(ལྔ་པ། གདུལ་བྱའི་སྒོ་ནས་དབྱེ་བ།)

ལྔ་པ་ནི། རྒྱན་ལས། གཉིས་ཀྱང་རུང་ཞེས་པས་དམན་པ་ལ་མོས་པ་ལ་ཉན་ཐོས་ཀྱི་སྡེ་སྣོད་དང་། རྒྱ་ཆེན་པོ་ལ་མོས་པ་ལ་ཐེག་པ་ཆེན་པོའི་སྡེ་སྣོད་དོ། །ཐེག་པ་ཆེ་ཆུང་གི་ཁྱད་པར་ནི། ཆེན་པོ་བདུན་དང་ལྡན་པས་སམ། ཐེག་བསྡུས་ལས། ཤེས་བྱའི་གནས་དང་མཚན་ཉིད་དེར་འཇུག་དང་། །དེ་ཡི་རྒྱུ་འབྲས་དེ་རབ་དབྱེ་བ་དང་། །བསླབ་པ་གསུམ་དང་དེ་འབྲས་སྤངས་པ་དང་། །ཡེ་ཤེས་ཐེག་པ་མཆོག་གྱུར་ཁྱད་པར་འཕགས། །ཞེས་པ་ལྟར་རོ། །དེས་ན་ཉན་ཐོས་ཀྱི་ལུགས་ཀྱིས༑ ཤིན་ཏུ་རྒྱས་པའི་སྡེ་སྣོད་ནི། མདོ་སྡེ་ལེའུའི་གྲངས་ཤིན་ཏུ་མང་ཞིང་རྒྱས་པ་འདོད་དོ། །ཐེག་ཆེན་ལུགས་ཀྱིས། ཤིན་ཏུ་རྒྱས་པའི་སྡེ་སྣོད་ནི། ངེས་པའི་ཚིག་གི་ཚུལ་གྱིས་ཐེག་པ་རྒྱས་པས་ན། ཤིན་ཏུ་རྒྱས་པ་སྟེ། སྟོང་ཕྲག་བརྒྱ་པ་ལ་སོགས་པ་དང་ལྡན་པས་ཆོས་ཆེན་པོ་དང་། སེམས་ཅན་ཐམས་ཅད་ཀྱི་དོན་གྱི་ཕྱིར་རྫོགས་པའི་བྱང་ཆུབ་ཏུ་སེམས་བསྐྱེད་པས་སེམས་བསྐྱེད་པ་ཆེན་པོ་དང་། ཆོས་ཤིན་ཏུ་ཟབ་པ་དང་རྒྱ་ཆེ་བ་ལ་མོས་པས་མོས་པ་ཆེ་བ་དང་། བདག་གཞན་མཉམ་པའི་བསམ་པ་ཐོབ་པས་བསམ་པ་རྒྱ་ཆེན་པོ་དང་། སར་ཆུད་ནས་སྐད་ཅིག་རེ་རེ་ལ་བསོད་ནམས་དང་ཡེ་ཤེས་ཀྱི་ཚོགས་དཔག་ཏུ་མེད་པ་གསོག་པས་ཚོགས་ཆེན་པོ་དང་། བསྐལ་པ་གྲངས་མེད་གསུམ་དུ་བརྩོན་པས་དུས་ཆེན་པོ་དང་། སེམས་ཅན་ཐམས་ཅད་དང་མི་མཉམ་པའི་སངས་རྒྱས་ཀྱི་སྐུ་འགྲུབ་པས་ཡང་དག་པར་འགྲུབ་པ་ཆེན་པོ་སྟེ། ཆེན་པོ་བདུན་དང་ལྡན་པས་ཐེག་ཆེན་ནོ། །མདོ་སྡེ་རྒྱན་ལས་ཆེན་པོ་བདུན་འདི་ལས་ཅུང་ཟད་མི་འདྲ་བར་འབྱུང་ངོ་། །ཡང་དབང་པོ་རྟུལ་པོ་རྒྱུ་ལ་མོས་པས་རྒྱུ་ལམ་དུ་བྱེད་པ། རྒྱུ་མཚན་ཉིད་ཀྱི་ཐེག་པ་དང་། རྣོན་པོ་རྒྱུ་འབྲས་ལྷུན་གྲུབ་ལ་མོས་པ་ལ་འབྲས་བུ་ལམ་དུ་བྱེད་པ་འབྲས་བུ་སྔགས་ཀྱི་ཐེག་པ་གཉིས་ཡིན་ཏེ། 

མདོ་སྡེ་གདམས་ངག་འབོགས་པའི་རྒྱལ་པོ་ལས། འཇམ་དཔལ་གྱིས། (འཕགས་པ་གསང་བ་ལུང་བསྟན་པའི་མདོ་ལས་གསུངས་སོ་ཞེས་ཛྙཱ་ན་ཤྲཱིས་རྡོ་རྗེ་ཐེག་པའི་མཐའ་གཉིས་སེལ་བར་གསུངས་སོ། །)འདྲེན་པའི་ཐེག་པ་གསུམ་པོ་དག །བཅོམ་ལྡན་ངེས་པར་གསུངས་ལགས་ན། །རྒྱ་འབྲས་ལྷུན་གྲུབ་ཏུ་སྤྱོད་ཅིང་། །སངས་རྒྱས་གཞན་ནས་མི་འཚོལ་བའི། །ངེས་པའི་ཐེག་པ་ཅིས་མ་གསུངས། །ཞེས་ཞུས་པ་དང་། རྒྱུ་ལ་མོས་པ་རྒྱུ་ཆོས་ཀྱི། །འཁོར་ལོ་རབ་ཏུ་བསྐོར་བྱས་ནས། །རྡོ་རྗེ་ཐེག་པའི་ཉེ་ལམ་ཞིག །མ་འོངས་དུས་ན་འབྱུང་བར་འགྱུར། །ཞེས་སོ། །སྔགས་མཚན་ཉིད་ཀྱི་ཁྱད་པར་ནི། སློབ་དཔོན་ཏྲི་ཕི་ཊ་ཀ་མ་ལའི་ཚུལ་གསུམ་གྱི་སྒྲོན་མ་ལས། དོན་གཅིག་ནའང་མ་རྨོངས་དང་། །ཐབས་མང་དཀའ་བ་མེད་པ་དང་། །དབང་པོ་རྣོན་པོའི་དབང་བྱས་པས། །སྔགས་ཀྱི་ཐེག་པ་ཁྱད་པར་འཕགས། །ཞེས་པས་ཕྱིའི་ཐབས་སྨད་ནས་ནང་ཏིང་ངེ་འཛིན་གྱི་ཕར་ཕྱིན་དྲུག་སྒྲུབ་པས་ཐབས་ལ་མ་རྨོངས་པ་དང་། ཤིན་ཏུ་ཕྲ་བ་སེམས་སེམས་བྱུང་དང་། ཕྲ་བ་ངག་ཡི་གེ་དང་། རགས་པ་རྟེན་དང་བརྟེན་པའི་དཀྱིལ་འཁོར་སྒོམ་པ་ཐུགས་གསུང་སྐུའི་ཏིང་ངེ་འཛིན་དང་། ཡང་དག་པའི་དོན་སྟོན་པས་ཐབས་མང་བ་དང་། གདུལ་བྱ་གང་འདོད་ལ་སྦྱར་ནས་འདོད་དོན་ཐོབ་པར་མཛད་པ་ཐབས་སླ་བ་ཕྱག་རྒྱ་བཞི་ལ་སོགས་པ་སྟོན་པས་དཀའ་བ་མེད་པ་དང་། དབང་པོ་རྣོན་པོས་བསྒྲུབ་པར་བྱ་བ་དང་། གཞན་གྱིས་བྱས་ན་ངན་འགྲོར་འགྲོ་བའི་ལས་ཀྱིས་ཀྱང་རྣམ་པར་དག་པར་འགྱུར་བ་བཞིས་ཁྱད་པར་འཕགས་ལ། དེའང་ཨཱརྱ་དེ་ཝས་རིག་པ་འཛིན་པའི་སྡེ་སྣོད་ཅེས་སྡེ་སྣོད་བཞི་པར་གསུངས་ལ། སློབ་དཔོན་ཤཱནྟི་པས་ཟབ་མོའི་དོན་བསྡུས་ཏེ་སྟོན་པས་ན་མདོ་སྡེ་ཡིན་ནོ་གསུངས། སློབ་དཔོན་ཨ་བྷྱ་ཀ་ར་གུཔྟ་ནི། བསླབ་པ་གསུམ་ག་སྟོན་པས་སྡེ་སྣོད་གསུམ་གའོ་ཞེས་བཞེད།