅས་པའི་སྟེང་དུ་བཞག་ནས་ལམ་སྲང་དང་བཞི་མདོར་ལྷུང་བཟེད་འདི་ནི་བཟང་པོ་སྟེ། འདིར་བྱིན་ནམ་བླུགས་ན་འབྲས་བུ་ཆེན་པོར་འགྱུར་རོ་ཞེས་བྱས་པས་གཞན་གྱིས་དེར་གསེར་དངུལ་བླུག་པ་ལོངས་སྤྱོད་དེ། དྲུག་སྡེ་སོགས་ལ་སྤང་ལྟུང་དུ་བཅས་སོ། །དེ་ནས་ཐམས་ཅད་འདོད་ན་རེ། ཁྱོད་སོང་ལ་ཕྱོགས་ཚོལ་ཅིག །ངས་ཆོས་བཞིན་གྲོགས་བྱའོ། །དེ་ནས་གྲགས་པས་གྲོང་ཁྱེར་ནོར་ཅན་གྱི་གཡོ་ལྡན་དང་། སང་ཀ་ཤའི་ནོར་ཅན་དང་། དམར་བུ་ཅན་གྱི་ཟླ་སྒུར་འགོག་སྙོམས་མཛད་པས་ཡིད་དགའ་ལ་དང་། སུག་ན་ན་མ་ཕམ་པ་དང་། མ་ཧེ་ལྡན་ན་ཡང་དག་སྐྱེས་དང་། ལྷན་ཅིག་སྐྱེས་ན་ནམ་གྲུ་གནས་པ་ལ། སྔར་བཞིན་བརྗོད་པས་དེས་ཁྱོད་ངལ་བསོ་ལ་ངས་ཕྱོགས་བཙལ་ལོ་ཞེས་ཏེ་ཕྱོགས་ཚོལ་དུ་སོང་ངོ་། །དེ་ནས་ཡངས་པ་ཅན་གྱི་དགེ་སློང་རྣམས་ཀྱིས་གྲགས་པའི་སློབ་མ་ལ་མཁན་པོ་གར་སོང་དྲིས་པས་ཁྱེད་ཅག་གནས་ནས་དབྱུང་བའི་ལས་བྱེད་པའི་ཕྱོགས་འཚོལ་ལོ། །དེ་དག་གིས་སྨྲས་པ། དེ་ལེགས་པ་མ་ཡིན་པ་བྱེད་དེ། སྟོན་པ་འདས་པའི་གསུང་རབ་ལ་རྣམ་པ་དེ་དང་དེ་དག་གིས་འཚོ་བ་རུང་ན་ངེད་རྣམས་ལ་ཅིའི་ཕྱིར་མཐོ་བརྩམ། གཞན་ཞིག་གིས་སྨྲས་པ། ཁྱེད་རུང་བ་མ་ཡིན་པ་སྤྱོད་ཅིང་བསྟན་པ་ལ་ཆུ་བུར་བསྐྱེད་པས་ངེས་པར་གནས་ནས་དབྱུང་བའི་ལས་བྱེད་དོ། །ཞེས་སྨྲས་པས་སྐྲག་སྟེ། གྲགས་པའི་སློབ་མ་ལ་སྣམ་སྦྱར་དང་ཆོས་གོས་ལ་སོགས་པ་བྱིན་ནས་བར་བཅོལ་ལོ། །དེ་ནས་གྲགས་

༄༅།        །པས་ཕྱོགས་བཙལ་ཏེ་སླར་འོངས་པ་དང་སློབ་མ་དེ་དག་གིས་མཁན་པོ་ཐུགས་འདི་ལྟ་བུ་བལྡོག་པར་རིགས་ཏེ། སྟོན་པ་འདས་པའི་གསུང་རབ་ལ་རྣམ་པ་དེ་དང་དེ་དག་གིས་འཚོ་བར་རུང་ན་ཅིའི་སླད་དུ་དེ་དག་ལ་གནོད་པའི་ལས་བགྱི། ཞེས་སྨྲས་པས་དེ་དག་གིས་གསུག་བླངས་པར་ཤེས་ནས་དེ་དག་བཤད་དེ། གང་གིས་བཤོལ་བར་བྱ་བ་རིངས་བྱེད་རིངས་པ་བཤོལ་བྱེད་པ། །ཚུལ་བཞིན་བྱ་བ་རབ་སྤངས་བྱིས་པ་དེ་ནི་སྡུག་བསྔལ་འགྲོ །དེ་ནི་གྲགས་པ་མེད་པས་སྐལ་ལྡན་གྲོགས་ཀྱིས་རྣམ་པར་སྤང་། །དེ་ཡེ་དོན་ནི་མི་འཕེལ་མར་གྱི་ངོ་ཡི་ཟླ་བ་བཞིན། །གང་གིས་དགོངས་པ་དེ་བཞིན་རིངས་བྱེད་བློ་ལྡན་མི་བཤོལ་བ། །ཚུལ་བཞིན་མ་ཡིན་རབ་སྤངས་མཁས་པ་དེ་ནི་བདེ་བ་ཐོབ། །དེ་ནི་གྲགས་པ་སྐལ་ལྡན་གྲོགས་པོ་རྣམས་ཀྱིས་སྤང་མི་འགྱུར། །དེ་ཡི་དོན་ནི་འཕེལ་བ་ཡར་གྱི་ངོ་ཡི་ཟླ་བ་བཞིན། །དེ་ནས་གྲགས་པ་འཁོར་གྱི་ཁྱམས་སུ་ཞུགས་ཏེ་སྨོན་ནས་ཤེས་པ་བརྟགས་ཏེ་གཎྜི་བརྡུངས་པས། དགྲ་བཅོམ་པ་བདུན་བརྒྱར་གཅིག་གིས་མ་ཚང་བ་འདུས་ཏེ་ཀུན་དགའ་བོའི་སློབ་མ་ཤ་སྟག་གོ །ཟླ་སྒུར་འགོག་སྙོམས་ལ་ཞུགས་པས་མ་ཐོས་སོ། །དེ་ནས་གྲགས་པས་མིང་ཕྱུང་སྟེ་བཟླས་ན་འཁྲུག་པ་ཆེན་པོར་འགྱུར་བས་མིང་མི་དབྱུང་བར་བརྗོད་པར་བྱའོ་སྙམ་སྟེ། རྒན་པའི་མཐའ་ལོགས་སུ་ཐལ་མོ་སྦྱར་ཏེ་འདུག་གོ །དེའི་ཚེ་ཟླ་སྒུར་འགོག་པ་ལས་ལངས་པ་ལ་ལྷ་ཞིག་གིས་ཁྱེད་དང་མཁན་པོ་གཅིག་པའི་དགྲ་བཅོམ་པ་བདུན་བརྒྱར་གཅིག་གིས་མ་ཚང་བ་བསྟན་པ་སྡུད་པས་རིངས་པར་བཞུད་ཅིག །དེས་རྫུ་འཕྲུལ་གྱིས་ཁྱམས་ཀྱི་སྒོར་འདུག་སྟེ་སྒོ་བརྡུངས་པས། ཁྱོད་སུ་ཡིན་འདྲི་བ་ལ། གང་དག་དམར་བུ་ཅན་ན་གནས་པ་ཡི། །དགེ་སྦྱོང་མང་དུ་ཐོས་པ་འདུལ་བ་འཛིན། །དེ་དག་ལས་ནི་གཞན་ཞིག་འདིར་འོངས་ཏེ། །དབང་པོ་དུལ་ཞེས་བྱ་བ་སྒོ་ན་འདུག །དབང་པོ་དུལ་བ་གཞན་ཡང་ཡོད་ཀྱི་སུ་ཡིན། ཐེ་ཚོམ་བཅད་དང་། འགྱོད་པ་མེད་དང་། ཟླ་སྒུར་ཞེས་སྨྲས་པས་སྒོ་ཕྱེ་སྟེ་ནང་དུ་ཞུགས་སོ། །དེ་ནས་གྲགས་པས་རྒན་རིམས་སུ་ཚེ་དང་ལྡན་པ་དག་ཨ་ལ་ལས་རུང་བ་རུང་ངམ། ཞེས་སོགས་སྔར་བཞིན་ལས་

དགེ་སློང་ཁ་ཅིག་ཅེས་མིང་མ་ཕྱུང་བར་བཟླས་ཏེ་རབ་ཏུ་སྤྱོད་དེ་དེ་བདག་ཅག་གིས་དོར་བར་བགྱིའོ་ཞེས་གཞི་བཅུ་རྒྱས་པར་བརྗོད་ནས་དེ་དག་གིས་ཀྱང་ཡང་དག་པར་བརྗོད་ནས་ཕྱིར་བྱུང་ནས་གཎྜི་བརྡུངས་ཏེ་ཡངས་པ་ཅན་གྱི་དགེ་སློང་རྣམས་བསྡུས་ཏེ་རྒན་རིམས་སུ་ཡངས་པ་ཅན་གྱི་དགེ་སློང་ཞེས་མིང་ཕྱུང་སྟེ་གཞི་བཅུ་རྒྱས་པར་བརྗོད་དེ་ཐམས་ཅད་ཀྱིས་དེ་དག་བདག་ཅག་གིས་དོར་བར་བྱའོ་ཞེས་བརྗོད་པས། བདུན་བརྒྱས་ཡང་དག་པར་བརྗོད་པ་ཞེས་གྲགས་སོ། །དེ་ལྟར་ན་དགོས་པ་རུང་མིན་གཞི་བཅུ་བསལ་བའི་ཕྱིར། དུས་སྟོན་པ་འདས་ནས་ལོ་བརྒྱ་དང་བཅུ་ན། གནས་ཡངས་པ་ཅན་གྱི་ཀུསྨ་པུ་རིའི་གཙུག་ལག་ཁང་དུ། སྦྱིན་བདག་ཆོས་རྒྱལ་མྱ་ངན་མེད་ཀྱིས་བྱས་ཏེ། དགྲ་བཅོམ་པ་བདུན་བརྒྱས་བསྡུ་བ་གཉིས་པ་བྱས་སོ། །