(བདུད་བཏུལ་བའི་མཛད་པ།)

དེ་ནས་བདུད་ལ་མ་སྦྲན་པར་འཚང་རྒྱ་བར་མི་རིགས་སོ་སྙམ་སྟེ་སྨིན་མཚམས་ནས་བདུད་ཀྱི་དཀྱིལ་འཁོར་ཐམས་ཅད་འཇོམས་པར་བྱེད་པ་ཞེས་བྱ་བའི་འོད་ཟེར་བཀྱེ་བས་བདུད་ཀྱི་གནས་ཐམས་ཅད་སྣང་ཞིང་གཡོས་མོག་མོག་པོར་བྱས་ཏེ། སེམས་ཅན་ཤིན་ཏུ་དག་པ་བསྐལ་མང་སྤྱོད་སྤྱད་པ། །ཟས་གཙང་སྲས་པོ་རྒྱལ་སྲིད་དག་ནི་རབ་སྤངས་ཏེ། །ཕན་བྱེད་དེ་ནི་བདུད་རྩི་མངོན་པར་འདོད་པས་བྱུང་། །བྱང་ཆུབ་ཤིང་དྲུང་འོངས་ཀྱི་དེ་རིང་སྒྲིམ་པར་གྱིས། །ཞེས་པ་ལ་སོགས་པའི་སྒྲ་བྱུང་ཞིང་། བདུད་སྡིག་ཅན་ལའང་རང་གནས་མུན་པས་ཁྱབ་པ་ལ་སོགས་པའི་རྨི་ལམ་སོ་གཉིས་རྨིས་ཏེ། རང་གི་འཁོར་ལ་སྦྲན་པ་དང་། བུ་དེད་དཔོན་གྱིས་བཟློག་ཀྱང་མ་བཟློག་པར། གནོད་སྦྱིན་གྲུལ་བུམ་ལྟོ་འཕྱེ་ཆེན་པོའི་གཟུགས། །སྲིན་པོ་ཡི་དྭགས་ཤ་ཟའི་གཟུགས་དང་བཅས། །འཇིགས་བྱེད་མི་སྡུག་དྲག་གཟུགས་ཇི་སྙེད་པ། །ཐམས་ཅད་སྒྱུ་ཡིས་དེར་ནི་སྤྲུལ་པ་བྱས། །ཞེས་པ་ལ་སོགས་པ་རྣམ་འགྱུར་དུ་མ་མཐོང་ཡང་། ཤཱཀྱའི་སྲས་པོ་ཆོས་རྣམས་རྟེན་འབྱུང་བ། །དངོས་པོ་མེད་པའི་ངོ་བོ་ཉིད་དུ་རྟོགས། །ནམ་མཁའ་ལྟ་བུའི་སེམས་དང་རབ་ཏུ་ལྡན། །དཔུང་བཅས་གཡོ་སྒྱུ་མཐོང་ཡང་མྱོས་པ་མེད། །དེ་ནས་བདུད་ཀྱི་གཡས་ནས་བྱང་ཆུབ་སེམས་དཔའ་ལ་དགའ་བ་རྣམས་ཀྱིས་བཟློག །གཡོན་ནས་མི་དགའ་བ་རྣམས་ཀྱིས་བསྐུལ་ཏེ་མཚོན་ཆ་སྣ་ཚོགས་པ་འཕངས་པས་མེ་ཏོག་ཏུ་གྱུར་ཏོ། །དེ་ནས་བདུད་ཀྱིས་ཁྱོད་ཀྱི་བསོད་ནམས་དེ་ཙམ་གྱིས་ཐར་པ་ག་ལ་ཐོབ་ཅེས་སྨྲས་པ་དང་། བྱང་ཆུབ་སེམས་དཔས། ཁྱོད་ཀྱིས་གཏན་པ་མེད་པའི་མཆོད་སྦྱིན་གཅིག་བྱས་པས་འདོད་པའི་དབང་ཕྱུག་

ཏུ་གྱུར་པ་ཡིན། ངས་གཏན་པ་མེད་པའི་མཆོད་སྦྱིན་དུ་མ་བྱས་སོ་ཞེས་བརྗོད་པ་དང་། བདུད་ཀྱིས། སྔོན་ཆད་ཁོ་བོས་མཆོད་སྦྱིན་ཁ་ན་མ་ཐོ་མེད། །གཏན་པ་མེད་པར་བྱས་པ་ཁྱོད་འདིར་དཔང་དུ་ཡོད། །ཁྱོད་ལ་འདིར་ནི་དཔང་པོ་གང་ཡང་ཡོད་མིན་པས། །སྨྲས་ཀྱང་ཕན་པ་ཅི་ཡོད་ཁྱོད་ནི་ཕམ་པར་གྱུར། །བྱང་ཆུབ་སེམས་དཔས་སྨྲས་པ། ས་འདི་ང་ཡི་དཔང་ཡིན་ནོ་གསུངས་ཏེ། ཕྱག་གཡས་པ་ས་ལ་བརྡབས་ཏེ། ས་འདི་འགྲོ་བ་ཀུན་གྱི་གནས་ཡིན་ཏེ། །རྒྱུ་དང་མི་རྒྱུ་སྙོམས་ཤིང་ཉེ་འཁོན་མེད། །འདི་ནི་བདག་གི་དཔང་སྟེ་བདག་རྫུན་མེད། །འདི་ལ་ཁྱོད་ནི་བདག་གི་དཔང་བྱོས་ཤིག །ཅེས་གསུངས་པས་ས་རྣམ་པ་དྲག་ཏུ་གཡོས་པའི་གསེབ་ནས་སའི་ལྷ་མོ་བསྟན་མ་ལུས་ཕྱེད་ཕྱུང་ནས་ཐལ་མོ་སྦྱར་ཏེ། སྐྱེས་བུ་ཆེན་པོ་དེ་དེ་བཞིན་ནོ། །ཁྱོད་ཀྱིས་ཇི་སྐད་སྨྲས་པ་དེ་བཞིན་ཏེ་འདི་ནི་བདག་ལ་མངོན་སུམ་མོ། །འོན་ཀྱང་བཅོམ་ལྡན་འདས་ཉིད་ལྷ་དང་བཅས་པའི་འཇིག་རྟེན་གྱི་དཔང་དུ་གྱུར་པ་ལགས་སོ་ཞེས་སྨྲས་ཏེ་མི་སྣང་བར་གྱུར་ཏོ། །གཡོན་ཅན་དཔུང་བཅས་ས་སྒྲ་དེ་ཐོས་ནས། །ནགས་སུ་སེང་གེའི་སྒྲ་བསྒྲགས་ཝས་ཐོས་དང་། །བྱ་རོག་རྡོ་འཕངས་མོད་ལ་བྱེར་བ་བཞིན། །སྔངས་སྐྲག་སྙིང་གས་ཐམས་ཅད་རབ་ཏུ་བྱེར། །དེ་ནས་སྡིག་ཅན་ཡིད་མ་བདེ་ནས། རང་གི་བུ་མོ་རྣམས་སད་དུ་བཏང་སྟེ། དེ་དག་གིས་ཀྱང་བཞིན་ཕྱེད་འགེབས་པ་ལ་སོགས་པ་སྒྱུ་སོ་གཉིས་བསྟན་ཀྱང་བསླུར་མ་ཚུགས་པས་སྡིག་ཅན་ཡིད་མི་དགའོ། །དེའི་ཚེ་ཤིང་གི་ལྷ་མོ་དཔལ་ལྡན་ལ་སོགས་བརྒྱད་ཀྱིས་བྱང་ཆུབ་སེམས་དཔའ་ལ། ཁྱོད་ནི་དགུང་ཟླ་ཡར་གྱི་ངོ་ལྟར་མཛེས་པའོ། །ཞེས་སོགས་བཅུ་དྲུག་གིས་བསྟོད། གནས་གཙང་མའི་ལྷས། བདུད་ལ་སྡིག་ཅན་ཁྱོད་ནི་གླང་རྒན་འདམ་དུ་བྱིང་བ་ལྟར་ཉམ་ཆུང་བའོ་ཞེས་སོགས་བཅུ་དྲུག་གིས་སྨད་ཅིང་། ལྷ་རྣམས་ཀྱིས་བཅུ་དྲུག་གིས་བཟློག་ཀྱང་མ་བཟློག་པར་མཚོན་ཆ་སྣ་ཚོགས་འཕངས་ཤིང་ཆོ་འཕྲུལ་སྣ་

༄༅།        །ཚོགས་བསྟན་ཀྱང་གླགས་མ་རྙེད་ཅིང་བདུད་དཔུང་མི་འཁྲུགས་པ་ཡང་འཐོར་ཏེ་ཞག་བདུན་དུ་མ་ཕྲད་དོ། །བདུད་མང་པོས་བྱང་ཆུབ་ཏུ་སེམས་བསྐྱེད་དོ། །