(མཁན་སློབ་བོད་དུ་གདན་དྲངས་ཚུལ།)

གསལ་སྣང་གིས་མང་ཡུལ་དུ་མ་བསྡད་པར་རྒྱ་གར་དུ་ཕྱིན་ནས་མ་ཧཱ་བྷོ་དྷི་དང་། ཤྲཱི་ན་ལེནྡྲ་ལ་མཆོད་པ་བྱས། བལ་ཡུལ་དུ་མཁན་པོ་བོ་དྷི་ས་ཏྭ་ལ་མཇལ་ཏེ་མང་ཡུལ་དུ་སྤྱན་དྲངས་ནས་གཙུག་ལག་ཁང་བཞེངས་སེམས་བསྐྱེད་དེ་ཡེ་ཤེས་དབང་པོ་ཞེས་མིང་

༄༅།        །བཏགས་སོ། །སློབ་དཔོན་བོད་དུ་བྱེན་པར་ཞུས་པས་ལུང་བསྟན་ཅིང་ཞལ་གྱིས་བཞེས་ཏེ་བལ་པོར་གཤེགས་སོ། །སྦས་ཆོས་བསླབ་སྟེ། ཕོ་བྲང་རླུང་ཚུབས་སུ་རྒྱལ་པོ་དང་མཇལ་ཏེ་ཆོས་ཀྱི་བཀའ་མཆིད་བྱས། བོ་དྷི་ས་ཏྭའི་ལོ་རྒྱུས་བསྙད་པས། ཁྱོད་ཡིབས་ཤིག །ངས་ཞང་ཉ་བཟང་ཁད་ཀྱིས་གསོལ་དུ་གཞུག་གོ་གསུངས་ནས། ཞང་ཉ་བཟང་དང་འགོས་ཁྲི་བཟང་ལ་སོགས་པ་ཆོས་ལ་དགའ་བའི་བློན་པོ་ཀུན་ལ་ཆོས་བྱེད་པར་མོལ་བཏབ་པས། ཉ་བཟང་ན་རེ༏ མ་ཞང་དབང་ཆེ་ལ་ཆོས་ལ་གནག་པས་མི་འགྲུབ་མཆི་ཟེར། འགོས་ན་རེ། ཐབས་བགྱི་བར་རྔོ་ཐོགས། ཁོ་བོའི་གཏིང་གནོན་སླད་ཀྱིས་མཛོད་ཅིག་ཟེར་རོ། །རྒྱལ་བློན་ཆད་བྱས་ཏེ་འགོས་ཀྱིས་བློ་བཏོན་ནས་མ་ཞང་གྲོམ་པ་སྐྱེས་གསོན་པོར་དུར་དུ་བཅུག་སྟེ་ཁ་ཕ་བོང་གིས་བཅད་དོ། །དེ་ནས་ཡེ་ཤེས་དབང་པོ་ཨཱ་ཙརྱ་བོ་དྷི་སཏྭ་སྤྱན་འདྲེན་དུ་བཏང་། ལང་གྲོང་སྣ་ར་དང་། གཉེར་སྟག་བཙན་སྟོང་གཟིགས་དང་། སྦྲང་རྒྱ་ར་ལེགས་གཟིགས་གསུམ་བསུ་རུ་བཏང་ངོ་། །མང་ཡུལ་དུ་མཇལ་ནས་ལང་གྲོང་སྣ་ར་དང་ཨཱ་ཅརྱ་དེར་བཞག་ནས། ཕོ་བྲང་དུ་རྗེ་ལ་ཞེས་ཕུལ་བས་ཞང་བློན་རྣམས་ན་རེ་ལྷོ་བལ་གྱི་ངན་སྔགས་བྱེད་མི་བྱེད་བརྟག་དགོས་ཟེར་ཏེ། སང་ཤི་དང་། སེང་གོང་ལྷ་ལུང་གཟིགས་དང་། མཆིམས་མེ་ལེན་གསུམ་བཏང་བས་སྐད་མ་ཤེས་ཏེ། ཁ་ཆེ་ཨཱ་ནནྟ་ལ་ལོ་ཙྪ་བཅོལ་ཏེ་ཨཱ་ཙརྱ་ཇི་འདྲ་དྲིས་པས་བཟང་པོ་ཞིག་སྟེ་ཐུགས་འཕྲིག་མི་འཚལ་ཟེར་ནས་ཕོ་བྲང་དུ་སྤྱན་དྲངས་ཏེ་ཁ་ཆེ་ཨ་ནནྟས་ལོ་ཙ་བྱས་ཏེ་ཕོ་བྲང་རླུང་ཚུབས་སུ་ཟླ་བ་བཞིར་དགེ་བ་བཅུ་ཁམས་བཅོ་བརྒྱད་རྟེན་འབྲེལ་བཅུ་གཉིས་ཀྱི་ཆོས་བཤད་པས་བོད་ཀྱི་ལྷ་སྲིན་ཁྲོས་ཏེ་འཕང་ཐང་ཆུས་ཁྱེར། དམར་པོ་རི་ལ་ཐོག་རྒྱབ། མི་ནད་ཕྱུགས་ནད་བྱུང་བས་བོད་འབངས་ཡོ་ལོག་ནས་ཆོས་བྱས་པས་ལན་ཟེར་ཏེ་ཨཱ་ཙརྱ་བལ་བོར་བཏང་ངོ་། །དེ་ནས་རིང་ཞིག་

ནས་སྦ་གསལ་སྣང་རྒྱ་ཡུལ་དུ་ཆོས་ཚོལ་དུ་བཏང་ངོ་། །སང་ཤི་ལ་སོགས་པ་སུམ་ཅུ་ཨཱ་ཙརྱ་སྤྱན་འདྲེན་དུ་བཏང་ངོ་། །དེའི་ཚེ་རྒྱའི་ཧྭ་ཤང་ན་རེ་ད་ཟླ་དྲུག་ཞག་དྲུག་ན་འཕགས་པ་རྟ་སྐད་ཀྱི་སྤྲུལ་པ་འདི་འདྲ་ཞིག་འོང་ཞེས་འབག་བྱས་ཤིང་སླེབ་པ་དང་རྒྱ་རྗེས་བྱ་དགའ་བྱིན་ཧྭ་ཤང་ལ་སྒོམ་ལུང་བླངས་ཏེ་འཁོར་བ་ན་སྐྱེས་ཕུལ་ལོ། །ཨཱ་ཙརྱ་ད་རུང་སྤྱན་མ་འདྲོངས་པར་ཁྱོད་སོང་ཞིག་གསུངས་ནས་བལ་བོར་ཕྱིན་ནས་ཨཱ་ཙརྱ་སྤྱན་དྲངས་ཏེ་བྲག་དམར་འགྲིང་བཟང་དུ་ཕྱིན་ཏེ། རྒྱལ་པོ་ལ་བོད་ཀྱི་ལྷ་སྲིན་མི་ཐུལ་བས་ཆོས་བྱེད་མི་སྟེར་ཞིང་བཙན་པོ་སྐུ་ཚེ་ཐུང་བ་དེས་ལན་པས། འདུལ་བ་ལ་སློབ་དཔོན་པདྨ་སཾ་བྷ་ཝ་ཞེས་བྱ་བ་མཐུ་རྩལ་དང་ལྡན་པ་ཞིག་ཡོད་པས་དེ་སྤྱན་དྲོངས་ཤིག་གསུངས་པ་དང་། བཙན་པོས་རྨི་ལམ་དུ་་བྱུང་བ་སྐད་བགྱིས་ཏེ། །སྦ་རྨང་རྗེ་གསལ་སྣང་དང་། སེང་གོང་ལྷ་ལུང་གཉིས་ལ། གཡོག་སྣ་ནམ་རྡོ་རྗེ་བདུད་འཇོམས། ལྕེ་ཛྙཱ་ན་སིདྡྷི། མཆིམས་ཤཱཀྱ་པྲ་བྷ། བྲང་ཏི་ཛ་ཡ་རཀྵི་ཏ། ཤུད་པུ་དཔལ་གྱི་སེང་གེ་དང་ལྔ་བཏང་བས་སློབ་དཔོན་གྱིས་མཁྱེན་ཏེ་མང་ཡུལ་གུང་ཐང་དུ་བྱོན་པ་དང་མཇལ་ནས་རིམ་གྱིས་ལྷ་སྲིན་གདུག་པ་ཅན་རྣམས་དམ་ལ་འདགས་ཤིང་བྱོན་ཏེ་ཧས་པོ་རི་ལ་ཕྱག་ཕེབས་ཏེ་བཙན་པོ་དང་མཇལ་ནས་མལ་དྲོའི་ཕུར་བྱོན་ནས་བོད་ཀྱི་ལྷ་སྲིན་ཐམས་ཅད་དམ་ལ་བཏགས་སོ། །དེ་ནས་སློབ་དཔོན་བསམ་ཡས་སུ་སྤྱན་དྲངས་ཏེ་ས་ཆོག་མཛད་དེ་སློབ་དཔོན་བོ་དྷི་ས་ཏྭས་ས་དཔྱད་མཛད་དེ་ཨོ་ཏནྟ་པུ་རིའི་གཅུག་ལག་ཁང་ལ་དཔེ་བླངས་ཏེ་རི་རབ་གླིང་བཅུ་གཉིས་ཉི་ཟླ་ཟུང་གཅིག་མཐའ་ལྕགས་རིས་བསྐོར་བའི་བཀོད་པ་མཛད་དེ་མེ་མོ་ཡོས་བུའི་ལོ་ལ་རྨང་བཏིང་ངོ་། །སྔོན་ལ་ཨཱརྱ་པ་ལོའི་གླིང་བཞེངས། ལྷ་རྣམས་བོད་ཀྱི་མི་ལ་དཔ་བྱས་ཏེ་བཞེངས། བཙུན་མོ་ཆེ་བ་ཚེ་སྤོང་བཟའ་དམར་རྒྱལ་མེ་ཏོག་སྒྲོལ་མས་ཁམས་གསུམ་ཟངས་ཁང་གླིང་བཞེངས། ཕོ་ཡོངས་བཟའ་རྒྱལ་མོ་བཙུན་གྱིས་དབུ་ཚལ་གསེར་ཁང་གླིང་

༄༅།        །བཞེངས། འབྲོ་བཟའ་བྱང་ཆུབ་སྨན་གྱིས་དགེ་རྒྱས་བྱེ་མ་གླིང་བཞེངས་སོ། །ས་མོ་ཡོས་ལ་ཚར་ནས་ཨཱ་ཙརྱ་བོ་དྷི་ས་ཏྭ་དང་། པདྨ་སཾ་བྷ་ཝས་རབ་གནས་མཛད། ལོ་བཅུ་གསུམ་དུ་དགའ་སྟོན་བྱས་ཏེ། ལུག་གི་ལོ་ལ་ཐམས་ཅད་ཡོད་སྨྲའི་སྡེ་པའི་དགེ་སློང་བཅུ་གཉིས་སྤྱན་དྲངས་ཏེ་བོད་ལ་བཙུན་པ་བཏུབ་མི་བཏུབ་སད་པའི་ཕྱིར་དུ་སད་མི་མི་བདུན་རབ་ཏུ་བྱུང་སྟེ་རྒན་གསུམ་ནི་དབའ་མཉྫུ་ཤྲཱི། དབའ་རཏྣ་རཀྟི་ཏ། བྲན་ཀ་མུ་ཏི་ཀ། གཞོན་གསུམ་ནི། འཁོན་ནཱ་གེནྡྲ། པ་གོར་བཻ་རོ་ཙ་ན། རྩངས་དེ་ཝེ་ནྡྲའོ། །བར་བ་གླང་ཀ་ཏ་ན་རབ་ཏུ་བྱུང་བའི་མཚན་ཡེ་ཤེས་དབང་པོ་ཡིན་ལ། མཁན་པོ་དཱ་ན་ཤཱི་ལས་བྱས་ཞེས་ཁ་ཅིག་ཟེར་རོ། །མཁན་པོ་བོ་དྷི་སཏྭས་བྱས་ནས་ཐོག་མར་བྱ་ཁྲི་གཟིགས་རབ་ཏུ་ཕྱུང་བས་(གཞན་ཡང་བློན་སྲས་སུམ་བརྒྱ་རབ་ཏུ་བྱུང་།)མངོན་ཤེས་ལྔ་དང་ལྡན་པར་གྱུར་(རྒྱལ་པོ་ལྕགས་ཕོ་རྟ་ལོ་པ་ལྔ་བཅུ་རྩ་དྲུག་ལ་འདས་པས་བསམ་ཡས་ལྕགས་ཕོ་སྟག་ལ་རྨང་བཏིང་ཟེར་བའང་འདུག་གོ །)ཏོ། །དེ་ནས་སྦ་གསལ་སྣང་། འབའ་ཁྲི་བཞེར་སང་ཤི་ཏ། པ་གོར་བཻ་རོ་ཙ་ན་རཀྵི་ཏ། ངན་ལམ་རྒྱལ་བ་མཆོག་དབྱངས། འཁོན་ཀླུའི་དབང་པོ་སྲུང་བ། རྨ་ཨཱ་ཙརྱ་རིན་ཆེན་མཆོག །གཙང་ལེགས་གྲུབ་དང་བདུན་རབ་ཏུ་བྱུང་བའི་མཚན་ཡེ་ཤེས་དབང་པོ་དང་དཔལ་དབྱངས་ལ་སོགས་པ་ཡིན། སད་མི་མི་བདུན་ཡིན་ཟེར་རོ། །མིང་གི་མཐའ་ལ་བརྟགས་ན་བོ་དྷི་སཏྭའི་མཚན་ཤཱནྟ་རཀྵི་ཏ་ཡིན་པས་དེའི་མཁན་བུར་གསལ་ལ། མཁན་བརྒྱུད་ནི། ཤཱ་རིའི་བུ། སྒྲ་གཅན་འཛིན། ཀླུ་སྒྲུབ། ལེགས་ལྡན་འབྱེད། དཔལ་སྦས། ཡེ་ཤེས་སྙིང་པོ། མཁན་པོ་བོ་དྷི་སཏྭ་རྣམས་བསམ་ཡས་གྱང་རིས་ལ་ཡོད་དོ། །དེ་ནས་སློབ་དཔོན་པདྨས་ངམ་ཤོད་ཀྱི་བྱེ་མ་ནེའུ་གསིང་དུ་བསྒྱུར་བ་དང་། གཙང་པོ་སྦུབས་སུ་འཛུད་པ་ལ་སོགས་པ་མཛད་པར་བྱས་ཏེ། བཙན་པོ་ཁྲུས་བསིལ་བའི་ཆུ་དངུལ་གྱི་

བུམ་པ་ནམ་མཁའ་ལ་བསྐྱུར་བས་ལྷའི་ཆུ་འོ་མའི་མདོག་འདྲ་བས་གང་བྱུང་བས་སྐྲ་བསིལ་བར་གསོལ་པས་བློན་པོས་སྐྱོ་མ་བྱས་ཏེ་སླར་བརྫངས་སོ། །གཞན་ཡང་རྒྱ་གར་གྱི་སློབ་དཔོན་བི་མ་ལ་མི་ཏྲ་དང་། སངས་རྒྱས་གསང་བ་དང་། ཤཱནྟི་གརྦྷ་དང་། བི་ཤུདྡྷ་སིངྷ་ལ་སོགས་པ་དང་། བོད་ཀྱི་ལོ་ཙཱ་བ་སད་མི་མི་བདུན་དང་། ཆོས་ཀྱི་སྣང་བ་དང་། བནྡེ་ནམ་མཁའ་དང་། སྒྲོ་རིན་ཆེན་སྡེ་དང་། རྣམ་པར་མི་རྟོག་པ་དང་། ཤཱཀྱ་འོད་ལ་སོགས་པས་ལོ་ཙཱ་བྱས་ཏེ་ཆོས་མང་པོ་བསྒྱུར་ཏོ། །སྔགས་འཆང་དྷརྨ་ཀིརྟི་ཞེས་པ་སྤྱན་དྲངས་ཏེ་ཡོ་ག་རྡོ་རྗེ་དབྱིངས་ལ་སོགས་པའི་དཀྱིལ་འཁོར་དུ་བདུད་འདུལ་སྔགས་པ་གླིང་དུ་དབང་བསྐུར། ཁ་ཆེའི་པཎྜི་ཏ་ཛི་ན་མི་ཏྲ་དང་། དཱ་ན་ཤཱི་ལ་ལ་སོགས་པས་རྣམ་དག་ཁྲིམས་གང་གླིང་དུ་ཁྲིམས་ཕོབ༏ རྒྱའི་ཧྭ་ཤང་ལ་སོགས་པས་མི་གཡོ་བསམ་གཏན་གླིང་དུ་བསམ་གཏན་བྱེད། བརྡ་སྦྱོར་ཚངས་པའི་གླིང་དུ་བརྡ་སྦྱོར། དཀོར་མཛོད་པེ་ཧར་གླིང་དུ་ནོར་འཇོག །བཻ་རོ་ཙ་ནའི་གླིང་དུ་ཆོས་འཆད་པ་ལ་སོགས་པས་བསྟན་པ་ཡོངས་སུ་རྫོགས་པར་དར་བར་བྱས་ཏེ། འབྲུག་གི་ལོ་ལ་ཕོ་བྲང་ལྡན་དཀར་ན་བཞུགས་པའི་སྟོན་སྒྲ་སྒྱུར་གྱི་བནྡེ་དཔལ་བརྩེགས་དང་། བནྡྷེ་ཀླུའི་དབང་པོ་ལ་སོགས་པས་བོད་ཁམས་སུ་དམ་པའི་ཆོས་འགྱུར་རོ་འཚལ་གྱི་མཚན་བྱང་བམ་པོ་དང་། ཤོ་ལོ་ཀའི་གྲངས་སུ་མཆིས་པ་གཏན་ལ་ཕབ་ནས། དཀར་ཆག་ཏུ་བྲིས་སོ། །