(བཙུན་མོའི་འཁོར་དགྱེས་རོལ་པའི་མཛད་པ།)

དེ་ནས་ཤཱཀྱ་རྒན་རབས་དག་གིས། རྒྱལ་པོ་ལ་ལྷ་ལྟས་མཁན་དག་གཞོན་ནུ་འདིས་ཁབ་བཞེས་ན། འཁོར་ལོ་བསྒྱུར་བར་འགྱུར་རོ་ཞེས་ལུང་སྟོན་ན་བཙུན་མོ་བླང་བར་བགྱིའོ། །རྒྱལ་པོས། གཞོན་ནུའི་ཚུལ་དང་མཐུན་པའི་བུ་མོ་གང་ཡོད་ལྟོས་ཤིག །དེ་ནས་ཤཱཀྱ་ལྔ་བརྒྱ་

༄༅།        །ཙམ་ངེད་ཀྱི་བུ་མོ་མཐུན་ནོ་ཟེར་རོ། །རྒྱལ་པོས་སྨྲས་པ། གཞོན་ནུ་ཉིད་ལ་དྲིས་ཤིག་ཟེར་ནས་དྲིས་པས། དགུང་བདུན་ན་ལན་བྱའོ་གསུངས་ཏེ། བསམ་པས། འདོད་པའི་སྐྱོན་ནི་བདག་གིས་མཐའ་ཡས་རིག །འཐབ་མོ་མཁོན་བཅས་མྱ་ངན་སྡུག་བསྔལ་རྩ། །འཇིགས་བྱེད་དུག་གི་ལོ་མ་འདྲ་བ་སྟེ། །མེ་དང་འདྲ་ཞིང་རལ་གྲིའི་སོ་དང་འདྲ། །འདོད་པའི་ཡོན་ཏན་བདག་འདོད་མ་ཡིན་ཏེ། །བདག་ནི་བུད་མེད་ཚོགས་དང་མཛེས་མ་ཡིན། །བསམ་གཏན་ཏིང་འཛིན་བདེ་བས་ཞི་སེམས་སུ། །བདག་ནི་མི་སྨྲ་ནགས་ཚལ་གནས་པར་བྱ། །ཡང་དེས་བརྟགས་ནས། ཐབས་མཁས་པ་དང་སྙིང་རྗེས། འདམ་དང་ལྕག་ལྕིག་ཁྲོད་ན་པདྨ་རྣམ་པར་འཕེལ། །མི་རྣམས་གང་བའི་ནང་ན་རྒྱལ་པོ་མཆོད་པ་ཐོབ། །གང་ཚེ་བྱང་ཆུབ་སེམས་དཔའ་འཁོར་མཆོག་ཐོབ་གྱུར་པ། །དེ་ཚེ་སེམས་ཅན་བྱེ་བ་ཁྲག་ཁྲིག་འཆི་མེད་འདུལ། །སྔོན་གྱི་བྱང་ཆུབ་སེམས་དཔའ་མཁས་པ་གང་བྱུང་བ། །དེ་དག་ཀུན་གྱིས་བཙུན་མོ་སྲས་དང་སླས་ཀྱང་བསྟེན། །འོན་ཀྱང་འདོད་པས་ཆགས་མེད་བསམ་གཏན་བདེ་མ་ཉམས། །བདག་ཀྱང་དེ་དག་ཡོན་ཏན་རྗེས་སུ་བསླབ་པར་བྱ། །སྙམ་སྟེ། བུད་མེད་ཀྱི་ཡོན་ཏན་ཡི་གེ་ལ་བྲིས་ཏེ་འདི་འདྲ་བ་བདག་ལ་གསོལ་ཞེས་པ་དང་། རྒྱལ་པོས་མདུན་ན་འདོན་ལ་ཁྱོད་སོང་ལ་གང་ན་ཡོན་ཏན་འདི་དག་ཡོད་པའི་བུ་མོ་དེ་འོན་ཅིག །རྒྱལ་རིགས་བྲམ་ཟེའི་བུ་མོ་དང་། །རྗེའུ་རིགས་དམངས་རིགས་དེ་བཞིན་ཏེ། །སུ་ལ་ཡོན་ཏན་འདི་ཡོད་པའི། །བུ་མོ་དེ་ནི་འདིར་འོན་ཅིག །ང་ཡི་བུ་འདིས་རིགས་དག་དང་། །རུས་ལ་ངོ་མཚར་འཛིན་མ་ཡིན། །ཡོན་ཏན་བདེན་པ་ཆོས་ཀྱི་རྣམས། །དེ་ལ་འདི་ཡི་ཡིད་དགའ་འོ། །ཞེས་སྨྲས་སོ། །དེ་ནས་བྲམ་ཟེ་དེས་ཡུལ་ཀུན་ཏུ་སོང་སོང་བས་ཤཱཀྱ་ལག་ན་བེ་ཅོན་ཅན་གྱི་བུ་མོ་ས་འཚོ་མ་མཐོང་ནས་ཡི་གེ་དེ་བྱིན་པ་དང་བཞིན་འཛུམ་སྟེ། བྲམ་

ཟེ་ཡོན་ཏན་འདི་དག་བདག་ལ་ཀུན་ཚང་གིས། །དེས་པའི་གཟུགས་ཅན་དེ་ནི་བདག་གི་ཁྱིམ་ཐབ་འོས། །གལ་ཏེ་གཞོན་ནུ་བཞེས་ན་ཕྱི་བཤོལ་མ་མཛད་གསུངས། །བརྒྱ་ལ་སྐྱེ་བོ་ཕལ་དང་ཞུགས་པར་གྱུར་ཀྱང་གདའ། །ཞེས་སྨྲས་སོ། །དེ་མདུན་ན་འདོན་གྱིས་རྒྱལ་པོ་ལ་གསོལ་བས་རྒྱལ་པོས་བུད་མེད་འདི་རྫུན་ཆེ་བས་ཡིད་མ་ཆེས་ཏེ་ཞག་བདུན་ན་བུ་མོ་ཐམས་ཅད་འདུན་ཁང་དུ་ཤོག་ཅིག །གཞོན་ནུས་ཡིད་དུ་འོང་བའི་ཡོ་བྱད་དག་སྦྱིན་ནོ་ཞེས་སྨྲས་ཏེ། དགུང་བདུན་ནས་གཞོན་ནུས་འདུན་ཁང་དུ་སོང་བ་ལ་བུ་མོ་རྣམས་ཇི་ལྟར་འོངས་པ་བཞིན་ཡོ་བྱད་དག་བྱིན་ཞིང་དེ་དག་གིས་ཀྱང་གཟི་བརྗིད་མ་བཟོད་པར་མྱུར་དུ་སོང་ངོ་། དེ་ནས་ས་འཚོ་མ་འོངས་པ་དང་ཡོ་བྱད་ཟད་དེ། དེས་འཛུམ་དམུལ་ཏེ་བདག་གིས་ནོངས་པ་ཅི་བགྱིས་ནས་བདག་ལ་རྔན་སྡང་མཛད། གཞོན་ནུས་རྔན་སྡང་མིན་གྱི་ཁྱེད་འཕྱིས་པས་ལན་ནོ་གསུངས་ནས་སོར་གདུབ་སྲང་བརྒྱ་སྟོང་རི་བ་དེ་བྱིན་ནོ། །དེ་ནས་དེ་སོང་བ་དང་བྱ་ར་བ་དག་གིས་རྒྱལ་པོ་ལ་གཞོན་ནུ་ས་འཚོ་མ་ལ་སྤྱན་ཆགས་ཏེ་བཀའ་མཆིད་ཀྱང་ཆུང་ཟད་བགྱིས་སོ་ཞེས་གསོལ་ཏོ། །དེ་ནས་རྒྱལ་པོས་ཤཱཀྱ་ལག་ན་བེ་ཅོན་ཅན་ལ་ཁྱེད་ཀྱི་བུ་མོ་གཞོན་ནུ་ལ་བྱིན་ཅིག་ཅེས་ཕོ་ཉ་བ་བཏང་བས། དེ་ན་རེ་གཞོན་ནུ་ཕོ་བྲང་ན་སྐྱིད་དེ་བར་འཁྲུངས་པས་སྒྱུ་རྩལ་མི་ཤེས་ན། བདག་གི་རིགས་ཆོས་ལ་བུ་མོ་སྒྱུ་རྩལ་ཤེས་པ་ལ་གཏོང་བ་ལགས་ན་སྒྱུ་རྩལ་མི་ཤེས་པ་ལ་ཇི་ལྟར་སྦྱིན་ཞེས་ཟེར་རོ། །དེ་བཟླས་པས་ང་ལ་འདིས་འདི་དང་ལན་གཉིས་(ཤཱཀྱ་ཐམས་ཅད་ཀྱིས་ཕྱག་བྱེད་པ་ན། རྒན་པས་གཞོན་པ་ལ་ཕྱག་བྱེད་དགོས་པ་ཨ་ཟེར་ནས་ཕྱག་བྱེད་མ་ཉན།)སུ་ངོར་བལྟས་ཏེ་བརྙས་སོ་སྙམ་སྟེ་རྒྱལ་པོ་སེམས་ཤིང་འདུག་གོ །དེ་ནས་གཞོན་ནུས་དེ་ཐོས་ནས་རྒྱལ་པོ་ལ་ཅི་ནོངས། འདི་བཀའ་མི་སྩལ་དུ་མི་རུང་ངོ་། །ཞེས་སྨྲས་པས་རྒྱལ་པོས་དོན་དེ་བསྙད་དོ། །དེ་ནས་གཞོན་ནུས་སྒྱུ་རྩལ་གྱིས་འགྲན་པར་ཁས་བླངས་པས་རྒྱལ་པོ་མཉེས་ཏེ་སྒྱུ་རྩལ་

༄༅།        །འགྲན་པར་དྲིལ་བསྒྲགས་སོ། །དེ་ནས་ཞག་བདུན་ན་ཤཱཀྱ་གཞོན་ནུ་ལྔ་བརྒྱ་ཙམ་ཚོགས་ཏེ་ས་འཚོ་མ་རྒྱལ་བའི་རུ་མཚོན་དུ་བཞག་སྟེ་རལ་གྲིའི་ཐབས་དང་འཕོང་དང་གྱད་ཀྱི་འཛིན་སྟངས་རྒྱལ་བས་ཁྱེར་ཅིག་ཅེས་དམ་བཅས་སོ། །དེ་ནས་ཐོག་མར་ལྷ་སྦྱིན་འོངས་པ་དང་། གླང་པོ་ཆེ་ཁྲིད་པ་དང་ཕྲད་དེ་ཕྲག་དོག་དང་ང་རྒྱལ་གྱིས་ཐལ་མོ་ལན་ཅིག་བསྣུན་ཏེ་བསད་དོ། །དེ་ནས་མཛེས་དགའ་བོས་གྲོང་ཁྱེར་གྱི་སྒོ་ནས་གུད་དུ་བོར་རོ། །དེ་ནས་བྱང་ཆུབ་སེམས་དཔས་རྐང་པའི་མཐེ་བོས་བླངས་ནས་ར་བ་བདུན་འོབས་བདུན་གྱི་ཕྱིར་རྒྱང་གྲགས་གཅིག་ཙམ་དུ་འཕངས་ཏེ་གཤོང་ཆེན་པོར་གྱུར་ནས་གླང་པོའི་གཤོང་ཞེས་གྲགས་སོ། །དེ་ནས་སློབ་དཔོན་ཀུན་གྱི་བཤེས་གཉེན་དབང་དུ་བཙུགས་ཏེ་ཡི་གེ་འགྲན་པས་བྱང་ཆུབ་སེམས་དཔའ་རྒྱལ་ལོ། །དེ་ནས་ཤཱཀྱ་སྲིད་སྒྲུབ་དཔང་དུ་བཙུགས་ཏེ་བརྩིས་པས་བྱང་ཆུབ་སེམས་དཔའ་རྒྱལ་ཏེ་སྲིད་སྒྲུབ་ཀྱིས་ཀྱང་མི་འཁྲུགས་པ་ཚུན་ཆད་ལས་མ་ཤེས་བྱང་ཆུབ་སེམས་དཔས་སྙིང་པོ་མཆོག་གི་བར་ཤེས་སོ། །དེ་ནས་མཆོང་པ་དང་། རྐྱལ་དང་བང་ཡང་བྱང་ཆུབ་སེམས་དཔའ་ལྷག་གོ །དེ་ནས་དགའ་བོ་ཀུན་དགའ་བོ་གཉིས་ཀྱིས་སྟོབས་བརྒལ་བའི་ཕྱིར་དྲུང་དུ་ཕྱིན་པས་དེའི་ལག་པ་རེག་མ་ཐག་འགྱེལ་ལོ། །དེ་ནས་ལྷ་སྦྱིན་གྱིས་ཕྱིན་པས་བྱང་ཆུབ་སེམས་དཔས་ཕྱག་གཡས་པས་བཏེགས་ཏེ་ནམ་མཁའ་ལ་བསྐོར་ནས་ས་ལ་བོར་ཡང་ལུས་ལ་མི་གནོད་པར་བྱས་སོ། །དེ་ནས་ཤཱཀྱ་གཞོན་ནུ་ཐམས་ཅད་རུབ་པ་དང་བྱང་ཆུབ་སེམས་དཔའ་རེག་མ་ཐག་འགྱེལ་ལོ། །དེ་ནས་འཕོང་འགྲན་པར་བྱེད་དེ་ཀུན་དགའ་བོས་རྒྱང་གྲགས་གཉིས། ལྷ་སྦྱིན་གྱིས་རྒྱང་གྲགས་བཞི། མཛེས་དགའ་བོས་རྒྱང་གྲགས་དྲུག། བེ་ཅོན་ཅན་གྱིས་དཔག་ཚད་གཅིག་གི་ཕ་རོལ་དུ་ལྕགས་རྔ་རེ་འབེན་དུ་བཙུགས་པ་ལ་རང་རང་གི་ལ་ཕོག་གི །དེ་ཕན་ཆད་ལ་མ་ཕོག་གོ །བྱང་ཆུབ་སེམས་དཔས་

རྒྱང་གྲངས་བཅུའི་ཕ་རོལ་དུ་ལྕགས་རྔ་གཅིག །དེའི་དྲུང་དུ་ཤིང་ཏ་ལ་བདུན་དངར། དེའི་ཕ་རོལ་དུ་ལྕགས་ཀྱི་ཕག་རྒོད་གཅིག་བཙུགས་ཏེ་ལྷ་ཁང་ནས། མེས་སེང་གེ་ཟ་འགྲམ་གྱི་གནམ་རུ་བླངས་ཏེ་ཕྱེད་ཀྲུང་དུ་འདུག་པས་བརྡུངས་ཏེ་མདའ་འཕངས་པས་ལྕགས་རྔ་གཅིག །ཤིང་ཏ་ལ་བདུན། ཕག་རྒོད་རྣམས་ཕུག་སྟེ་ས་ལ་ཟུག་ནས་མི་སྣང་བར་གྱུར་ནས་ཁྲོན་པ་ལྟ་བུ་བྱུང་བས་མདའི་ཁྲོན་པ་ཞེས་གྲགས་སོ། །དེ་ནས་ལག་རྩིས་དང་གླང་པོ་ཆེའི་གཉར་ཞོན་ནས་སྤོས་སྦྱོར་གྱི་བར་སྒྱུ་རྩལ་ཐམས་ཅད་ལ་བྱང་ཆུབ་སེམས་དཔའ་ལྷག་པར་གྱུར་པ་དང་། བེ་ཅོན་ཅན་གྱིས་བུ་མོ་ཕུལ་ལོ། །བྱང་ཆུབ་སེམས་དཔས་ཀྱང་འཇིག་རྟེན་དང་མཐུན་པར་བྱ་བའི་ཕྱིར་བུད་མེད་བརྒྱད་ཁྲི་བཞི་སྟོང་གི་མཆོག་ཏུ་ས་འཚོ་མ་དབང་བསྐུར་ཏེ་དེ་དག་དང་རྩེ་དགའ་ལ་ལོངས་སུ་སྤྱོད་དོ། །