(སློབ་དཔོན་ཨརྱ་དེ་ཝ།)

དེའི་སྲས་སློབ་དཔོན་ཨཱརྱ་དེ་ཝ་ནི། སིངྒ་ལའི་གླིང་དུ་པདྨའི་སྦུབས་སུ་རྫུས་ཏེ་སྐྱེས་པ་ལ་དེའི་རྒྱལ་པོས་བུར་བཟུང་སྟེ་ཆེར་སྐྱེས་པ་ན་སློབ་དཔོན་ཀླུ་སྒྲུབ་ཅན་དུ་བྱོན་ནས་སློབ་གཉེར་མཛད་པས་རིག་པའི་གནས་ཐམས་ཅད་དང་ཕྱི་ནང་གི་གྲུབ་མཐའ་མ་ལུས་པ་ལ་མཁས་པར་གྱུར་ཏེ། དེའི་ཚེ་མུ་སྟེགས་ཀྱི་སྟོན་པ་མ་ཁོལ་ཞེས་བྱ་བ་ལྷ་དབང་ཕྱུག་ཆེན་པོ་གྲུབ་སྟེ་མངལ་སྐྱེས་གང་གིས་ཀྱང་མི་ཐུབ་པའི་མཆོག་བྱིན་པ་ཞིག་ཡོད་པ་དེས་སངས་རྒྱས་ཀྱི་བསྟན་པ་ལ་གནོད་པ་བྱས་ཏེ་ཕལ་ཆེར་མུ་སྟེགས་ལ་བཙུད་དེ་ནཱ་ལེནྡྲར་ཕྱིན་ནོ། །ནཱ་ལེནྡྲ་པ་རྣམས་ཀྱིས། དཔལ་གྱི་རི་ལ་ཀླུ་སྒྲུབ་བཞུགས་པ་ལ་སྦྲན་ནས། སློབ་དཔོན་ཨཱརྱ་དེ་ཝས་འདུལ་བར་ཞལ་གྱིས་བཞེས་ཏེ་བྱོན་པའི་ཚེ། ཤིང་གི་ལྷ་མོས་སྤྱན་སློང་བ་ལ་སྤྱན་གཅིག་སྦྱིན་པར་བཏང་ངོ་། །དེ་ནས་མུ་སྟེགས་ཕམ་པར་བྱས་པ་ན་མིག་གཅིག་པ་འདི་ཅི་འདྲ་ཞེས་སྨྲ་བ་ལ། དྲག་པོ་མིག་གསུམ་ལྡན་ཡང་དེ་ཉིད་མཐོང་བ་མེད། །བརྒྱ་བྱིན་མིག་སྟོང་ལྡན་ཡང་དེ་ཉིད་མཐོང་བ་མེད། །ཨཱརྱ་དེ་ཝ་མིག་གཅིག་པོ་ནི་གང་ཡིན་དེས། །སྲིད་པ་གསུམ་པོ་མ་ལུས་པ་ཡི་དེ་ཉིད་མཐོང་། །ཞེས་གསུངས་ཏེ་ཆོས་ཀྱིས་ཚར་བཅད་དེ་བསྟན་པ་ལ་བཅུག་སྟེ་པཎྜི་ཏ་ཆེན་པོར་གྱུར་ཏོ། །སློབ་དཔོན་འདི་ས་བརྒྱད་པ་པར་གྲགས་ཏེ། འཇམ་དཔལ་རྩ་རྒྱུད་ལས། འཕགས་པ་མིན་ལ་འཕགས་པའི་མིང་། །ཞེས་གསུངས་པས་བརྟག་པར་བྱའོ། །སློབ་དཔོན་འདིས་རང་བཞིན་མེད་པའི་དོན་རྒྱས་པར་སྟོན་པ་དབུ་མ་བཞི་བརྒྱ་པ། བསྡུས་ཏེ་སྟོན་པ་དབུ་མ་ལག་པའི་ཚད། དེ་ལ་རྩོད་པ་སྤོང་བ། འཁྲུལ་པ་ཟློག་པའི་གཏན་ཚིགས་གྲུབ་པ། མཚན་ཉིད་དང་སྔགས་ཀྱི་གྲུབ་མཐའི་རྣམ་གཞག་སྟོན་པ་ཡེ་ཤེས་སྙིང་བོ་ཀུན་ལས་བཏུས། སྔགས་ཕྱོགས་ལ། སྔགས་ཀྱི་ལྟ་སྤྱོད་གཏན་ལ་འབེབས་པ་ལ་

༄༅།        །མདོ་རྒྱུད་རྟོག་པའི་ལུང་བསྲེས་ནས་སྒྲུབ་པ་སྤྱོད་པ་བསྡུས་པའི་སྒྲོན་མ། རིགས་པས་སྒྲུབ་བ་སེམས་ཀྱི་སྒྲིབ་སྦྱོང་། སྨིན་བྱེད་དབང་གི་ཆོ་ག་ལ་གདན་བཞིའི་དཀྱིལ་ཆོག་སྙིང་པོ་མདོར་བསགས། བསྐྱེད་རིམ་སྟོན་པ་གདན་བཞིའི་སྒྲུབ་ཐབས། ཡེ་ཤེས་མཁའ་འགྲོ་མའི་སྒྲུབ་ཐབས། གཏོར་ཆོག །རྫོགས་རིམ་སྟོན་པ་ཤིང་གཅིག་གི་དཀའ་འགྲེལ་ལ་སོགས་པ་མཛད་ཅིང་། སྒྲོན་གསལ་གྱི་འགྲེལ་བཤད་མཛད་ཟེར་ཏེ། དུས་མཚུངས་མི་མཚུངས་བརྟག་པར་བྱའོ། །ཡང་སློབ་དཔོན་ཀླུ་སྒྲུབ་ཀྱི་སློབ་མ་ཀླུའི་བྱང་ཆུབ་ནི། ཕྱི་ནང་གི་གྲུབ་མཐའ་ཐམས་ཅད་ལ་མཁས་པ་ཡི་དམ་གྱི་ལྷའི་ཞལ་གཟིགས་ཤིང་ཚེའི་དངོས་གྲུབ་བརྙེས་པས་དེང་སང་གི་བར་དུ་ཡང་དཔལ་གྱི་རི་ལ་བཞུགས་པར་གྲགས་པ་དེས་ཀྱང་། གསང་འདུས་ཀྱི་དཀྱིལ་ཆོག་དང་རིམ་ལྔའི་འགྲེལ་པ་ལ་སོགས་པ་མང་དུ་མཛད་དོ། །སློབ་དཔོན་ཙནྡྲ་གོ་མི་ནི། ཤར་ཕྱོགས་བྷཾ་ག་ལར་སྐྱེས་ཤིང་གཞོན་ནུ་ལ་མཁས་པར་གྱུར་ཏེ་བ་རེནྡྲའི་རྒྱལ་པོའི་བུ་མོ་ཏཱ་ར་ཞེས་བྱ་བ་བག་མར་བྱས་ཏེ་འདུག་པ་ན། རེ་ཞིག་གི་ཚེ་གཡོག་མོས་ཏཱ་ར་ཞེས་བོས་ཏེ་བསམ་པ་དང་། །མོ་དང་ཡི་དམ་གྱི་མཚན་མཐུན་པས་མི་རུང་བར་ཤེས་ཏེ་བཟོད་པར་གསོལ་ཏེ་འགྲོ་བར་ཆས་པ་ན། འཁོར་གྱིས་བཟུང་སྟེ་ཅིའི་ཕྱིར་འགྲོ་ཞེས་འདྲི་བ་ལ་རྒྱུ་མཚན་བརྗོད་དོ། །དེ་རྒྱལ་པོས་ཐོས་ཏེ་ངའི་བུ་མོ་དང་ལྷན་ཅིག་ཏུ་མི་འདུག་ན་གཾ་གཱ་ལ་སྐྱུར་ཅིག་ཟེར་བ་དང་། གཤེད་མ་དག་གིས་གངྒཱར་བསྐྱུར་བ་ན། སློབ་དཔོན་གྱིས་སྒྲོལ་མ་ལ་བསྟོད་པས་སྒྲོལ་མས་ཆུ་དབུས་སུ་གླིང་སྤྲུལ། ཞལ་མངོན་སུམ་དུ་བསྟན་ཏེ་བྱིན་གྱིས་བརླགས་པས་དེང་སང་ཡང་ཙནྡྲའི་གླིང་ཞེས་གྲགས་སོ། །དེ་ནས་ཉ་པས་བསྒྲལ་ཏེ། བ་རེནྡྲའི་རྒྱལ་པོའང་དད་ནས་མཆོད་གནས་མཛད་དེ་མཐར་གྱིས་ནཱ་ལེནྡྲར་སོང་སྟེ་ཡོན་ཏན་ཅི་ཤེས་འདྲི་བ་ལ་སྒྲ་པཱ་ཎི་དང་། མཚན་བརྗོད་དང་། བསྟོད་པ་བརྒྱ་ལྔ་

བཅུ་པ་གསུམ་ཤེས་ཞེས་བརྗོད་པས། མཁས་པ་ཆེན་པོར་ཤེས་ཏེ་བསུ་བ་དང་བཀུར་སྟི་རྒྱ་ཆེན་པོ་བྱས་སོ། །དེའི་ཚེ་སྨན་དཔྱད་ལ་སོགས་པའི་བསྟན་བཅོས་ཕྲན་མང་དུ་བརྩམས་པས། རྗེ་བཙུན་འཇིག་རྟེན་དབང་ཕྱུག་གི་ཞལ་ནས། ཐེག་ཆེན་གྱི་བསྟན་བཅོས་མང་དུ་རྩོམས་ཤིག་གསུངས་ནས་ཟླ་བ་སྒྲོན་མའི་འགྲེལ་པ་དང་། སྐུ་གསུམ་ལ་འཇུག་པ་ལ་སོགས་པ་མང་དུ་མཛད་དེ། དེའི་ཚེ་སློབ་མ་རྒྱལ་རིགས་ཀྱི་དགེ་སློང་ཞིག་བབས་ནས་སྡིག་པ་སྣ་ཚོགས་བྱེད་པ་ཞིག་བྱུང་ནས་དེ་འདུལ་བའི་དོན་དུ་སློབ་མ་ལ་སྤྲིང་བ་དང་། སྒྲའི་མདོ་ལེའུ་སུམ་ཅུ་སོ་གཉིས་ཤུ་ལོཀ་བདུན་བརྒྱ་ཡོད་པ་པཱ་ཎི་ནི་དང་མཐུན་པ་ཞིག་མཛད་དེ། དེའི་ཡན་ལག་ཏུ་གྱུར་པ་བྱིངས་དང་ཉེར་བསྒྱུར་དང་ཡི་གེའི་མདོ་དང་ཨུ་ཎ་ལ་སོགས་པ་དང་སུ་པ྄་དང་ཏིང྄་ལ་སོགས་པ་མཛད་ནས་བཏུལ་ལོ། །འཇམ་དཔལ་དབྱངས་ལ་བསྟོད་པ་བྱས་པས་སྐུ་གཟུགས་ཀྱི་དབུ་ཡོན་པོར་མཛད་དེ་གསན་པ་བྱུང་བས་འཇམ་དབྱངས་མཇིང་ཡོན་གྱི་བསྟོད་པ་ཞེས་གྲགས་སོ། །དེའི་ཚེ་སློབ་དཔོན་ཟླ་བ་གྲགས་པས་སྒྲའི་བསྟན་བཅོས་ཀུན་ཏུ་བཟང་པོ་ཞེས་བྱ་བ་ཚིགས་བཅད་དུ་བྱས་པ་ལེགས་པ་ཞིག་མཛད་པ་གཟིགས་ཏེ། རང་གིས་བྱས་པའི་བསྟན་བཅོས་མི་ལེགས་པས་སྣུབ་བོ་སྙམ་སྟེ་ཁྲོན་པར་བསྐྱུར་བ་དང་། འཇིག་རྟེན་དབང་ཕྱུག་གིས་ཁྱོད་ཀྱིས་ལྷག་བསམ་གྱིས་བྱས་པས་ཕན་ཆེ་བར་འགྱུར་གྱི་ཐོན་ཅིག་གསུངས་ནས་བཏོན་ཏེ། ཁྲོན་པ་དེ་ལ་ཙནྡྲ་ཁྲོན་པ་ཞེས་གྲགས་ཤིང་དེ་ལ་ཆུ་འཐུང་ནའང་བློ་རྣོ་བར་འགྱུར་ཟེར་རོ། །དེའི་ཚེ་ཟླ་གྲགས་དང་རྩོད་པ་བྱས་ཏེ་དེ་རིང་གི་ལན་འཇིག་རྟེན་དབང་ཕྱུག་ལ་ཞུས་ཏེ་ནང་པར་བཏབ་པས་ཟླ་གྲགས་ཐེ་ཚོམ་དུ་གྱུར་ཏེ་ཕྱི་བཞིན་བསྙེགས་པ་ན། འཇིག་རྟེན་དབང་ཕྱུག་གིས་ལན་སློབ་པ་གཟིགས་ཏེ། འཕགས་པ་ཉེ་རིང་མ་མཛད་ཅེས་གསོལ་བས་ཕྱག་མཛུབ་བསྐུམ་པ་མ་བྱུང་བར་ལུས་པས་དེང་སང་ཡང་ཐུགས་རྗེ་

༄༅།        །ཆེན་པོ་མཛུབ་ཀེར་ཞེས་གྲགས་སོ། །དེ་ལྟར་ཙནྡྲ་གོ་མི་ཡོན་ཏན་ཆེན་པོ་དང་ལྡན་པས་བསྟན་པ་བཟུང་ངོ་། །ཟླ་བ་གྲགས་པ་ནི། ཡུལ་ལྷོ་ཕྱོགས་ས་མ་ནར་འཁྲུངས་ཏེ། མདོ་རྒྱུད་ཀྱི་དོན་ལ་སྦྱངས་པས་ཀླུ་སྒྲུབ་ཡབ་སྲས་ཀྱི་གསུང་རབ་ལ་བརྟེན་ནས་མཁས་པ་ཆེན་པོར་གྱུར་ཅིང་སྐྱེ་བ་ལྔ་བརྒྱར་འཇམ་དཔལ་གྱིས་བྱིན་གྱིས་བརླབས་པ། རི་མོར་བྲིས་པའི་བ་ལ་འོ་མ་འཇོ་ནུས་པ། རྡོའི་ཀ་པ་ལ་ཕྱག་མི་ཐོགས་པར་གཡུག་པ་དེས། རིགས་ཚོགས་དང་བཞི་བརྒྱ་པའི་འགྲེལ་པ་དང་དབུ་མ་ལ་འཇུག་པ་རྩ་འགྲེལ་དང་། ཁྱད་པར་དུ་ཉི་ཟླ་ལྟར་གྲགས་པའི་འགྲེལ་པ་རྩ་ཤེའི་འགྲེལ་པ་ཚིག་གསལ། གསང་འདུས་འགྲེལ་པ་སྒྲོན་གསལ་ཏེ་གསལ་བ་རྣམ་པ་གཉིས་སུ་གྲགས་པ་མཛད་དོ། །དེ་བཞིན་དུ་སངས་རྒྱས་བསྐྱངས་དང་ཟླ་གྲགས་དབུ་མ་ཐལ་འགྱུར་འཇིག་རྟེན་གྲགས་སྡེ་སྤྱོད་པའི་དབུ་མ། སློབ་དཔོན་བྷ་བྱ་ལ་སོགས་མདོ་སྡེ་སྤྱོད་པའི་དབུ་མ། ཡེ་ཤེས་སྙིང་པོ། དཔལ་སྦས། ཞི་བ་འཚོ། པདྨའི་ངང་ཚུལ། སེང་གེ་བཟང་པོ་ལ་སོགས་པ་རྣམ་འབྱོར་སྤྱོད་པའི་དབུ་མར་འཕགས་པ་ཡབ་སྲས་ཀྱི་དགོངས་པ་འཆད་དོ། །ཚིག་གསལ་དུ། ཀླུ་སྒྲུབ་སྒྲ་གཅན་འཛིན་ནི་བཟང་པོའི་ཞལ་སྔ་དང་བཅས་ལྷས་ཀྱང་གསུང་རྗེས་སུ། །འབྲངས་པས་དེ་ཡི་ཚུལ་ལུགས་དུས་ནི་ཡུན་རིང་ཞིག་ཏུ་གསལ་བར་བསྟན་པར་མཛད། །དེ་ཡི་སློབ་མ་བསྟན་བཅོས་དེ་ལ་རྣམ་པར་འབྱེད་པས་རྣམ་ངེས་བློ་ལྡན་པ། །རྣམས་ཀྱིས་ཀྱང་ནི་མུ་སྟེགས་མ་ལུས་ཕམ་བྱས་ཐུབ་མཆོག་བསྟན་པ་ཡུན་རིང་བཤད། །ཅེས་གསུངས་སོ། །ཨཱརྱ་དེ་བའི་སློབ་མ་མ་ཁོལ་གྱིས་ཀྱང་བསྟན་བཅོས་མང་དུ་བརྩམས་ཤིང་བསྟན་པ་ལ་བྱ་བ་བྱས་ཏེ་ལོ་རྒྱུས་རྣམས་མངས་པས་འཇིགས་པས་མ་བྲིས་སོ། །

ཐོགས་མེད་སྐུ་མཆེད་ཀྱི་བྱོན་ཚུལ་ནི་ཆོས་མངོན་པ་ལ་དགྲ་ལན་གསུམ་དུ་དར་ཏེ། དང་པོ་མུ་སྟེགས་ཀྱི་རྒན་མོ་ཞིག་ན་

རེ༏ ནང་པའི་གཎྜིའི་སྒྲ་ལས་འགེམ་ཞེས་པ་ཞིག་སྣང་སྟེ། དེ་འོ་སྐོལ་ལ་གནོད་མི་གནོད་བརྟག་པར་རིགས་སོ་ཟེར་ནས་བརྟགས་པས། ལྷ་དང་ཀླུ་དང་གནོད་སྦྱིན་གྱིས་མཆོད་པའི། །དཀོན་མཆོག་གསུམ་གྱི་ཏོག་སྡེ་འདི་བརྡུངས་པས། །མུ་སྟེགས་འཆལ་བའི་ཀླད་པ་རྣམ་པར་འགེམ། །ཞེས་པར་རིག་ནས་དམག་དྲངས་ཏེ་བསྣུབས་སོ། །དེ་ནས་ཅུང་ཟད་འཕེལ་ནས་ཡོད་པའི་ཚེ་དབུས་ཀྱི་རྒྱལ་པོས་སྟག་གཟིག་གི་རྒྱལ་པོ་ལ་རས་ཀྱི་ན་བཟའ་སྲུབས་མེད་པ་ཞིག་སྐྱེས་སུ་བསྐུར་ཏེ་དེའི་སྙིང་ཁར་རྐང་རྗེས་འདྲ་བ་ཞིག་ཡོད་པས་ངན་སྔགས་བྱས་སོ་ཟེར་ནས་དམག་དྲངས་ཏེ་བསྣུབས་སོ། །དེ་ནས་ཡང་ཅུང་ཟད་འཕེལ་ནས་ཡོད་པའི་ཚེ་ནང་པའི་གཙུག་ལག་ཁང་ཞིག་ཏུ་ཕྱི་པའི་སྤྲང་པོ་གཉིས་སློང་དུ་འོངས་པ་ལ་བཀྲུ་ཆུ་གཏོར་བས་ཁྲོས་ཏེ་ཉི་མ་བསྒྲུབས་ནས་ནང་པའི་གཙུག་ལག་ཁང་དང་གསུང་རབ་མང་པོ་བསྲེགས་ནས་བསྣུབས་སོ། །དེའི་ཚེ་བྲམ་ཟེ་མེ་གསལ་བའི་ཚུལ་ཁྲིམས་ཞེས་པའི་བསམ་པ་ལ་བསྟན་པའི་རྩ་བ་མངོན་པ་ལ་དགྲ་ལན་གསུམ་གྱིས་བསྣུབས་པས་འདི་དར་བར་བྱེད་ནུས་པ་གཞན་ཡང་མི་སྣང་། བདག་ཀྱང་བུད་མེད་དུ་སོང་བས་མི་ནུས་ཀྱི་ལུས་ལ་བུ་བསྐྱེད་ལ་དར་བར་བྱེད་དུ་གཞུག་གོ་སྙམ་སྟེ་རྒྱལ་རིགས་དང་འདུས་པས་ཐོགས་མེད་དང་། བྲམ་ཟེ་དང་འདུས་པས་དབྱིག་གཉེན་བྱུང་ནས་བཙས་པ་ན་ལྕེ་ལ་གྷི་ཧང་གིས་ཡི་གེ་ཨ་འབྲི་བ་ལ་སོགས་པ་བློ་རྣོ་བའི་ཆོ་ག་ཡང་བྱས་ཏེ། ཆེར་སྐྱེས་པའི་ཚེ་ཕའི་ལས་གང་ཡིན་ཞུས་པས། མ་ན་རེ་ཁྱེད་དེའི་ཕྱིར་མ་བསྐྱེད་ཀྱི་བློ་སྦྱོང་གྱིས་ལ་བསྟན་པ་དར་བར་གྱིས་ཤིག་གསུངས་ནས། གཅུང་ཁ་ཆེར་སློབ་དཔོན་འདུས་བཟང་གི་དྲུང་དུ་བྱོན། གཅེན་གྱིས་བྱམས་པ་བསྒྲུབ་ལ་བསྟན་པ་དར་བར་བྱའོ་སྙམ་སྟེ་རི་བྱ་རྐང་གི་ཕུག་ཏུ་སྒྲུབ་ཏུ་བྱོན་ཏེ་ལོ་གསུམ་དུ་བསྒྲུབས་པས་མཚན་མ་ཅུང་ཟད་ཀྱང་མ་མཐོང་བས་སྐྱོ་སྟེ་ཕྱིར་ཐོན་པ་ན་རྒན་མོ་ཤིང་བལ་གྱི་

༄༅།        །འདབ་མས་ལྕགས་ཀྱི་སྡོང་པོ་ལ་ཁབ་བྱེད་པ་མཐོང་ནས། ཁབ་ཇི་ལྟར་འབྱུང་ཞེས་དྲིས་པས། སྙིང་སྟོབས་ལྡན་པའི་སྐྱེས་བུ་ཡིས། །བསྒྲུབ་ན་མི་འགྲུབ་གང་ཡང་མེད། །དཀའ་ཡང་བརྣག་པ་མ་དོར་ན། །རི་བོ་རྣམས་ཀྱང་ཐལ་བར་རློག །ཟེར་བས་ལོ་དྲུག་དང་དགུར་བསྒྲུབས་ཏེ་ཐོན་པ་ན། ཆུ་ཐིགས་ཀྱིས་ཀྱང་བྲག་ཟད་པ་དང་། བྱ་སྒྲོས་བྲག་ཟད་པར་མཐོང་སྟེ་ལོ་བཅུ་གཉིས་སུ་བསྒྲུབས་ཀྱང་མཚན་མ་མ་བྱུང་བས་སྐྱོ་སྟེ་ཐོན་ནས་ཕྱིན་པ་ན་ཁྱི་མོ་རོ་སྨད་འབུས་གཞིག་པ་རོ་སྟོད་ཟུག་ཅིང་ཟ་བ་ཞིག་མཐོང་ནས་སྙིང་རྗེ་ལྷག་པར་སྐྱེས་ཏེ། བསལ་ན་འབུ་འཆི་མ་བསལ་ན་ཁྱི་མོ་འཆི་བར་སྣང་བས་རང་གི་ལུས་ལས་ཤ་བཅད་དེ་དེར་འབུ་བསལ་སྙམ་སྟེ། གྲོང་ཁྱེར་ཨ་ཙེན་ཏ་ཞེས་བྱ་བར་ཕྱིན་ཏེ་གསེག་གཤང་གཏེང་པར་བཅུག་ནས་གསེར་གྱི་སྤུ་གྲི་གཡར་ཏེ་རང་གི་ལུས་ལས་ཤ་བཅད་ལག་པས་བླང་ན་ཤི་ཡིས་དོགས་ཏེ་སྤྱན་བཙུམ་སྟེ་ལྗགས་ཀྱིས་བླང་སྙམ་པ་དང་། ཁྱི་མེད་པར་རྗེ་བཙུན་འོད་དང་བཅས་པ་མཐོང་ནས། ཀྱེ་མ་ཡབ་ཅིག་བདག་གི་སྐྱབས། །ངལ་བརྒྱས་འབད་ཀྱང་འབྲས་མ་མཆིས། །ཅི་ཕྱིར་ཆར་སྤྲིན་རྒྱ་མཚོའི་དཔུང་། །གདུང་བས་བསྲེགས་ཏེ་སྐོམ་ཚད་འབབ། །བདག་གིས་དེ་ཙམ་བསྒྲུབས་ཀྱང་རྟགས་མ་བྱུང་ན་ཐུགས་རྗེ་རེ་ཆུང་ཞེས་འཁངས་པས་རྗེ་བཙུན་གྱིས། ལྷ་ཡི་རྒྱལ་པོས་ཆར་ཕབ་ཀྱང་། །ས་བོན་མི་རུང་མི་འཁྲུངས་ལྟར། །སངས་རྒྱས་རྣམས་ནི་བྱོན་གྱུར་ཀྱང་། །སྐལ་བ་མེད་པས་བཟང་མི་མྱོང་། །ང་དང་པོ་ནས་ཡོད་དེ་ཁྱོད་རང་གི་སྒྲིབ་པས་མ་མཐོང་ལ། ད་ལྟ་སྙིང་རྗེ་ཆེན་པོ་སྐྱེས་པས་སྒྲིབ་པ་དག་ནས་མཐོང་བ་ཡིན་ཏེ། དེ་ལྟར་ཡིན་པར་ཁྱོད་རང་ང་ཕྲག་གོང་དུ་ཁུར་ལ་སྟོན་ཅིག་གསུངས་ནས་བསྟན་པས་མཐོང་བ་མ་བྱུང་བས་དེར་ཡིད་ཆེས་སོ། ཁྱོད་ཅི་འདོད་གསུང་བ་ལ་ཐེག་ཆེན་དར་བ་ཞུ་འཚལ་བྱས་པས། ངའི་ཆོས་གོས་

ལ་འཇུས་ཤིག་གསུང་ནས་དགའ་ལྡན་དུ་བྱོན་ཏེ་ལྷའི་དྲོ་སྐད་གཅིག །མི་ལོ་ལྔ་བཅུའམ་ལྔ་བཅུ་རྩ་གསུམ་དུ་བཞུགས་པར་འཆད། ས་སྡེའི་གནའ་མཆན་ལས་ཟླ་བ་དྲུག་བཞུགས་ཏེ་གསན་ཅེས་འབྱུང་ངོ་། །དེར་ཡུམ་གྱི་མདོ་རྣམས་དང་རྣལ་འབྱོར་སྤྱོད་པའི་ས་ཆེན་པོ་དང་ཐེག་ཆེན་གྱི་མདོ་སྡེ་མང་དུ་གསན་ནོ། །དེ་དག་གི་དོན་སྟོན་པའི་བསྟན་བཅོས་རྩོམ་པར་ཞུས་པས་བྱམས་ཆོས་ལྔ་བརྩམས་སོ་ཞེས་སློབ་དཔོན་སེང་གེ་བཟང་པོ་ལ་སོགས་པ་འདོད་ལ། གནད་ཀྱི་ཟླ་ཟེར་ལས། བཀའ་བསྡུས་པའི་རྗེས་ལ་དུས་དེར་གནས་པ་ཉིད་ན་མཆོག་ཏུ་ཟབ་ཅིང་རྟོགས་པར་དཀའ་ལ་རྟོགས་བར་མི་ནུས་པས་ཐུགས་རྗེས་དེ་རྟོགས་པའི་དོན་དུ་འཕགས་པ་བྱམས་པས་མངོན་པར་རྟོགས་པའི་རྒྱན་གྱི་ཚིག་ལེའུར་བྱས་པའི་བསྟན་བཅོས་ཀྱིས་གསལ་བར་མཛད་ཀྱི༏ འཕགས་པ་ཐོགས་མེད་ཀྱིས་ཞུས་ནས་དུས་ཕྱིས་བྱས་ཟེར་བ་ནི་སེངྒེ་བཟང་པོ་ལ་སོགས་པ་རྣམས་ཀྱི་འཁྲུལ་པ་སྟེ། སྔོན་དུ་བྱས་པ་ལམ་བཤད་ཅེས་པ་ནི་གཞན་དག་གིའོ། །ཞེས་གསུངས་སོ། །སློབ་དཔོན་ཤནྟི་པ་ནི། མངོན་པ་ཀུན་ལས་བཏུས་ཀྱང་བྱམས་པས་མཛད་པར་འདོད་ཅེས་གྲགས་ཀྱང་། ཡོངས་སུ་གྲགས་པ་བྱམས་པའི་ཆོས་ལྔ་མཛད་པ་རྣམས་གསན་ཏེ་མི་ཡུལ་དུ་བྱོན་ནས། རྣལ་འབྱོར་སྤྱོད་པའི་ས་ཆེན་པོ་ལ་སོགས་པ་ཐེག་ཆེན་གྱི་སྡེ་སྣོད་དམ། སྡེ་སྣོད་གསུམ་གཏན་ལ་འབེབས་པ་རྒྱས་པའི་བསྟན་བཅོས་ས་སྡེ་ལྔ་དང་། དེའི་དོན་བསྡུས་པ་སྡོམ་རྣམ་གཉིས་བརྩམས་ཏེ། མངོན་པ་ཀུན་ལས་བཏུས་ནི།ཐེག་པ་ཐུན་མོང་གི་སྡོམ་ཡིན་ནོ། །ཁ་ཅིག། སློབ་དཔོན་ཨ་བྷྱ་ས་ཐེག་པ་ཆེན་པོའི་བསྟན་བཅོས་མངོན་པ་ཀུན་ལས་བཏུས་ཞེས་བཤད་པས་ཐུན་མོང་དུ་མི་འཐད་ཟེར་ཡང་སྐྱོན་མེད་དེ། ཐེག་ཆེན་གྱི་བསྟན་བཅོས་ཡིན་ཡང་ཐེག་པ་གསུམ་གའི་དོན་སྟོན་པ་མི་འགལ་ཏེ། ས་སྡེ་བཞིན་ནོ། །བྱམས་ཆོས་ལྔ་ཡང་ཡི་གེར་བཀོད་དེ་མངོན་རྟོགས་རྒྱན་དང་

༄༅།        །ཡུམ་གྱི་དོན་སྟོན་པ་དེ་ཉིད་རྣམ་ངེས་བརྩམས། རྒྱུད་བླའི་འགྲེལ་པ་དང་། མདོ་དགོངས་པ་ངེས་འགྲེལ་གྱི་འགྲེལ་པ་ལ་སོགས་པ་མཛད་ཅིང་ས་གསུམ་པ་བརྙེས་པས་བསྟན་པ་ལ་བྱ་བ་བྱས་པ་ཡིན་ནོ། །འགྲེལ་ཆུང་གི་བཤད་པ་ཚིག་གསལ་དུ། སློབ་དཔོན་ཐོགས་མེད་ས་གསུམ་པ་འོད་བྱེད་པ་བརྙེས་ཀྱང་དབྱིག་གཉེན་གདུལ་བའི་དོན་དུ་སེམས་ཙམ་དུ་བསྟན་ནོ་ཞེས་པ་དང་། སེམས་ཙམ་རྒྱན་ལས། བྱམས་པ་ཐོགས་མེད་ཀྱིས་གསུངས་ཤིང་། །ཀླུ་སྒྲུབ་ཀྱང་ནི་བཞེད་པ་ཡི། །ཚད་མ་ལུང་དང་ལྡན་པ་ཡི། །བདེན་པ་གཉིས་ནི་འདིར་བརྗོད་བྱ། །ཞེས་པའི་འགྲེལ་པར། བྱམས་པ་ནི་ས་བཅུ་པའི་བྱང་ཆུབ་སེམས་དཔའོ། །ཐོགས་མེད་ནི་ས་གསུམ་པ་ལ་གནས་པའི་བྱང་ཆུབ་སེམས་དཔའོ། །ཀླུ་སྒྲུབ་ནི་ས་དང་པོ་ལ་གནས་པའི་བྱང་ཆུབ་སེམས་དཔའོ། །ཞེས་སོ། །ཁ་ཅིག་སའི་སྟོད་འགྲེལ་ལས། འཇིག་རྟེན་ཀུན་ལ་ཕན་ཕྱིར་ཐོགས་མེད་ཅེས་བྱ་བ། །ཆོས་རྒྱུན་ཏིང་འཛིན་སྟོབས་ཀྱིས་དྲངས་པའི་བདུད་རྩིའི་ཆོས། །འཕགས་པ་མི་ཕམ་ཞལ་གྱི་བུམ་པ་ནས་བླུགས་པ། །གསན་པའི་སྙིམ་པས་གསོལ་བ་དེ་ལ་ཕྱག་འཚལ་ལོ། །ཞེས་པ་དང་། རྣམ་པར་བཤད་པ་བསྡུ་བའི་མཇུག་ཏུ། འཕགས་པ་ཐོགས་མེད་བདག་དང་གཞན་གྱི་གྲུབ་པའི་མཐའ་རྒྱ་མཚོའི་ཕ་རོལ་དུ་བྱོན་ནས་ཆོས་ཀྱི་རྒྱུན་གྱི་ཏིང་ངེ་འཛིན་གྱི་ཁྱད་པར་བརྙེས་པ་འཕགས་པ་མི་ཕམ་པའི་ཞབས་ཀྱི་པདྨ་རྙོག་པ་མེད་པ་སྤྱི་བོས་ལེན་པས་མཛད་ཅེས་བཤད་པས་ཆོས་རྒྱུན་གྱི་ཏིང་ངེ་འཛིན་ལ་གནས་པར་བཤད་ཅིང་དེ་ཚོགས་ལམ་ན་ཡོད་པས་འཕགས་པ་མིན་ཡང་རྒྱུ་ལ་འབྲས་བུའི་མིང་གིས་འཕགས་པར་བཏགས་སོ་ཟེར་བ་མི་འཐད་དེ། སློབ་དཔོན་སེང་གེ་བཟང་པོས་ཆོས་རྒྱུན་གྱི་ཏིང་ངེ་འཛིན་ནི་ཚོགས་ལམ་དུ་ཐོབ་པར་བཤད་ཀྱང་དེའི་རྗེས་ལ་མེད་པར་མ་བཤད་པས་སོ་སྐྱེར་མི་འགྲུབ་ཅིང་།

མདོ་སྡེ་རྒྱན་གྱི་འགྲེལ་བཤད་ཆེན་མོ་ལས། ཆོས་ཀྱི་རྒྱུན་གྱི་ཏིང་ངེ་འཛིན་ནི་མོས་པས་སྤྱོད་པས་མཐར་ཕྱིན་པའོ་ཞེས་པ་དང་། བཙུན་པ་ངོ་བོ་ཉིད་མེད་པའི་འགྲེལ་བཤད་ལས། ཆོས་ཀྱི་རྒྱུན་གྱི་ཏིང་ངེ་འཛིན་ནི་འཇིག་རྟེན་པའི་ཆོས་ཀྱི་མཆོག་གོ་ཞེས་གསུངས་ལ་ཆོས་མཆོག་དང་མཐོང་ལམ་སྟན་གཅིག་ཏུ་སྐྱེ་བས་ཤིན་ཏུའང་འཕགས་པར་གསལ་ལོ། །དེས་དགུང་ལོ་ལྔ་བརྒྱར་ཟེར་ཡང་བརྒྱ་ལྔ་བཅུ་བཞུགས་ཏེ་ཐེག་ཆེན་དར་བར་མཛད་དོ། །དབྱིག་གཉེན་གྱིས། སྔོན་རང་རྒྱལ་མང་པོས་ཆོས་མངོན་པ་དར་བར་སྨོན་ལམ་བཏབ་ཅིང་། ལུང་སྨན་གྱི་གཞི་ལས། ལྷག་མཐོང་དང་རྗེས་སུ་མཐུན་པའི་གནས་མལ་གྱི་མཆོག་ཏུ་ལུང་བསྟན་པའི་ཁ་ཆེར་སློབ་དཔོན་འདུས་བཟང་གི་དྲུང་དུ། སྔོན་དགྲ་བཅོམ་པ་ཞི་ལྡན་དང་སྒུར་པོ་ལ་སོགས་པ་མང་པོས་མངོན་པ་སྡེ་བདུན་དང་ལུང་གི་དོན་བསྡུས་པ་བསྟན་བཅོས་བྱེ་བྲག་ཏུ་བཤད་པ་ཞེས་པ་གཞུང་འབུམ་ཕྲག་གཅིག་ཏུ་ལོངས་པ་ཞིག་མཛད་དོ། །འོད་ལྡན་ལས། ཉེར་སྦས་ཀྱིས་མཛད་ཅེས་འབྱུང་ངོ་། །འདི་ལ་འགྲེལ་པ་རྒྱལ་སྲས་མར་བྱེ་བྲག་བཤད་མཚོ་ཞེས་འབྱུང་བ་ནི་བྱེ་བྲག་ཏུ་བཤད་པ་རྒྱ་མཚོར་གཟུགས་ཅན་གྱི་རྒྱན་གྱིས་སྟོན་པ་ཡིན་གྱི་མིང་མ་ཡིན་ལ་དེ་བཞིན་དུ་བྱེ་བྲག་བཤད་མཛོད་ཅེས་འདོད་པའང་མི་འཐད་དོ། །བྱེ་བྲག་ཏུ་བཤད་པ་དང་མངོན་པ་སྡེ་བདུན་ལ་སོགས་པ་བསླབ་པས་ཚེགས་མེད་པར་མཁྱེན་ནས་རྒྱ་གར་དུ་བྱོན་པར་བཞེད་པའི་ཚེ་ཡུལ་དེའི་ཤོ་གམ་སྲུང་བའི་གནོད་སྦྱིན་གྱིས་ལྷ་རྟེན་ཡོད་པ་འཕྲོག་ནས་ལན་གསུམ་གྱི་བར་དུ་བཟློག་ཀྱང་ནོར་ནི་མེད། ཆོས་བློ་ལ་ཡོད་པ་དབྲལ་དུ་མི་བཏུབ་པས་བཏང་སྟེ་ནཱ་ལེནྡྲར་བྱོན་པ་དང་། གཅེན་གྱིས་བསྟན་བཅོས་མང་དུ་བརྩམས་པའང་གསན་ནས། ཀྱེ་མ་ཐོགས་མེད་ནགས་སུ་ལོ། །བཅུ་གཉིས་བར་དུ་ཏིང་འཛིན་བསྒྲུབས། །ཏིང་འཛིན་མ་གྲུབ་གླང་ཆེན་གྱི། །རྒྱབ་ཁལ་ལོངས་པའི་གྲུབ་

༄༅།        །མཐའ་བརྩམས། །ཞེས་ཐེག་ཆེན་གྱི་གང་ཟག་དང་ཆོས་ལ་བསྟིང་པ་གཅེན་གྱིས་གསན་ནས་ལོག་སྒྲུབ་དོན་མིན་དུ་འགྱུར་བར་མཁྱེན་པ་དེ་བཟློག་པའི་ཕྱིར་སློབ་མ་གཉིས་ལ་ས་བཅུ་པ་དང་། བློ་གྲོས་མི་ཟད་པས་བསྟན་པ་འཛིན་དུ་བཅུག་ནས་གཅུང་ཅན་སོང་ལ་སྲོད་དང་ཐོ་རངས་ཐོན་ཅིག་ཅེས་བསྒོས་པ་ལྟར་བསྒྲུབས་པས་སྲོད་ལ་ཐེག་ཆེན་འདི་རྒྱུ་བཟང་ལ་འབྲས་བུ་ཁ་གཡེལ་བ་འདྲ་གསུང་། ཐོ་རངས་རྒྱུ་འབྲས་གཉིས་ཀ་བཟང་བར་འདུག་པ་ལ་ངས་སྐུར་བ་བཏབ་པ་ལྕེ་འདིས་ལན་པས་གཅོད་གསུང་ནས་སྤུ་གྲི་ཚོལ་བའི་ཚེ་ཁོང་གཉིས་ལྗགས་དགུམ་མི་འཚལ། དེའི་སྒྲིབ་པ་སྦྱང་ཐབས་གཅེན་ལ་མངའ་བས་དེར་གཤེགས་སོ། །ཞེས་སྨྲས་ཏེ་བྱོན་ཏོ། །དེར་ཆོས་མང་དུ་གསན་ཅིང་འབེལ་གཏམ་མང་དུ་མཛད་པའི་ཚེ་གཅུང་ནི་སྤོབས་པ་ཤིན་ཏུ་མྱུར་བར་བྱུང་། གཅེན་ཅུང་ཟད་བུལ་ཡང་ལན་བཟང་པོ་བྱུང་བས་འདིའི་རྒྱུ་ཅི་དྲིས་པས། ཁྱོད་ནི་སྐྱེ་བ་ལྔ་བརྒྱར་པཎྜི་ཏར་གྱུར་པས་སྐྱེས་ཐོབ་ཀྱི་ཤེས་རབ་ཆེ་བ་ཡིན། ང་ལ་དེ་ལྟ་བུ་མེད་པས་ཡི་དམ་ཞིག་ལ་དྲིས་ཤིང་ལན་འདེབས་པ་ཡིན་གསུང་། དེ་བདག་ལ་བསྟན་པར་ཞུ་བྱས་པས། རྗེ་བཙུན་ལ་ཞུ་ཡི་གསུངས་ནས་ཞུས་པས། ཁྱོད་སོ་སོའི་སྐྱེ་བོ་ཡིན་ཅིང་དང་པོར་ཐེག་ཆེན་ལ་སྐུར་པ་བཏབ་པས་ཚེ་འདི་ལ་མཐོང་བའི་སྐལ་བ་མེད་ཀྱི་སྒྲིབ་པ་སྦྱང་བར་བྱ་བའི་ཕྱིར་ཐེག་ཆེན་གྱི་མདོ་འགྲེལ་མང་དུ་རྩོམས། གཙུག་ཏོར་རྣམ་རྒྱལ་ཐོན་ཕྱི་མ་ལ་མཇལ་གསུངས་ནས། དེ་ནས་གཅེན་ལ་ལྷག་པར་དད་དེ། ང་ཡི་ཕུ་བོ་ཀླུ་དང་འདྲ། །ང་ནི་ཆར་སྡོད་བྱ་དང་འདྲ། །ཀླུ་ཡི་རྒྱལ་པོས་ཆར་ཕབ་ཀྱང་། །བྱ་ཡི་གྲེ་བར་སོང་བ་མེད། །ཅེས་ཟེར་ཞིང་བྱམས་པའི་གསུང་ཡང་བསྒྲུབས་ལ། མཛོད་ཀྱི་ཚིག་ལེའུར་བྱས་པ་བརྩམས་ཏེ་སྐྱེས་དང་བཅས་པ་འདུས་བཟང་ལ་སྤྲིངས་སོ། །དེའི་སློབ་མ་

དག་གིས་ལོ་དང་གྲག་ལ་སོགས་པ་འདི་འོ་སྐོལ་གྱི་གྲུབ་མཐའ་ལ་ཟུར་ཟའོ་ཞེས་སྨྲས་པ་དང་། ཁོང་བསྟན་བཅོས་རྩོམ་པ་ལ་མཁས་པས་ཚིག་རྒྱན་ཡིན་ཟེར་ཏེ་ཤིན་ཏུ་མཉེས་ནས་འགྲེལ་པ་མདོ་དང་མཐུན་པ་ཡང་སྦྱར་རོ། །དུས་ཕྱིས་འགྲེལ་པ་མཛད་དེ་བསྐུར་བ་དང་། རྩ་བ་སུན་འབྱིན་གྱི་འགྲེལ་པ་འདི་ལུང་དང་རིགས་པས་ཚར་གཅད་ཅིང་ཕམ་པར་བྱས་ལ་ཁོ་ཉིད་ཀྱིས་ལག་པས་བསུབ་ཏུ་གཞུག་དགོས་གསུང་སྟེ། བསྟན་བཅོས་ལན་གྱི་ཕུང་པོའང་བརྩམས་ཏེ་རྒྱ་གར་དུ་འགྲོ་བར་ཆས་པ་དང་། དབྱིག་གཉེན་གྱིས་གསན་ནས་སློབ་དཔོན་འདུས་བཟང་ནི་བྱེ་བྲག་ཏུ་སྨྲ་བའི་གྲུབ་མཐའ་ལ་བྱང་བ་ཡིན་པས་བཟློག་པར་དཀའ་ལ་དེ་ཕམ་ཡང་དགོས་པ་མེད་པས་རང་བྱུང་གི་མཆོད་རྟེན་བལྟར་འགྲོ་ཞེས་བསྒྲགས་ལ་བལ་ཡུལ་དུ་འགྲོའོ་སྙམ་ནས་བྱོན་ནོ། །དེའི་རྗེས་ལ་སློབ་དཔོན་སཾ་གྷ་བྷ་དྲ་འདུས་བཟང་ངམ་དགེ་འདུན་བཟང་པོ་འཁོར་རབ་ཏུ་བྱུང་བ་མང་པོའི་གོས་ངུར་སྨྲིག་གི་འོད་ཀྱིས་ནམ་མཁའ་དམར་པོར་སོང་བ་ཙམ་བྱོན་ཏེ་ནཱ་ལེནྡྲར་ཞི་བར་གཤེགས་སོ། །