(གསུམ་པ། གནས་པའི་མཐར་འཇིག་ཅིང་ནུབ་པའི་ཚུལ།)

གསུམ་པ་ནུབ་པར་འགྱུར་ཚུལ་ནི། ཟླ་བ་སྙིང་པོས་ཞུས་པ་ལས། བཅོམ་ལྡན་འདས་དམ་པའི་ཆོས་འདི་ཐ་མར་ཇི་ལྟར་ནུབ་པར་འགྱུར། རྒྱུ་ཅི་ལས་ཉམས། སུས་མ་མཆིས་པར་བགྱིད་ཅེས་ཞུས་པ་ན། ང་འདས་པའི་འོག་ཏུ་ལོ་ལྔ་བརྒྱའི་བར་དུ་ངའི་བསྟན་པ་སྤྱོད་པའི་སེམས་ཅན་རྣམ་པར་གྲོལ་བ་མང་དུ་འབྱུང་། དེ་ནས་ལོ་ལྔ་བརྒྱའི་བར་དུ་ཏིང་ངེ་འཛིན་སྤྱོད་པའང་མང་དུ་འབྱུང་། རྒྱལ་པོ་དང་སེམས་ཅན་ཕལ་ཆེར་ཆོས་ལ་དད་ཅིང་སྤྱོད་པ་ནི་ཕྱིར་ཞིང་ཉུང་བར་འགྱུར་རོ། །དེ་ནས་ལྔ་བརྒྱའི་བར་དུ་དམ་པའི་ཆོས་སྟོན་ཅིང་སེམས་ཅན་འདྲེན་པ་དང་ཐར་པར་བྱེད་པའི་སློབ་དཔོན་མང་དུ་འབྱུང་ལ་ཉན་ཐོས་ཀྱི་དགྲ་བཅོམ་པ་ཉིད་ནི་ཉུང་བར་འགྱུར་རོ། །རྒྱལ་པོ་དང་སེམས་ཅན་ཕལ་ཡང་ཉན་པ་ཙམ་དུ་ཟད་ཀྱི་ཉམས་སུ་ལེན་ཅིང་སྤྱོད་པ་ལ་བརྩོན་འགྲུས་མི་བྱེད་ལ་དད་པ་འབྲི་བར་འགྱུར་རོ། །དམ་པའི་ཆོས་ཀྱི་སྲུང་མ་རྣམས་ཀྱང་མི་དགའ་

བར་འགྱུར་ཏེ་དམ་པའི་ཆོས་ལ་མ་དད་པ་རྣམས་ནི་སྔོན་བས་མཐུ་སྟོབས་སྐྱེའོ། །འཛམ་བུ་གླིང་གི་རྒྱལ་པོ་རྣམས་ཀྱང་ཕན་ཚུན་གཅིག་ལ་གཅིག་དམག་འདྲེན་ཅིང་འཁྲུག་པར་འགྱུར་རོ། །དེ་ནས་ལོ་ལྔ་བརྒྱའི་སུམ་བརྒྱར་ནི་དམ་པའི་ཆོས་སྤྱོད་པའི་ལྷ་ཀླུ་ལ་སོགས་པ་རྣམས་མི་གནས་ཤིང་སེམས་ཅན་རྣམས་ཆོས་ལ་མ་དད་པར་འགྱུར། ཆོས་སྤྱོད་པ་རྣམས་ཀྱང་ཆོས་ཀྱི་གཞུང་བཞིན་མི་སྤྱོད་པ་དང་བརྩོན་འགྲུས་ཆུང་བས་གྲུབ་པའང་ཉུང་བར་འགྱུར། ཁ་དོག་བཞི་དང་བཞི་ལས་གྱུར་པའང་དྲི་རོ་ལ་སོགས་པའང་ཆུང་བར་འགྱུར་རོ། །མི་ནད་དང་ཕྱུགས་ནད་དང་མུ་གེའང་འབྱུང་ངོ་། །ལོ་ཉིས་བརྒྱ་ལ་དགེ་སློང་ཡང་ཆོས་བཞིན་མི་སྤྱོད། འཇིག་རྟེན་གྱི་ཁེ་དང་གྲགས་པ་ཚོལ། སྙིང་རྗེ་ཆུང་ཚུལ་ཁྲིམས་ལ་མི་གནས། དམ་པའི་ཆོས་མ་ནོར་བར་སྤྱོད་པ་ལ་ནི་སྐུར་པ་འདེབས། ལོངས་སྤྱོད་དང་ཡོ་བྱད་འཕྲོག །འཇིག་རྟེན་གྱི་རྒྱལ་པོའི་གསང་ལ་བརྟེན་ཅིང་རྒྱལ་སྲིད་འཛིན། རྒྱལ་པོའི་འཕྲིན་པར་འགྲོ་ཞིང་ངོ་འཕྲད་ཚོལ། རྒྱལ་པོ་དང་འབངས་འབྱེད་པའི་དབྱེན་བྱེད། ཉོ་ཚོང་དང་ཁེ་སྤོགས་བྱེད་ཐབས་ཚོལ། དམ་པའི་ཆོས་སྤྱོད་པའང་སྙིང་ནས་ཉམས་སུ་བླངས་ཏེ་མི་སྤྱོད་ཀྱི་ཕལ་ཆེར་ཁ་གསག་དང་ཚུལ་འཆོས་བྱེད་དོ། །དེའི་དུས་ན་ཆོས་ལ་དགའ་བའི་ལྷ་ཀླུ་ཐམས་ཅད་ཀྱིས་ཁམས་ཀྱི་དགེ་སློང་འདི་ལྟར་སྤྱོད་པའི་ས་གཞི་དེ་བོར་ཏེ་མི་གནས་ཤིང་། བདུད་ཀྱི་རིས་ལ་སོགས་པ་ཆོས་ཀྱི་བགེགས་རྣམས་དེར་འབྱུང་སྟེ་མཐུ་དང་སྟོབས་སྐྱེ་བར་འགྱུར། རྒྱལ་པོ་དང་བློན་པོ་ལ་སོགས་པ་དད་པ་འབྲི། དགེ་སྡིག་གི་མཚམས་མི་ཟིན། དམ་པའི་ཆོས་ལ་རྨ་འབྱིན། དཀོན་མཆོག་གསུམ་གྱི་དཀོར་དང་དགེ་འདུན་གྱི་རྫས་ལ་རྐུ་འཕྲོག་བྱེད། སྡིག་པ་ལ་མི་འཛེམ་གཟུགས་བརྙན་དང་མཆོད་རྟེན་རྣམས་ཁད་ཀྱིས་བཤིག །མཆོད་པའི་ཡོ་བྱད་འབྲི། དེའི་ཚེ་དམ་པའི་ཆོས་མ་ནོར་བར་སྤྱོད་པའི་དགེ་སློང་དང་ཁྱིམ་པ་འགའ་གནས་པའི་བསོད་ནམས་ཀྱིས་ཡུལ་ཕྱོགས་སུ་ཁ་

༄༅།        །ཆར་དུས་སུ་འབབ་ཅིང་ལོ་ལེགས་པ་དང་མི་ནད་ཕྱུགས་ནད་ཉུང་ཞིང་ཡུལ་བདེ་བ་དག་ཀྱང་འབྱུང་ལ། དེ་ལྟ་བུ་མི་གནས་པ་ཕལ་ཆེར་ནི་སྡུག་བསྔལ་དང་མི་བདེ་བ་སྣ་ཚོགས་འབྱུང་ངོ་། །དེའི་དུས་སུ་རྒྱ་གར་དང་རྒྱ་མ་ཡིན་པའི་རྒྱལ་པོ་ཡ་བ་ན་དང་། བ་ལཱ་བ་དང་། ཤི་ཀུ་ན་ཞེས་བྱ་བ་གསུམ་འབྱུང་ཞིང་དེ་དག་དམ་པའི་ཆོས་བཞིན་མི་སྤྱོད་པར་དམག་འདྲེན་ཅིང་འཐབ་རྩོད་བྱེད་པས་ནུབ་དང་བྱང་གི་ཡུལ་ཁམས་མང་པོ་མེད་པར་བྱས་ཡུལ་ཁམས་དེའི་མཆོད་རྟེན་དང་གཙུག་ལག་ཁང་བཤིག །མེས་བསྲེགས་མཆོད་པའི་ཡོ་བྱད་དང་དཀོན་མཆོག་གི་དཀོར་ལ་སོགས་པ་འཕྲོག་བཅོམ་སྟེ། རྒྱལ་པོ་དེ་གསུམ་གཅིག་ལ་གཅིག་གནོད་པ་བྱེད་པས་གསུམ་ཆར་གྱི་རྒྱལ་སྲིད་མི་བདེ་བར་གྱུར་ནས་རེ་ཞིག་དེ་དག་མཛའ་འདུམ་སྟེ་སྲིད་གཅིག་ཏུ་བྱས་ཏེ་དམག་མང་པོ་བསྡུས་ནས། རྒྱ་གར་གྱི་ཡུལ་གཾ་གཱའི་ཚུ་རོལ་གནྡྷ་ར་དང་མ་ཧཱ་དེ་ཤ་ལ་སོགས་པ་འཕྲོག་ནས་འཛིན་པར་འགྱུར་རོ། །དེའི་ཚེ་གཾ་གཱའི་ཕ་རོལ་ལྷོ་ཕྱོགས་ན་ཀོའུ་ཤམྦྷིའི་ཡུལ་ན་རྒྱལ་པོ་མ་ཧེནྡྲ་སེ་ན་ཞེས་བྱ་བ་ལ་བུ་ཞིག་བཙས་པའི་མིང་དུ་པྲ་ས་ཧ་ཞེས་བྱ་བ་སྨིན་མཚམས་ན་ལྕགས་ཀྱི་རྨེ་བ་ཡོད་པ་ལག་པའི་གྲུ་མོ་མན་ཆད་ཁྲག་གིས་བསྐུས་པ་ཞིག་འབྱུང་ངོ་། །དེ་དང་དུས་མཉམ་དུ་བློན་པོ་ལྔ་བརྒྱ་ལ་བུ་ལག་པའི་མཁྲིག་མ་མན་ཆད་ཁྲག་ཅན་དུ་བྱས་པ་ལྔ་བརྒྱ་བཙའོ། །དེ་དག་དང་དུས་མཉམ་དུ་རྒྱལ་པོ་དེ་ལ་རྟེའུ་སྨྲ་ཤེས་པ་ཞིག་ཀྱང་འབྱུང་སྟེ། དེའི་ནུབ་མོ་ནམ་མཁའ་ལ་ཁྲག་གི་ཆར་འབབ་བོ། །རྒྱལ་པོས་དྲང་སྲོང་ལྔ་མངོན་པར་ཤེས་པ་ཅན་ཞིག་ལ་དེ་དག་གིས་མཚན་ལྟས་དྲིས་པས། དྲང་སྲོང་གིས་རྒྱལ་པོ་ཁྱོད་ཀྱི་བུས་འཛམ་བུའི་གླིང་གི་ས་གཞི་ལ་ཁྲག་གིས་གཤེར་བར་བྱས་ཏེ་དེའི་འོག་ཏུ་འཛམ་བུའི་གླིང་གི་རྒྱལ་པོ་བྱེད་པར་འགྱུར་རོ། །ཞེས་ལུང་བསྟན་ནོ། །དེ་ནས་རྒྱལ་བུ་བཙས་ནས་ལོ་བཅུ་གཉིས་ལོན་པ་དང་། སྔར་གྱི་རྒྱལ་པོ་ཡ་བ་

ན་ལ་སོགས་པ་གསུམ་འདུས་པའི་དམག་སུམ་འབུམ་རྒྱལ་པོ་དང་ཆས་ཏེ་རྒྱལ་པོ་མ་ཧེནྡྲ་སེ་ནའི་ཡུལ་དུ་དྲངས་པ་ན། དམག་བྱུང་བས་རྒྱལ་པོ་མི་དགའ་སྟེ་མྱ་ངན་བྱེད་ཅིང་འདུག་པ་ལ་བུ་དུ་པྲ་ས་ཧས་ཡབ་ལ་འདི་ལྟ་བུའི་ཐུགས་མི་དགྱེས་པ་ཅི་ལས་གྱུར་ཅེས་དྲིས་པ་དང་། ཕ་ན་རེ། རྒྱལ་པོ་གསུམ་གྱི་དམག་བྱུང་བས་མི་དགའོ། །ཞེས་སྨྲས་པ་དང་། བུས་ཡབ་མི་དགྱེས་སུ་མ་མཛད་ཅིག །དམག་འདི་དག་བདག་གིས་ཐུབ་པར་བགྱིའོ། །ཞེས་སྨྲས་པ་དང་ཕ་ན་རེ་ལེགས་སོ་ཞེས་ཟེར་ནས། དེ་ནས་རྒྱལ་བུ་དེ་བློན་པོའི་བུ་ཡ་མཚན་ཅན་ལྔ་བརྒྱ་ལ་སོགས་པ་དམག་ཉིས་འབུམ་དང་ཆས་ནས་འཐབ་མོ་བྱས་པའི་ཚེ་སྨིན་མཚམས་ནས་ལྕགས་ཀྱི་སྨེ་བ་བསྐྱེད་ནས་ལུས་རིལ་གྱིས་ལྕགས་སུ་བྱས་ཏེ་རབ་ཏུ་ཁྲོས་ནས་བརྒལ་བ་དང་། དུ་པྲ་ས་ཧའི་དམག་རྒྱལ་ཏེ་ཕྱིར་ལོག་པ་དང་། ཕ་ན་རེ། བུ་ཁྱོད་ཀྱིས་རྒྱལ་པོ་གསུམ་གྱི་དམག་འདི་ལྟ་བུ་དང་འཐབ་པ་ལས་རྒྱལ་བ་ལེགས་སོ། །ད་ཕྱིན་ཆད་ཁྱོད་ཀྱིས་རྒྱལ་སྲིད་ཟུངས་ཤིག །ང་ནི་རབ་ཏུ་འབྱུང་ངོ་ཞེས་བསྒོས་ནས་རྒྱལ་སྲིད་བུས་བཟུང་ངོ་། །དེ་ནས་ལོ་བཅུ་གཉིས་ཀྱི་བར་དུ་རྒྱལ་པོ་གསུམ་གྱི་དམག་དང་འཐབ་པ་ལས་དམག་མང་པོའང་རིམ་གྱིས་གཏུགས། རྒྱལ་པོ་གསུམ་ཡང་བཟུང་ནས་མེད་པར་བྱས་སོ། །དེ་ཕན་ཆད་འཛམ་བུ་གླིང་གི་རྒྱལ་པོ་ཆེན་པོ་བྱས་པར་གྱུར་ཏོ། །དེ་ནས་རྒྱལ་པོས་བློན་པོ་རྣམས་ལ་ང་འཛམ་བུའི་གླིང་གི་རྒྱལ་པོ་བྱེད་པ་ནི་དགའ་ན། སེམས་ཅན་མང་པོ་འདི་སྙེད་ཅིག་བསད་པས་སྡིག་པ་ཆེ་བས་མི་དགའ་བས་སྡིག་པ་འདི་ཇི་ལྟ་བུ་བྱས་ན་འབྱང་བར་འགྱུར་ཞེས་དྲིས་པ་དང་། བློན་པོ་རྣམས་ན་རེ་ཡུལ་པ་ཊ་ལི་པུ་ཏ་ན་ཆོས་ཀྱི་མཁན་པོ་སྡེ་སྣོད་གསུམ་ཤེས་པ་ཞེས་པ་བྲམ་ཟེ་ཨ་ཀ་ན་དྲ་དྷའི་བུ་སློབ་མ་ཅན་ཞེས་བགྱི་བ་ཞིག་དགོན་པ་ན་གནས་པ་དེ་སྤྱན་དྲངས་ན་སྡིག་པ་འབྱང་བར་བགྱིད་ནུས་སོ་ཞེས་ཟེར་བ་དང་། རྒྱལ་པོ་དགའ་ནས་དགེ་སློང་སློབ་མ་ཅན་སྤྱན་དྲངས་ནས་རྒྱལ་པོས་ཕྱག་བྱས་ཏེ་སྡིག་པ་

༄༅།        །རྣམས་ཐབས་ཅི་ཞིག་གིས་འབྱང་ཞེས་ཞུས་པ་དང་། དེས་དཀོན་མཆོག་གསུམ་ལ་ལོ་བཅུ་གཉིས་སུ་མཆོད་ཅིང་སྐྱབས་སུ་གསོལ་ན་སྡིག་པ་འབྱང་ངོ་ཞེས་བྱས་སོ། །དེ་ནས་འཛམ་བུའི་གླིང་ན་དགེ་སློང་འདུག་གོ་ཅོག་ལ་འགུགས་པ་བཏང་སྟེ་ཐམས་ཅད་ཀོའུ་ཤཾ་བྷིར་བསྡུས་ནས་ཡུལ་གཞན་དུ་ཆོས་སྤྱོད་དུ་མི་སྟེར་བར་གྱུར་ཏོ། །དགེ་སློང་རྣམས་ཀྱང་ལམ་དུ་གཅན་གཟན་དང་མི་རྒོད་དང་ཆུ་ལ་སོགས་པས་ཕལ་ཆེར་ཆུད་ཟོས་ནས་རྒྱལ་པོའི་དྲུང་དུ་འབུམ་ཙམ་ཞིག་གིས་ཕྱིན་པར་གྱུར་ཏོ། །དེ་དག་ཕྱིན་པ་དང་རྒྱལ་པོས་མཆོད་སྟོན་གསོལ་ཡོན་ཕུལ་ཏེ་མཆོད་དོ། །དེ་ནས་དགེ་འདུན་རྣམས་ཕན་ཚུན་ཁྱོད་ཀྱི་མཁན་པོ་ག་རེ། སློབ་མ་གར་སོང་གྲོགས་པོ་ཁྲིམས་ཟླ་ག་རེ་ཞེས་སོ་སོར་གཏམ་དྲིས་པ་དང་། གཅན་གཟན་དང་མི་རྒོད་ཀྱིས་བསད་པ་དང་ཆུས་ཁྱེར་བ་དང་ནད་ཀྱིས་བཏབ་སྟེ་ཤི་བ་ལ་སོགས་པའི་གཏམ་བྱས་པས་སོ་སོ་ནས་མྱ་ངན་ལངས་ཏེ་ངུ་མོ་འདེབས་ཤིང་བྲང་བརྡུངས་པར་གྱུར་ཏོ། །དེ་ནས་རྒྱལ་པོས་མྱ་ངན་མ་བྱེད་ཅེས་བསྒོས་པར་དགེ་འདུན་རྣམས་ཀྱིས་མ་ཉན་པ་དང་རྒྱལ་པོའང་མི་དགའ་སྟེ་འོག་ཏུ་ཁ་ཕྱོགས་ཏེ་ཉལ་ལོ། །ཉལ་བའི་ཚེ་ད་འཇིག་རྟེན་གྱི་དགེ་འདུན་ལ་ནི་སྐྱབས་མ་བྱུང་གི་དགྲ་བཅོམ་པའི་ཞལ་མཐོང་བར་ཤོག་ཤིག་ཅེས་སྨོན་ལམ་བཏབ་པ་དང་། འཇིག་རྟེན་གྱི་ལྷས་རྨི་ལམ་དུ་གནྡྷ་མ་ཧཱ་ནའི་རི་ལ་སུ་རཏྣ་ཤའི་བུ་དེས་པ་ཞེས་བྱ་བ་དགྲ་བཅོམ་པ་ཞིག་བཞུགས་ཏེ་དེ་སྤྱན་དྲངས་ན་སྡིག་པ་འབྱང་ཞིང་ཐེ་ཚོམ་ཡང་སེལ་བར་འགྱུར་རོ་ཞེས་ལུང་བསྟན་པ་དང་། རྒྱལ་པོའི་རྨི་ལམ་བཞིན་དུ་སད་མ་ཐག་ཕོ་ཉ་བཀྱེ་སྟེ་འཕགས་པ་སྤྱན་དྲངས་ཏེ་མཆོད་ཅིང་ཕྱག་བྱས་སོ། །དེ་ནས་ཚེས་བཅུ་བཞིའི་ནུབ་མོ་དགེ་འདུན་འདུས་པའི་ནང་ནས་དགེ་སློང་གསར་ཞུགས་རྣམས་ཀྱི་མཁན་པོ་སློབ་མ་ཅན་ལ་འདུལ་བ་བཤད་པར་གསོལ་བ་དང་། སློབ་མ་

ཅན་ན་རེ་མི་ལ་མིག་ཞར་སྣ་དང་རྣ་བ་མེད་ན་མེ་ལོང་གིས་ཅི་བྱར་ཡོད། འདུལ་བ་བཤད་ཀྱང་ཁྱེད་འདུལ་བ་བཞིན་མི་སྤྱོད་ཆོས་ཁྲིམས་མི་སྲུང་བ་ལ་འདུལ་བ་བཤད་པས་ཅི་ཕན་ཟེར་བ་དང་། དགྲ་བཅོམ་པ་དེས་བས་སེང་གེའི་སྒྲ་བཞིན་དུ་ངས་སངས་རྒྱས་བཅོམ་ལྡན་འདས་ཀྱི་ཆོས་ཁྲིམས་མནོས་ནས་ད་ཙམ་གྱི་བར་དུ་རྩྭ་མཆོག་ཙམ་ཡང་མ་ཉམས་ན་དེ་སྐད་མ་ཟེར་བར་འདུལ་བ་ཤོད་ཅེས་སྨྲས་པ་དང་། མཁན་པོ་སློབ་མ་ཅན་གྱིས་དགྲ་བཅོམ་པ་ཡིན་པར་ཤེས་ནས་རབ་ཏུ་གནོང་སྟེ་ཅང་མི་སྨྲ་བར་འདུག་གོ །དེ་ནས་སློབ་མ་ཅན་གྱི་སློབ་མ་དགེ་སློང་དཔུང་རྒྱན་ཞེས་བྱ་བ་སྟན་ལས་ལངས་ཏེ་དགྲ་བཅོམ་པ་ལ་ཁྱོད་ཁྲིམས་ཀྱང་མེད་འདུལ་བ་ཡང་མི་ཤེས་པར་ངའི་མཁན་པོ་སྡེ་སྣོད་གསུམ་ལ་མཁས་པ་ལ་ཅིའི་ཕྱིར་བརྙས་ཞེས་ཁྲོས་ནས་དགྲ་བཅོམ་པ་བརྡེགས་ཏེ་བསད་དོ། །དེ་ནས་དམ་པའི་ཆོས་ལ་དགའ་བའི་གནོད་སྦྱིན་ཞོ་གདོང་ཞེས་བྱ་བས་རྡོ་རྗེ་ཐོགས་ཏེ་མངོན་དུ་བྱུང་ནས་དགེ་སློང་དཔུང་རྒྱན་ཅན་ལ་ཅིའི་ཕྱིར་དགྲ་བཅོམ་པ་གསོད་ཅེས་ཟེར་ནས་རྡོ་རྗེས་བརྡེགས་ཏེ་བསད་དོ། །དགེ་སློང་གེ་རད་ཅེས་བྱ་བས་སློབ་མ་ཅན་བསད་དོ་ཞེས་འབྱུང་ངོ་། །དེ་ནས་དགེ་སློང་ཐམས་ཅད་ཕན་ཚུན་གཅིག་གིས་གཅིག་བསད་དེ་གཅིག་ཀྱང་མ་ལུས་སོ། །དེའི་ཚེ་ནམ་མཁའ་ལ་ལྷ་ཀླུ་ལ་སོགས་པ་ཆོས་ཀྱི་སྲུང་མ་ཕལ་པོ་ཆེ་མི་དགའ་ནས་ངུས་པའི་མཆི་མ་ནི་ཁྲག་དང་མེའི་ཆར་དུས་གཞི་དེར་འབབ་བོ། །ནམ་མཁའང་སེར་པོ་དང་ནག་པོ་དང་དམར་པོར་གྱུར་གློག་དང་སྒྲ་ཆེན་པོ་ཡང་འབྱུང་། སྐར་མ་དྷུ་མ་ཀེ་ཏུ་ཞེས་བྱ་བའི་ལུས་ལས་དུ་བ་ནག་པོ་ཞིག་བྱུང་སྟེ་ཉི་ཟླ་ལ་སོགས་པའི་འོད་ཀྱང་མི་སྣང་ངོ་། །དེའི་ཚེ་སུམ་ཅུ་རྩ་གསུམ་གྱི་ལྷ་དང་ཡུམ་སྒྱུ་འཕྲུལ་ཆེན་མོ་ལ་སོགས་པ་འོངས་ནས་མྱ་ངན་བྱེད་ཅིང་དགེ་འདུན་གྱི་གོས་ཚོན་ཅན་ཐམས་ཅད་བསྡུས་ཏེ་སུམ་ཅུ་རྩ་གསུམ་དུ་ཁྱེར་རོ། །དེ་ནས་རྒྱལ་པོས་འདི་ལྟ་བུའི་ཅ་ཅོ་

༄༅།        །ཆེན་པོ་ཅི་ལས་བྱུང་ཞེས་དྲིས་པས་དགེ་འདུན་འཁྲུགས་ནས་གཅིག་གིས་གཅིག་བསད་པར་གྱུར་ཏོ་ཞེས་གསོལ་བ་དང་རྒྱལ་པོ་མ་དགའ་ནས་ལངས་ཏེ་ཐོ་རངས་ཕྱི་རོལ་གྱི་ལྷ་ཁང་དུ་བལྟར་ཕྱིན་པ་དང་དགེ་འདུན་ལ་ལ་ནི་མགོ་བཅད། ལ་ལ་ནི་རྐང་ལག་བཅད། ཁ་ཅིག་ནི་མིག་ཕྱུང་སྟེ་སྣ་ཚོགས་སུ་ཤི་བ་མཐོང་ནས་མྱ་ངན་ལངས་ཏེ་དགྲ་བཅོམ་པ་དང་སྡེ་སྣོད་གསུམ་པ་སློབ་མ་ཅན་གྱི་བུར་བཙལ་ཏེ་མཚན་ཁུང་གཡས་གཡོན་དུ་བཅུག་ནས་དགྲ་བཅོམ་པ་ནི་ངའི་མ་ཡིན། སྡེ་སྣོད་གསུམ་པ་ནི་ཆོས་ཀྱི་མཛོད་ཡིན་ཏེ་འདི་གཉིས་འདས་པས་ད་ཕྱིན་ཆད་ངའི་སྲོག་ཀྱང་གཅེས་པ་མེད་དོ། །རྒྱལ་སྲིད་ཀྱང་སུ་འདོད་པ་ལ་སྦྱིན་ནོ་ཞེས་སྨྲས་ནས་མིག་ཀྱང་བཙུམས་ཏེ་མི་བལྟ་བར་གྱུར་ཏོ། །དེ་ནས་བློན་བོ་རྣམས་ཀྱིས་རྒྱལ་པོའི་མྱ་ངན་སངས་པའི་ཕྱིར་མི་ལྔ་བརྒྱར་རབ་ཏུ་བྱུང་བར་བཅོས་ཏེ། སྐྲ་དང་ཁ་སྤུ་བྲེག་ཏུ་སྤུ་གྲིས་མ་ཆོད་ནས་མེས་བསྲེགས་ཏེ་ཕྱུགས་སེར་པོ་དང་དམར་པོའི་ཀོ་བ་བསྐོན་ཏེ་རྒྱལ་པོའི་དྲུང་དུ་འོང་ནས་རབ་ཏུ་བྱུང་བ་ལྔ་བརྒྱ་འོངས་སོ་ཞེས་གསོལ་བ་དང་རྒྱལ་པོ་དགའ་ནས་མིག་ཕྱེ་སྟེ་བལྟས་པས་ཐམས་ཅད་ཕྱུགས་ཀྱི་ཀོ་བ་གོན་ཞིང་སྐྲ་དང་ཁ་སྤུ་མེས་བསྲེགས་པ་མཐོང་ནས། དཀོན་མཆོག་གསུམ་ལ་མཆོད་པའི་ཡོ་བྱད་ཁྱེར་ལ་ཤོག་ཅེས་བསྒོས་ནས་དེ་རྣམས་ལ་མཆོད་དོ། །དེ་ནས་རྒྱལ་པོས་དེ་དག་ལ་ཆོས་དྲིས་པས་ཆོས་ཚིག་གཅིག་ཀྱང་མི་ཤེས་ནས་རྒྱལ་པོའང་མྱ་ངན་ལངས་ཏེ་ངུའོ། །དེ་ནས་དགེ་སློང་རྣམས་ཀྱི་རོ་ཐམས་ཅད་བསྡུས་ཏེ་བསྲེགས་ནས་མཆོད་པ་བྱེད་དོ། །དེའི་ཚེ་འཛམ་བུ་གླིང་གི་དམ་ཆོས་རིལ་ནུབ་བོ། །དེ་ནས་གསེར་ནི་དངུལ་ངན་པ་དང་རྡོར་འགྱུར། དངུལ་ནི་ར་གན་ངན་པ་དང་རྡོར་འགྱུར་རོ། །ར་གན་ནི་ཟངས་སུ་འགྱུར། མུ་ཏིག་ནི་རྭ་རུ་འགྱུར། རོ་དྲུག་ལས་ཁ་བ་དང་སྐྱུར་བ་གཉིས་ལུས་སོ་ཞེས་འབྱུང་ངོ་། །དགེ་འདུན་འཕེལ་གྱིས་ལུང་བསྟན་པ་ལ་སོགས་ལས།

སྐུ་ལུགས་མ་ལ་སོགས་པ་ནི་ཀླུའི་ཡུལ་དུ་སྤྱན་འདྲེན་ནོ། །ཡི་གེ་ཐམས་ཅད་རང་བྱི་བར་འགྱུར་རོ། །གོས་ཐམས་ཅད་རྩུབ་མོར་འགྱུར། རོ་ཁ་བ་དང་བསྐ་བ་མ་གཏོགས་པ་དང་རིན་པོ་ཆེ་ཐམས་ཅད་ནུབ་པར་འགྱུར་ལ། རྒྱལ་པོ་དེའང་བསྟན་པ་ནུབ་པའི་མྱ་ངན་གྱིས་འཆི་བར་འགྱུར་རོ། །ཞེས་བཤད་དོ། །དེ་དག་ཀྱང་བསྟན་པ་ལོ་ཉིས་སྟོང་གི་དབང་དུ་བྱས་ནས་གསུངས་ལ། མངོན་རྟོགས་རྒྱན་གྱི་འགྲེལ་བཤད་ཆོས་ཀྱི་བཤེས་གཉེན་གྱིས་མཛད་པར། དེ་དག་སྔར་བྱུང་ཟིན་པར་བཤད་པར་གསལ་ལོ། །སྤྱིར་བསྟན་པ་ནུབ་པའི་རྒྱུ་སངས་རྒྱས་ཀྱི་སྨོན་ལམ་གྱི་འཕེན་པ་ཟད་པ་དང་བསྟན་པའི་གདུལ་བྱ་ཟད་པ་ཡིན་ལ། རྐྱེན་ནི་མདོ་དག་ལས་དགེ་སྦྱོང་རྣམས་རང་གི་ལྟ་སྤྱོད་ལས་ཉམས་པ་དང་། སྦྱིན་བདག་རྣམས་བསྟན་པ་ལ་དད་པ་བྲི་བ་དང་། བདུད་དང་བདུད་ཀྱི་རིས་ཀྱི་ལྷ་དང་ཡི་དྭགས་ཀྱིས་བར་ཆད་བྱས་པ་གསུམ་གྱིས་ནུབ་པར་འགྱུར་བར་གསུངས་པ་ལ་སྟོན་པ་འདིའི་བསྟན་པ་འཇིག་པའི་རྐྱེན་དང་པོ་གཉིས་སུ་གསལ་ལོ་གསུང་ངོ་། །ནུབ་དུས་ཚེ་ལོ་བཞི་བཅུ་པའི་དུས་སུ་ནུབ་པར་གདགས་པ་ལས་བཤད་ཟེར་རོ། །ཆག་ན་རེ་སུམ་ཅུ་པའི་དུས་སུ་ཟེར་ཏེ་ཤེས་བྱེད་མ་མཐོང་ངོ་། །སྙིང་རྗེ་པད་དཀར་ལས། དེ་བཞིན་གཤེགས་པ་ཤཱཀྱ་ཐུབ་པའི་དམ་པའི་ཆོས་ནུབ་པའི་རྗེས་ལ་སྐུ་གདུང་རྣམས་འོག་ཏུ་གསེར་གྱི་ས་གཞིའི་མཐར་ཐུག་པར་འགྲོ་ཞིང་ནམ་མི་མཇེད་ཀྱི་འཇིག་རྟེན་དུ་རིན་པོ་ཆེས་འཕོངས་པའི་ཚེ་སྐུ་གདུང་དེ་དག་ནོར་བུ་བཻ་ཌཱུརྱ་ཏོག་གི་བློ་གྲོས་ཞེས་བྱ་བར་གྱུར་ནས་དབུལ་བ་སེལ་བ་དང་། དེ་ནས་ཡང་སྐུ་གདུང་དེ་དག་སྟེང་དུ་ཡང་འོག་མིན་གྱི་བར་དུ་འཕགས་ནས་མེ་ཏོག་སྣ་ཚོགས་ཀྱི་ཆར་འབེབས་ལ། མེ་ཏོག་གི་ཆར་པ་དེ་དག་ལས་དཀོན་མཆོག་གསུམ་གྱི་སྒྲ་ལ་སོགས་པ་ཆོས་ཀྱི་སྒྲ་སྣ་ཚོགས་འབྱུང་ཞིང་། ཆོས་ཀྱི་སྒྲ་དེ་རྣམས་འདོད་གཟུགས་ཀྱི་ལྷ་རྣམས་ཀྱིས་ཐོས་པས་སྔོན་བྱས་པའི་དགེ་བ་དྲན་ནས་

༄༅།        །དེ་དག་འཛམ་བུའི་གླིང་དུ་བབས་ཏེ་མི་རྣམས་དགེ་བ་བཅུ་ལ་འགོད་པར་འགྱུར་བ་དང་། ཡང་མེ་ཏོག་ནམ་མཁའ་ལ་རིན་པོ་ཆེ་སྣ་ཚོགས་སུ་གྱུར་ནས་མི་མཇེད་དུ་བབ་ཅིང་། མི་མཇེད་ཀྱི་སེམས་ཅན་རྣམས་ཀྱི་འཐབ་རྩོད་ལ་སོགས་པ་རྣམས་ཞི་ཞིང་ནད་མེད་པ་དང་ལོ་ལེགས་པ་ལ་སོགས་པ་དང་། སེམས་ཅན་གང་གིས་རིན་པོ་ཆེ་དེ་དག་མཐོང་བ་དང་རེག་པ་དང་ལོངས་སྤྱོད་པ་དེ་དག་ཀྱང་ཐེག་པ་གསུམ་ལས་ཕྱིར་མི་ལྡོག་པར་བྱས་ཏེ་སླར་ཡང་སྐུ་གདུང་དེ་དག་གསེར་གྱི་ས་གཞིའི་མཐར་ཐུག་བར་གནས་པར་འགྱུར་རོ། །དེ་བཞིན་དུ་མཚོན་དང་མུ་གེ་དང་ནད་ཀྱི་བསྐལ་བ་བར་མ་གསུམ་འབྱུང་བའི་དུས་སུའང་སྐུ་གདུང་དེ་དག་ནོར་བུ་རིན་པོ་ཆེ་ཨནྡ་རྙིལ་དུ་གྱུར་ནས་སྟེང་དུ་འོག་མིན་གྱི་བར་དུ་འཕགས་ནས་གནས་ཏེ་སྔ་མ་ལྟར་མེ་ཏོག་གི་ཆར་འབེབས་ཤིང་ཆོས་ཀྱི་སྒྲ་སྒྲོག་པ་དང་། རིན་པོ་ཆེའི་ཆར་འབེབས་པ་དང་མི་མཐུན་པའི་ཕྱོགས་རྣམས་ཞི་བར་བྱས་ཏེ་སླར་ཡང་གསེར་གྱི་ས་གཞིའི་མཐར་ཐུག་པར་གནས་པར་འགྱུར་བར་གསུངས་ལ། དགའ་བའི་བཤེས་གཉེན་གྱི་རྟོགས་བརྗོད་ལས། འཛམ་བུའི་གླིང་པའི་མི་རྣམས་ཀྱི་ཚེ་ལོ་བདུན་བརྒྱ་པར་གྱུར་པ་ན། གནས་བརྟན་ཆེན་པོ་བཅུ་དྲུག་གིས་སའི་སྟེང་ན། སངས་རྒྱས་ཤཱཀྱ་ཐུབ་པའི་བསྟན་པའི་ཆོས་ཀྱི་ཚོགས་ཇི་སྙེད་བཞུགས་པ་ཐམས་ཅད་གཅིག་ཏུ་བསྡུས་ནས་རིན་པོ་ཆེ་སྣ་བདུན་གྱི་མཆོད་རྟེན་བྱས་ཏེ་དེར་བཞུགས་པ་ལ་ཀུན་ནས་བསྐོར་ཏེ་སྐྱིལ་ཀྲུང་བཅས་ཏེ་འདུག་ནས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་ལ་ཕྱག་འཚལ་ལོ་ཞེས་བརྗོད་དེ་ཕྱག་བྱས་ནས་གནས་བརྟན་དེ་དག་ཀྱང་ལྷག་མེད་དུ་མྱ་ངན་ལས་འདའ་ལ་རིན་པོ་ཆེ་སྣ་བདུན་གྱི་མཆོད་རྟེན་དེ་ཡང་ནུབ་ནས་འོག་གི་གསེར་གྱི་ས་གཞི་ལ་གནས་བར་འགྱུར་ཞིང་དེ་ནས་བཅོམ་ལྡན་འདས་ཤཱཀྱ་ཐུབ་པའི་བསྟན་པ་དམ་པའི་

ཆོས་ནུབ་པར་འགྱུར་རོ། །དེ་ནས་དེའི་རྗེས་ལ་རང་སངས་རྒྱས་བྱེ་བ་ཕྲག་བདུན་འཇིག་རྟེན་དུ་འབྱུང་བར་འགྱུར་རོ། །དེ་ནས་སྐྱེ་དགུ་རྣམས་ཀྱིས་ཚེ་ལོ་བརྒྱད་ཁྲི་ཐུབ་པ་ན་དེ་བཞིན་གཤེགས་པ་བྱམས་པ་འཇིག་རྟེན་དུ་འབྱུང་ངོ་ཞེས་བཤད་དོ། །བྱང་ཆུབ་སེམས་དཔའི་སྡེ་སྣོད་ལས། ཚེ་ལོ་བཅུ་པ་ནས་བྱམས་པ་མ་བྱོན་གྱི་བར་བསྐལ་པ་ཡར་འཕེལ་ལ་རང་སངས་རྒྱས་བརྒྱད་ཁྲི་འབྱུང་བར་གསུངས་སོ། །ཁ་ཅིག་དེ་བཞིན་གཤེགས་པ་ཤཱཀྱ་ཐུབ་པ་མྱ་ངན་ལས་འདས་ནས་ལོ་བྱེ་བ་ཕྲག་ལྔ་བཅུ་རྩ་བདུན་ན་སངས་རྒྱས་བྱམས་པ་འབྱུང་ངོ་ཟེར་རོ། །རྒྱལ་བའི་བསྟན་པ་ནོར་བུ་རིན་ཆེན་སྒྲོན། །དགེ་ལེགས་ཡོན་ཏན་ཀུན་གྱི་གཏེར་གྱུར་པ། །དུས་ཀྱི་དབང་གིས་ཡོངས་སུ་གཏུགས་གྱུར་ཅིང་། །མེ་ཏོག་རླན་དང་བྲལ་བ་བཞིན་དུ་ཉམས། །ད་ནི་བསྟན་པ་རིང་དུ་མི་གནས་ཤིང་། །ཚེ་ནི་མི་བརྟན་རླུང་ནང་མར་མེ་བཞིན། །ལས་ཉོན་འཆི་བདག་བདུད་ནི་སྟོབས་ལྡན་པས། །བསྟན་ལ་བག་ཡོད་བྱོས་དང་རིན་ཆེན་གྲུབ། །ཚུལ་འདི་ཤཱཀྱའི་སྲས་ཀྱི་དགེ་སློང་གང་། །ཚེ་འདིའི་དབང་གྱུར་ཡང་དག་ཏིང་འཛིན་བྲལ། །ནེ་ཙོ་ལྟ་བུའི་བུ་སྟོན་ཁ་ཆེས་བྲིས། །དགེ་བས་མྱུར་དུ་མི་ཕམ་ཞལ་མཐོང་ཤོག །ཆོས་ཀྱི་འབྱུང་གནས་གསུང་རབ་རིན་པོ་ཆེའི་མཛོད་ལས། སྤྱིར་འཇིག་རྟེན་དུ་ཆོས་བྱུང་ཚུལ་གྱི་ལེའུ་སྟེ་གཉིས་པའོ། །      ། །