(༣. ཐབས་ཤེས་རབ་གཉིས་སུ་མེད་པའི་རྒྱུད།)

གསུམ་པ་ཐབས་ཤེས་རབ་གཉིས་སུ་མེད་པའི་རྒྱུད་ནི། འཇམ་དཔལ་གྱི་མཚན་ཡང་དག་པར་བརྗོད་པ་ཕན་ཡོན་དང་བཅས་པ་བམ་པོ་གཅིག་རིན་ཆེན་བཟང་པོའི་འགྱུར། དུས་ཀྱི་འཁོར་ལོའི་རྩ་བའི་རྒྱུད་ཀྱི་དུམ་བུ་དབང་མདོར་བསྟན་པ་འབྲོ་ཤེས་རབ་གྲགས་ཀྱི་འགྱུར། དུས་ཀྱི་འཁོར་ལོའི་བསྡུས་རྒྱུད་རྭ་ཆོས་རབ་ཀྱི་འགྱུར། སྤྱིར་འདི་

ལ་འགྱུར་བཅུ་བཞི་ཡོད། རྒྱུད་ཕྱི་མ་རྒྱུད་ཀྱི་སྙིང་པོ་དར་མ་གྲགས་ཀྱི་འགྱུར། དབང་གི་རབ་ཏུ་བྱེད་པ་འབྲོ་འགྱུར། བཀོལ་བའི་རྒྱུད་ཀྱི་དུམ་བུ་གྱི་ཅོའི་འགྱུར། ཡང་བཀོལ་བའི་རྒྱུད་ལྕེ་སྤྱང་རོལ་པ་དང་། རྡོ་རྗེ་གླུ་གར་དང་། བླ་མའི་ཡོན་ཏན་ཡོངས་སུ་བཟུང་བ་དང་གསུམ། འདི་རྣམས་ཁ་ཅིག་མ་དག་པར་འདོད་དོ། །དེ་ལྟར་རྒྱུད་བཞི་བརྒྱར་གཉིས་ཆད་པ་ཡོད་དོ། །སྔ་འགྱུར་གསང་སྔགས་རྙིང་མ་ནི། ལོ་ཙཱ་བ་ཆེན་པོ་རིན་ཆེན་བཟང་པོ་དང་ལྷ་བླ་མ་ཡེ་ཤེས་འོད་དང་ཕོ་བྲང་ཞི་བ་འོད་དང་འགོས་ཁུག་པ་ལྷས་བཙས་ལ་སོགས་པ་རྣམས་ཡང་དག་པ་མ་ཡིན་པར་སྨྲ་ལ། ཁོ་བོའི་བླ་མ་སྐད་གཉིས་སྨྲ་བ་ཉི་མའི་མཚན་ཅན་དང་རིགས་རལ་ལ་སོགས་པ། བསམ་ཡས་ནས་རྒྱ་དཔེ་རྙེད་པའི་ཕྱིར་དང་། ཕུར་པ་རྩ་བའི་དུམ་བུའི་རྒྱ་དཔེ་བལ་པོར་ཡང་སྣང་བས་རྒྱུད་ཡང་དག་གོ་ཞེས་གསུང་ངོ་། །ཁོ་བོས་ནི་ཡིད་ཀྱི་ཉེས་པ་རང་བཞིན་གདུག་པ་སྟེ། །མི་རིགས་པ་ཡི་གཟུགས་ལའང་མི་རིགས་ན། །ཐེ་ཚོམ་ཟ་བའི་ཆོས་ལ་སྨོས་ཅི་དགོས། །དེ་ཕྱིར་བཏང་སྙོམས་བཞག་ལེགས་ཉེས་པ་མེད། །ཅེས་འབྱུང་བ་དང་། ཆོས་ཡིན་པ་ལ་མ་ཡིན་ཟེར་བ་དང་། མ་ཡིན་པ་ལ་ཡིན་ཟེར་བ་ལས་འབྲས་མཉམ་པར་བཤད་པས་དང་། ཆོས་ཀྱི་མཚན་ཉིད་གང་ལ་ཡོད་མེད་དག །མི་ཤེས་མཐོང་བ་མེད་པར་རྒྱུ་བཞི་ཡིས། །རྣམ་དབྱེ་སྨྲ་བའི་ཁ་ནི་བདུད་ཀྱིས་ཕྱེ། །ཆོས་ལ་ཉེས་སྨོད་ཐུབ་པའི་གཞུང་ལས་བཀག །ཅེས་ཟེར་བ་བཞིན་དུ་བཏང་སྙོམས་སུ་བཞག་གོ །བློ་དང་ལྡན་པ་རྣམས་ཀྱིས་རྟོན་པ་བཞི་དང་བརྟག་པ་གསུམ་ལ་བརྟེན་ནས་དཔྱད་པར་བྱའོ། །