(༡. བཀའ་བསྡུ་དང་པོ།)

དེ་ལྟར་སྐུ་གདུང་གི་མཆོད་རྟེན་ལ་སོགས་པ་གྲུབ་པ་དང་། ཤཱ་རིའི་བུ་འཁོར་བརྒྱད་ཁྲི། མོའུ་གལ་གྱི་བུ་འཁོར་བདུན་ཁྲི། སྟོན་པ་འཁོར་དགེ་སློང་ཁྲི་བརྒྱད་སྟོང་དང་བཅས་པ་འདས་པས་ཚེ་བསྐལ་པ་མང་པོ་ཐུབ་པའི་ལྷ་རྣམས་སྟོན་པའི་གསུང་རབ་ནི་དུད་པ་ཙམ་དུ་གྱུར་ཏེ་དགེ་སློང་དབང་ཡོད་པ་དག་ཀྱང་འདས་པས་སྡེ་སྣོད་གསུམ་མི་སྒྲོག་གོ །ཞེས་འཕྱ་བ་བསལ་བའི་ཕྱིར། འོད་སྲུང་ཆེན་པོས་དགེ་སློང་བསྡུ་བའི་ཕྱིར་གང་པོ་ལ་དགེ་འདུན་སྡུས་ཤིག་ཅེས་བརྗོད་དོ། །གང་པོས་རབ་མཐའི་བསམ་གཏན་ལ་ཞུགས་ཏེ་བལྟས་ནས་གཎྜི་བརྡུངས་པས་བ་ལང་བདག་མ་གཏོགས་པ་འདུས་སོ། །གང་པོ་

བ་ལང་བདག་འབོད་པར་བསྒོས་པས་རྫུ་འཕྲུལ་གྱིས་ཤི་རི་ཤ་ཀའི་གཞལ་མེད་ཁང་ན་བ་ལང་བདག་གནས་པར་སོང་ནས་ཕྱག་བྱས་ཏེ་འདི་སྐད་ཅེས་འོད་སྲུང་ལ་སོགས་པའི་དགེ་སློང་གི་དགེ་འདུན་རྣམས་ཚེ་དང་ལྡན་པ་བ་ལང་བདག་ནད་མེད་པར་གྱུར་ཅིག །དགེ་འདུན་གྱི་བྱ་བ་ཅུང་ཟད་ཡོད་ཀྱི་མྱུར་དུ་བོས་ཤིག་ཟེར་རོ། །ཞེས་སྨྲས་པ་དང་། དེ་འདོད་ཆགས་དང་བྲལ་བ་ཡིན་ཡང་བྱམས་པའི་བག་ཆགས་ཀྱིས་བསྒོས་པས། ཚེ་དང་ལྡན་པ་གང་པོ། བཅོམ་ལྡན་འདས་གདུལ་བྱའི་དོན་དུ་འཇིག་རྟེན་གཞན་དུ་མ་གཤེགས་སམ། དགེ་འདུན་འཐབ་པ་དང་རྩོད་པ་དང་འགྱེད་པ་དང་མཚང་འབྲུ་འམ། དེ་བཞིན་གཤེགས་པས་ཆོས་ཀྱི་འཁོར་ལོ་བསྐོར་བ་མུ་སྟེགས་ཀྱིས་མ་བཟློག་གམ། དེ་དག་འདུས་ནས་ཉན་ཐོས་ཀྱི་དགེ་འདུན་ལ་གནོད་པ་མ་བྱས་སམ། དེ་བཞིན་གཤེགས་པ་ཉི་མ་དང་འདྲ་བ་ལ་ཉོན་མོངས་པའི་དཀྲིས་པའི་དབང་དུ་གྱུར་པའི་དགེ་སྦྱོང་དང་བྲམ་ཟེ་དང་སྤྱོད་པ་བ་དང་ཀུན་ཏུ་རྒྱུ་དག་གིས་བརྙས་པར་མ་གྱུར་ཏམ། མ་རིག་པའི་མུན་པས་གཡོགས་པའི་བློ་གྲོས་ཅན་དག་གིས་དགེ་འདུན་འདུས་པའི་དབྱེན་མ་བྱས་སམ། དེ་བཞིན་གཤེགས་པའི་ཆོས་དང་འདུལ་བ་ལ་ཆོས་དང་འདྲ་བའི་ཚིག་དང་ཡི་གེ་དང་ལྟ་བའི་དྲི་མ་མ་བྱུང་ངམ། ཚངས་པ་མཚུངས་པར་སྤྱོད་པ་དག་ཀློག་པ་དང་འདོན་པ་དང་ཡིད་ལ་བྱེད་པ་དག་ལས་བློ་བསྒྱུར་ཞིང་འདུས་ནས་བྲེ་མོའི་གཏམ་བྱེད་པར་མ་གྱུར་ཏམ། ཐེ་ཚོམ་དང་ཡིད་གཉིས་ལ་ཞུགས་པའི་སེམས་ཀྱིས་ཆོས་མ་ཡིན་པ་ལ་ཆོས་སུ། ཆོས་ལ་ཆོས་མ་ཡིན་པར། འདུལ་བ་མ་ཡིན་པ་ལ་འདུལ་བར། འདུལ་པ་ལ་ནི་འདུལ་བ་མ་ཡིན་པར་མ་བཤད་དམ༏ དགེ་སློང་དག་སེར་སྣའི་དྲི་མས་གཡོགས་པས་ཚངས་པ་མཚུངས་པར་སྤྱོད་པ་གློ་བུར་དུ་འོངས་པ་རྣམས་ལ་ཀུན་ཏུ་དགའ་བར་བྱ་བའི་ཆོས་དྲུག་ལ་སོགས་པ་མི་བྱེད་ཅིང་ཁྱད་དུ་གསོད་པར་མི་བྱེད་དམ། རབ་ཏུ་བྱུང་བ་ངན་པ་དག་གིས་བྲམ་ཟེ་དང་

༄༅།        །ཁྱིམ་བདག་དད་པ་ཅན་དག་བསྟན་པ་ལ་མ་དད་པར་བྱས་ནས་མུ་སྟེགས་ལ་བརྟེན་པར་མ་གྱུར་ཏམ། ལོག་པར་འཚོ་བ་ཀུན་ཏུ་སྤྱོད་ཅིང་ཞིང་རྨོ་བ་དང་ཉོ་ཚོང་བྱེད་པ་དང་རྒྱལ་པོ་ལ་བརྟེན་ཅིང་འཚོ་བ་ལྟོས་པར་མ་གྱུར་ཏམ། སྦྱངས་པའི་ཡོན་ཏན་བླངས་ནས་བས་མཐའི་གནས་མལ་དུ་བརྟེན་པ་ལས་སྦྱངས་པའི་ཡོན་ཏན་བོར་བར་མ་གྱུར་ཏམ། དགེ་སྦྱོང་མ་ཡིན་པ་དགེ་སྦྱོང་དུ་ཁས་འཆེས་ནས་ཚངས་པ་མཚུངས་པར་སྤྱོད་པ་འཁྲུག་པར་མི་བྱེད་དམ། དེ་ལྟ་མོད་ཀྱི་ཇོ་བོ་གང་པོ། སངས་རྒྱས་ལ་སོགས་པའི་དགེ་སློང་གི་དགེ་འདུན་ཞེས་སྨྲ་བར་རིགས་ན། འོད་སྲུང་ལ་སོགས་པ་ཞེས་སྨྲའམ། ཐུགས་རྗེ་ཆེན་པོ་ལ་གོམས་པར་གནས་པ་ཀུན་ཏུ་སྤྱོད་པ་ལ་ཞུགས་པའི་སྟོན་པ་ཕུང་པོ་ལྷག་མ་མེད་པའི་མྱ་ངན་ལས་འདས་པའི་དབྱིངས་སུ་ཡོངས་སུ་མྱ་ངན་ལས་འདས་པ་ལ་མ་ཞུགས་སམ། འགྲོ་བའི་རུ་སྐྱ་འཛིན་པ་མེད་ནས་འཇིག་རྟེན་འཁྲུགས་པར་མ་གྱུར་ཏམ། སྟོབས་བཅུ་ལྡན་པ་མི་རྟག་པའི་སྟོབས་ཀྱིས་མ་ནོན་ནམ། སེམས་ཅན་གྱི་སྟོན་པ་བདག་ཅག་སད་པར་བྱེད་པའི་མགོན་པོ་མ་གཟིམས་སམ། སངས་རྒྱས་ཉིན་བྱེད་མ་ནུབ་བམ། ཐུབ་པའི་དབང་པོའི་ཟླ་བ་སྒྲ་གཅན་གྱིས་བཅོམ་ནས་སྣང་བ་མེད་པར་མ་གྱུར་ཏམ། སུམ་ཅུ་རྩ་གསུམ་ན་དབང་ཕྱུག་དཔག་བསམ་གྱི་ཤིང་དྲི་ཞིམ་པ་བྱང་ཆུབ་ཡན་ལག་གི་མེ་ཏོག་གིས་མཛེས་པར་བྱས་ལ་དགེ་སྦྱོང་གི་འབྲས་བུ་བཟང་པོ་བཞི་དང་ལྡན་པ་མི་རྟག་པའི་གླང་པོ་ཆེ་སྨྱོན་པས་མ་བཅོམ་མམ། ཡེ་ཤེས་ཀྱི་སྒྲོན་མ་མི་རྟག་པའི་རླུང་གིས་བདས་ནས་ཡོངས་སུ་མྱ་ངན་ལས་མ་འདས་སམ། ཞེས་དྲིས་པ་དང་། གང་པོས། བློ་ལྡན་བསྟན་པ་གནས་བྱའི་ཕྱིར། །ཉན་ཐོས་དགེ་འདུན་ཚོགས་ནས་ནི། །དེ་དག་དེར་ནི་འདུས་གྱུར་ཏེ། །ཁྱོད་ལ་སྡོད་ཅིང་དེ་བརྩོན་བྱེད། །གྲུ་ཆེན་རྒྱལ་བ་དེ་ཞིག་སྟེ། །ཡེ་ཤེས་རི་ཡང་རྣམ་པར་བསྙིལ། །བསྟན་པ་རབ་མཆོག་ལྡན་པ་

ཡི། །དགེ་སློང་མང་པོ་རྣམ་པར་ཞི། །གྱི་ན་མ་ལགས་ལེགས་པར་ནི། །བདག་ནི་ཕོ་ཉར་འདིར་འོངས་ན། །བསྟན་པ་གནས་པར་བྱ་བའི་ཕྱིར། །དེ་བས་ཁྱོད་ནི་ངེས་པར་བཞུད། །དེས་སྨྲས་པ། གང་པོ་ཆོག་གི་འགྲོ་བའི་དུས་མིན་ནོ། །འགྲོ་བའི་སྒྲོན་མེ་མགོན་པོ་བཞུགས་པ་དེར། །བདག་ནི་འགྲོ་བར་བྱ་བའི་བློ་ཡོད་ཀྱང་། །དེ་ནི་ཕ་རོལ་རབ་ཞིར་གཤེགས་གྱུར་ན། །བློ་ལྡན་གང་ཞིག་འཇིག་རྟེན་དེ་དག་འགྲོ། ལྷུང་བཟེད་ཆོས་གོས་རྣམ་གསུམ་མཆོག་འདི་དག །ཁྱོད་ཀྱིས་དགེ་འདུན་དག་ལ་དབུལ་བར་གྱིས། །བདག་ནི་ཞི་བ་ཡང་སྲིད་མེད་པར་འགྲོ །བདག་གི་བསམ་པ་འཕགས་ལ་བཟོད་པར་གསོལ། །ཞེས་སྨྲས་ཏེ། རྫུ་འཕྲུལ་བསྟན་ཏེ་འདས་སོ། །དེའི་ལུས་ལ་རང་བྱུང་བའི་མེས་ཚིག་ཅིང་དེ་ལས་ཆུ་རྒྱུན་བཞི་བབས་པ་ལས་ཚིགས་སུ་བཅད་པ་བཞི་བྱུང་སྟེ། ད་ལྟ་དུས་རྣམས་ངན་གྱུར་ཏེ། །སེམས་ཅན་རང་གི་ལས་ལ་བརྟེན། །འགྲོ་བའི་སྒྲོན་མ་དེ་འདས་པས། །ཐམས་ཅད་འགྲོ་བར་འཇུག་པར་རྟོགས། །འདུས་བྱས་བསགས་པའི་སྐད་ཅིག་འཇིག་འགྱུར་ཏེ། །སྐྱེ་ལ་སོགས་པ་སྡུག་བསྔལ་ཉོན་མོངས་ལྡན། །སོ་སོ་སྐྱེ་བོ་བདག་ཏུ་ང་རྒྱལ་ཏེ། །དེ་དག་བྱེད་པ་མེད་པར་རིག་པར་བྱ། །མཁས་པས་རྟག་ཏུ་དགོངས་པས་བག་ཡོད་ཅིང་། །བསོད་ནམས་ཡིད་ལ་བྱ་བ་དེ་བརྩོན་བྱ། །འབྱུང་པོའི་ཚོགས་ཀུན་སོང་ཞིང་འཇིག་འགྱུར་ཏེ། །སྲོག་དང་བཅས་པའི་དཔལ་ནི་གཡོ་བར་འགྱུར། །ཐུབ་པ་དེ་ལ་བློ་མཆོག་ཡང་དག་བཏུད། །རང་གི་དགོངས་པ་མ་ལུས་ཐམས་ཅད་བྱས། །གུས་ཤིང་རབ་ཏུ་དད་པས་བླ་མ་དེའི། །ཕྱི་བཞིན་བ་ལང་བདག་ཀྱང་དེ་ལྟར་སོང་། །དེ་ནས་གང་པོས་རྫུ་འཕྲུལ་གྱིས་དགེ་འདུན་འདུས་པའི་ནང་དུ་ཕྱག་བྱས་ཏེ་ལྷུང་བཟེད་ལ་སོགས་པ་ཕུལ་ནས། མགོན་པོའི་སྐུ་ནི་མེད་པར་དེས་ཐོས་ནས། །བསོད་ནམས་ལས་ཀྱིས་རབ་ཏུ་ཞི་བར་སོང་། །དེ་ཡི་ལྷུང་བཟེད་ཆོས་གོས་འདི་ཡིན་ཏེ། །དེ་བསམ་དགེ་འདུན་དག་

༄༅།        །ལ་བཟོད་པར་གསོལ། །དེ་ནས་འོད་སྲུང་ཆེན་པོས་དགེ་སློང་དག་ཉོན་ཅིག །ཇི་ལྟར་དེ་ནི་འཕགས་པའི་ཚུལ་གྱིས་འདས། །གཞན་གྱིས་དེ་བཞིན་རབ་ཞིར་འགྲོ་མི་བྱ། །དེ་བས་ཇི་སྲིད་དགོས་པའི་དོན་བྱ་ཞིང་། །དབང་ཅན་ཚོགས་ནས་དེ་སྲིད་འགྲོ་བར་བྱ། །ཇི་ལྟར་བསོད་ནམས་ལས་ཀྱི་གཞིར་གྱུར་པ། །ཤིར་ཤ་ཀ་ཡི་སེམས་མཆོག་བ་ལང་བདག །དེ་ལྟར་ཁྱེད་ཀྱིས་དེ་བཞིན་མི་བསམ་སྟེ། །འགྲོ་དོན་དགོངས་ཕྱིར་ཚོགས་ནས་བློ་གྲོས་བྱ། །ཞེས་ཁྲིམས་སུ་བཅས་ནས་སྨྲས་པ། འདིར་ཆོས་ཀྱི་ཚུལ་བཤད་ན་དགེ་སློང་མང་པོ་འོངས་ན་གཡེང་བར་བྱེད་པས་མ་ག་དྷར་འགྲོའོ། །ལེགས་སོ་ཟེར་ནས་སློབ་པའི་དགེ་སློང་གཞན་ལྡོག་ཅིང་ཀུན་དགའ་བོ་ཆུའི་ཞལ་ཏ་བར་བསྐོས་ནས་ཀུན་དགའ་བོ་དགེ་འདུན་དང་བཅས་པ་ལྗོངས་རྒྱུ་ཞིང་སོང་། འོད་སྲུང་ཆེན་པོ་དྲང་པོ་ནས་སོང་སྟེ་རྒྱལ་པོའི་ཁབ་ཏུ་སོང་བ་དང་། མ་སྐྱེས་དགྲས་མཐོང་སྟེ་སྟོན་པ་དྲན་ཏེ་གླང་པོ་ཆེ་ལས་ལྷུང་བ་འོད་སྲུང་གིས་མཐུས་བཟུང་ནས་ཕྱིས་དེ་ལྟར་མི་བྱེད་པར་བཅས་ཏེ་ལྷའི་གནས་འདིར་ཆོས་ཀྱི་ཚུལ་བགྲོ་བར་འཚལ་ལོ། །དེས་སྨྲས་པ། ལེགས་ཀྱི་བདག་གིས་ཡོ་བྱད་ཐམས་ཅད་སྦྱར་རོ་ཞེས་སོ། །དེ་ནས་འདུས་ཏེ་ཤིང་ནྱ་གྲོ་དྷའི་ཕུག་ཏུ་རྒྱལ་པོས་མལ་སྟན་དང་ཡོ་བྱད་སྦྱར་ཏེ་དབྱར་གནས་བར་ཁས་བླངས་ཏེ་འོད་སྲུང་ཆེན་པོས་ཀུན་དགའ་བོའི་སེམས་ལ་ཀུན་ཏུ་བལྟས་ནས་མ་འགག་པ་ལ། འཁོར་འདིར་དེ་བཞིན་གཤེགས་པས་རབ་ཏུ་བསྔགས་པའི་ནང་ན་དགེ་སློང་འདོད་ཆགས་དང་བཅས་པ་ཞེ་སྡང་དང་བཅས་པ་གཏི་མུག་དང་བཅས་པ་སྲེད་པ་དང་བཅས་པ་ལེན་པ་དང་བཅས་པ་སློབ་པ་དག་ཡོད་དོ། །མ་འགག་པས་མངོན་ཤེས་ཀྱིས་བལྟས་ཏེ་སྨྲས་པ། མཁྱེན་པར་མཛོད་ཅིག་དགེ་སློང་གི་དགེ་འདུན་ནི་སྙིང་པོ་མེད་པ་དང་བྲལ་བ་དག་པ་གཙང་བ་སྙིང་པོ་ཅན་བླ་ན་མེད་པ་བསོད་

ནམས་ཀྱི་ཞིང་འཇིག་རྟེན་གྱི་སྦྱིན་གནས་ཡིན་མོད་ཀྱི་ཀུན་དགའ་བོ་ནི། སྔར་གྱི་དེ་ལྟ་བུ་ཡིན་ནོ། །དེ་ནས་འོད་སྲུང་གིས་སྤྱོས་པས་འདུལ་བར་ཤེས་ཏེ། དེས་དེ་ལ་ངེད་ནི་མཆོག་འདུས་པ་ཡིན་ལ་ཁྱོད་དང་ལྷན་ཅིག་ཆོས་བགྲོ་བར་མི་བྱའི་ཁྱོད་སོང་ཞིག །དེ་གནད་དུ་ཕོག་པ་བཞིན་དུ་གཡོས་ཏེ་འོད་སྲུང་ཆེན་པོ་ཆོག་གི །བདག་གིས་ཚུལ་ཁྲིམས་ལྟ་བ་སྤྱོད་པ་འཚོ་བ་ཉམས་པར་མ་བྱས། དགེ་འདུན་ལ་ཉེས་པ་ཅུང་ཟད་ཀྱང་མ་བྱས་ཀྱི་བཟོད་པར་མཛོད་ཅིག །འོད་སྲུང་གིས་ཁྱོད་སྟོན་པའི་ཞབས་འབྲིང་ན་འདུག་པས་ཉམས་པ་བཞི་མ་བྱས་པ་ངོ་མཚར་ཅི་ཆེ། དགེ་འདུན་ལ་ཉེས་པ་མ་བྱས་ན་ལོངས་ལ་ཚུལ་ཤིང་ཟུངས་ཤིག །ཉེས་པ་བསྟན་པར་བྱའོ། །ཀུན་དགའ་བོ་ལངས་པ་དང་སྟོང་གསུམ་གཡོས་ལྷ་རྣམས་ངོ་མཚར་དུ་གྱུར་ཏེ། ཀྱེ་མ་འོད་སྲུང་བདེན་པ་དང་ཕན་པར་སྨྲ་བས་ཐུབ་པ་ལུས་འཕགས་ཀྱི་གནས་འདི་ནས་ཀུན་དགའ་བོ་ལ་དྲག་ཏུ་སྤྱོས་སོ་ཞེས་ཟེར་རོ། །དེ་ནས་འོད་སྲུང་གིས་ཁྱོད་ཀྱིས་བུད་མེད་རབ་ཏུ་དབྱུང་བར་གསོལ་བས། སྟོན་པས་ཀུན་དགའ་བོ་བུད་མེད་རབ་ཏུ་དབྱུང་ཞིང་བསྙེན་པར་རྫོགས་ཏེ་དགེ་སློང་མའི་དངོས་པོ་ཐོབ་པར་འགྱུར་བར་མ་སྨྲ་ཞིག །དེ་ཅིའི་ཕྱིར་ཞེ་ན། ཆོས་འདུལ་བ་འདི་ལ་བུད་མེད་རབ་ཏུ་ཕྱུང་ན་ཆོས་འདུལ་བ་ཡུན་རིང་དུ་མི་གནས་ཏེ། དཔེར་ན་འབྲས་སཱ་ལུ་ཕུན་སུམ་ཚོགས་པའི་ཞིང་ལ་སེར་བ་བབ་ན་མེད་པར་འགྱུར་བ་བཞིན་དུ་བུད་མེད་རབ་ཏུ་ཕྱུང་ན་ཆོས་འདུལ་བ་ཡུན་རིང་དུ་གནས་པར་མི་འགྱུར་ཞེས་མ་གསུངས་སམ། དེ་ངོ་ཚ་མེད་པ་སོགས་མ་ལགས་ཀྱི་འོན་ཀྱང་སྲུ་སྐྱེ་དགུའི་བདག་མོ་སྟོན་པའི་ནུ་མ་སྣུན་པའི་མ་མ་ཡིན་པས་བྱས་པ་གཟོ་བ་དང་འཁོར་རྣམ་བཞི་དང་ལྡན་པའི་ཕྱིར་དུ་ལགས་སོ། །ཁྱོད་ཀྱིས་བྱས་བ་གཟོ་བ་ནི་ཆོས་སྐུ་ལ་གནོད་པ་བྱེད་པ་སྟེ་སངས་རྒྱས་ཀྱི་ཞིང་ཕུན་སུམ་ཚོགས་པ་ལ་སེར་བ་ཕབས་པས་ལོ་སྟོང་ཚང་བར་གནས་པ་ཡུན་ཐུང་ངུར་ལྷག་མ་ཙམ་དུ་བྱས་སོ། །སྔོན་སེམས་ཅན་ཉོན་

༄༅།        །མོངས་ཆུང་བ་ལ་འཁོར་རྣམ་བཞི་རིགས་ཀྱི་ད་ལྟ་སྟོན་པ་མི་བཞེད་བཞིན་དུ་གསོལ་བ་བཏབ་པས་འདི་ནི་ཉེས་པ་དང་པོ་སྟེ་ཚུལ་ཤིང་ཞོག་ཅིག །ཡང་མྱ་ངན་ལས་མི་འདའ་བར་གསོལ་བ་མ་བཏབ་བོ། །དེ་བདུད་ཀྱིས་ཁྱབ་པར་གྱུར་ཏོ། །དེ་ཉིད་ཉེས་པས་ཚུལ་ཤིང་ཞོག་ཅིག །ཡང་དྲིས་པའི་ལན་(ྋབཅོམ་ལྡན་འདས་དགེ་འདུན་དང་བཅས་པའི་དབུས་སུ་ཤཱ་རིའི་བུས། དགེ་སློང་འགོག་པའི་སྙོམས་འཇུག་ཐོབ་པ་ཁམས་ཀྱི་ཟས་སྤངས་ཏེ་ཡིད་ཀྱི་རང་བཞིན་གྱི་ལུས་ཅན་དུ་སྐྱེས་ནས་དེར་ཡང་འགོག་པ་ལ་སྙོམས་པར་འཇུག་པ་མཆིས་ཞེས་སྨྲས་པས། འཆར་ཁ་ན་རེ། འདི་ནི་གནས་མེད་གོ་སྐབས་མེད་དོ། །ཟེར་བ་ལ། བཅོམ་ལྡན་འདས་ཀྱིས་དེའི་རྒྱུ་མཚན་དྲིས་པས་འདོད་པ་ལས་འདོད་ཆགས་དང་བྲལ་ནས་ཡིད་ཀྱི་རང་བཞིན་གྱི་ལུས་ཅན་གཟུགས་མེད་དུ་སྐྱེས་ནས་དེར་འགོག་སྙོམས་བྱེད་མི་སྲིད་ཟེར་བ་ལ། སྟོན་པས་ཀུན་དགའ་བོ་མང་དུ་ཐོས་པ་ཡིན་པས་གཤགས་འབྱེད་དུ་རེ་བ་ལ། ལན་གཉིས་ལན་གསུམ་གྱི་བར་དུ་འབྱེད་མ་ཉན། དེ་ནས་བཅོམ་ལྡན་འདས་ཀྱིས་ཀུན་དགའ་བོ་ལ་མི་གཏི་མུག་ཅན་བ་ལང་དང་འདྲ་བས་དགྲ་བཅོམ་པ་རི་རབ་དང་འདྲ་བ་ལ་མཐོ་འཚམ་པ་ལ་བཟོད་པར་བྱེད་དམ། ཞེས་གསུངས་པས། སྟོན་པ་མང་ལགས་མ་ཞུས་པར། ཀུན་དགའ་བོ་ན་རེ། དཔེ་ཅན་ལ། དགེ་སློང་དགེ་ཅན་འདི་ནི་གཞན་གྱིས་བརྗོད་པ་གཞན་ལ་སྦྱོར་བར་བྱེད་པ་སྟེ་ཞེས་སོགས་སྨྲས་ནས་བཅོམ་ལྡན་འདས་ཀྱི་བཀའ་རླུང་ལ་བསྐུར་བའོ། །བཅོམ་ལྡན་འདས་ཀྱིས་གཤགས་དྲང་པོར་ཕྱེ་པ་ནི། ཡིད་ལུས་ཅན་གཟུགས་ཁམས་པ་སྟེ། དེར་འགོག་སྙོམས་རུང་ངོ་ཞེས་ལུང་འདྲེན་དང་བཅས་མཛོད་འགྲེལ་ན་ཡོད། ལུང་ལ་ལ་ཆད། ལ་ལ་གོར་རུང་མེད།)གཞན་དུ་བཏབ་པས་ཚུལ་ཤིང་ཞོག་ཅིག །ཡང་ན་བཟའ་ཕྲུག་རྐང་པས་བརྫིས་སོ། །དེ་འཐེན་པའི་གྲོགས་མེད་དོ། །དེ་ནམ་མཁར་དོར་ན་ལྷས་འཛིན་ཏེ་ཚུལ་ཤིང་ཞོག་ཅིག །ཡང་རྙོག་ཆུ་དྲངས་སོ། །དེ་ཆུ་བོ་ཀ་ཀུ་ཏ་ལ་ཤིང་རྟ་ལྔ་བརྒྱས་ཕྱིན་ནས་རྙོག་པར་གྱུར་ཏོ། །དེ་ཉིད་ཉེས་ཏེ་ནམ་མཁར་བཟུང་ན་ལྷས་ཆུ་ཡན་ལག་བརྒྱད་ལྡན་ལྡུགས་པས་ཚུལ་ཤིང་ཞོག་ཅིག །ཡང་ཚུལ་ཁྲིམས་ཕྲ་མོ་དང་ཕྲན་ཚེགས་དག་འདོད་ན་དགེ་འདུན་གྱི་ཕྱིར་གློད་ལ་བདེ་བ་ལ་རེག་པར་མནོས་ཤིག་ཅེས་འབྱུང་བ་ན་ཕྲན་ཚེགས་གང་

ལགས་ཞེས་མ་ཞུས་སོ། །དེ་ལ་ལྟུང་བ་སྡེ་ལྔ་མན་ཆད་དང་། སོ་སོར་བཤགས་པ་མན་ཆད་དང་། ལྟུང་བྱེད་མན་ཆད་དང་། སྤང་ལྟུང་མན་ཆད་དང་། མ་ངེས་པ་མན་ཆད་ཕྲན་ཚེགས་སུ་གསུངས་པས། དེ་ལ་བརྟེན་ནས་ཁ་ཅིག་ཕམ་པ་བཞི་ལས་མི་བསྲུང་། ཁ་ཅིག་མ་ངེས་པ་ཡན་ཆད་ལས་མི་བསྲུང་བས་མུ་སྟེགས་ཀྱིས་སྐབས་རྙེད་ཅིང་འཕྱ་བས་ཉེས་སོ། །དེ་སྟོན་པ་དང་འབྲལ་བའི་མྱ་ངན་གྱིས་ནོན་ནོ། །དེ་ཉིད་ཉེས་པས་ཚུལ་ཤིང་ཞོག་ཅིག །ཡང་ཁྱིམ་པ་དང་བུད་མེད་ལ་འདེམས་ཀྱི་སྦ་བ་སྦུབས་སུ་ནུབ་པ་བསྟན་ནོ། །དེ་བུད་མེད་ཕོ་མཚན་དང་བྲལ་ལམ་སྙམ་པའོ། །དེ་ཉེས་པས་ཚུལ་ཤིང་ཞོག་ཅིག །ཡང་སྐུ་བུད་མེད་ལ་བསྟན་པས་མཆི་མས་དྲི་མ་ཅན་དུ་གྱུར་པའོ། །དེ་སྐུ་དེ་ལྟ་བུ་དེ་མཐོང་ན་སེམས་ཅན་རྣམས་སེམས་བསྐྱེད་པར་འགྱུར་རོ་སྙམ་མོ། །དེ་ཉིད་ཉེས་པས་ཆགས་པ་ཅུང་ཟད་དང་ལྡན་པས་འདོད་ཆགས་དང་བྲལ་བ་མཆོག་འདུས་པའི་ནང་དུ་མ་འདུག་པར་སོངས་ཤིག །དེ་ནས་ཀུན་དགའ་བོས་ཕྱོགས་བཞིར་བལྟས་ཏེ་སྙིང་རྗེ་བ་དང་སྡུག་བསྔལ་བའི་སེམས་ཀྱིས་དལ་བུས་སྨྲས་པ། ཀྱེ་མ་ངའི་དུས་ནི་འདི་འདྲ་སྟེ། བདག་དེ་བཞིན་གཤེགས་པས་ནི་སྤངས། མགོན་སྐྱབས་དང་སྣང་བ་ཡང་སུ་ལ་བསྟེན་པར་བྱ། །དེའི་ཚེ་ལྷས་ཀྱེ་མ་ལྷ་རྒྱལ། ལྷ་མིན་སྨད་བསྟན་པ་རྒྱས་ཏེ། སྟོན་པ་དང་འདྲ་བའི་ཉན་ཐོས་ཀྱིས་སྟོན་པ་དང་འདྲ་བའི་ཉན་ཐོས་ལ་སྤྱོས་སོ་ཞེས་སོ། །དེ་ནས་ཀུན་དགའ་བོས། འོད་སྲུང་བཟོད་པ་མཛོད་ཅིག་དེ་ལྟར་ཆོས་བཞིན་བགྱིད་ཅིང་སླན་ཆད་མི་བགྱིད་མོད་ཀྱི། སྟོན་པས་བདག་ཁྱོད་ལ་གཏད་དོ། །ཀུན་དགའ་བོ་ཁྱོད་མྱ་ངན་མ་བྱེད་ཅིག །ཁྱོད་འོད་སྲུང་ཆེན་པོ་ལ་གཏད་དོ། །ཁྱོད་ཉེས་པ་ཆུང་ངུ་ལ་མི་བཟོད་པ་མ་བྱེད་པར་བཀའ་བཞིན་བྱོས་ཤིག་གསུངས་སོ། །དེས་ཀུན་དགའ་བོ་ཁྱོད་མ་ངུ་བར་ཁྱོད་ཀྱི་དགེ་བའི་ཆོས་འཕེལ་བར་འགྱུར་གྱི་འགྲིབ་པར་མི་འགྱུར་རོ། །ངས་ཁྱོད་ལ་བསྟན་པ་ལ་བརྩོན་པའི་ཕྱིར་ཆད་པ་བཅད་དོ་ཞེས་སྨྲས་སོ། །དེ་ནས་མ་འགག་པས་

༄༅།        །འོད་སྲུང་ལ་ཀུན་དགའ་བོ་མེད་ན་བཀའ་ཇི་ལྟར་བསྡུ། དེས་ཀུན་དགའ་བོ་ཡོན་ཏན་དང་ལྡན་ཡང་ལྷན་ཅིག་མི་གནས་སོ། །དེ་ནི་འདོད་ཆགས་ལ་སོགས་པ་དང་བཅས་པས་བསླབ་དགོས་ཏེ་ལྷན་ཅིག་བཟླས་པ་མི་བྱའོ། །དེ་ནས་ཀུན་དགའ་བོ་ཁྱོད་སོངས་ཤིག །ཁྱོད་བརྩོན་པས་དགྲ་བཅོམ་པར་གྱུར་ན་ལྷན་ཅིག་ཡང་དག་པར་བཟླས་པ་བྱའོ། །དེ་ནས་ཀུན་དགའ་བོ་མིག་མཆི་མས་གང་བཞིན་དུ་སྟོན་པ་དང་བྲལ་བས་ཡིད་མི་དགའ་བཞིན་དེ་ནས་སོང་སྟེ། བྲི་ཛིའི་གྲོང་དུ་སོང་ནས་བྲི་ཛིའི་བུས་གཡོག་བྱས་ཏེ་ཆོས་འཆད་པའི་ཚེ། བྲི་ཛིའི་བུས་མཁན་པོའི་སེམས་ལ་བལྟས་ནས། གོའུ་ཏ་མ་བག་མེད་མ་མཛད་པར། །ཤིང་དྲུང་ཐིབས་པོ་བསྟེན་ན་མྱ་ངན་འདའ། །ཐུགས་ལ་བཞག་སྟེ་བསམ་གཏན་མཛོད་ཅིག་དང་། །རིང་པོར་མི་ཐོགས་ཞི་བའི་གནས་ཐོབ་འགྱུར། །དེ་ལྟར་སྤོང་བྱེད་བུ་ཡི་གདམས་ངག་ལས་ཉིན་མོ་དང་མཚན་མོའི་ཐུན་དང་པོ་ལ་འཆག་པ་དང་འདུག་པས་སེམས་ཀྱི་སྒྲིབ་པ་སྦྱངས་ཏེ། གུང་ཐུན་ལ་གཙུག་ལག་ཁང་གི་ཕྱི་རོལ་དུ་རྐང་པ་བཀྲུས་ནས། ནང་དུ་གློ་གཡས་པ་ཕབ་སྟེ་སྔས་ལ་མགོ་མ་བཞག་པ་ཁོ་ནར་དགྲ་བཅོམ་སྟེ་སླར་ནྱ་གྲོ་དྷའི་ཕུག་ཏུ་ཕྱིན་ནོ། །དེ་ནས་འོད་སྲུང་གིས་ཕྱི་མའི་དུས་ཀྱི་དགེ་སློང་བརྗེད་ངས་པའི་དོན་དུ་སྔ་དྲོ་ཚིགས་བཅད་དང་ཕྱི་དྲོ་ལྷུག་པས་བགྲོ་ཞིང་དེ་ཡང་སྔར་མདོ་སྡེ་བསྡུ་བར་བགྲོས་པ་དང་། འོད་སྲུང་གིས་ཀུན་དགའ་བོ་ལ་སྤྲོ་བ་དྲིས༏ གསོལ་གཉིས་ཀྱི་ལས་ཀྱིས་མདོ་སྡེ་བསྡུ་བར་བསྐོས་ནས། སེང་གེའི་ཁྲི་ལ་དགྲ་བཅོམ་པ་ལྔ་བརྒྱས་སྣམ་སྦྱར་བཏིང་སྟེ། དེ་ལ་ཀུན་དགའ་བོ་འདུག་སྟེ་མདོ་སྡེ་བཟུང་བ་ཐམས་ཅད་བཤད་པར་བྱའོ་སྙམ་པ་དང་། ལྷ་རྣམས་ཀྱིས་ཤེས་ནས་གུས་པར་ཉན་ནོ། །དེ་ནས་འོད་སྲུང་གིས། སྟོན་པ་འཇིག་རྟེན་ཕན་བཞེད་པ། །རྒྱལ་བས་གསུངས་པའི་ཆོས་རྣམས་ཀྱི། །རྣམ་པ་མཆོག་ནི་གང་བཤད་པ། །ཚེ་དང་ལྡན་པས་མདོ་

སྡེ་གསུང་། །ཞེས་གསོལ་བ་བཏབ་བོ། །དེ་ནས་ཀུན་དགའ་བོས་སྟོན་པའི་ཡོན་ཏན་དྲན་པས་ཁ་བྱང་ཆུབ་སྙིང་པོར་བལྟས། ཐལ་མོ་སྦྱར་ཏེ་སྒྲས་ཁྱབ་པར་བྱས་ཏེ། འདི་སྐད་བདག་གིས་ཐོས་པ་དུས་གཅིག་ན་བཅོམ་ལྡན་འདས་ཡུལ་ཝཱ་ར་ཎཱ་སི་དྲང་སྲོང་སྨྲ་བ་རི་དྭགས་ཀྱི་ཚལ་ན་བཞུགས་སོ། །ཞེས་བརྗེད་མ་ཐག་ལྷ་མི་རྣམས་མྱ་ངན་སྐྱེས་ཏེ། ཀྱེ་མ་འཇིག་རྟེན་འདི་དག་ཏུ། །མི་རྟག་པར་ནི་ཁྱད་པར་མེད། །གང་གིས་རིན་ཆེན་གཏེར་དེ་ཡི། །ཡོན་ཏན་རྒྱ་མཚོ་དག་ཀྱང་བསྐམས། །གང་ལས་བདག་གིས་སྔོན་ཐོས་པས། །ཆོས་ནི་ཐར་པའི་དབྱེ་བ་བྱེད། །འདི་སྐད་ཐོས་ཞེས་རབ་སྦྱར་ཏེ། །དེ་ཡང་དེ་རིང་བསྒྲགས་པ་ཡིན། །ཞེས་སོ། །དེ་ནས་བཅོམ་ལྡན་འདས་ཀྱིས་དགེ་སློང་ལྔ་པོ་ལ་འདི་སྐད་ཅེས་བཀའ་སྩལ་ཏེ་དགེ་སློང་དག་མ་ཐོས་པའི་ཆོས་འདི་ནི་སྡུག་བསྔལ་འཕགས་པའི་བདེན་པའོ་ཞེས་སོགས་མདོ་སྡེ་བཤད་དོ། །དེ་ནས་ཀུན་ཤེས་ཀྱིས་འོད་སྲུང་ལ། བདག་གིས་ཆོས་ཀྱི་རྣམ་གྲངས་འདི་མངོན་སུམ་དུ་ཐོས་ཏེ་བདག་གི་ཁྲག་དང་མཆི་མའི་རྒྱ་མཚོ་བསྐམས་རུས་པའི་རི་ལས་བརྒལ་ངན་སོང་གི་སྒོ་ནི་བཅད་མཐོ་རིས་ཐར་པའི་སྒོ་ཕྱེ་སྟེ་འདི་བཤད་པས་བདག་དང་ལྷ་བརྒྱད་ཁྲིས་ཆོས་ཀྱི་མིག་ཐོབ་ན་དེ་རིང་འདིར་འདི་སྐད་ཐོས་ནས་བཤད་དེ། ཀྱེ་མ་ཐམས་ཅད་མི་རྟག་པར་ཁྱད་མེད་དོ་ཞེས་སྨྲས་ནས་སྟན་ལས་བབས་ཏེ་འདུག་གོ །གཞན་རྣམས་ཀྱང་སྟན་ལས་བབས་ཏེ་བདག་ཅག་གི་ཆོས་འཆད་པ་མངོན་སུམ་དུ་མཐོང་བ་ལས་མི་རྟག་པའི་སྟོབས་ཀྱིས་བཅོམ་ལྡན་འདས་དེ་ཡང་ཐོས་པའི་ལམ་དུ་གཤེགས་པར་གྱུར་ཏོ། །དེ་ནས་དགྲ་བཅོམ་པ་རྣམས་ཀྱིས་མངོན་ཤེས་ཀྱིས་བལྟས་ནས་ཀུན་དགའ་བོ་ལ་ཁྱོད་ཀྱི་ལུང་དེ་ཡིན་ནམ། དེས་བདག་ཅག་གི་ལུང་དེ་ལགས་སོ། །ཁྱེད་ཅག་གི་ལུང་དེ་ལྟ་བུ་ལགས་སམ། དེ་ཁོ་ནའོ། །དེ་ནས་འོད་སྲུང་གིས་བདག་གིས་མདོ་སྡེ་དང་པོ་བསྡུས་ན་གང་གིས་ཀྱང་མ་བཟློག་པས་ཆོས་སོ་སྙམ་སྟེ་ཀུན་དགའ་བོ་ལ་མདོ་སྡེ་གཉིས་པ་གང་དུ་བཤད། འདི་

༄༅།        །སྐད་བདག་གིས་ཐོས་ནས་སྡུག་བསྔལ་འཕགས་པའི་བདེན་པ་གང་ཞེ་ན། སྐྱེ་བའི་སྡུག་བསྔལ་དང་ཞེས་སོགས་སྔར་བཞིན་ནོ། །མདོ་སྡེ་གསུམ་པ་གང་དུ་བཤད། དེས་འདི་སྐད་ཅེས་སོགས་ནས་དགེ་སློང་དག་གཟུགས་ནི་བདག་མིན་ནོ་ཞེས་སོགས་ཀུན་དགའ་བོས་བཟླས་ནས་དགྲ་བཅོམ་པ་ལྔ་བརྒྱར་གཅིག་གིས་མ་ཚང་བས་གཞུང་དུ་བྱས་ཏེ་ཕུང་པོ་དང་ལྡན་པ་ནི་ཕུང་པོར། སྐྱེ་མཆེད་དང་ལྡན་པ་ནི་སྐྱེ་མཆེད་དུ། རྟེན་འབྲེལ་དང་འཕགས་པའི་བདེན་པ་རིག་པ་དང་ལྡན་པ་ནི་གླེང་གཞི་དང་ལྡན་པར། ཉན་ཐོས་ཀྱི་བཤད་པ་མང་བ་དེ་ནི་ཉན་ཐོས་ཀྱི་བཤད་པར། སངས་རྒྱས་ཀྱི་ནི་སངས་རྒྱས་ཀྱི་བཤད་པར། བྱང་ཕྱོགས་དང་ལྡན་པ་ནི་ལམ་གྱི་ཡན་ལག་ཏུ། བརྗོད་པ་མང་པོ་ནི་ཡང་དག་པར་བརྗོད་པའི་སྡེར། ཚིགས་བཅད་མང་བ་ནི་ཡང་དག་པར་ལྡན་པའི་མིང་དུ། ལུང་རིང་པོ་ནི་རིང་པོར། བར་མ་ནི་བར་མར། ཚིག་གཅིག་ལ་སོགས་པ་ནི་གཅིག་ལས་འཕྲོས་པའི་ལུང་ཞེས་བསྡུས་ཏེ་བཞག་གོ །དེ་ནས་འོད་སྲུང་གིས་ཀུན་དགའ་བོ་ལ་ལུང་དེ་སྙེད་ཅིག་གམ། དེ་སྙེད་ཅིག་ལགས་ཏེ་འདི་ལས་ལྷག་པ་མེད་དོ་ཞེས་སྨྲས་ནས་ཁྲི་ལས་བབས་ཏེ་ས་ལ་འདུག་གོ །དེ་ནས་ཉེ་བར་འཁོར་ལ་སྤྲོ་བ་བྱས་ཏེ་གསོལ་གཉིས་ཀྱི་ལས་ཀྱིས་འདུལ་བ་བསྡུ་བར་བསྐོས་ཏེ་ཉེ་བར་འཁོར་སེང་གེའི་ཁྲི་ལ་བཞག་ནས་བཅོམ་ལྡན་འདས་ཀྱིས་བསླབ་གཞི་དང་པོ་གང་དུ་བཅས་ཝཱ་ར་ཎཱ་སིར་རོ། །གང་གི་དོན་དུ་ན། ལྔ་སྡེའི་དོན་དུ་ཤམ་ཐབས་ཟླུམ་པོར་བགོ་བར་བྱའོ་ཞེས་བཅས་སོ། །དེ་ནས་དགྲ་བཅོམ་པ་རྣམས་ཀྱིས་མངོན་ཤེས་ཀྱིས་བལྟས་ཞེས་པ་ནས། ཆོས་སོ་སྙམ་སྟེ་བསླབ་གཞི་གཉིས་པ་གང་དུ་བཅས། ཝཱ་ར་ཎཱ་སིར་ལྔ་སྡེ་ལ་ཆོས་གོས་ཟླུམ་པོར་བགོ་བར་བྱའོ་ཞེས་སོགས་ནས་སྔར་བཞིན་ནོ། །བསླབ་གཞི་གསུམ་པ་གང་དུ་བཅས། ཀ་ལནྟྲ་ཀའི་གྲོང་དུ་བཟང་སྦྱིན་ལ་མི་ཚངས་སྤྱོད་ཕམ་པར་བཅས་པ་ནས་ཕམ་པ་དང་ལྷག་མ་དང་

མ་ངེས་པ་དང་སྤང་ལྟུང་དང་ལྟུང་བྱེད་དང་སོ་སོར་བཤགས་པ་དང་བསླབ་པ་མང་པོ་དང་རྩོད་པ་ཞི་བྱེད་དང་བཅས་པ་དང་རྗེས་བཅས་དང་སྤང་གནང་དང་རབ་བྱུང་དང་གསོ་སྦྱོང་དང་དགག་དབྱེ་དང་ཕྲ་མོ་དང་གླེང་གཞི་དང་མོས་པ་ནི་འདིའོ་ཞེས་འདུལ་བ་བསྡུས་ནས་ཉེ་བར་འཁོར་ཁྲི་ལས་བབས་སོ། །དེ་ནས་འོད་སྲུང་གིས་མ་འོངས་པའི་གང་ཟག་གི་དོན་དུ་མ་མོ་བསྡུ་བའི་ཕྱིར་གསོལ་གཉིས་ཀྱི་ལས་བྱས་ཏེ་མ་མོ་ཞེས་བྱ་ནི་བདག་ཁོ་ནས་སྨྲ་བར་བྱ་སྟེ་མ་མོ་ལྟ་བུ་ནི་ཤེས་བྱའི་མཚན་ཉིད་རབ་ཏུ་གསལ་བར་བྱེད་པ་སྟེ་འདི་ལྟ་སྟེ་དྲན་པ་ཉེ་བར་གཞག་པ་བཞི་དང་ཞེས་སོགས་སྔར་བཞིན་ནོ། །དེ་ནས་ལྷ་རྣམས་ཀྱིས་དགྲ་བཅོམ་པ་ལྔ་བརྒྱས་སྡེ་སྣོད་གསུམ་བསྡུས་པས་ལྷ་འཕེལ་ལྷ་མིན་འགྲིབ་བོ། །ཞེས་བསྒྲགས་ཤིང་ལྔ་བརྒྱས་ཡང་དག་པར་བསྡུས་པ་ཞེས་པའི་མིང་དུ་གྱུར་ཏོ། །དེ་ནས་འོད་སྲུང་ཆེན་པོས། ཀྱེ་མ་སྟོབས་བཅུ་མངའ་བའི་གསུང་ནི་ཚད་མེད་པ། །འགྲོ་ལ་ཕན་ཕྱིར་ཆོས་ཀྱི་བསྟན་བཅོས་འདི་བསྡུས་པས། །གང་ན་འཇིག་རྟེན་བློ་ངན་མུན་བྱེད་ཆུད་ཟོས་པ། །བློ་གྲོས་རབ་རིབ་བསལ་བས་སྒྲོན་མར་ཡང་དག་ལྡན། །དེ་ནས་འོད་སྲུང་གིས་སྟོན་པའི་གསུང་ཅི་ནུས་སུ་བསྒྲུབས་ཤིང་ཕན་གདགས་པ་ཅུང་ཟད་བྱས་ཏེ་མ་ལུས་པར་སུས་ནུས། ང་མྱ་ངན་ལས་འདའ་བར་བྱའོ་སྙམ་སྟེ། བདག་གིས་ཐུབ་པའི་མདོ་སྡེ་ནི། །ཡང་དག་བསྡུས་ནས་ཆོས་ལམ་བཞག །གཅིག་ནས་གཅིག་ཏུ་ཡུན་རིང་བར། །སྟོན་པའི་གསུང་རབ་འདི་གནས་འགྱུར། །ངོ་ཚ་མེད་རྣམས་ཆད་པས་བཅད། །ངོ་ཚ་བྱེད་ནི་ཡོངས་སུ་བཟུང་། །བདག་གིས་ཕན་དང་དགེ་བྱས་པས། །བདག་ནི་མྱ་ངན་འདས་དུས་བབ། །ཀུན་དགའ་བོ་ཤེས་པར་གྱིས་ཤིག །སྟོན་པས་ང་ལ་བསྟན་པ་གཏད་ནས་འདས་སོ། །ང་ཡང་མྱ་ངན་ལས་འདའ་བས་བསྟན་པ་ཁྱོད་ཀྱིས་སྐྱོངས་ཤིག །ཁྱོད་ཀྱིས་ཀྱང་ཤ་ནའི་གོས་ཅན་ལ་གཏོད་ཅིག །དེ་ནས་འོད་སྲུང་གིས་སྐུ་གདུང་གི་མཆོད་རྟེན་བརྒྱད་ཀླུའི་ཡུལ་གྱི་ཚེམས་མཆེ་བ་ལ་མཆོད་དེ། སུམ་ཅུ་རྩ་གསུམ་དུ་ཕྱིན་ཏེ། ཚེམས་

༄༅།        །མཆེ་བ་ལ་མིག་མི་འཛུམ་པར་བལྟས་ནས་སྤྱི་བོ་ལ་བཞག་སྟེ་མཆོད་ནས་ལྷ་རྣམས་ལ་བག་ཡོད་པར་བྱོས་ཤིག་ཅེས་གདམས་ནས་རྒྱལ་པོའི་ཁབ་ཏུ་ཕྱིན་ཏེ་མ་སྐྱེས་དགྲ་ལ་སྦྲན་པས་གཉིད་དུ་སོང་སྟེ་སད་པ་དང་སྦྲན་ནོ་ཞེས་སྨྲོས་ཤིག་ཅེས་བྱས་ནས་ལྷོ་རི་བྱ་རྐང་གི་རི་ལ་འཛེགས་ཏེ་རི་གསུམ་གྱི་དབུས་སུ་རྩྭ་བཏིང་སྟེ་བཅོམ་ལྡན་འདས་ཀྱི་ཕྱག་དར་ཁྲོད་ཀྱི་སྣམ་སྦྱར་གྱོན་ཏེ་བྱམས་པའི་གསུང་རབ་རྒྱས་ཀྱི་བར་དུ་མི་ཉམས་པར་བྱིན་གྱིས་བརླབས་ཏེ་ཆོ་འཕྲུལ་དུ་མ་བསྟན་ནས་མྱ་ངན་ལས་འདས་སོ། །དེ་ནས་ལྷ་རྣམས་ཀྱིས་མཆོད་ནས་རི་གསུམ་བཀབ་སྟེ་སྨྲེ་སྔགས་མང་པོ་བཏོན་ནས་མི་སྣང་བར་གྱུར་ཏོ། །དེའི་ཚེ་མ་སྐྱེས་དགྲ་རྒྱལ་རིགས་ཀྱི་ཞང་པོ་རྒྱུད་ཆད་པ་རྨིས་ནས་སད་པ་དང་། འོད་སྲུང་འདས་པ་ཐོས་ཏེ་བརྒྱལ་ལོ། །སངས་པ་དང་བྱ་རྐང་གི་རི་ལ་འཛེགས་པས་གནོད་སྦྱིན་གྱིས་རི་ཕྱེའོ། །དེ་ལ་རྒྱལ་པོས་ཕྱག་མཆོད་བྱས་ཏེ་བསྲེག་པར་བརྩམས་པ་དང་། ཀུན་དགའ་བོས་འདི་ནི་བྱམས་པའི་གསུང་རང་བྱུང་གི་བར་བྱིན་གྱིས་བརླབས་ཏེ་བྱམས་པའི་ཉན་ཐོས་བྱེ་བ་དགུ་བཅུ་རྩ་དགུས་འོད་སྲུང་གི་ལུས་འདི་བཟུང་ནས་འདི་ཤཱཀྱ་ཐུབ་པའི་ཉན་ཐོས་སྦྱངས་པའི་ཡོན་ཏན་འཆང་བའི་མཆོག་དེས་བསྟན་པ་བསྡུས་སོ་ཞེས་བསྟན་པས་དེ་དག་གི་མི་རྣམས་ཆུང་ཞིང་སྟོན་པའི་སྐུ་ཆེ་བར་ཤེས་སོ། །དེ་ནས་བྱམས་པས་འདི་ཤཱཀྱ་ཐུབ་པའི་སྣམ་སྦྱར་རོ། །ཞེས་བསྟན་པས་འཁོར་རྣམས་ཀྱིས་སྦྱངས་པའི་ཡོན་ཏན་ལེན་ཅིང་དགྲ་བཅོམ་པ་ཐོབ་པར་བྱེད་པས་འདི་བསྲེག་མི་ནུས་ཀྱི་མཆོད་རྟེན་བརྩིག་པར་བྱའོ། །དེ་ནས་མཆོད་རྟེན་བརྩིགས་ནས་མཆོད་པ་བྱས་སོ། །དེ་ནས་རི་གསུམ་བཀབ་བོ། །དེ་ནས་ཀུན་དགའ་བོ་མྱ་ངན་ལས་འདའ་བ་མ་སྐྱེས་དགྲ་ལ་སྟོན་པར་ཁས་བླངས་ཏེ། འོད་མའི་ཚལ་དུ་གནས་པའི་ཚེ་ཤ་ནའི་གོས་ཅན་རྒྱ་མཚོ་བདེ་བར་བརྒལ་ཏེ་འོངས་ནས་བདག་ལོ་ལྔའི་དུས་སྟོན་བགྱིད་ན་སྟོན་པ་གང་

ན་བཞུགས། དེ་འདས་སོ་ཞེས་སྨྲས་པས་བརྒྱལ་ལོ། །སངས་པ་དང་ཤཱ་རིའི་བུ་ལ་སོགས་པ་གང་ན། དེ་དག་ཀྱང་འདས་སོ། །དེ་ནས་ཀུན་དགའ་བོ་དགེ་འདུན་དང་བཅས་པ་ལ་ལོ་ལྔའི་དུས་སྟོན་བྱས་ཏེ་མཐར་རབ་ཏུ་བྱུང་ནས་སྡེ་སྣོད་གསུམ་ལ་མཁས་པར་བྱས་སོ། །དེའི་ཚེ་དགེ་སློང་ཞིག་གིས། གང་ན་ལོ་བརྒྱ་འཚོ་བ་ན། །ངེས་པར་ཆུ་ལ་བྱ་གག་བཞིན། །ཆུ་ལ་བྱ་གག་མཐོང་བ་ལྟར། །བདག་ཉིད་གཅིག་པུའི་འཚོ་བ་དགེ །དེ་ཀུན་དགའ་བོས་ཐོས་ནས། སྟོན་པས་དེ་སྐད་མ་གསུངས་ཀྱི་འོན་ཀྱང་། གང་ན་ལོ་བརྒྱར་འཚོ་བ་ནི། །ངེས་པར་སྐྱེ་དང་འཇིག་པ་ཡིན། །གང་ཟག་གཉིས་ལ་སྟོན་པ་ཡིས། །ས་འདིར་རྟག་པར་བཤད་པ་ནི། །མ་དད་ཞེ་སྡང་བློ་ཅན་དང་། །དད་ལ་ཕྱིན་ཅི་ལོག་གྱུར་པའོ། །མདོ་སྡེ་ལོག་པར་བཟུང་གྱུར་པས། །བ་ལང་འདམ་དུ་སོང་བ་བཞིན། །དེ་ནི་ཉེ་བར་འཇིག་འགྱུར་ཏེ། །རང་གི་འཆི་བློའི་བློ་མེད་པ། །ཐོས་པ་མི་ཤེས་འབྲས་བུ་མེད། །ལོག་པར་ཤེས་པ་དུག་དང་འདྲ། །ཐོས་པ་ཡང་དག་ཉིད་ཤེས་པ། །བྲལ་བ་འབྲས་བུ་བློ་ལྡན་ཡིན། །དེས་དེའི་མཁན་པོ་ལ་སྨྲས་པས། ཀུན་དགའ་བོ་ནི་རྒས་གྱུར་ཏེ། །དེ་ཡི་དྲན་པའང་ཉམས་པར་གྱུར། །སྨྲས་པ། །རྒ་བ་དག་གིས་གཟིར་གྱུར་པ། །ལུས་ཅན་དེ་ནི་དྲན་པ་ཉམས། །ཡང་དག་རྗེས་སུ་མི་དྲན་པ། །དེ་ཡི་བློ་ནི་རྒས་པས་ནོན། །དེ་ཀུན་དགའ་བོས་ཐོས་ནས། དེ་ལ་སྨྲས་ན་འཐབ་མོར་འགྱུར། དེའི་མཁན་པོའི་དྲུང་དུ་བདག་འགྲོ་བར་མི་རིགས་པས་མྱ་ངན་ལས་འདའ་བར་བྱའོ་སྙམ་སྟེ། རྙིང་པ་དག་ཀྱང་སྔར་འདས་ཏེ། །གསར་བུ་དེ་དང་བདག་མི་མཐུན། །བདག་ནི་གཅིག་པུ་བསམ་གཏན་ལ། །སྒོ་ང་ལས་སྐྱེས་བཞིན་དུ་གནས། །བདག་གི་གྲོགས་དང་མཛའ་བོ་ཀུན། །སྔོན་དུ་འདས་ཤིང་སོང་བར་གྱུར། །ཇི་ལྟར་བསམ་གཏན་གནས་དྲན་པ། །དེ་འདིའི་བཤེས་གཉེན་འདི་ན་མེད། །དེ་ནས་ཤ་ནའི་གོས་ཅན་ལ། སྟོན་པས་འོད་

༄༅།        །སྲུང་ལ། དེས་ཀྱང་ང་ལ་བསྟན་པ་གཏད་དོ། །དའང་འདའ་བས་བསྟན་པ་ཁྱོད་ཀྱིས་སྐྱོངས་ཤིག །ཡུལ་བཅོམ་བརླག་གི་རི་མུ་རུན་དར་ཚོང་དཔོན་གྱི་བུ་ན་ད་དང་པ་ཏས་གཙུག་ལག་ཁང་བརྩིགས་ནས་སྦྱིན་བདག་བྱེད་པར་ལུང་བསྟན་ནོ༏ ༏དེར་སྤོས་ཚོང་སྦས་པའི་བུ་ཉེར་སྦས་རབ་ཏུ་ཕྱུང་ཞིག །ང་འདས་ནས་ལོ་བརྒྱ་ན་དེ་མཚན་མེད་པའི་སངས་རྒྱས་སུ་འགྱུར་ཏེ་སངས་རྒྱས་ཀྱི་བྱ་བ་བྱེད་དོ་ཞེས་སྟོན་པས་ལུང་བསྟན་ནོ། །དེས་དེ་བཞིན་བྱའོ་ཞེས་སོ། །དེ་ནས་མ་སྐྱེས་དགྲ་ལ་སྦྲན་ཏེ་གཾ་གཱའི་དབུས་སུ་སོང་ངོ་། །རྒྱལ་པོས་གདུགས་ཀྱི་ཡུ་བ་ཆག་པ་རྨིས་ནས་སད་པ་དང་སྦྲན་པ་ཐོས་ཏེ་བརྒྱལ་ལོ། །སངས་པ་དང་དཔུང་དང་བཅས་ཏེ་གཾ་གཱར་སོང་ངོ་། །དེའི་ཚེ་ལྷས་ཡངས་པ་ཅན་པ་ལ། འཕགས་པ་ཀུན་དགའ་འགྲོ་བའི་སྒྲོན་མ་ནི། །སྐྱེ་བོ་ཕལ་པོ་ཆེ་ལ་ཐུགས་རྗེ་མཇད། །ཐུབ་པ་འདིས་ནི་མྱ་ངན་མུན་བསལ་ནས། །རབ་ཞི་བསྟན་པར་ཡངས་པ་ཅན་དུ་གཤེགས། །དེ་ནས་ལི་ཙ་བྱི་རྣམས་ཀྱང་གཾ་གཱར་སོང་ངོ་། །དེའི་ཚེ་དྲང་སྲོང་ཞིག་འཁོར་ལྔ་བརྒྱས་བསྐོར་ཏེ་རབ་ཏུ་འབྱུང་བར་ཞུས་པས། ཀུན་དགའ་བོས་གཾ་གཱའི་དབུས་སུ་གླིང་སྤྲུལ་ཏེ་དེར་བསྙེན་པར་རྫོགས་པས་དགྲ་བཅོམ་པར་གྱུར་ནས་དུས་དང་གནས་ཀྱི་དབང་གིས་ཉི་མ་གུང་པའམ་ཆུ་དབུས་པ་ཞེས་གྲགས་སོ། །ཀུན་དགའ་བོའི་སྔོན་ལ་འདའ་བར་ཞུས་པས། ཁ་ཆེ་ནི། བསམ་གཏན་དང་མཐུན་པ་དང་གནས་མལ་གྱི་མཆོག་ཏུ་དང་། ང་འདས་ནས་ལོ་བརྒྱ་ན་དགེ་སློང་ཉི་མའི་གུང་ཞེས་པས་བསྟན་པ་འཇོག་གོ་ཞེས་ལུང་བསྟན་པས་དེ་བཞིན་གྱིས་ཤིག །དེས་དེ་བཞིན་བགྱིའོ་ཞེས་སོ། །དེ་ནས་ཀུན་དགའ་བོས་ཆོ་འཕྲུལ་སྣ་ཚོགས་བསྟན་ཏེ་མྱ་ངན་ལས་འདས་ཏེ་ལུས་ཕྱེད་ཡངས་པ་ཅན་པས། ཕྱེད་མ་སྐྱེས་དགྲས་ཐོབ་སྟེ། ཡེ་ཤེས་རྡོ་རྗེ་རྣོན་པོ་ཡིས། །རང་གི་ལུས་ཀྱི་རི་བཅོམ་སྟེ། །ཕྱེད་ནི་མི་ཡི་དབང་པོར་བྱིན། །ཕྱེད་ནི་ཐུབ་པའི་ཚོགས་ལ་བྱིན། །དེ་ནས་ཡུལ་

ཡངས་པ་ཅན་དང་སྐྱ་ནར་བུར་མཆོད་རྟེན་བརྩིགས་སོ། །དེ་ནས་ཉི་མའི་གུང་པས་སྟོན་པའི་ལུང་བསྟན་དང་མཁན་པོའི་གསུང་བསྒྲུབ་པའི་ཕྱིར་ཁ་ཆེར་སོང་སྟེ། སྐྱིལ་ཀྲུང་བཅས་ཏེ་མཉམ་པར་བཞག་པས་ཀླུ་འཁྲུགས་ཏེ། ས་གཡོས་རྫི་ཆར་དྲག་པོ་ཕབ་ཀྱང་ཆོས་གོས་ཀྱི་མཐའ་ཡང་མ་གཡོས། མདའ་མཚོན་གྱི་ཆར་ཕབ་པ་མེ་ཏོག་ཏུ་བསྒྱུར་བས། ཀླུ་རྣམས་ངོ་མཚར་ཏེ་བཀའ་ཅི་སྩོལ་ཟེར་བ་དང་། སྟོན་པས་ལུང་བསྟན་པས་གནས་འདི་ངའི་ཡིན་ནོ་གསུངས་ཏེ་སྐྱིལ་ཀྲུང་གཅིག་གིས་ལུང་པ་དགུའི་མདོ་ནོན་པའི་ས་དེ་ཕུལ་ཏེ་འཁོར་ཇི་སྙེད་མངའ། དགྲ་བཅོམ་པ་ལྔ་བརྒྱའོ། །དེས་དེ་ལ་གཅིག་གིས་མ་ཚང་ན་ཡང་གནས་དབྲོག་གོ །གནས་བརྟན་གྱིས་དེ་ལྟ་མོད་ཀྱི་སྦྱིན་བདག་གནས་སར་ལེན་པོ་ཡོད་པས་དེ་དག་ཀྱང་གཞུག་པར་བྱའོ། །དེ་ནས་སྐྱེ་བོའི་ཚོགས་བཅུག་ཅིང་དེ་དག་སྤེལ་བའི་ཕྱིར་རི་སྤོས་ཀྱི་ངད་ལྡན་དུ་ཕྱིན་ནས་གུར་ཀུམ་བཏོན་ནས་ཀླུ་རྣམས་འཁྲུགས་པ་དང་། དེ་དག་བཏུལ་བ་དང་། ཀླུ་རྣམས་ཀྱིས་བསྟན་པ་ཇི་སྲིད་གནས། གནས་བརྟན་གྱིས་ལོ་སྟོང་ངོ་། །དེ་དག་གིས་སྟོན་པའི་བསྟན་པ་གནས་ཀྱི་བར་གནང་ངོ་། །གནས་བརྟན་གྱིས་དེ་བཞིན་དུ་གྱུར་ཅིག་ཅེས་སྨྲས་སོ། །དེ་ལྟར་ཁ་ཆེར་བསྟན་པ་བཞག་སྟེ་མྱ་ངན་ལས་འདས་སོ། །ཤ་ནའི་གོས་ཅན་གྱིས་ཉེར་སྦས་ལ། དེས་དྷི་དྷི་ཀ་ལ། དེས་ནག་པོ་ལ། དེས་ལེགས་མཐོང་ལ་བསྟན་པ་གཏད་དེ་མྱ་ངན་ལས་འདས་སོ། །