(དང་པོ། མཆོག་དམན་གྱི་སྒོ་ནས་དབྱེ་བ།)

དང་པོ་ནི། དགུར་ས་སྡེར་གསུངས་ཏེ། དོན་མེད་པའི་དང་དོན་ལོག་པའི་དང་དོན་དང་ལྡན་པའི་བསྟན་བཅོས་ཏེ། གསུམ་དང་། ངན་གཡོའི་དང་སྙིང་པོ་མེད་པའི་དང་སྡུག་བསྔལ་སྤོང་བའི་བསྟན་བཅོས་ཏེ། གསུམ་དང་། ཐོས་པ་ལྷུར་ལེན་པའི་དང་རྩོད་པ་ལྷུར་ལེན་པའི་དང་སྒྲུབ་པ་ལྷུར་ལེན་པའི་བསྟན་བཅོས་གསུམ་སྟེ། དགུ་ལས། ཕྱི་མ་རེ་རེ་མཆོག་ཡིན་ལ། སྔ་མ་གཉིས་གཉིས་དམན་པ་ཡིན་ནོ། །ཁ་ཅིག་(ལྷོ་པ་)ཐོས་རྩོད་ལྷུར་ལེན་གཉིས་ཏེ་ལྔ་མཆོག་ཏུ་འདོད་པ་མི་འཐད་དོ། །བསྡུ་བ་རྣམ་པར་གཏན་ལ་དབབ་པར་དེ་གཉིས་མུ་སྟེགས་ཀྱི་བསྟན་བཅོས་སུ་གསུངས་པའི་ཕྱིར་རོ། །དེས་ན་ཕྱི་མ་རེ་རེ་མཆོག་ཡིན་ཏེ། སངས་རྒྱལ་ཀྱི་བཀར་བཤད་པའི་ཕྱིར་རོ། །