(གཉིས་པ། ཐེག་ཆེན་གྱི་ལུགས།)

གཉིས་པ་ཐེག་ཆེན་གྱི་ལུགས་ནི། རྒྱལ་པོའི་ཁབ་ཀྱི་ལྷོ་ཕྱོགས་བི་མ་ལ་སྭ་བྷ་ཝ་ཞེས་པའི་རི་ལ་རྒྱལ་སྲས་འབུམ་ཕྲག་བཅུ་འདུས་ཏེ། འཇམ་དཔལ་གྱིས་མངོན་པ། བྱམས་པས་འདུལ་བ། ཕྱག་ན་རྡོ་རྗེས་མདོ་སྡེ་བསྡུས་སོ་ཞེས་གྲག་གོ །རྟོག་གེ་འབར་བ་ལས་ཀྱང་། ཐེག་པ་ཆེན་པོ་སངས་རྒྱས་ཀྱིས་གསུངས་པ་ཡིན་ཏེ། རྩ་བའི་སྡུད་པར་བྱེད་པ་པོ་ཀུན་ཏུ་བཟང་པོ་དང་འཇམ་དཔལ་དང་གསང་བ་པའི་བདག་པོ་དང་བྱམས་པ་ལ་སོགས་པ་རྣམས་ཀྱིས་བསྡུས་པའི་ཕྱིར་རོ། །བདག་ཅག་གི་(སློབ་དཔོན་ལགས་ལྡན་འབྱེད་ཀྱི་དབུས་མའི་སྙིང་པོ་བསྡུས་པ་ཤུ་ལོག་བརྒྱད་ཅུ། དེའི་འགྲེལ་པ།)རྩ་བའི་སྡུད་པར་བྱེད་པ་ཉན་ཐོས་ནི། མ་ཡིན་ཏེ། ཐེག་པ་ཆེན་པོའི་གསུང་ནི། དེ་དག་གི་ཡུལ་མ་ཡིན་པའི་ཕྱིར་རོ་ཞེས་འབྱུང་ངོ་། །འབུམ་ཊིཀ་ཏུའང་ཕྱག་ན་རྡོ་རྗེ་ནི་སངས་རྒྱས་སྟོང་གི་བསྟན་པ་སྡུད་པ་པོར་གསང་བ་བསམ་གྱིས་མི་ཁྱབ་པར་བཤད་ཅིང་ཕྱག་ན་རྡོ་རྗེ་དབང་བསྐུར་བའི་རྒྱུད་ལས་ཀྱང་། ཕྱག་རྡོར་སྡུད་པ་པོར་བཤད་པས་ཕྱག་རྡོར་གྱིས་བྱམས་པ་ལ་སོགས་པ་རྣམས་ལ་འདི་སྐད་ཅེས་བསྡུས་པར་བཞེད་དོ། །