(༢ བར་དུ་ཚོགས་བསགས་ཚུལ།)

གཉིས་པ་ནི། དེ་ནས་བཟུང་སྟེ་སངས་རྒྱས་ཡུལ་འཁོར་སྐྱོང་གི་བར་སངས་རྒྱས་བདུན་ཁྲི་ལྔ་སྟོང་བསྙེན་བཀུར་ཞིང་བསྐལ་པ་གྲངས་མེད་པར་ཚོགས་བསགས་ཏེ་གྲངས་མེད་པ་དང་པོ་རྫོགས་ཏེ། ལུང་ལས། སངས་རྒྱས་ཤཱཀྱ་ཐུབ་པ་ནས། །འདྲེན་པ་ཡུལ་འཁོར་སྐྱོང་གི་བར། །བདུན་ཁྲི་ལྔ་སྟོང་ཚང་བ་ཡི། །སངས་རྒྱས་རྣམས་ནི་ངས་མཆོད་དོ། །ཞེས་སོ། །དེ་ནས་སངས་རྒྱས་ལེགས་མཛད་ནས་བཟུང་སྟེ་དབང་པོ་རྒྱལ་མཚན་གྱི་བར་དུ་བདུན་ཁྲི་དྲུག་སྟོང་བསྙེན་བཀུར་ཞིང་གྲངས་མེད་གཉིས་པ་རྫོགས་པར་བྱས་སོ། །ལུང་ལས། སངས་རྒྱས་ལེགས་མཛད་ནས་བཟུང་སྟེ། །དབང་པོ་རྒྱལ་མཚན་ཐུབ་པའི་བར། །བདུན་ཁྲི་དྲུག་སྟོང་ཚང་བ་ཡི། །སངས་རྒྱས་རྣམས་ནི་ངས་མཆོད་དོ། །ཞེས་སོ། །དེ་ནས་མར་མེ་མཛད་ནས། འོད་སྲུང་གི་བར་བདུན་ཁྲི་བདུན་སྟོང་བསྙེན་བཀུར་ཞིང་གྲངས་མེད་གསུམ་པ་རྫོགས་པར་བྱས་ཏེ། ལུང་ལས། སངས་རྒྱས་མར་མེད་མཛད་ནས་ནི། །སངས་རྒྱས་འོད་སྲུང་བར་དག་ཏུ། །བདུན་ཁྲི་བདུན་སྟོང་ཚང་བ་ཡི། །སངས་རྒྱས་རྣམས་ནི་ངས་མཆོད་དོ། །ཞེས་སོ། །(ལུང་གཞིར་རོ། །)མཛོད་ནས།(ྋལུང་རིང་པོའི་ལྟར།) རིན་ཆེན་གཙུག་ཏོར་ཅན་ཡན་ཆད་ཀྱིས་གྲངས་མེད་དང་པོ་རྫོགས་སོ། །དེ་ནས་མར་མེ་མཛད་ཡན་ཆད་ཀྱིས་གཉིས་པ་རྫོགས་སོ། །དེ་ནས་རྣམ་པར་གཟིགས་ཡན་ཆད་ཀྱིས་གསུམ་པ་རྫོགས་པར་བཤད་དེ། རྣམ་གཟིགས་མར་མེ་རིན་ཆེན་

གཙུག །གྲངས་མེད་གསུམ་གྱི་ཐ་མར་བྱུང་། །དང་པོ་ཤཱཀྱ་ཐུབ་པ་ཡིན། །ཞེས་སོ། །དེ་ནས་བསྐལ་པ་ཆེན་པོ་བརྒྱར་མཚན་བཟང་པོའི་རྒྱུ་སྒྲུབ་པར་བྱེད་པ་ལ་བྱང་ཆུབ་སེམས་དཔའ་ངེས་གནས་ཞེས་བྱ་བ་ཟེར་བ་ཡིན་ནོ། །དེ་ནས་བསྐལ་པ་བརྒྱ་ལུས་པ་སངས་རྒྱས་སྐར་རྒྱལ་ལ་ཞག་བདུན་དུ་ཚིགས་སུ་བཅད་པ་གཅིག་གིས་བསྟོད་ཅིང་བསྐོར་བ་བར་མ་ཆད་པར་བྱས་པའི་བརྩོན་འགྲུས་ཀྱིས་བསྐལ་པ་ཆེན་པོ་དགུའི་ཚོགས་འདུམས་ཏེ་དེ་ནས་བསྐལ་པ་ཆེན་པོ་དགུ་བཅུ་རྩ་གཅིག་འདས་པ་ན་གྲོང་ཁྱེར་ཉེར་ལྡན་དུ་སངས་རྒྱས་འོད་སྲུང་བྱོན་པའི་ཚེ་བྲམ་ཟེ་ཁྱེའུ་བླ་མར་གྱུར་པ་ཡན་ཆད་ཀྱིས་མཚན་གྱི་རྒྱུ་རྫོགས་སོ། །དེ་ནས་དམ་པ་ཏོག་དཀར་ཏུ་འཁྲུངས་པ་ལ་སོགས་པའི་མཛད་པ་བཅུ་གཉིས་ཀྱི་ཚུལ་ཞིབ་ཏུ་ལུང་དང་མངོན་པར་འབྱུང་བའི་མདོ་ལས་ཤེས་པར་བྱ་ཞིང་ཁྱད་ཆོས། སྟོན་དང་བསེ་རུ་བྱང་ཆུབ་པར། །བསམ་གཏན་མཐའ་བརྟེན་གཅིག་ལ་ཀུན། །ཞེས་པས་སོ་སོའི་སྐྱེ་བོ་གྲངས་མེད་གསུམ་དུ་ཐར་པ་ཆ་མཐུན་བསགས་པ་ཞིག་གིས་སྲོད་ལ་བདུད་བཏུལ་གུང་ལ་བསམ་གཏན་བཞི་པའི་དངོས་གཞི་ལ་བརྟེན་ནས་སྦྱོར་ལམ་ཡན་ཆད་རྒྱུད་ལ་བསྐྱེད་ནས་ཐོ་རངས་སྐྱ་རེངས་འཆར་ཀའི་སྐད་ཅིག་གཅིག་ཡན་ཆད་ལ་ཕྱིན་དྲུག་རྫོགས་ཏེ། ཇི་སྐད་དུ། ཀུན་ལ་ཐམས་ཅད་སྙིང་རྗེ་བས། །སྦྱིན་པར་བྱེད་པས་སྦྱིན་པ་རྫོགས། །ཆགས་བཅས་ཡན་ལག་བཅད་ཀྱང་ནི། །མི་འཁྲུགས་བཟོད་དང་ཚུལ་ཁྲིམས་ཀྱི། །སྐར་རྒྱལ་བསྟོད་པས་བརྩོན་འགྲུས་ཀྱི། །དེ་མ་ཐག་ལ་ཏིང་འཛིན་བློའི། །ཞེས་པས་ཕྱིན་དྲུག་རྫོགས་ཏེ་སངས་རྒྱས་ཏེ་ཆོས་དང་གཟུགས་ཀྱི་སྐུའི་བདག་ཉིད་ཅན་དུ་གྱུར་ནས་ཀུན་ཤེས་ནས་རབ་བཟང་གི་བར་ལ་ཆོས་ཀྱི་འཁོར་ལོ་བསྐོར་ཏེ་ལྷག་མེད་དུ་མྱ་ངན་ལས་འདས་པར་འདོད་དོ། །