(དགའ་ལྡན་གནས་ནས་འཕོ་བའི་མཛད་པ།)

དེ་ནས་དགའ་ལྡན་དུ་ཏོག་དཀར་པོར་སྐྱེས་པ་དང་དེ་ནས་ཟས་གཙང་གི་སྲས་དོན་ཐམས་ཅད་གྲུབ་པར་བསྟན་པ་དང་། ཁབ་ན་བཞུགས་པ་དང་། ཁབ་ནས་ངེས་པར་བྱུང་ནས་རིང་འཕུར་ལ་སོགས་པ་ལ་བྱང་ཆུབ་ཀྱི་ལམ་ཚོལ་བ་ལ་ཞུགས་པ་དང་། རིམ་གྱིས་སངས་རྒྱས་ཏེ་ཆོས་ཀྱི་འཁོར་ལོ་བསྐོར་བ་དང་། དེ་ནས་རིམ་གྱིས་མྱ་ངན་ལས་འདས་པ་ཆེན་པོའི་བར་དུ་སྤྲུལ་བ་ཙམ་ཞིག་ཡིན་པར་བསྟན་ཏོ། །ཞེས་འབྱུང་

༄༅།        །ཞིང་། ངག་གི་དབང་ཕྱུག་གྲགས་པས་ཀྱང་། དཔལ་ལྡན་སྟུག་པོ་བཀོད་པ་ཉིད་དུ་དོན་དམ་ཐུགས་ཆུད་ཅིང་། །དགའ་ལྡན་སྐྱེ་བོའི་དོན་མཛད་ཕྱིར་ནི་དམ་པ་ཏོག་དཀར་གྱུར། །དེ་ནས་འདིར་ནི་འགྲོ་བའི་དོན་དུ་ཤཱཀྱའི་ཏོག་གྱུར་གང་། །འཆི་བདག་ལས་རྒྱལ་སྒྱུ་མ་ཀུན་སྟོན་དེ་ནི་རྒྱལ་གྱུར་ཅིག །ཅེས་པ་ལ་སོགས་པ་མང་པོའི་བཞེད་པས་ཚོགས་རྫོགས་ནས་ས་བཅུ་བའི་སྲིད་པ་ཐ་མའི་རྟེན་ལ་འོག་མིན་དུ་སངས་རྒྱས་ནས་གདོད་འདོད་ཁམས་སུ་མཛད་པ་བཅུ་གཉིས་སྟོན་པས་ཐམས་ཅད་སངས་རྒྱས་ཀྱི་མཛད་པར་འཆད་དོ། །ཤཱཀྱ་བཤེས་གཉེན་ལ་སོགས་པ་གསང་བ་འདུས་པའི་ལུགས་ཀྱིས་དཀའ་བ་སྤྱོད་པའི་དུས་སུ་རྣམ་སྨིན་གྱི་ལུས་ཆུ་བོ་ནེ་རཉྫ་རའི་འགྲམ་དུ་བཞག་ནས་ཡེ་ཤེས་ཀྱི་ལུས་འོག་མིན་དུ་ཕྱིན་ནས་ལོངས་སྤྱོད་རྫོགས་པའི་སྐུར་སངས་རྒྱས་ནས་སླར་ཡེ་ཤེས་དཀའ་བ་སྤྱོད་པའི་ལུས་ལ་ཞུགས་ཏེ་བྱང་ཆུབ་སྙིང་པོར་གཤེགས་པ་པ་སོགས་པ་མཛད་པས་དཀའ་བ་སྤྱོད་པ་མན་ཆད་བྱང་སེམས། ཡན་ཆད་སངས་རྒྱས་སུ་འདོད་ལ། ལོཙྪ་བ་ཆེན་པོ་སྤྲུལ་པའི་སྐུ་རིན་ཆེན་བཟང་པོས་ཀྱང་སྔགས་ལོག་སུན་འབྱིན་དུ་དེ་ལྟར་བཤད་(སྔགས་སྤྱི་དང་བསྟུན་ན་ལེགས་རྒྱུ་མེད།)དོ། །དབུ་མ་པ་ཆོས་ཀྱི་བཤེས་གཉེན་ན་རེ། འོག་མིན་དུ་སངས་རྒྱས་ནས་འདིར་མཛད་པ་སྟོན་པ་ཐུབ་པ་འདི་ལྟ་བུ་དང་འདོད་ཁམས་ཉིད་དུ་མཛད་པ་བཅུ་གཉིས་སྟོན་ཅིང་སངས་རྒྱས་མངོན་དུ་བྱེད་པ་གཉིས་ཡོད་གསུང་ངོ་། །ཐེག་པ་ཐུན་མོང་བའི་ལུགས་ཀྱིས་མངོན་པ་ཀུན་ལས་བཏུས་སུ། དེ་བཞིན་གཤེགས་པ་བསམ་གྱིས་མི་ཁྱབ་པ་གང་ཞེ་ན། གང་དགའ་ལྡན་གྱི་གནས་ན་གནས་པ་ནས་བཟུང་སྟེ་ཡོངས་སུ་མྱ་ངན་ལས་འདས་པའི་བར་དུ་བྱང་ཆུབ་སེམས་དཔའི་སྤྱོད་པ་ཐམས་ཅད་དང་། སངས་རྒྱས་ཀྱི་སྤྱོད་པ་ཡང་འདོད་པའི་ཁམས་སུ་སྟོན་པའི་གང་ཟག་གོ་ཞེས་པའི་འགྲེལ་པར། བྱང་ཆུབ་སེམས་དཔའི་སྤྱོད་པ་ཐམས་ཅད་ཅེས་བྱ་བ་

ནི་དགའ་ལྡན་གྱི་གནས་ན་གནས་པ་ནས་བཟུང་སྟེ་བདུད་ལས་རྒྱལ་བའི་བར་དུའོ། །སངས་རྒྱས་ཀྱི་སྤྱོད་པ་ཞེས་བྱ་བ་ནི་མངོན་པར་རྫོགས་པར་བྱང་ཆུབ་པ་ནས་བཟུང་སྟེ་ཡོངས་སུ་མྱ་ངན་ལས་འདས་པ་ཆེན་པོའི་བར་དུའོ། །ཞེས་སྒྲ་ཇི་བཞིན་པར་འཆད་དོ། །འདིར་རྒྱུད་བླ་མའི་ཚིགས་བཅད་བཞིན་དུ་བཤད་པར་བྱ་སྟེ། བྲམ་ཟེའི་ཁྱེའུ་བླ་མ་དེ་ཚེ་འཕོས་ནས་དགའ་ལྡན་དུ་དམ་པ་ཏོག་དཀར་པོ་ཞེས་བྱ་བར་གྱུར་ཏེ་(འདི་གདགས་པའི་བསྟན་བཅོས་ན་ཟུར་ཙམ་གསལ། རྣམ་བཤད་རིགས་པའི་འགྲེལ་པ་ན་གསལ།)ལྷ་རྣམས་ལ་ཆོས་སྟོན་ཏོ། །དེའི་ཚེ་ཉིད་ཀྱི་བསོད་ནམས་ཀྱི་མཐུ་དང་སངས་རྒྱས་རྣམས་ཀྱི་བྱིན་གྱི་རླབས་ཀྱིས་ལྷའི་རོལ་མོའི་སྒྲ་དག་ལས། །བསོད་ནམས་རྒྱ་ཆེ་ཚོགས་མངའ་དྲན་རྟོགས་དང་། །བློ་གྲོས་མཐའ་ཡས་ཤེས་རབ་འོད་མཛད་པ། །མཚུངས་མེད་སྟོབས་མངའ་སྒྱུ་རྩལ་རྒྱ་ཆེ་བ། །མར་མེ་མཛད་ཀྱི་ལུང་བསྟན་དགོངས་པར་མཛོད། །སྐྱེས་མཆོག་ཁྱེད་ཀྱི་བསོད་ནམས་དཔལ་གྱིས་ནི། །དགའ་ལྡན་ཕོ་བྲང་ཤིན་ཏུ་མཛེས་མོད་ཀྱི། །འོན་ཀྱང་ཐུགས་རྗེའི་ཐུགས་དང་ལྡན་པས་ན། །ཐུགས་རྗེའི་རྒྱལ་མཚན་དག་ཏུ་ཆར་པ་ཕོབ། །ཅེས་པ་ནས། འདི་ནི་དུས་ལགས་བཏང་སྙོམས་མ་མཛད་ཅེས། །སྙིང་རྗེའི་ཡིད་དང་ལྡན་ལ་སྐུལ་བར་བྱེད། །ཅེས་པ་ལ་སོགས་པས་བསྐུལ་ལོ། །དེའི་ཚེ་གནས་གཙང་མའི་ལྷའི་བུ་རྣམས་བྱང་ཆུབ་སེམས་དཔའ་མངལ་དུ་འཇུག་པའི་ལོ་བཅུ་གཉིས་ཀྱི་གོང་ནས་བྲམ་ཟེར་སྤྲུལ་ཏེ་འོག་ནས་འཆད་པའི་རྣམ་པས་མངལ་དུ་ཞུགས་པར་གྱུར་ན། མཚན་དཔེ་དང་ལྡན་ཏེ་འཁོར་ལོས་བསྒྱུར་རྒྱལ་ལམ་སངས་རྒྱས་སུ་འགྱུར་རོ་ཞེས་འདོན་དུ་འཇུག་ཅིང་རང་སངས་རྒྱས་རྣམས་ལ་ལོ་བཅུ་གཉིས་ན་བྱང་ཆུབ་སེམས་དཔའ་ལྷུམས་སུ་འཇུག་གི །ཞིང་འདི་བོར་ཅིག་ཅེས་ཟེར་ཞིང་དེ་རྒྱལ་པོའི་ཁབ་ཀྱི་མཇུག་མ་བསྒྱུར་བའི་རི་ལ་རང་རྒྱལ་གླང་པོ་ཞེས་བས་ཐོས་ཏེ་རྡོ་ལ་རྐང་རྗེས་བཞག་སྟེ་འདས་སོ། །ཝ་ར་ཎཱ་སིར་རང་རྒྱལ་ལྔ་བརྒྱ་མེའི་ཁམས་ལ་ཞུགས་ཏེ་འདས་ནས་

༄༅།        །རིང་བསྲེལ་ལྷུང་བས་(དྲང་སྲོང་ཆེན་པོ་འདས་ད་ལྟར་གྱི་སངས་རྒྱས། ཆུང་བ་མུ་སྟེགས་ཀྱི་དྲང་སྲོང་། གཞན་འོད་སྲུང་སོགས་ཀྱིས་ཆོས་སྨྲ་བ་ཡིན་པས་དྲང་སྲོང་སྨྲ་བ། རྒྱལ་པོ་ཚངས་བས་བྱིན་གྱིས་མི་འཇིགས་པ་བྱིན་པའི་རི་དྭགས་ཀྱི་ནགས།)དྲང་སྲོང་ལྷུང་བར་གྲགས་སོ། །དེ་ནས་བསྐུལ་བའི་དོན་རྗེས་སུ་དགོངས་ཏེ། དུས་ཚེ་ལོ་བརྒྱ་པ་དང་། གླིང་འཛམ་བུའི་གླིང་དང་། ཡུལ་དབུས་དང་། རིགས་རྒྱལ་རིགས་ཏེ་བཞི་ལ་གཟིགས་པའམ་ལུང་ལྟར་ན། རིགས་དང་དུས་དང་ཡུལ་དང་རུས་དང་བུད་མེད་ལ་གཟིགས་པ་དང་ལྔས་འཇིག་རྟེན་ལ་གཟིགས་ཏེ་མིའི་ཡུལ་དུ་གཤེགས་པར་རྩོམ་པ་ན་ལྷ་རྣམས་ལ་གྲོགས་པོ་དག་ཆོས་སྣང་བའི་སྒོ་བརྒྱ་རྩ་བརྒྱད་པོ་འདི་དག་ནི་རྒྱལ་སྲས་འཆི་འཕོ་བའི་ཚེ་བསྟན་པར་བྱའོ། །གྲོགས་པོ་དག །དད་པ་ནི་ཆོས་སྣང་བའི་སྒོ་སྟེ་བསམ་པ་མི་ཕྱེད་པར་འགྱུར་རོ། །དང་བ་ནི་ཆོས་སྣང་བའི་སྒོ་སྟེ་སེམས་རྙོག་མ་ཅན་དང་བར་འགྱུར་བའི་ཕྱིར་རོ་ཞེས་པ་ནས། དབང་བསྐུར་བའི་ས་ནི་ཆོས་སྣང་བའི་སྒོ་སྟེ་མངལ་དུ་འཇུག་པ་ནས་མྱ་ངན་ལས་འདས་པ་ཆེན་པོ་སྟོན་པའི་བར་དུ་འགྱུར་རོ་ཞེས་པའི་བར་དུ་གསུངས་ནས། གང་གི་ཚེ་ན་དགའ་ལྡན་གནས་མཆོག་ནས། །འདྲེན་པ་སྐྱེས་བུ་སེང་གེ་འཆི་འཕོའི་ཚེ། །ལྷ་རྣམས་དག་ལ་ཚིག་ཏུ་སྨྲས་པ་ནི། །གྲོགས་དག་བག་མེད་སྤྱོད་པ་སྤང་བར་གྱིས། །ཞེས་པ་ལ་སོགས་པ་གསུངས་ཤིང་རིན་པོ་ཆེའི་ཅོད་པན་མ་ཕམ་པའི་དབུ་ལ་བཅིངས་ནས། གྲོགས་པོ་དག་ཁོ་བོ་ནི་འཛམ་བུའི་གླིང་དུ་འཚང་རྒྱར་འགྲོ་སྟེ་ཁྱེད་ལ་མ་ཕམ་པས་ཆོས་སྟོན་ཏོ། །ཞེས་གསུངས་པས་ལྷ་རྣམས་མི་དགའ་བར་གྱུར་ནས། སྐྱེས་བུ་དམ་པ་ཁྱེད་ནི་མི་བཞུགས་ན། །དགའ་ལྡན་གནས་འདི་མཛེས་པར་མི་འགྱུར་རོ། །ཞེས་ཟེར་ཞིང་། བྱང་ཆུབ་སེམས་དཔའ་འཛམ་བུའི་གླིང་དེ་ནི་དེང་སང་འོད་སྲུངས་རྫོགས་བྱེད་དང་། ཀུན་ཏུ་རྒྱུ་གནག་ལྷས་ཀྱི་བུ་དང་། སྨྲ་འདོད་ཀྱི་བུ་

མོའི་བུ་ཡང་དག་རྒྱལ་བ་ཅན་དང་། མི་ཕམ་སྐྲའི་ལྭ་བ་ཅན་དང་། ཀ་ཏྱའི་བུ་ནོག་ཅན་དང་། གཅེར་བུ་པ་གཉེན་གྱི་བུ་སྟེ་རྟོག་གེ་པ་དྲུག་དང་། བྲམ་ཟེ་རྒྱུ་རྒྱལ་དང་། བྲམ་ཟེ་རྣས་རྡེག་དང་། བྲམ་ཟེ་བཟང་ལྡན་དང་། བྲམ་ཟེ་ཚངས་པའི་ཚེ་དང་། བྲམ་ཟེ་པད་མའི་སྙིང་པོ་དང་། བྲམ་ཟེ་དམར་པོ་སྟེ་རྗེས་སུ་སྒྲོག་པ་དྲུག་དང་། རིངས་བྱེད་ཀྱི་བུ་ལྷག་སྤྱོད་དང་། སྒྱུ་རྩལ་ཤེས་ཀྱི་བུ་རིང་འཕུར་དང་། ཀུན་ཏུ་རྒྱུ་རབ་བཟང་དང་། བྲམ་ཟེའི་ཁྱེའུ་ཀུན་རྒྱལ་དང་། དྲང་སྲོང་ཉོན་མོངས་མེད་དང་། སྟེང་རྒྱས་འོད་སྲུང་རལ་བ་ཅན་ཏེ། སྙོམས་འཇུག་པ་དྲུག་སྟེ། སྟོན་པ་དྲུག་གསུམ་བཅོ་བརྒྱད་ཀྱིས་མ་རུངས་པར་བགྱིས་པས་གཤེགས་པའི་སྐབས་མ་ལགས་སོ། །ཞེས་གསོལ་བས་དུང་གི་སྒྲ་དང་རོལ་མོའི་སྒྲ་སྒྲ་གཞན་མི་འདྲེ་བ་དང་། ཉི་མའི་འོད་ཀྱིས་འོད་གཞན་ལྟར་དེ་དག་གི་ཆོས་དང་མི་འདྲེ་ཞིང་དེ་དག་ང་ཉིད་ཀྱིས་ཟིལ་གྱིས་གནོན་ནུས་སོ། །སེང་གེ་གཅིག་གིས་གཅན་གཟན་ཚོགས་རྣམས་དུ་མ་རྣམ་པར་སྐྲག །རྡོ་རྗེ་གཅིག་གིས་བྲག་གི་རྩེ་མོ་དུ་མ་རྣམ་པར་འཇིག །བརྒྱ་བྱིན་གཅིག་གིས་ལྷ་མ་ཡིན་དཔུང་དུ་མ་རྣམ་པར་འཇོམས། །ཉི་མ་གཅིག་གིས་མུན་པའི་ཚོགས་རྣམས་དུ་མ་རྣམ་པར་སེལ། ཞེས་གསུངས་ནས་ཁོ་བོ་ཇི་ལྟ་བུའི་གཟུགས་ཀྱིས་འགྲོ་བར་བྱ་ཞེས་དྲིས་པས། ལ་ལ་ཚངས་པའི་གཟུགས་ཀྱིས། ལ་ལ་བརྒྱ་བྱིན་ལ་སོགས་པའི་གཟུགས་ཀྱིས་རིགས་སོ་ཟེར་ཡང་། ལྷའི་བུ་གཟི་བརྗིད་དམ་པ་ན་རེ། རིག་བྱེད་ནས་འབྱུང་བ་བཞིན་གླང་པོ་ཆེའི་གཟུགས་ཀྱིས་རིགས་སོ་ཟེར་ནས། བྱང་ཆུབ་སེམས་དཔའ་ཆས་པ་དང་རྒྱལ་པོ་ཟས་གཙང་གི་ཁྱིམ་དུ་ལྟས་བཅོ་བརྒྱད་བྱུང་ངོ་། །