(གཉིས་པ། ཐུབ་པའི་མཛད་པ་ཁྱད་པར་དུ་བཤད་པ།)

(སྤྱིར་བསྟན་པ།)

གཉིས་པ་ནི། ཐུབ་པ་ལ་མཛད་པ་བསམ་གྱིས་མི་ཁྱབ་ཀྱང་གྲངས་ལ་དགའ་བ་རྗེས་སུ་བཟུང་བ་དང་གཙོ་བོ་ཉེ་བར་བཟུང་ནས་མཁས་པ་རྣམས་ཀྱིས་མཛད་པ་བཅུ་གཉིས་སུ་ཐ་སྙད་མཛད་དེ། པད་མའི་ངང་ཚུལ་གྱིས། སངས་རྒྱས་ཀྱི་སྐུའམ་མཛད་པ་བཅུ་གཉིས་ལ་སོགས་པ་བསམ་

ལ་བྱིང་བ་ཞི་བར་བྱའོ་ཞེས་དང་། ཆོས་ཀྱི་བཤེས་གཉེན་གྱིས་ཀྱང་དགའ་ལྡན་གྱི་གནས་ནས་བབས་པ་ལ་སོགས་པ་མཛད་པ་བཅུ་གཉིས་ཀྱིས་གདུལ་བྱ་སྨིན་པར་མཛད་པ་ཞེས་བཤད་པ་ཡིན་ནོ། །དེ་ལའང་། རིན་ཆེན་ཕྲེང་བར། སྙིང་རྗེའི་དབང་དུ་གྱུར་པ་རྣམས། །གཤེགས་དང་བལྟམས་དང་རོལ་པ་དང་། །ཁབ་ནས་འབྱུང་དང་དཀའ་སྤྱོད་དང་། །བྱང་ཆུབ་ཆེད་དུ་བདུད་སྡེ་འཇོམས། །ཆོས་ཀྱི་འཁོར་ལོ་བསྐོར་པ་དང་། །ལྷ་རྣམས་ཀུན་ནས་བབས་པ་དང་། །དེ་བཞིན་དུ་ནི་མྱ་ངན་ལས། །འདས་པ་སྟོན་པའི་མཛད་པ་ཡིན། །ཞེས་པ་ལ་སོགས་པ་ལྷ་ལས་བབས་པའི་མཛད་པ་ཞེས་པ་གཅིག་ཏུ་བགྲང་སྟེ་དེའང་རྒྱ་གར་གྱི་གྲོང་ཁྱེར་སྒྲ་ཅན་ཞེས་བྱ་བའི་གྲོང་ཁྱེར་ཆེན་པོར། བཅོམ་ལྡན་འདས་ཀྱིས། སུམ་ཅུ་རྩ་གསུམ་དུ་ཡུམ་འདུལ་བ་ལ་བྱོན་ནས། དེ་ནས་མར་ལམ་བཻ་ཌཱུརྱའི་སྐས་ལ་བྱོན་པ་ལ་ལྷ་ལས་བབས་པ་ཞེས་ཟེར་རོ། །ཐབས་ལ་མཁས་པ་ཞེས་པ་ལ་སོགས་པའི་མདོ་ལས། དམ་པའི་ཆོས་ནུབ་པ་ལ་མཁས་པ་ཞེས་ཆོས་ནུབ་པའང་མཛད་པ་གཅིག་ཏུ་གསུངས་ཏེ་ཆོས་དོན་དུ་མི་འགྱུར་བ་ན་ནུབ་པར་བསྟན་ནས་སེམས་ཅན་ལ་ཆོས་སྤོང་གི་ལས་མི་འབྱུང་བར་བྱ་བའི་ཕྱིར་ཡིན་ཏེ། གསེར་འོད་དམ་པ་ལས། སངས་རྒྱས་མྱ་ངན་ཡོངས་མི་འདའ། །ཆོས་ཀྱང་ནུབ་པར་མི་འགྱུར་ཏེ། །ཞེས་སོ༏ ༏ཁ་ཅིག་(རིགས་རལ)ན་རེ། དགའ་ལྡན་ནས་འཕོ་བ་ཞེས་གཅིག་ཏུ་བྱེད་པ་ལ། གཞན་དག་(རྒྱང་རོ་བ་)ན་རེ་མི་རིགས་ཏེ། མདོ་སྡེ་རྒྱན་གྱི་འགྲེལ་བར་ཡང་དགའ་ལྡན་གྱི་གནས་ན་བཞུགས་པ་ལ་སོགས་པ་སྟོན་པའི་སྒོ་ནས་ཞེས་པ་དང་༏ མངོན་རྟོགས་རྒྱན་གྱི་འབྲེལ་པར་ཡང་། དགའ་ལྡན་གྱི་གནས་ན་བཞུགས་པ་ལ་སོགས་པ་ཀུན་ཏུ་སྟོན་པར་རུང་བ་ཞེས་པ་དང་། རྒྱུད་བླར། སྐྱེ་བ་མངོན་པར་སྐྱེ་བ་དང་། །ཞེས་དགའ་ལྡན་ན་གནས་པ་མཛད་པའི་ཐོག་མར་བཤད་

༄༅།        །པས་སོ། །ཞེས་གསུངས་སོ། །འོན་ཀྱང་དགོངས་པ་ངེས་འགྲེལ་གྱི་འགྲེལ་ཆེན་དུ། འཇིག་རྟེན་གྱི་ཁམས་ཐམས་ཅད་དུ་སྤྲུལ་པའི་སྐུས་དང་པོ་དགའ་ལྡན་གྱི་གནས་ནས་བབས་པ་ནས་ཐ་མ་ཡོངས་སུ་མྱ་ངན་ལས་འདས་པ་ཆེན་པོ་སྟོན་པའི་བར་གྱི་སངས་རྒྱས་ཀྱི་མཛད་པ་བཅུ་གཉིས་ལ་སོགས་པ་གཅིག་ཅར་སྟོན་ཞེས་པ་དང་མཐུན་པར་སྣང་ངོ་། །འོ་ན་མཛད་པ་འདི་དག་སངས་རྒྱས་སམ་བྱང་སེམས་གང་གི་མཛད་པ་ཡིན་ཞེ་ན། མདོ་ཡབ་སྲས་མཇལ་བར། ཐུབ་པའི་དབང་པོ་འདི་སྔོན་བསྐལ་པ་དཔག་ཏུ་མེད་པའི་མངོན་རོལ་དུ་སངས་རྒྱས་དབང་པོའི་ཏོག་ཅེས་བྱ་བར་སངས་རྒྱས་ཤིང་ད་དུང་སངས་རྒྱ་བ་དང་བྱང་ཆུབ་སེམས་དཔའི་ཚུལ་གྱིས་གཞན་དོན་བྱེད་པའི་སྤྲུལ་པར་བཤད་དེ། ཇི་སྐད་དུ། བྱེ་བ་བརྒྱད་ཅུར་རྒྱལ་བ་ཉིད། །སངས་རྒྱས་ཉིད་དུ་བསྟན་གྱུར་ཀྱང་། །ད་དུང་ཆོག་པའི་འདུ་ཤེས་བསལ། །བྱང་ཆུབ་མཆོག་ཏུ་ཐུགས་ཀྱང་འཇུག །སྟོང་གསུམ་དྲུག་ཅུ་རྩ་གཅིག་གི །སངས་རྒྱས་ཞིང་རྣམས་དག་གྱུར་པ། །ཇི་ལྟར་ཐུབ་པ་ཐབས་མཁས་དང་། །རྒྱལ་བ་ཁྱོད་ནི་ཀུན་གྱིས་འཚལ། །ད་དུང་དང་པོར་ཐུགས་བསྐྱེད་པར། །དེ་དང་དེར་ནི་ཡོངས་བསྟན་ཏེ། །ད་དུང་དུ་ཡང་འདྲེན་པ་ཁྱོད། །སངས་རྒྱས་མང་པོ་སྟོན་པར་མཛད། །ཅེས་སོ། །དམ་པའི་ཆོས་པད་མ་དཀར་པོ་ལས་ཀྱང་། བསྐལ་པ་བྱེ་སྟོང་བསམ་གྱིས་མི་ཁྱབ་པ། །དེ་ཡི་ཚད་ནི་ནམ་ཡང་མེད་པ་ནས། །བྱང་ཆུབ་མཆོག་རབ་འདི་ནི་ངས་ཐོབ་སྟེ། །ང་ནི་རྟག་ཏུ་ཆོས་ཀྱང་རབ་འཆད་དོ། །ཞེས་སྔར་སངས་རྒྱས་པར་གསུངས་སོ། །དེ་མཉམ་པ་ཉིད་ལ་དགོངས་པ་ཡིན་དུ་ཆུག་ནའང་གྲུབ་མཐའི་འདོད་ཚུལ་གསུམ་ལས་ཉན་ཐོས་ཀྱི་ལུགས་གོང་དུ་བསྟན་ཅིང་། ཐེག་ཆེན་གྱི་ལུགས་ཀྱིས་སངས་རྒྱས་རྣམས་འོག་མིན་དུ་སངས་རྒྱས་ནས་འདོད་ཁམས་སུ་མཛད་པ་བཅུ་གཉིས་སྟོན་པར་གསུངས་ཏེ། 

ལང་ཀར་གཤེགས་པར། འདོད་པའི་ཁམས་དང་གཟུགས་མེད་དུ། །སངས་རྒྱས་རྣམ་པར་འཚང་མི་རྒྱ། །གཟུགས་ཀྱི་ཁམས་ཀྱི་འོག་མིན་དུ། །འདོད་ཆགས་བྲལ་ཁྱོད་འཚང་རྒྱའོ། །ཞེས་པ་དང་། སྟུག་པོ་བཀོད་པའི་མདོ་ལས། སངས་རྒྱས་ཐམས་ཅད་འོག་མིན་དུ། །སངས་རྒྱས་མ་གྱུར་འདོད་ཁམས་སུ། །སངས་རྒྱས་མཛད་པ་མི་མཛད་དོ། །ཞེས་དང་། རྒྱུད་བླ་མར་ཡང་། ཐུགས་རྗེ་ཆེན་པོས་འཇིག་རྟེན་མཁྱེན། །འཇིག་རྟེན་ཀུན་ལ་གཟིགས་ནས་ནི། །ཆོས་ཀྱི་སྐུ་ལས་མ་གཡོས་པར། །སྤྲུལ་པའི་རང་བཞིན་སྣ་ཚོགས་ཀྱིས། །སྐྱེ་བ་མངོན་པར་སྐྱེ་བ་དང་། །དགའ་ལྡན་གནས་ནི་འཕོ་བ་དང་། ལྷུམས་སུ་ཞུགས་དང་བལྟམས་པ་དང་། །བཟོ་ཡི་གནས་ལ་མཁས་པ་དང་། །བཙུན་མོའི་འཁོར་དགྱེས་རོལ་པ་དང་། །ངེས་འབྱུང་དཀའ་བ་སྤྱོད་པ་དང་། །བྱང་ཆུབ་སྙིང་པོར་གཤེགས་པ་དང་། །བདུད་སྡེ་འཇོམས་དང་རྫོགས་པར་ནི། །བྱང་ཆུབ་ཆོས་ཀྱི་འཁོར་ལོ་དང་། །མྱ་ངན་འདས་པར་གཤེགས་མཛད་རྣམས། །ཡོངས་སུ་མ་དག་ཞིང་རྣམས་སུ། །སྲིད་པ་ཇི་སྲིད་གནས་པར་སྟོན། །ཞེས་སྤྲུལ་སྐུར་བཤད་པ་དང་། རྣམ་བཤད་རིགས་པར་ཡང་། བྲམ་ཟེའི་ཁྱེའུ་བླ་མ་ནས་བཟུང་སྟེ་ཡོངས་སུ་མྱ་ངན་འདས་པ་ཆེན་བོའི་བར་དུ་སྤྲུལ་པ་ཙམ་ཞིག་ཡིན་པར་བསྟན་པ་དེ་ལ་དགོས་པ་ཅི་ཡོད་ཅེ་ན། ཞེས་པའི་འགྲེལ་པར། བཅོམ་ལྡན་འདས་འོད་སྲུང་གི་དུས་ན་བྲམ་ཟེའི་ཁྱེའུ་བླ་མ་ཚངས་པར་སྤྱོད་པ་ལ་གནས་པ་སྤྲུལ་པ་ཡིན་པར་བསྟན་ཏོ། །