(སྤྱིར་རིག་གནས་བྱུང་ཚུལ།)

བྱང་ཆུབ་སེམས་དཔའི་སྤྱོད་ཡུལ་རྣམ་པར་འཕྲུལ་པ་བསྟན་པའི་མདོ་འམ། མཚན་གཞན་བདེན་སྨྲ་ལུང་བསྟན་པའི་མདོ་ལས་རྒྱལ་པོ་རྣམས་ལ་བསྟན་བཅོས་དགོས་མི་དགོས་ཀྱི་དབྱེ་བ་གོང་དུ་བཤད་པ་དང་རྣམ་པ་མཐུན་པར་དྷཱི་ལྔ་པ་ཡན་ཆད་ལ་རང་གཞན་གྱི་སྒོ་གསུམ་དྲང་པོར་སྲོང་བའི་མན་ངག་གི་སྙིང་པོ་ཙམ་སྙན་བརྒྱུད་དུ་ཡོད་པ་མ་གཏོགས་མེད་པ་ལ། དབང་རྣམ་པ་གསུམ་ཀ་དང་། ལྷག་པར་ཊིའུ་རྒྱལ་སྲིད་ཚུགས་པ་ནས་བཟུང་བསྟན་བཅོས་ཀྱི་རིགས་རྒྱ་ཆེར་དར་སྟེ་རིག་གནས་སྨྲ་བའི་སྟོན་པ་བརྒྱར་གྲགས་པ་ཅིག་ཆར་དང་སྔ་ཕྱིར་བྱུང་ངོ་། །དེ་དག་གིས་ཇི་སྙེད་བསྟན་པ་མཐའ་དག་མཆོག་དམན་གྱི་ཁོག་འབུབས་གཉིས་སུ་འདུས་པ་ལས། ཕྱི་མ་ནི་སྒྲ་ཚད་གཟོ་གསོ། སྙན་ངག །མངོན་བརྗོད། སྡེབ་སྦྱོར། ཟློས་གར། སྐར་རྩིས། ས་དཔྱད། མོ་ཕྱ་སོགས་ཐ་སྙད་ཀྱི་རིག་བྱེད་རྣམས་དང་། འཕོངས་ཐབས། རལ་གྲི། རོལ་མོ། གྱད་སྟབས། ཆིབས་ཀྱི་ཁ་ལོ་བསྒྱུར་བ་སོགས་སྒྱུ་རྩལ་སྣ་ཚོགས་སོ། །སྔ་མ་ནི་ནང་རིག་པར་དོན་གྱིས་གཏོགས་ཟེར་ཏེ། བོན་སྟོན་ལོའུ་ཀྱུན་དང་། བཞུ་སྟོན་ཁོང་ཙིའི(བོད་དག་གིས་

༄༅།       །མཚན་ཙམ་གཡར་བར་ཀོང་ཙེ་ཟེར་འདུག) བརྒྱུད་པ་ནི་མ་ཆད་ཅིང་གྲགས་ཆེ་ལ། སྙིང་རྗེ་ཆེན་པོ་དང་སྤྲོས་པ་མེད་པ་དང་། སྡུག་བསྔལ་གྱི་རྩ་བ་བདག་འཛིན་དུ་བཤད་པ་དང་། ཞི་བའི་མཐའ་དང་། ཕྱི་ལྟར་སྲིད་བསྲུང་ལ་ནང་ལྟར་འཕགས་ལམ་ལ་འཛེགས་པའི་རིམ་པ་དང་། ལྷན་སྐྱེས་རང་བྱུང་གི་ཡེ་ཤེས་དང་། ཞི་གནས་དང་། ལྷག་མཐོང་སོགས་བསྟན་འདུག་པ་དག་གསུང་རབ་རིན་པོ་ཆེ་དང་མི་འགལ་བས་ལུགས་དེ་གཉིས་དང་བདག་ཅག་གི་སྟོན་པའི་བསྟན་པ་གསུམ་ལ། བསྟན་པ་རྣམ་གསུམ་ཞེས་ཡུལ་འདིར་ཡོངས་སུ་གྲགས་ཤིང་བསྟན་གསུམ་དགོངས་གཅིག་ཏུ་བཀྲལ་བའི་བསྟན་ཆོས་དག་ཀྱང་མཐོང་ངོ་། །གཞན་ཡང་སྟོན་པ་མཱེ་ཙིས་ལུས་སྲོག་ལ་མི་བལྟ་བར་གཞན་དོན་ཁོ་ན་དང་དུ་བླངས་དགོས་པ་དང་། སེམས་ཀྱི་རང་བཞིན་གདོད་མ་ནས་རྣམ་པར་དག་པ་ལས་བློ་བུར་གྱི་དྲི་མས་སླད་ཅིང་ལས་ཀྱིས་བསྒྱུར་བར་གསུངས་པ་རྣམས། སྔ་རབས་པས་སངས་རྒྱས་པ་དང་མཐུན་པར་བཤད་ཅིང་། སྟོན་པ་ལི་མེ་ཙིས་ཆོས་ཐམས་ཅད་རྟེན་ཅིང་འབྲེལ་ཏེ་བྱུང་བར་བསྟན། ཁྱད་པར་དུ་ཡང་བདག་ཅག་གི་སྟོན་པའི་མཚན་སྙན་ཕྱོགས་འདིར་ཐོག་མར་བསྒྲགས་པ་པོ་ནི་ཁོང་ཡིན་སྟེ་ཁོང་གི་ལེགས་བཤད་ལས། ནུབ་གྱི་ཕྱོགས་ཆར། ལྷུན་གྱིས་གྲུབ་པའི་མཛད་པ་དང་ཕུལ་དུ་བྱུང་བའི་དགོངས་པ་ཅན། སྨྲ་བརྗོད་ཀྱི་ཡུལ་ལས་འདས་པའི་སྐྱེས་བུ་

འཕགས་པ་ཞིག་བྱུང་སྟེ། དེའི་མིང་ནི་སངས་རྒྱས་སོ་ཞེས་བྱུང་ལ། དེའི་དུས་སུ་རྒྱ་གར་ནག་ཕན་ཚུན་འགྲུལ་ལམ་ཐར་མ་མྱོང་འདུག་གཤིས་མངོན་ཤེས་ཀྱིས་རིག་པར་གོར་མ་ཆག་གོ །ཡང་སྟོན་པ་ཅྭང་ཙི་ཞེས་བྱ་བས་རྨང་ལམ་ན་ཕྱེ་མ་ལེབ་ཏུ་རྨིས་ནས་སད་རྗེས་མནོ་དཔྱད་བཏང་བས་ཅིར་ཡང་སྣང་ལ་ཅིར་ཡང་མ་གྲུབ་པའི་དོན་གྱི་རྟོགས་པ་རྒྱུད་ལ་འཁྲུངས་པ་སོགས་མང་ལ་སྤྱིར་ནི་ཕལ་ཆེར་འཇིག་རྟེན་ཆོས་བརྒྱད་སྤོང་བ་སོགས་སེམས་འདུལ་བའི་རིམ་པ་སྙིང་པོར་བསྟན་པས། ཏིང་འཛིན་རྒྱལ་པོ་ལས། ལེགས་པར་བཤད་པའི་ཆོས་ནི་གང་ཐོས་ཀྱང་། །སངས་རྒྱས་དག་གི་བཤད་པར་ཐེ་ཚོམ་མེད། །ཞེས་དང་འཇམ་དཔལ་རྩ་རྒྱུད་ལས། གྲུབ་པའི་མཐའ་ནི་མཐའ་དག་ཀུན། །གང་ཡིན་ཐར་པའི་རྒྱུར་གསུངས་པ། །སྔགས་ཀྱི་ལམ་གྱི་གྲུབ་པའི་རྒྱུར། །ང་ཉིད་གྱིས་ནི་བྱས་པ་ཡིན། །ཞེས་གསུངས་པ་ལྟར་སངས་རྒྱས་བྱང་སེམས་རྣམས་ཀྱི་བྱིན་གྱིས་རླབས་པའི་བཀར་དོན་གྱིས་གཏོགས་སོ། །མུ་སྟེགས་པ་དྲག་ཤོས་རྣམས་སུ་སྨྲ་མཁན་ཡང་ཡོད་མོད་ཀྱིས། གང་ལྟར་སྔར་བཤད་པའི་རིག་གནས་དེ་དག་བློ་ཆེན་རྣམས་ཀྱིས་བསླབ་པར་བྱ་དགོས་པ་ཡིན་སྟེ། ཇི་སྐད་དུ། རྒྱལ་སྲས་རྣམས་ཀྱིས་མི་སློབ་པའི། །དངོས་དེ་གང་ཡང་ཡོད་མ་ཡིན། །ཞེས་དང་ཏིང་འཛིན་རྒྱལ་པོ་ལས། འཇིག་རྟེན་གཟོ་གནས་མང་པོ་ཅི་ཡོད་པ། ཐམས་ཅད་བྱང་ཆུབ་སེམས་

༄༅།       །དཔའ་དེས་བསླབས་ཏེ། ཞེས་དང་། ཁྱད་པར་དུ་ཡང་འཇམ་དཔལ་རྩ་རྒྱུད་ལས། གང་ཡང་གཟོ་ཡི་རྣམ་པར་ཤེས། །འཇིག་རྟེན་པ་ཡི་འཇིག་རྟེན་འདོད། །རྒྱུ་མཚན་ཤེས་དང་ལ་ཉེ་བཟང་། །སྐར་མའི་དཔྱད་ཀྱི་བརྟགས་དང་ནི། །རྒྱུ་མཚན་ཤེས་དང་དཔྱོད་པ་དང་། །སྒྲ་སྐད་དགེ་དང་མི་དགེ་དང་། །འབྱུང་པོ་ཀུན་གྱི་སྐད་ཤེས་དང་། །སྤྱོད་དང་སེམས་ཀྱི་སྤྱོད་པ་དང་། །ཟུར་གྱི་ཤེས་པ་དག་ཀྱང་བཤད། །དེ་བཞིན་གཏེར་ལྟ་ནོར་སྒྱུར་བྱེད། །རྩིས་དང་བརྡ་སྤྱོད་བསྟན་བཅོས་དང་། །གོས་ཀྱི་རིམ་པའི་ཆོ་ག་དང་། །ནད་རིགས་གསོ་བའི་རིག་པ་དང་། །དེ་ཉིད་ཐམས་ཅད་ཕན་དང་བདེ། །གཏན་ཚིགས་ལུགས་ཀྱི་བསྟན་བཅོས་དང་། །གཞན་ཡང་སྒྲ་ཡི་བསྟན་བཅོས་བསྟན། །སྡེབ་སྦྱོར་རིག་བྱེད་དྲི་ཟའི་གླུ། །སྤོས་སྦྱར་དག་ཀྱང་བསྟན་པ་ཡིན། །བདག་གིས་བྱང་ཆུབ་སེམས་ཀྱིས་ནི། །སེམས་ཅན་དོན་ཕྱིར་བཤད་པ་ཡིན། །ཇི་ལྟར་གདུལ་བྱའི་སེམས་ཅན་ལ། །དེ་ལྟར་བདག་གིས་དེ་བཞིན་བྱས། །ཇི་ལྟ་ཇི་ལྟར་སེམས་ཅན་རྣམས། །ཕན་པའི་ལས་ནི་ལེན་པ་དང་། །ཕན་དོན་ལས་ཀྱི་དགེ་བའི་གཞི། །དེ་ལྟ་དེ་ལྟར་འདི་དག་བྱས། །སྣ་ཚོགས་ལས་ཀྱིས་བསྒྱུར་བ་ཡི། །སེམས་ཅན་འགྲོ་བའི་སྐྱེ་གནས་དག །འདི་དག་བྱ་བ་སྣ་ཚོགས་བྱས། །སྣ་ཚོགས་སྐྱེ་གནས་རབ་ཏུ་བསྟན། །ལས་རྣམས་སྣ་

ཚོགས་ལྡན་པ་ཡིས། །སྣ་ཚོགས་དོན་གྱི་བསྟན་བཅོས་བསྟན། །རྣམ་པ་སྣ་ཚོགས་གཟུགས་ལྡན་པ། །འདི་ལ་དེ་བཞིན་བྱས་པ་ཡིན། །སྣ་ཚོགས་འགྲོ་བའི་སྐྱེ་གནས་སུ། །བདག་གིས་དེ་བཞིན་ཆ་བྱད་བྱས། །ཕན་པའི་བསམ་པས་སེམས་ཅན་ལ། །སྣ་ཚོགས་གཟུགས་ནི་བདག་གིས་སྤྲུལ། །དབང་ཕྱུག་བརྒྱ་བྱིན་ཚངས་པ་སོགས། །ཁྱབ་འཇུག་ནོར་སྦྱིན་བདེན་བྲལ་དང་། །སྣ་ཚོགས་གཟའ་ཡི་གཟུགས་སོགས་ཀྱང་། །དེ་ཚོ་སྔོན་ནི་ང་ཡིས་སྤྲུལ། །ཐུགས་རྗེ་ཆེན་པོའི་དབང་བསྒྱུར་ཐུགས། །སེམས་ཅན་བསམ་པའི་སྤྱོད་ཡུལ་ཅན། །དེ་དག་ལ་ནི་རིམ་གྱིས་སུ། །ཞི་བའི་གནས་ལ་བཞག་པ་ཡིན། །ཞེས་དང་། འཇིག་རྟེན་ཇི་སྙེད་སྔགས་རྣམས་དང་། །ཆོ་ག་དག་ཀྱང་རབ་བསྟན་པ། །དེ་ཀུན་མཆོད་ཅིང་རི་མོར་བྱ། །དེ་དག་ལ་ནི་བརྙས་པ་སྤང་། །རྒྱུ་མཚན་ཤེས་དང་རིག་པ་དང་། །སྐར་མའི་དཔྱད་ཤེས་སྐད་ཤེས་པ། །དེ་དག་དོན་མེད་མི་བྱ་སྟེ། །བཀྲ་ཤིས་དོན་དུ་བསྟན་པ་ཡིན། །ཞེས་དང་། འཇིག་རྟེན་ཇི་སྙེད་གང་སུ་དག །སྐར་མའི་དཔྱད་ལ་མཁས་པ་དང་། །གཞན་གྱི་རྒྱུད་ལ་མཁས་པ་དང་། །ལུགས་ཀྱི་བསྟན་བཅོས་གཏན་ཚིགས་བཅས། །རིགས་པའི་བསྟན་བཅོས་ལེགས་འབྲེལ་བ། །སེམས་ཅན་རྣམས་ལ་ཕན་བྱེད་གང་། །དེ་ཀུན་ང་ཡིས་སྔོན་གསུངས་ཏེ། །སྔགས་ཟློས་པས་ནི་གཟུང་

༄༅།       །བར་བྱ། །ལམ་འདི་འགྲུབ་པའི་རྒྱུ་ཡིན་པར། །དེ་ཉིད་གཟིགས་པས་བསྟན་པ་ཡིན། །ཞེས་སོགས་གསུངས་པས་སོ། །དེ་ལྟ་ན་ཡང་གཞི་འཁོར་བའི་ངོ་བོ་དང་། རྒྱུ་རྐྱེན་ལས་འབྲས་ཀྱི་ཕྲ་ཞིབ་དང་། ལམ་ཐེག་པ་གསུམ་གྱི་རྣམ་བཞག་དང་། ཐབས་རྒྱ་ཆེ་བའི་གདམས་པ་དང་། ཟབ་མོའི་མན་ངག་དང་། འབྲས་བུ་སྐུ་གསུམ་དང་ཡེ་ཤེས་ལྔ་ལ་སོགས་པ་ཆེས་གསལ་པོར་བསྟན་པ་ནི་རྒྱལ་བའི་གསུང་རབ་རིན་པོ་ཆེ་ཁོ་ན་ཡིན་པས་གནས་ལུགས་ཀྱི་དོན་གསལ་བར་བྱེད་པའི་སྒྲོན་དཔེར། བཞུ་ལུགས་སྐར་མ་ལྟ་བུ། བོན་ལུགས་ཟླ་བ་ལྟ་བུ། ཆོས་ལུགས་ཉི་མ་ལྟ་བུའོ། །ཞེས་ཚད་ཐུབ་གྱི་མཁས་པ་རྣམས་གླེང་བར་བརྟེན་རྒྱལ་བསྟན་ལ་རྒྱལ་བ་ཉི་མའི་མཚན་ཡང་ཆགས་སོ། ་མཱེ་ཙི་ལ་སོགས་པའི་ཡིག་ཆ་ཙམ་ལུས་པ་ལས་རྒྱུན་མ་བཞུགས་ཤིང་། དོན་མེད་དོན་ལོག་སོགས་རྣམ་པ་དྲུག་མཐུན་གྱི་བསྟན་བཅོས་འགའ་ཡོད་མོད་གྱིས་དམ་པར་མི་གཟུང་ངོ་། །རྒྱ་ནག་རང་ངོས་ནས་ནི་དེ་ཙམ་ལ། ཐང་གི་སྐབས་སུ་ཐོད་ཀར་གྱི་དམག་དཔུང་རམ་མདར་དྲངས་པ་ཕྱིར་མ་ལོག་པར་གཏན་ཆགས་སུ་སྡད་པ་ལས། རིམ་གྱིས་འཕེལ་བའི་སྐྱེ་བོ་ཤིན་ཏུ་མང་བ་རང་གི་ཆོས་ལུགས་སྤྱོད་བཞིན་པར་རྒྱ་ནག་དང་འདྲེས་མར་གནས་ཀྱང་། རྒྱ་མི་རྣམས་དེའི་ཆོས་ལ་འཇུག་པའི་སྲོལ་མེད་ཅིང་གཉེན་

འབྲེལ་ཙམ་ཡང་མི་བྱེད་དོ། །ཡང་ཇིང་གིར་གྱིས་ནུབ་ཕྱོགས་པ་རྣམས་དབང་དུ་བསྡུས་ནས་ཚུར་ཐེག་སྐབས་སི་ཡང་ཞེས་བྱ་བ་རྒྱ་མཚོའི་གླིང་གི་འབངས་ཤིག་ནས་ཐིཡན་ཊུའི(ནམ་མཁའི་བདག་པོ།) བསྟན་པ་ཟེར་བའི་རིག་གནས་གཅིག་རྗེས་སུ་འབྲངས་ཏེ་ཡུལ་དབུས་སུ་བྱུང་བ་ད་ལྟའི་བར་དར་སོ་ཆེ་བར་སྣང་ངོ་། །སྟོན་པ་ནི་མ་ལི་ཡ(རྒྱ་ཚོའི་སྐར་མ)ཞེས་བྱ་བའི་བུ་མོའི་མངལ་ནས་རྫུས་ཏེ་སྐྱེས་པ་མཚན་ཡེ་སུ(འཇིག་རྟེན་མགོན་པོ)ཟེར་བ་ཞིག་སྟེ། མིའི་སྲོག་མི་གཅོད་པ་ལ་སོགས་པའི་སྡོམ་པ་ཡན་ལག་བཅུ་བསྟན་ཅིང་། དགེ་བའི་འབྲས་བུ་ལྷའི་གནས་སུ་སྐྱེས་ནས་རྟག་ཏུ་བདེ་བ་མྱོང་བ་དང་། སྡིག་པའི་རྣམ་སྨིན་དམྱལ་བར་ལྷུང་ནས་རྟག་ཏུ་སྡུག་བསྔལ་གྱིས་མནར་བར་བཤད་པ་དང་། ཤེས་བཞིན་དུ་བྱས་པའི་ཁ་ན་མ་ཐོ་བ་རྣམས་བཤགས་པས་མི་འདག་པར་གསུངས་པས་མཚོན་པའི་བསྟན་བཅོས་ཁ་ཤས་མཐོང་མོད། བསྟན་བཅོས་གཞན་མ་མཐོང་ངོ་། །དེ་ལ་འདི་སྐད་ཅེས་བྱ་སྟེ། ཡུལ་འདིར་རྗེ་བཙུན་ཐབས་མཁས་ཐུགས་རྗེ་ཡིས། །ལེགས་གསུངས་དྲང་ངེས་དོན་དང་ཡན་ལག་བཅས། །ད་ལྟ་རིག་གནས་རྒྱུ་མཚོའི་མཆོག་གྱུར་གང་། །བན་བོན་བཞུ་གསུམ་ཉི་ཟླ་སྐར་འདྲར་གྲགས། །ཞེས་སོ། རིག་བྱེད་སྤྱིའི་སྐབས་སོ། །