(༡. སེམས་བསྐྱེད་ཀྱི་ངོ་བོ།)

དང་པོ་ནི། མདོ་སྡེ་རྒྱན་ལས། སྤྲོ་བ་ཆེ་དང་རྩོམ་པ་ཆེ། །དོན་ཆེ་བ་དང་འབྱུང་བ་ཆེ། །བྱང་ཆུབ་སེམས་དཔའི་སེམས་པ་སྟེ། །དོན་གཉིས་ལྡན་པའི་སེམས་འབྱུང་བ། །ཞེས་གྲོགས་གོ་ཆ་དང་སྦྱོར་བའི་བརྩོན་འགྲུས་དང་ལྡན་པ། འབྲས་བུ་རང་གཞན་གྱི་དོན་འགྲུབ་ཅིང་བྱང་ཆུབ་ཆེན་པོར་འབྱུང་བ། དམིགས་ཡུལ་བྱང་ཆུབ་ཆེན་པོ་དང་སེམས་ཅན་གྱི་དོན་ལ་དམིགས་པའི་སེམས་པ་འབྱུང་བ་སེམས་བསྐྱེད་ཀྱི་མཚན་ཉིད་དུ་བཤད་དོ། །མངོན་རྟོགས་རྒྱན་ནས། སེམས་བསྐྱེད་པ་ནི་གཞན་དོན་ཕྱིར། །ཡང་དག་རྫོགས་པའི་བྱང་ཆུབ་འདོད། །དེ་དང་དེ་ནི་མདོ་བཞིན་དུ། །བསྡུས་དང་རྒྱས་པའི་སྒོ་ནས་བརྗོད། །ཅེས་གསུངས་ཤིང་། དེའི་འགྲེལ་པ་དག་ལྡན་དུ། གཞན་གྱི་དོན་གྱི་ཕྱིར་ཡང་དག་པར་རྫོགས་པའི་བྱང་ཆུབ་ལ་དམིགས་པའི་འདོད་པ་ནི་སེམས་བསྐྱེད་པའི་མཚན་ཉིད་དོ་ཞེས་སོ། །