(བདུན་པ། བསྡུས་པའི་བསྟན་པ་རྒྱན་དྲུག་མཆོག་གཉིས་ལ་སོགས་པའི་པཎ་གྲུབ་རྣམས་ཀྱིས་ཇི་ལྟར་བསྐྱང་བའི་ཚུལ།)

བདུན་པ་བསྡུས་པའི་བསྟན་པ་མཁས་གྲུབ་རྣམས་ཀྱིས་ཇི་ལྟར་བསྐྱངས་པའི་ཚུལ་ནི། ལང་ཀར་གཤེགས་པ་ལས། ལྷོ་ཕྱོགས་བྷེ་ཏའི་ཡུལ་དུ་ནི། །དགེ་སློང་དཔལ་ལྡན་ཆེར་གྲགས་པ། །དེ་མིང་ཀླུ་ཞེས་བོད་པ་སྟེ། །ཡོད་དང་མེད་པའི་ཕྱོགས་འཇིག་པ། །ང་ཡི་བསྟན་པ་འཇིག་རྟེན་དུ། །བླ་མེད་ཐེག་ཆེན་རབ་བཤད་ནས། །རབ་ཏུ་དགའ་བའི་ས་སྒྲུབ་སྟེ། །བདེ་བ་ཅན་དུ་དེ་འགྲོའོ། །ཞེས་དང་འཇམ་དཔལ་རྩ་རྒྱུད་ལས། །དེ་བཞིན་གཤེགས་པ་ང་འདས་ནས། །ལོ་ནི་བཞི་བརྒྱ་ལོན་པ་ན། །དགེ་སློང་ཀླུ་ཞེས་དེ་འབོད་འབྱུང་། །བསྟན་པ་ལ་ནི་དད་ཅིང་ཕན། རབ་ཏུ་དགའ་བའི་ས་ཐོབ་པ། །ལོ་ནི་དྲུག་བརྒྱ་དག་ཏུ་འཚོ། །རིག་པ་རྨ་བྱ་ཆེན་མོ་ནི། །བདག་ཉིད་ཆེན་པོ་དེས་ཀྱང་འགྲུབ༑ །བསྟན་བཅོས་སྣ་ཚོགས་དོན་དང་ནི། །དངོས་པོ་མེད་པའི་དོན་དེ་རིག །གང་ཚེ་ལུས་དེ་བོར་བ་ན། །བདེ་བ་ཅན་དུ་སྐྱེ་བར་འགྱུར། །དེ་ནི་མཐར་གྱི་སངས་རྒྱས་ཉིད། །ངེས་པ་ཁོ་ནར་ཡང་དག་ཐོབ། །ཅེས་དང་། གཞན་ཡང་དུས་ཀྱི་འཁོར་ལོ་དང་། རྔ་བོ་ཆེའི་མདོ་ལ་སོགས་པ་དུ་མ་ནས་ལུང་བསྟན་པ་ལི་ཙ་བྱི་གཞོན་ནུ་སེམས་ཅན་ཐམས་ཅད་ཀྱིས་མཐོང་ན་དགའ་བར་གྲགས་པའི་སྤྲུལ་པ་དཔལ་འཕགས་པ་ཀླུ་སྒྲུབ་ཞབས་དང་། དེའི་སློབ་མ་དུས་ཀྱི་འཁོར་ལོ་ལས། དགེ་བཅུའི་ལམ་གྱི་གྲུབ་པར་གྱུར་པ་འཕགས་པའི་ལྷ་དང་ལྭ་བའི་ན་བཟའ་རྟ་དབྱངས་དང་། ཞེས་ལུང་བསྟན་པ་རྒྱ་གར་གྱི་སྐད་དུ་ཨཱཪྱ་དེ་ཝ། བོད་སྐད་དུ་འཕགས་པ་ལྷ་ཞེས་ཡོངས་སུ་གྲགས་པ་དེ་གཉིས་ཀྱིས་ལྷོ་ཕྱོགས་དཔལ་གྱི་རི་ལ་བཞུགས་ནས་ཐེག་པ་ཆེན་པོ་

དབུ་མའི་བསྟན་པ་དར་ཞིང་རྒྱས་པར་མཛད། ཀླུ་སྒྲུབ་ཀྱིས་དབུ་མ་རིགས་པའི་ཚོགས་ལྔ། བསྟོད་ཚོགས་རབ་ཏུ་མང་པོ། གཏམ་གྱི་ཚོགས་གཉིས་ལ་སོགས་པ་མཛད་ནས་ཐེག་པ་ཆེན་པོ་བཀའ་མ་ཡིན་པར་འདོད་པའི་ལོག་རྟོག་བསལ་ཏེ་ཐེག་ཆེན་བཀར་སྒྲུབ་པའི་སེང་གེའི་ང་རོ་ལན་གཅིག་མ་ཡིན་པར་བསྒྲགས། ཨཱཪྱ་དེ་ཝས་དེའི་སྲོལ་ཚུལ་བཞིན་དུ་བསྐྱངས་ཤིང་མུ་སྟེགས་ཀྱི་སྟོན་པ་མངལ་སྐྱེས་སུས་ཀྱང་མི་ཐུབ་པའི་དངོས་གྲུབ་དབང་ཕྱུག་ཆེན་པོས་བྱིན་པ་མ་ཁོལ་དང་ཕ་ཁོལ་དང་། མ་ཏི་ཙིཏྲ་སོགས་མིང་གི་རྣམ་གྲངས་དུ་མ་དང་ལྡན་པ་དེ་བཏུལ་ནས་སངས་རྒྱས་ཀྱི་བསྟན་པའི་སྒོར་འཇུག་པར་མཛད་པས་ཕྱིས་སློབ་དཔོན་དཔའ་བོ་ཞེས་པ་ཐུབ་པའི་སྐྱེས་རབས་སོ་བཞི་པ་སོགས་མཛད་དེ་བསྟན་པ་ལ་ཕན་པ་ཆེན་པོ་མཛད་པ་དེ་བྱུང་། ཨཱཪྱ་དེ་ཝས་རབ་ཏུ་བྱེད་པ་ལེགས་པའི་ཚད་དང་། དབུ་མ་བཞི་བརྒྱ་པ་དང་། ཡེ་ཤེས་སྙིང་པོ་ཀུན་ལ་བཏུས་པ་ལ་སོགས་པའི་བསྟན་བཅོས་མང་དུ་མཛད། ཡབ་སྲས་དེ་གཉིས་ཀྱི་དབུ་མའི་བསྟན་བཅོས་རྣམས་ལ་གཞུང་ཕྱི་མོའི་དབུ་མ་ཞེས་ཐལ་རང་གཉིས་ཀས་ཚད་མར་རྩི་བ་ཡིན། དེ་གཉིས་ཀྱི་རྗེས་འབྲང་ལ་ཐལ་རང་གཉིས་སུ་གྱེས་པ་ཡིན་ཏེ། ཐལ་འགྱུར་བ་ནི་ཨཱཪྱ་དེ་ཝའི་སློབ་མ་སློབ་དཔོན་སངས་རྒྱས་བསྐྱངས་ཀྱིས་དབུ་མ་ཐལ་འགྱུར་བའི་སྲོལ་དབྱེ། གཞན་ཡང་ཨཱཪྱ་དེ་ཝའི་སློབ་མ་སློབ་དཔོན་ཟླ་བ་གྲགས་པ་དང་། ཟླ་གྲགས་ཀྱི་སློབ་མ་རིག་པའི་ཁུ་བྱུག་ཆེ་བ། དེའི་སློབ་མ་རིག་པའི་ཁུ་བྱུག་ཆུང་བ། དེ་གཉིས་ཀའི་སློབ་མ་ཇོ་བོ་རྗེ་དཔལ་ལྡན་མར་མེ་མཛད་ལ་སོགས་པ་འཕགས་ཡུལ་ན་བཟང་ལ་མང་བ་བྱུང་། རང་རྒྱུད་པ་ནི། ཐོག་མར་སློབ་དཔོན་

༄༅།       །ལེགས་ལྡན་འབྱེད་ཀྱིས་རང་རྒྱུད་ཀྱི་སྲོལ་ཕྱེ། དེའི་སློབ་མ་དཔལ་སྦས་དང་། དེ་ནས་སློབ་དཔོན་ཡེ་ཤེས་སྙིང་པོ། ཞི་བ་འཚོ། ཀཱ་མ་ལ་ཤཱི་ལའམ། བོད་སྐད་དུ་པདྨའི་ངང་ཚུལ་དུ་གྲགས་པ་གསུམ་གྱིས་རྒྱ་གར་ཤར་ཕྱོགས་སུ་རང་རྒྱུད་ཀྱི་སྲོལ་བསྐྱངས་པས་རང་རྒྱུད་ཤར་གསུམ་དུ་གྲགས། ཡང་འཇམ་དཔལ་རྩ་རྒྱུད་དུ། ང་ནི་མྱ་ངན་འདས་འོག་ཏུ། །ལོ་ནི་དགུ་བརྒྱ་ལོན་པ་ན། །ཐོགས་མེད་ཅེས་བྱའི་དགེ་སློང་ནི། །བསྟན་བཅོས་ཀྱི་ནི་དོན་ལ་མཁས། །མདོ་སྡེ་ངེས་དོན་དྲང་བའི་དོན། །རྣམ་པ་མང་པོ་རབ་ཏུ་འབྱེད། །འཇིག་རྟེན་རིག་པ་སྟོན་བདག་ཉིད། །གཞུང་བྱེད་ངང་ཚུལ་ཅན་དུ་འགྱུར། །ཞེས་ལུང་བསྟན་པ་འཕགས་པ་ཐོགས་མེད་ཞབས་དང་། ཡང་འཇམ་དཔལ་རྩ་རྒྱུད་ལས། དེ་འོག་རྣམ་པར་གྲགས་པ་ནི། །ལྷོ་ཡི་ཕྱོགས་སུ་བྲམ་ཟེ་ནི། །ཡི་གེ་དང་པོ་བ་བསྟན་པ། །སྟོན་པའི་བསྟན་པ་གཅེས་འཛིན་བྱེད། །མཆོད་རྟེན་ཀུན་དགའ་ར་བར་གནས། །སྟོན་པའི་གཟུགས་བརྙན་ཡིད་འོང་གི། །ས་ནི་རྒྱ་མཚོ་གཉིས་མཐར་ཐུག །ཐམས་ཅད་ཀྱིས་ནི་རྒྱན་དུ་བྱས། །ཞེས་ལུང་བསྟན་པ་ཀུན་མཁྱེན་གཉིས་པ་དབྱིག་གཉེན་ཞབས་ཏེ་སྐུ་མཆེད་གཉིས་ཀྱིས་མངོན་པའི་བསྟན་པ་ཤིན་ཏུ་རྒྱས་པར་མཛད་པ་ཡིན་ཏེ། དེ་ཡང་འཕགས་པ་ཐོགས་མེད་ཀྱིས་མགོན་པོ་བྱམས་པ་བསྒྲུབས་པས་འགྲུབ་སྟེ༑ དགའ་ལྡན་དུ་བྱོན་ནས་བྱམས་པ་ལ་ཆོས་མངོན་པའི་མདོ་སྟོང་ཕྲག་བརྒྱ་པ་དང་། བྱམས་པའི་ཆོས་ལྔ་ལ་སོགས་པ་གསན་ནས་སླར་ཛམྦཱུའི་གླིང་དུ་བྱོན་ཏེ། ས་སྡེ་ལྔ། སྡོམ་རྣམ་པ་གཉིས་ལ་སོགས་པ་མཛད་ནས་ཐེག་པ་ཆེན་པོའི་མངོན་པ་

ཤིན་ཏུ་དར་བར་མཛད་པ་ལ་མངོན་པ་གོང་མ་ཞེས་ཡོངས་སུ་གྲགས། སློབ་དཔོན་དབྱིག་གཉེན་གྱིས་ཁ་ཆེར་འདུས་པ་བཟང་པོའམ། དགེ་འདུན་བཟང་པོའི་དྲུང་དུ་བྱོན་ནས་རིག་པའི་གནས་ལྔ་ལ་བསླབས་པས་ཤིན་ཏུ་མཁས་པར་གྱུར་ནས་སླར་ཡུལ་དབུས་སུ་བྱོན་ཏེ་མངོན་པ་མཛོད་ཀྱི་ཚིག་ལེའུར་བྱས་པ་རང་འགྲེལ་དང་བཅས་པ་མཛད། དེ་ལ་ཀ་བཞི་རང་ལས་མཁས་པའི་སློབ་མ་བཞི་བྱུང་བ་ལས། མངོན་པ་རང་ལས་མཁས་པ་ཁ་ཆེ་བློ་གྲོས་བརྟན་པ་དང་། སློབ་དཔོན་གང་བ་འཕེལ་དང་། རྒྱལ་པོའི་སྲས་གྲགས་པ་བཤེས་གཉེན་ལ་སོགས་པས་མཛོད། རང་འགྲེལ་ལ་འགྲེལ་བཤད་མཛད་དེ། ཐེག་པ་ཆུང་ངུའི་ལུགས་ཀྱི་མངོན་པ་ཤིན་ཏུ་དར་བར་མཛད་པ་ལ་མངོན་པ་འོག་མ་ཞེས་ཡོངས་སུ་གྲགས་པ་ཡིན། དབྱིག་གཉེན་གྱི་སློབ་མ་འདུལ་བ་རང་ལས་མཁས་པ་སློབ་དཔོན་ཡོན་ཏན་འོད་ཀྱིས་འདུལ་བ་མདོ་རྩ་བ་དང་། ཀརྨྨ་ཤ་ཏཾ་ལ་སོགས་པའི་བསྟན་བཅོས་མཛད། དེའི་སློབ་མ་ཤཱཀྱ་འོད་ཀྱི་འདུལ་བ་སུམ་བརྒྱ་པ་དང་། དེའི་རང་འགྲེལ་འོད་ལྡན་ལ་སོགས་པ་མཛད། ཡོན་ཏན་འོད་ཀྱི་སློབ་མ་བཤེས་གཉེན་རྣམ་པ་བཞིའི་ནང་ཚན་སློབ་དཔོན་ཆོས་ཀྱི་བཤེས་གཉེན་གྱིས་མདོ་རྩའི་འགྲེལ་པ་ཤིན་ཏུ་རྒྱས་པ་རྒྱ་ཆེར་འགྲེལ་མཛད། བཤེས་གཉེན་གཞན་གསུམ་གྱིས་ཀྱང་འགྲེལ་པ་རེ་མཛད་དེ་འཕགས་ཡུལ་ན་འདུལ་བའི་སྲོལ་ཤིན་ཏུ་དར་བར་བྱུང་། དབྱིག་གཉེན་གྱི་སློབ་མ་ཕར་ཕྱིན་རང་ལས་མཁས་པ་འཕགས་པ་རྣམ་གྲོལ་སྡེ་ནི་སློབ་དཔོན་ཆེན་པོ་དཀོན་མཆོག་འབངས་ཀྱི་དབོན་པོ་ས་གསུམ་པ་ལ་གནས་པའི་བྱང་ཆུབ་སེམས་དཔའ་ཡིན་ལ། དེས་ཤེར་ཕྱིན་གྱི་མདོའི་སྦས་དོན་མགོན་

༄༅།       །པོ་བྱམས་པས་མཛད་པའི་མངོན་པར་རྟོགས་པའི་རྒྱན་དང་། ཤེར་ཕྱིན་མདོ་གཉིས་ཀའི་འགྲེལ་པ་ཉི་ཁྲི་སྣང་བ་ཞེས་བྱ་བ་མཛད། དེའི་སློབ་མ་བཙུན་པ་རྣམ་གྲོལ་སྡེས་ཉི་ཁྲི་རྣམ་འགྲེལ་ཞེས་བྱ་བ་མཛད་ཅིང་། དེའི་རྗེས་སུ་སློབ་དཔོན་སེང་གེ་བཟང་པོས་མངོན་པར་རྟོགས་པའི་རྒྱན། ཉི་ཁྲི་དང་སྦྱར་བས་ཉི་ཁྲི་ལེ་བརྒྱད་མ། བརྒྱད་སྟོང་པ་དང་སྦྱར་བས་བརྒྱད་སྟོང་འགྲེལ་ཆེན། ཡུམ་རྒྱས་འབྲིང་བསྡུས་གསུམ་ཀ་དང་སྦྱར་བ་འགྲེལ་ཆུང་དོན་གསལ་ལ་སོགས་པ་མཛད་ནས་ཕར་ཕྱིན་ཐེག་པའི་བསྟན་པ་ཤིན་ཏུ་དར་ཞིང་རྒྱས་པར་མཛད། དབྱིག་གཉེན་གྱི་སློབ་མ་ཚད་མ་རང་ལས་མཁས་པ་སློབ་དཔོན་ཕྱོགས་ཀྱི་གླང་པོ་ནི། དུས་འཁོར་རྩ་རྒྱུད་ལས། ཕྱོགས་ཀྱི་གླང་པོ་གཞན་ལ་ཕན་པའི་བསམ་པ་ཅན་ནི་ཟླ་བ་པདྨའི་མྱུ་གུ་ཞེས། ཞེས་ལུང་བསྟན་ཞིང་། དེས་ཚད་མའི་བསྟན་བཅོས་ཐོར་བུ་བ་མང་དུ་མཛད་པ་ལས། ཕྱིས་རྗེ་བཙུན་འཇམ་པའི་དབྱངས་ཀྱིས་བསྐུལ་ནས་ཚད་མའི་མདོ་ཀུན་ལས་བཏུས་པ་རང་འགྲེལ་དང་བཅས་པ་མཛད། དེའི་སློབ་མ་དབང་ཕྱུག་སྡེ་ཡིན་ལ། དེའི་སློབ་མ་དཔལ་ལྡན་ཆོས་ཀྱི་གྲགས་པ་ནི། འཇམ་དཔལ་རྩ་རྒྱུད་ལས། ཡི་གེ་དྷ་ཞེས་སྡོམ་བརྩོན་ཉིད། །ལྷོ་ཡི་ཕྱོགས་སུ་རྣམ་པར་བསྒྲགས། །ཕ་རོལ་རྒོལ་བ་བཟློག་ནས་ནི། །དེ་བཞིན་སྡོམ་བརྩོན་སྔགས་ཀྱང་འགྲུབ༑ །ཅེས་དང་། མགོན་པོ་མངོན་བྱུང་གི་རྒྱུད་ལས། པཎྜིཏ་རྣམས་ཀྱི་གཙོ་བོར་གྱུར་པ་ཆོས་ཀྱི་གྲགས་པ་ཞེས་པར་གྱུར་པ་འདི་དང་། སྐྱེས་བུ་དྲུག་བསྟན་པ་ལ་ཕན་པ། ཚངས་པར་སྤྱོད་པ་ལ་གནས་པ་རྣམས་ཀྱིས་གྲུབ་པོ་ཞེས་ལུང་བསྟན་པ་དེས་

ཚད་མའི་བསྟན་བཅོས་སྡེ་བདུན་ལེའུ་དང་པོའི་རང་འགྲེལ་དང་བཅས་པ་མཛད། དེའི་སློབ་མ་ལྷ་དབང་བློས་ལེའུ་ཕྱི་མ་གསུམ་གྱི་འགྲེལ་པ་མཛད་ཅིང་། དེའི་སློབ་མ་ཤཱཀ་བློ་དང་རྒྱན་མཁན་པོའམ་མཚན་དངོས་ཤེས་རབ་འབྱུང་གནས་སྦས་པ་ཞེས་གྲགས་པ་དང་༑ སློབ་དཔོན་ཆོས་མཆོག་དང་། སློབ་དཔོན་རྒྱལ་བ་ཅན་དང་། བྲམ་ཟེ་བདེ་བྱེད་དགའ་བ་ལ་སོགས་པ་རབ་ཏུ་མང་པོས་འགྲེལ་པ་འགྲེལ་བཤད་ལ་སོགས་པ་མཛད་ནས་ཚད་མ་རིག་པའི་བསྟན་པ་ཤིན་ཏུ་དར་བར་མཛད། འཕགས་ཡུལ་དུ་གསང་སྔགས་ཀྱི་བཤད་སྲོལ་ཇི་ལྟར་དར་བའི་ཚུལ་ནི། རྒྱ་གར་ལྷོ་ཕྱོགས་སུ་རྒྱལ་བ་བི་སུ་ཀ་ཝ་ཞེས་པ་ཉན་ཐོས་ཀྱི་ཐེག་པ་ལ་ཞུགས་པ་ཞིག་གིས་རྨི་ལམ་དུ་ཁྱོད་ཨུ་རྒྱན་དུ་སོང་ཞིག །ཚེ་འདིར་རྡོ་རྗེ་འཛིན་པ་ཐོབ་པར་འགྱུར་རོ། །ཞེས་ཟེར་བ་ཐོས་ཏེ་ཐེ་ཚོམ་མེད་པར་ཕྱིན་པས། ཨུ་རྒྱན་དུ་བུད་མེད་གཅིག་དང་ཕྲད། དེ་ལ་རྙེད་བཀུར་བྱས་པས་དེས་དབང་བསྐུར་བྱིན་གྱིས་བརླབས་ཏེ། གསང་བ་འདུས་པ་དང་། དེ་ཉིད་འདུས་པའི་རྒྱུད་གཉིས་བྱིན་པ་ཁྱེར་འོངས་ཏེ་ཡུལ་དབུས་སུ་དར་བར་མཛད་པ་དང་། ཀུ་ཀུ་རི་པས་མ་ཧཱ་མ་ཡའི་རྒྱུད་དང་། ལ་ལི་ཏ་བཛྲ་ཀྱི་རྡོ་རྗེ་འཇིགས་བྱེད་ཀྱི་རྒྱུད་ཨུ་རྒྱན་ནས་བླངས་ཏེ་ཡུལ་དབུས་སུ་དར་བར་བྱས་པ་དང་། ཀྱེ་རྡོ་རྗེའི་རྒྱུད་ནི་རྡོག་གཞུང་པའི་རྗེས་འབྲང་ཁ་ཅིག །ཀླུ་སྒྲུབ་གླན་པར་བརྫུས་ནས་ཨུ་རྒྱན་དུ་མཁའ་འགྲོ་མའི་ཕྱག་ནས་བརྐུས་པ་ཡིན་ནོ་ཞེས་ཟེར་བ་ནི་གཏམ་རྒྱུད་མ་དག་པ་ཡིན་ལ། དེས་ན་བིཪྺ་པ་དང་། ཌོམྦཱིཧེ་རུ་ཀས་སྤྱན་དྲངས་པའི་ལོ་རྒྱུས་གཉིས་འབྱུང་ཞིང་། གཉིས་ཀ་ལྟར་ཡང་འགལ་བ་མེད་པས་ཡུལ་དབུས་སུ་དར་བར་བྱས་པ་དང་། དུས་ཀྱི་འཁོར་ལོའི་

༄༅།       །རྒྱུད་ནི། སློབ་དཔོན་ཙི་ལུ་པ་ཤམྦྷ་ལར་བྱོན་པས་རིགས་ལྡན་གྱི་སྤྲུལ་པ་དང་མཇལ་ནས་དུས་ཀྱི་འཁོར་ལོའི་དབང་དང་རྒྱུད་ལ་སོགས་པ་གསན་ཏེ་ཡུལ་དབུས་སུ་དར་བར་མཛད་པ་སོགས་ཡིན་ཏེ། དེ་རྗེས་ཀླུ་ལས་གྱུར་པའི་དཔའ་བོ་དང་། །མཁའ་འགྲོ་རྣམས་ལས་བི་སུ་ཀལྤ་སོགས། །གྲུབ་པའི་སློབ་དཔོན་རྣམས་ཀྱིས་ལེགས་བླངས་ཏེ། །འཕགས་པའི་ཡུལ་དང་གངས་རིའི་ཁྲོད་འདིར་ཡང་། །སྐྱེས་མཆོག་རྣམས་ཀྱི་ཡོངས་སུ་དར་བར་མཛད། །ཅེས་གསུངས་པའི་ཕྱིར། སྒྲ་རིག་པ་ནི། སྔོན་སུམ་ཅུ་རྩ་གསུམ་གྱི་གནས་སུ་སརྦྦཛྙཱ་ན་དེ་ཝ་ཞེས་པ་ལྷ་ཐམས་ཅད་མཁྱེན་པ་ཞེས་གྲགས་པ་བྱུང་། དེས་སརྦ་ཛྙཱ་བྱ་ཀ་ར་ཎ་ཞེས་པའི་སྒྲའི་བསྟན་བཅོས་བྱས། དེའི་སློབ་མ་བརྒྱ་བྱིན་གྱིས་ཨིཎྜ་བྱ་ཀ་ར་ཎ་ཞེས་པའི་སྒྲའི་བསྟན་བཅོས་བྱས༑ དེའི་སློབ་མ་ཕུར་བུ་ལྷའི་བླ་མར་གྲགས་པ་དེ་སྒྲ་ལ་མཁས་པའི་ང་རྒྱལ་གྱིས་ཤིན་ཏུ་དྲེགས་པ་ན་བརྒྱ་བྱིན་གྱིས་ཕྱིས་རྒྱ་མཚོ་ལས་ཆུ་བུམ་པ་གང་བླངས། དེ་ལས་ཀུ་ཤའི་རྩེས་ཐིགས་པ་གཅིག་བླང་སྟེ། སྒྲ་ཡི་རིག་པ་མཐའ་ཡས་པ། །ཡོངས་སུ་རྫོགས་པ་རྒྱ་མཚོ་ཙམ། །དབང་པོས་ཤེས་པ་བུམ་ཆུ་ཙམ། །ཕུར་བུས་ཤེས་པ་ཐིགས་པ་ཙམ། །ཞེས་བརྗོད་པས། ཕུར་བུ་སྒྱིད་ལུག་པར་གྱུར་པ་ན། རང་གི་ཇི་ལྟར་ཤེས་པ་བཞིན་ལྷ་རྣམས་ལ་སྟོན་ཅིག་ཅེས་བསྒོས་པས། ཕུར་བུ་ན་རེ། ཚེས་བརྒྱད་སློབ་དཔོན་ངེས་པར་འཛོམས། །བཅུ་བཞི་ལ་ནི་སློབ་མ་འཛོམས། །གནམ་སྟོང་ལ་ནི་རིག་པ་འཛོམས། །ཚེས་གཅིག་ལ་ནི་ཐམས་ཅད་འཛོམས། །ཞེས་རང་བསྙེན་གནས་བསྲུང་བའི་དུས་བཞི་མ་གཏོགས་པ་དུས་ཐམས་ཅད་དུ་བཤད་

པས་ལྷའི་ཡུལ་དུ་དར་ཞིང་རྒྱས་ཏེ། ཕུར་བུ་ལ་ལྷའི་བླ་མ་ཞེས་འབོད་པར་བྱུང་། དེ་ནས་མི་ཡུལ་དུ་དར་ཚུལ་ནི། ལང་ཀར་གཤེགས་པ་ལས། སྒྲ་བྱེད་པ་ནི་པ་ཎིའོ། །ཞེས་དང་། འཇམ་དཔལ་རྩ་རྒྱུད་ལས། བྲམ་ཟེའི་ཁྱེའུ་པ་ཎི་ནི། །ངེས་པར་ཉན་ཐོས་བྱང་ཆུབ་ཏུ། །ང་ཡིས་ལུང་བསྟན་བྱས་པ་ཡིན། །འཇིག་རྟེན་དབང་ཕྱུག་བདག་ཉིད་ཆེ། །དེ་ཉིད་དེ་ཡིས་སྔགས་འགྲུབ་པོ། །ཞེས་ལུང་བསྟན་པ་བྲམ་ཟེའི་ཁྱིའུ་པ་ཎི་ཞེས་པ་དེས་སྒྲ་ཤེས་པར་འདོད་ནས་ལག་རིས་མཁན་ལ་ལག་པ་བསྟན་པས༑ སྒྲ་ཤེས་པའི་མཚན་མ་འདི་ལྟ་བུ་ཡིན་ཏེ་མི་འདུག་ཟེར་བས་ཚོན་གྱིས་མཚན་མ་བཅོས་པ་ན། བརྩོན་འགྲུས་འདི་ལྟ་བུ་ཡོད་ན་གང་ཡང་འགྲུབ་བོ་ཞེས་ཟེར། དེ་ནས་སྤྱན་རས་གཟིགས་དབང་ཕྱུག་བསྒྲུབས་པས་ཟླ་དྲུག་ན་ཞལ་མཐོང་སྟེ། ཅི་འདོད་གསུངས་པ་ན་སྒྲ་ཤེས་པར་འཚལ་ལོ་ཞེས་ཞུས་པས། ཡི་གེའི་བསྡུ་བ་ཅུང་ཟད་བསྟན་པ་ཙམ་གྱིས་སྒྲ་ལ་ཤིན་ཏུ་མཁས་པར་གྱུར་ཏེ་པ་ཎི་བྱ་ཀ་ར་ཎ་ཞེས་པ་སྒྲའི་བསྟན་བཅོས་ཤློ་ཀ་ཉིས་སྟོང་ཡོད་པ་ཞིག་མཛད། དེ་ལ་ཀླུའི་རྒྱལ་པོ་ནོར་རྒྱས་ཀྱི་བུས་མ་ཧཱ་བྷེ་ཤ་ཞེས་འགྲེལ་པ་ཤློ་ཀ་འབུམ་ཡོད་པ་ཞིག་མཛད། དེ་གཉིས་ཡུལ་དབུས་སུ་དར་བར་འགྱུར། ཀ་ཙན་གཉིས་ཞེས་གྲགས་པ་ནི། རྒྱལ་པོ་བདེ་སྤྱོད་བཟང་པོའི་ཞང་པོ་ཤྭ་ར་ཝརྨྨ་ཞེས་པས་གཞོན་ནུ་ཀིརྟི་ཀ་བསྒྲུབས་པས་ཞག་བདུན་ནས་གཞོན་ནུ་སྨིན་དྲུག་རྨ་བྱ་ལ་ཞོན་པ་མཐོང་ནས་ཅི་འདོད་ཟེར་བ་ན་སྒྲ་ཤེས་པར་འཚལ་ལོ་ཞེས་ཞུས་པས། ཀུན་བཤད་རྐང་པ་བཞིའི་བར་བསྟན་པ་ན་སྒྲ་ལ་ཤིན་ཏུ་མཁས་པར་གྱུར་ཏེ་འཚལ་ལོ་ཞེས་སྨྲས་པས། རྨ་བྱའི་བཞོན་པ་གྱེན་དུ་བསྐྱོད་ནས་མཇུག་སྒྲོ་ཁྲ་བུན་གྱིས་

༄༅།       །མཐོང་བ་ན་ཀ་ལཱ་པ་བཟོད་པར་གསོལ་ལོ་ཞེས་སྨྲས་ཏེ་ཡི་གེར་བཀོད་པ་ནི་ཀ་ལཱ་པ་ཡིན་ལ། དེ་ལ་དུརྒ་སེང་ཧས་འགྲེལ་པ་དུར་སེང་མཛད། བྲམ་ཟེ་གྲགས་འབྱོར་གྱིས་འགྲེལ་པ་སློབ་མ་ལ་ཕན་པ་མཛད། དེ་སོགས་འགྲེལ་པ་མང་དུ་བྱུང་སྟེ་ཡུལ་དབུས་སུ་ཤིན་ཏུ་དར་བར་གྱུར། ཙནྡྲ་པ་ནི་སློབ་མ་ཞིག་འདུལ་བའི་དོན་དུ་སློབ་དཔོན་ཙནྡྲ་གོ་མའི་མཛད་པ་ཡིན་ལ། དེ་ལ་རང་གི་ཞང་པོ་དྷརྨྨ་དཱཥས་འགྲེལ་པ་སྟོང་ཕྲག་དྲུག་པ་དང་། སེང་གེ་བཟང་པོས་འགྲེལ་པ་སུ་བནྡུ་དང་། ཉི་མའི་སྙིང་པོའི་འགྲེལ་པ་གྲུབ་པ་སོགས་མང་དུ་འབྱུང་ཞིང་ཡུལ་དབུས་སུ་ཤིན་ཏུ་དར་བར་གྱུར་པ་ཡིན། སྒྲ་རིག་པའི་བྱེ་བྲག་རིག་པའི་གནས་ཆུང་བཞི་ནི། མངོན་བརྗོད་ཤེས་ན་མིང་ལ་མི་རྨོངས། སྡིབ་སྦྱོར་ཤེས་ན་ཚིགས་བཅད་ལ་མི་རྨོངས། སྙན་ངག་ཤེས་ན་ཚིག་རྒྱན་ལ་མི་རྨོངས། ཟློས་གར་ཤེས་ན་སྐད་རིགས་ལ་མི་རྨོངས་ཞེས་པ་བཞི་ཡིན་ལ། དེ་ཡང་མངོན་བརྗོད་ནི་ཆོས་རེ་རེ་ལ་མིང་གི་རྣམ་གྲངས་དུ་མ་ཡོད་པར་སྟོན་པ་སྟེ། སློབ་དཔོན་ཨ་མ་ར་ཀོ་ཥས་འཆི་མེད་མཛོད་ཅེས་པའི་བསྟན་བཅོས་མཛད་ཅིང་། དེ་ལ་སུ་བྷུ་ཏི་ཙནྡྲས་འགྲེལ་པ་འདོད་འཇོ་ཞེས་པ་མཛད་པ་སོགས་དང་། སྡེབ་སྦྱོར་ནི་དྲང་སྲོང་སེར་སྐྱས་བྱས་པའི་རྩ་བའི་མདོ་དང་། དེའི་དཔེར་བརྗོད་རྒྱལ་བའི་ལྷས་མཛད་པ་དང་། ཁྱད་པར་དུ་འཕགས་པ་སྡེབ་སྦྱོར་རིན་ཆེན་འབྱུང་གནས་རང་འགྲེལ་དང་བཅས་པ་སློབ་དཔོན་ཤཱནྟི་པས་མཛད་པ་སོགས་ཀྱིས་སྟོན་པ་ཡིན་ལ། སྙན་ངག་ནི་སློབ་དཔོན་དཎྡིའམ་དབྱུག་པ་ཅན་གྱིས་མཛད་པ་མེ་ལོང་གི་བསྟན་བཅོས་ཉིད་དང་། དཔེར་བརྗོད་ནི་ཤར་པའི་ལམ་ལ་དཔག་བསམ་འཁྲི་ཤིང་དང་། ལྷོ་པའི་ལམ་ལ་དཔའ་

བོའི་སྐྱེས་རབས་སོ་བཞི་པ་སོགས་ཀྱིས་སྟོན་པ་ཡིན་ཞིང་། ཟློས་གར་ནི། སློབ་དཔོན་དགའ་བའི་ལྷས་མཛད་པའི་ཀླུ་ཀུན་ཏུ་དགའ་བའི་ཟློས་གར་དང་། སློབ་དཔོན་ཙནྡྲ་གོ་མིའི་མཛད་པའི་འཇིག་རྟེན་ཀུན་ཏུ་དགའ་བའི་ཟློས་གར་སོགས་ཀྱིས་སྟོན་པ་ཡིན་ནོ། །འོ་ན་རིག་པའི་གནས་ཆུང་ངུ་འདི་དག་ཕྱི་ནང་ཐུན་མོང་བ་ཡིན་པས་བསླབས་ཀྱང་སངས་རྒྱས་ཐོབ་པའི་རྒྱུར་མི་འགྱུར་རམ་སྙམ་ན་ཤིན་ཏུའང་འགྱུར་ཏེ། མགོན་པོ་བྱམས་པས། རིག་པའི་གནས་ལྔ་དག་ལ་མཁས་པར་མ་སྦྱངས་ན། ཞེས་སོགས་དང་། མདོ་དྲིན་ལན་བསབས་པ་ལས། དེ་བས་ན་བླ་ན་མེད་པའི་བྱང་ཆུབ་ཐོབ་པར་བྱ་བའི་ཕྱིར་རིག་པའི་དངོས་པོ་ལྔ་ལ་བསླབ་པར་བྱའོ། །ཞེས་དང་། མཁྱེན་རབ་ཀྱི་དབང་ཕྱུག་ས་སྐྱ་པཎྜི་ཏས། རང་བློ་ཤེས་བྱ་ཀུན་ལ་མ་སྦྱངས་ན། ཞེས་སོགས་མཐའ་ཡས་པ་གསུངས་པའི་ཕྱིར། འོ་ན་མདོ་དྲན་པ་ཉེར་གཞག་ལས། དེ་བས་ན་དགེ་སློང་གི་ཐོས་པ་ངན་པ་སྙན་ངག་སྡེབ་པར་མི་བྱའོ། །ཞེས་དང་། སྙན་ངག་གཙོ་བོར་བྱེད་པ་རྣམས་ལྷ་ཡུལ་གྱི་བྱ་གཞན་ལ་ཚིགས་བཅད་ཀྱི་བསྐུལ་ཞིང་རང་བག་མེད་དུ་སྡོད་པར་སྐྱེ་བར་བཤད་པ་དང་འགལ་ལོ་ཞེ་ན་མི་འགལ་ཏེ། དེ་ནི་འདོད་པའི་གཏམ་གྱི་སྙན་ངག་མི་བྱ་བ་ལ་དགོངས་པའི་ཕྱིར་ཏེ། མདོ་དེ་ཉིད་ལས། སངས་རྒྱས་ཆོས་དང་དགེ་འདུན་ལ་བསྟོད་པ་དང་བསྟན་པ་གསལ་བར་འགྱུར་བའི་ཕྱིར་སྙན་ངག་བྱའོ༑ །དེ་ལས་བླ་ན་མེད་པའི་བྱང་ཆུབ་ཐོབ་པར་འགྱུར་རོ། །ཞེས་དང་། མདོ་སྡེ་བསྐལ་བཟང་ལས། དེ་བཞིན་གཤེགས་པ་དུས་མཁྱེན་རྒྱལ་པོ་ནི། །སྙན་ངག་མཁན་དེ་བདེ་གཤེགས་རྩྭ་མཆོག་ལ། །ཚིགས་སུ་བཅད་པའི་དབྱངས་ཀྱིས་

༄༅།       །བསྟོད་ནས་ཀྱང་། །དང་པོ་བྱང་ཆུབ་ཏུ་ནི་སེམས་བསྐྱེད་དོ། །ཞེས་པ་དང་། འདུལ་བ་ལུང་ལས། སངས་རྒྱས་སྐར་རྒྱལ་ལ་ནི་ངས། །དེ་ཚེ་ཚིགས་བཅད་གཅིག་བསྟོད་པས། །བསྐལ་པ་དགུ་ནི་ཕྱིར་བསྙིལ་ཏོ། །ཞེས་དང་། མེ་ལོང་ལས། དེ་ལྟར་སྐྱོན་བྲལ་བསྐལ་བཟང་ལྡན་པ་ཡི། །སྙན་ངག་བཟང་པོ་དཀོན་མཆོག་རྣམ་གསུམ་གྱིས། །ཡོན་ཏན་ཚུལ་བཞིན་རབ་ཏུ་བསྔགས་བྱས་ན། །གྲགས་དང་འབྱོར་དང་རྒྱལ་མཆོག་ཐོབ་པར་འགྱུར། །ཞེས་གསུངས་པའི་ཕྱིར། དེར་མ་ཟད་སྙན་ངག་གི་རྩོམ་པ་ཁོ་ནས་ཡི་དམ་གྱི་ལྷ་འགྲུབ་ཅིང་ཞལ་མཐོང་བ་ཡང་ཡོད་དེ། མེ་ལོང་ལས། ཐོས་དང་འབད་པ་དག་གི་ངག་བསྟན་ནས། །ཅི་ཞིག་ལྟར་ན་ངེས་པར་རྗེས་འཛིན་བྱེད། །ཅེས་དང་། མཁྱེན་རབ་ཀྱི་དབང་ཕྱུག་ས་སྐྱ་པཎྜི་ཏས། སྡེབ་སྦྱོར་གྱི་གཙུག་ལག་དང་མཐུན་པར་རྩོམ་ཤེས་ན། རྩོམ་པ་ཁོ་ནས་ལྷག་པའི་ལྷའི་ཞལ་མཐོང་བར་འགྱུར་བ་ཡང་ཡོད་དོ། །ཅེས་གསུངས་པའི་ཕྱིར་དང་། སློབ་དཔོན་ཟླ་བ་གྲགས་པས། སློབ་དཔོན་ཙནྡྲ་གོ་མི་སེར་འཕྲེང་གིས་བསུས་པ་ན། ཙནྡྲ་གོ་མི་རང་གི་མདུན་དུ་འཇམ་པའི་དབྱངས་ཀྱི་སྐུ་ཞིག་ཤིང་རྟའི་འཁོར་ལོས་འདྲེན་དུ་བཅུག །དེ་ལ་སྙན་ངག་གི་བསྟོད་པ་མཛད་ཅིང་ཕེབས་པ་ན་སྐུ་གཟུགས་དེས་མཇིང་པ་ཡོན་མཛད་ནས་གསན་ཏེ། ང་ལ་དེ་འདྲའི་ཡོན་ཏན་རང་འདུག་གམ་ཞེས་གསུང་བྱོན་ཞིང་། དེ་ལ་འཇམ་དབྱངས་མཇིང་ཡོན་དུ་གྲགས་པའི་གཏམ་རྒྱུད་ཚད་མ་རླུང་ལྟར་གྲགས། སློབ་དཔོན་ཙནྡྲ་གོ་མི་རྒྱལ་པོའི་ཆད་པས་ཡན་ལག་ལྕགས་སྒྲོག་གིས་བཅིངས་ཏེ་ཆུ་བོ་གངྒཱ་ལ་བསྐྱུར་བའི་ཚེ་སློབ་དཔོན་

གྱི་སྒྲོལ་མ་ལ་སྙན་ངག་གི་སྒོ་ནས་བསྟོད་པས། སྒྲོལ་མས་གསན་ཅིང་ཆུ་བོའི་དབུས་སུ་གླིང་སྤྲུལ་པ་ལ་ཙནྡྲིའི་གླིང་དུ་གྲགས་པའི་གཏམ་རྒྱུད་ཚད་མ་ཡང་ཡོད་པའི་ཕྱིར། དོན་འདི་ལ་དགོངས་ནས་སློབ་དཔོན་ཉི་མ་སྦས་པས་འཇིགས་པ་བརྒྱད་སྐྱོབས་ཀྱི་བསྟོད་པར༑ ཙནྡྲ་གོ་མི་འཕགས་པའི་དགེ་བསྙེན་མཆོག །རྒྱལ་པོའི་ཆད་པས་གངྒཱའི་ཆུ་ལ་བསྐྱུར། །གུས་ལྡན་ཞེ་སར་བཅས་པའི་སྡེབ་སྦྱོར་གྱིས། །འཛུམ་ཞལ་དགའ་མས་སིང་གའི་གླིང་ལ་བཞག །ཅེས་གསུངས་པའི་ཕྱིར། བཟོ་རིག་པ་ལ་རྣམ་པར་མ་གྱུར་པ་སེམས་ཀྱི་བཟོ་ནི་སེམས་བཟང་ངན་གྱི་དབང་ལས་འཁོར་འདས་ཀྱི་བདེ་སྡུག་འགྲུབ་པ་ལྟ་བུ་དང་། བརྗོད་པ་སྒྲའི་བཟོ་ནི་སྒྲ་དང་སྙན་ངག་དང་དབྱངས་ལ་སོགས་ངག་གི་འགྱུར་བ་ལ་བྱ་དགོས་ཤིང་། རྣམ་པར་གྱུར་པ་དབྱིབས་ཀྱི་བཟོ་ནི་བྱེད་པ་པོ་དང་མ་འབྲེལ་བ་ནི་འཇིག་རྟེན་ཆགས་པ་སོགས་ཡིན་ལ། བྱེད་པ་པོ་དང་འབྲེལ་བ་ནི་རིག་པའི་གནས་ལྔའི་ནང་ཚན་གྱི་བཟོ་ལྟ་བུ་ལ་འཇོག་པ་ཡིན། དེའི་གཙོ་བོ་ཡང་སྐུ་གསུང་ཐུགས་ཀྱི་རྟེན་བཞེངས་པ་ཉིད་ཡིན་ལ། དེའི་ཡང་ཐོག་མར་བྱུང་བ་ནི་རི་མོའི་གཟུགས་དག་ཡིན་ཏེ། སྔོན་རྒྱལ་པོ་འཇིགས་ཐུལ་གྱིས་རྒྱལ་སྲིད་ཆོས་བཞིན་དུ་བསྐྱངས་པས་མི་རྣམས་ཚེ་ལོ་འབུམ་དུ་འཕེལ་ཞིང་ཤིན་ཏུ་བདེ་ཞིང་སྐྱིད་པར་གྱུར་པའི་ཚེ། བྲམ་ཟེ་ཞིག་གི་བུ་གཞོན་ནུ་གཅེས་པ་ཞིག་གློ་བུར་དུ་ཤི་བས། བྲམ་ཟེས་རྒྱལ་པོ་ལ་ཁྱོད་ཀྱི་རྒྱལ་སྲིད་ཆོས་བཞིན་དུ་མ་བསྐྱངས་པ་འདྲ་སྟེ། ཁྱོད་ཀྱི་འབངས་ལ་དུས་མིན་གྱི་འཆི་བ་བྱུང་ནས་བདག་གི་བུ་འཕྲོགས་སོ། །བུ་སླར་མ་བཙལ་ན་བདག་འདི་ཁར་ལྕེབ་བོ་ཞེས་སྨྲས་པས། རྒྱལ་པོས་བྲམ་

༄༅།       །ཟེ་ཁྲིད་དེ་གཤིན་རྗེའི་རྒྱལ་པོ་ཉི་མ་ལྟར་འབར་བའི་དྲུང་དུ་ཕྱིན་ཏེ། བྲམ་ཟེའི་བུ་བཙལ་དུ་གསོལ་ཞེས་ཞུས་པས། གཤིན་རྗེའི་རྒྱལ་པོས་ངས་མ་ལན། རང་རང་གི་ལས་སུ་ཟད་དོ་ཞེས་སྨྲས་པ་ན། རྒྱལ་པོ་ཁྲོས་ཏེ། གཤིན་རྗེའི་རྒྱལ་པོ་དང་གཡུལ་ཐུག་པ་ན་འཇིག་རྟེན་ཐམས་ཅད་བསྔངས་པར་གྱུར་པའི་ཚེ། ཚངས་པ་བྱོན་ནས་གཤིན་རྗེས་མ་ཉེས། སོ་སོའི་ལས་སུ་ཟད་དོ། །འོན་ཀྱང་བྲམ་ཟེའི་བུ་རི་མོར་བྲིས་ཤིག་ཅེས་བསྒོ་བ་ལྟར་བྲིས་པས་ཚངས་པས་གསོལ་ཏེ་བྲམ་ཟེ་ལ་གཏད། སླར་རྒྱལ་པོས་ཚངས་པའི་འཇིག་རྟེན་དུ་བྱོན་ཏེ་རི་མོ་འབྲི་ཚུལ་ཞུས་པས། རི་ཡི་མཆོག་ནི་རི་རབ་ཡིན། །སྒོ་ང་ལས་སྐྱེས་རྣམས་ཀྱི་ནི། །གཙོ་བོ་ནམ་མཁའ་ལྡིང་ཡིན་ནོ། །མི་ཡི་གཙོ་བོ་ས་བདག་སྟེ། །དེ་བཞིན་རི་མོ་སྒྱུ་རྩལ་གཙོ། །ཞེས་དང་། རྒྱལ་པོ་དེ་བཞིན་སྒྱུ་རྩལ་ཀུན། །རི་མོའི་ལས་ལ་ཡང་དག་བསྟན། །ཞེས་བཟོའི་བསྔགས་པ་བརྗོད་ནས་བི་ཤྭ་ཀརྨས་སྟོན་པར་ལུང་བསྟན་ཅིང་། དེས་འཁོར་ལོས་བསྒྱུར་བའི་ཚད་གཙོ་བོར་བྱས་ཏེ་ཚད་དང་མི་ལྡན་པའི་ཉེས་པ། །ལྡན་པའི་ཕན་ཡོན་སོགས་བསྟན་ཅིང་། །ལུས་ལ་མཛེས་པ་མ་ཚང་ན། །ཚད་དག་གི་ནི་ཅི་ཞིག་བྱ། །ཞེས་མཛེས་དགོས་པར་ཡང་བསྟན་པ་སོགས་རི་མོའི་མཚན་ཉིད་ཚང་བའི་ཚད་ཡིག་ཅེས་བྱ་བ་དྲང་སྲོང་ཨེ་ཏྲེའི་བུས་སྦྱར་བ་ལས་འབྱུང་ཞིང་། གཞན་ཡང་དུས་ཀྱི་འཁོར་ལོ་དང་། བདེ་མཆོག་སྡོམ་འབྱུང་སོགས་དུ་མ་ལས་འབྱུང་བ་ཡིན། ཐུབ་པའི་བསྟན་པ་འདི་ལ་ཡང་སྐུའི་རྟེན་རི་མོར་བྲིས་པ་ཐོག་མར་བྱུང་བ་ཡིན་སྟེ། འདུལ་བ་ལུང་ལས། དེ་

བཞིན་གཤེགས་པ་བཞུགས་པའི་དུས་སུ་ཡུལ་སྒྲ་སྒྲོགས་ཀྱི་རྒྱལ་པོ་ཨུ་ཏྲ་ཡ་ན་དང་། ཡུལ་དབུས་ཀྱི་རྒྱལ་པོ་གཟུགས་ཅན་སྙིང་པོ་གཉིས་མ་མཐོང་མ་འཕྲད་པའི་གྲོགས་པོ་བྱས་ནས་སྐྱེས་བསྐུར་རེས་བྱས་པ་ན། རྒྱལ་པོ་ཨུ་ཏྲ་ཡ་ནས་རིན་པོ་ཆེའི་ཁྲབ་རིན་གྱི་གཞལ་དུ་མེད་པ་ཞིག་བསྐུར་བ་ན་མ་གདྷཱའི་རྒྱལ་པོ་གཟུགས་ཅན་སྙིང་པོས་དེའི་སྐྱེས་ལན་དུ་འོས་པ་མ་རྙེད་པར་སེམས་ཤིན་ཏུ་ཞུམ་པར་གྱུར་ནས། བཅོམ་ལྡན་འདས་ལ་གསོལ་པ། བཅོམ་ལྡན་འདས་ཀྱི་དེ་བཞིན་གཤེགས་པའི་སྐུ་རི་མོར་བྲིས་པ་དང་། བཀའི་ཚིགས་སུ་བཅད་པ་དང་བཅས་པ་བྲིས་ལ་སྐུར་ཞིག །ཅེས་གསུངས་པ་ལྟར་བཟོ་བོ་རྣམས་ཀྱིས་བཅོམ་ལྡན་འདས་ཀྱི་སྐུ་ལ་བལྟ་ཞིང་འདྲི་བར་བརྩམས་པ་ན། སྐུ་ཉི་མའི་འོད་ལྟར་འབར་བས་འདྲི་མ་ནུས་པར་བཅོམ་ལྡན་འདས་ཁྲུས་ཀྱི་རྫིང་བུའི་སྟེང་དུ་བཞུགས། དེའི་གཟུགས་བརྙན་རྫིང་བུར་ཤར་བ་ལྟར་བྲིས་པ་ལ་ཐུབ་པ་ཆུ་ལོན་མར་གྲགས་པ་དེ་དང་། རྟེན་འབྲེལ་བཅུ་གཉིས་ལུགས་འབྱུང་ལུགས་བཟློག་གི་ཚིགས་བཅད། དཀོན་མཆོག་གསུམ་ལ་སྐྱབས་སུ་འགྲོ་བའི་ཚིགས་བཅད་དང་། བསླབ་པའི་བཞི་ལྔའི་ཚིགས་བཅད་དང་། དེ་དག་གི་ཕན་ཡོན་དང་བཅས་པ་བྲིས་ཏེ་གསེར་གྱི་ཟ་མ་ཏོག་ཏུ་བཅུག་ནས་གླང་པོ་ཆེ་ལ་བཀལ་ཏེ་བསྐུར། འདི་འཇིག་རྟེན་གསུམ་ལས་འདས་པའི་སྐྱེས་ཡིན་པས་རྒྱལ་པོ་ཁྱོད་དཔུང་གི་ཚོགས་ཡན་ལག་བཞི་དང་བཅས་པས་གདུགས་དང་རྒྱལ་མཚན་དང་མེ་ཏོག་དང་བདུག་སྤོས་ལ་སོགས་པའི་མཆོད་པ་དང་བཅས་ཏེ་བསུས། གོ་སྐབས་ཡངས་པར་སེང་གེའི་ཁྲིའི་སྟེང་དུ་བཞུགས་སུ་གསོལ་

༄༅།       །ཏེ་དད་ཅིང་གུས་པའི་སྒོ་ནས་ཞལ་ཕྱེ་ཞིག་ཅེས་པའི་སྤྲིང་ཡིག་དང་བཅས་པ་བརྫངས། སྒྲ་སྒྲོགས་ཀྱི་རྒྱལ་པོས་ཀྱང་དེ་བཞིན་དུ་བྱས་ཏེ་ཞལ་ཕྱེ་བ་ན། ཚོང་པ་རྣམས་ཀྱི་མགྲིན་གཅིག་ཏུ་སངས་རྒྱས་ལ་ཕྱག་འཚལ་ལོ་ཞེས་བརྗོད་པ་ཐོས་པས་བ་སྤུ་ཐམས་ཅད་གྱེན་དུ་ལངས་ཤིང་མཆི་མ་རང་དབང་མེད་པར་གཡོས། ཚིགས་བཅད་རྣམས་བཀླགས་པས་སྐྱབས་གསུམ་འཛིན་པའི་དགེ་བསྙེན་དུ་གྱུར་ཏེ་བདེན་པ་མཐོང་བར་བཤད་པ་དང་། ཡང་སྟོན་པས་ཆོས་གསུངས་པའི་ཚེ་ཤཱཀྱའི་མིང་ཅན་གྱི་ཆུང་མས་མུ་ཏིག་གི་དོ་ཤལ་ཁྱིམ་དུ་ལུས་པ་བྲན་མོ་ལེན་དུ་གཏང་བ་ན་བྲན་མོའི་བསམས་པ་ལ་འདི་ལྟ་བུའི་ཆོས་ཟབ་མོ་ཉན་པའི་དབང་མེད་པར་འགྲོ་དགོས་པ་ཤིན་ཏུ་སྐལ་པ་དམན་སྙམ་པའི་ཚེ། སྟོན་པས་དེའི་བསམས་པ་མཁྱེན་ནས་ཆོས་ཚིགས་སུ་བཅད་པ་ཅིག་བྲིས་ཏེ་གནང་བ་འདོན་ཞིང་ཕྱིན་པ་ན་ལམ་དུ་བ་དྲུས་མ་ཞིག་གིས་བརྡུངས་ཏེ་ཤི། དེ་མ་ཐག་སིང་ག་གླིང་གི་རྒྱལ་པོའི་བུ་མོར་སྐྱེས། སྐྱེས་མ་ཐག་ཏུ་ཡུལ་དེར་མུ་ཏིག་གི་ཆར་བབས་པས་མུ་ཏིག་ཅན་ནམ་མུ་ཏིག་གི་འཁྲི་ཤིང་ཅན་དུ་བཏགས། དེ་ནས་རེ་ཞིག་ན་ཡུལ་དབུས་ཀྱི་ཚོང་པ་མང་པོས་སིང་གའི་གླིང་དུ་ཕྱིན། སངས་རྒྱས་ཀྱི་བཀའ་ཚིགས་སུ་བཅད་པ་འགའ་ཞིག་སྟོན་པ་དང་བུ་མོའི་ཡིད་འཕྲོགས་ཏེ། བཟང་པོའི་གླུ་དེ་ད་དུང་ལོངས་ཤིག་ཟེར་བ་ན་ཚོང་པ་རྣམས་ཀྱི་འདི་གླུ་མིན་སངས་རྒྱས་ཀྱི་བཀའ་ཡིན་ཞེས་བཤད་པ་ན་བུ་མོ་མུ་ཏིག་ཅན་སངས་རྒྱས་ཀྱི་མཚན་ཐོས་པ་ཙམ་གྱིས་ལུས་ཀྱི་བ་སྤུ་ལྡངས། མིག་མཆི་མས་གང་བཞིན་དུ་སངས་རྒྱས་ཞེས་བྱ་བ་ཅི་འདྲ་ཞིག་ཡོད་ཅེས་དྲིས་པ་ན། ཚོང་པ་རྣམས་ཀྱི་ཅི་ནུས་ཀྱི་ཡོན་ཏན་བརྗོད་པས་བུ་མོ་ཤིན་

ཏུ་དད་པར་གྱུར་ཏེ། དེ་བཞིན་གཤེགས་པ་ལ། བདག་འཁོར་བའི་གནས་ལས་དྲང་དུ་གསོལ་ཞེས་པའི་ཕྲིན་ཡིག་ཕུལ་བ་སྟོན་པས་བཞེས་ཏེ། དེའི་ལན་དུ་རས་ཀྱི་ངོས་ལ་འོད་ཟེར་བཏང་བ་ལྟར་རིག་བྱེད་པ་དག་གི་བྲིས་ཏེ་བཀའི་ཚིགས་བཅད་འགའ་དང་བཅས་པ་བཀུར་བ་མཐོང་བའི་མོད་ལ་བུ་མོས་བདེན་པ་མཐོང་སྟེ་ཡུལ་དེའི་མི་ཀུན་བསྟན་པའི་སྒོར་བཙུད། དྲིན་ལན་དུ་དཀོན་མཆོག་གསུམ་ལ་མུ་ཏིག་མཆོག་མ་གདྷཱའི་བྲེ་རེ་རེ་ཕུལ། སྐུ་དེ་ལ་ཐུབ་པ་འོད་ཟེར་མར་གྲགས་ཏེ་སྐུ་གཟུགས་ཀྱི་ཐོག་མ་ཡིན། འབུར་སྐུའི་ཐོག་མ་ནི་བཅོམ་ལྡན་འདས་མ་གཤེགས་པར་དགེ་འདུན་གདུགས་ཚོད་ལ་སྤྱན་དྲངས་པའི་ཚེ་གྲལ་གྱི་དབུས་མི་བརྗིད་པར་མཐོང་ནས་ཁྱིམ་བདག་མགོན་མེད་ཟས་སྦྱིན་གྱིས་སྟོན་པ་ལ་བདག་གི་སྟོན་པའི་སྐུ་རིན་པོ་ཆེ་ལས་གྲུབ་པ་ཞིག་བཞེངས་ནས་དགེ་འདུན་གྱི་གྲལ་གྱི་ཐོག་མར་བཞུགས་སུ་གསོལ་ན་རུང་ངམ་ཞེས་ཞུས་པ་ན། སྟོན་པས་སྣང་སྟེ་མགོན་མེད་ཟས་སྦྱིན་གྱི་གླང་པོ་ཆེ་མཆོག་ལ་ཞོན་གདུགས་དང་རྒྱལ་མཚན་དང་རོལ་མོའི་སྒྲ་དང་བཅས་ཏེ་དབུལ་པོའི་སྲང་ལ་སོགས་པ་གྲོང་ཁྱེར་ཀུན་ཏུ་ཞུགས་ནས་འགྲོ་བ་ཀུན་ལ་དམིགས་པའི་ལྷག་པའི་བསམ་པ་བཟང་པོས་དེ་བཞིན་གཤེགས་པའི་སྐུ་གཟུགས་ཀྱི་རྒྱུ་བླངས་ཏེ་རྒྱལ་བའི་སྐུ་གཟུགས་མང་དུ་བཞེངས་པ་རྣམས་ཡིན། གསུང་རྟེན་གྱི་ཐོག་མར་ནི། འཁོར་ལོ་བར་པའི་ཚེ་བརྒྱ་བྱིན་གྱི་གསེར་གྱི་གླེགས་བུ་ལ་བཻ་ཌཱུཪྱའི་ཞུན་མས་ཤེས་རབ་ཀྱི་ཕ་རོལ་ཏུ་ཕྱིན་པའི་མདོ་བྲིས་ཏེ་ལྷའི་གནས་སུ་མཆོད་ཅིང་བཀུར་སྟི་བྱས་པར་གསུངས་པ་དང་། རྒྱལ་མཚན་རྩེ་མོའི་དཔུང་རྒྱན་སོགས་གཟུངས་མང་པོ་གླེགས་བམ་དུ་བྱས་ཏེ་རྒྱལ་

༄༅།       །མཚན་གྱི་རྩེར་བཏགས་པས་ལྷ་མ་ཡིན་གྱི་གཡུལ་ལས་རྒྱལ་བར་གསུངས་པ་དང་། ཁྱིམ་བདག་གོང་ཏ་ཤི་བའི་ཡོ་བྱད་རྣམས་དགེ་འདུན་ལ་ཕུལ་བ་བཞེས་པའི་ཚེ་སྟོན་པས་རྒྱལ་བའི་བཀའི་གླེགས་བམ་འཚོང་དུ་མི་སྣང་། མུ་སྟེགས་བྱེད་ཀྱི་གཞུང་འཚོང་དུ་གནང་བར་གསུངས་པས་བཀའ་བསྡུ་གསུམ་པའི་སྔོན་དུ་ཡང་རྒྱལ་བའི་བཀའ་ཡི་གེར་བྲིས་པ་ཡོད་པར་བཤད་པ་རྣམས་ཡིན་ལ། དེ་ནས་སྟོན་པས་ཐབས་ལ་མཁས་པ་རྣམ་པ་སྣ་ཚོགས་ཀྱི་སྒོ་ནས་གང་ལ་གང་འདུལ་གྱི་གཟུགས་ཀྱིས་འཇིག་རྟེན་ལ་ཕན་པ་བསམ་གྱིས་མི་ཁྱབ་པ་ཞིག་མཛད་པ་ཡིན་པར་ཡང་ངེས་དགོས་ཏེ། མཁྱེན་རབ་ཀྱི་དབང་ཕྱུག་ས་སྐྱ་པཎྜི་ཏས། ཐབས་མཆོག་དག་གིས་ལེགས་སྒྲུབ་པའི། །ཆོས་ཕྱིར་གཟིགས་པའི་ཡེ་ཤེས་སྤྱན༑ །ཁྱོད་ཀྱི་ཕྲིན་ལས་མངོན་བསམ་ན། །བསམ་མི་ཁྱབ་པ་འདི་ལྟར་སྣང་། །ཆོས་ཀྱི་དབྱིངས་ཀྱི་ཕོ་བྲང་དུ། །སངས་རྒྱས་རྣམས་ལ་ཆོས་སྐུར་སྣང་། །སྟུག་པོ་བཀོད་པའི་ཞིང་ཁམས་སུ། །རྒྱལ་སྲས་མཆོག་ལ་ལོངས་སྐུར་བསྟན། །འཇིག་རྟེན་ཁམས་ནི་མཐའ་ཡས་སུ། །འགྲོ་ལ་སྤྲུལ་པ་སྣ་ཚོགས་འགྱེད། །སྐྱེ་བའི་སྤྲུལ་པ་དགའ་ལྡན་དུ། །ལྷ་རྣམས་གདུལ་བ་བྱ་ཕྱིར་བཞུགས། །མཆོག་གི་སྤྲུལ་པ་སྣ་ཚོགས་པ། །གདུལ་དཀའ་འགའ་ཞིག་འདུལ་བའི་ཕྱིར། །རི་རབ་རི་ཡི་རྩེ་མོ་རུ། །སྤྲུལ་པའི་དཀྱིལ་འཁོར་ཆེན་པོ་དེར། །དབང་བསྐུར་མཛད་ནས་རྣམ་པར་བཏུལ། །བདུད་ཀྱི་དཀྱིལ་འཁོར་འདུལ་བའི་ཕྱིར། །རྡོ་རྗེ་ལྷ་མོའི་ཚོགས་ཀྱིས་བསྐོར། །ཞེས་དང་། མི་ཡི་འགྲོ་བ་འདུལ་བའི་ཕྱིར། །གཞོན་ནུ་རོལ་རྩེད་སྣ་

ཚོགས་མཛད། །དཀའ་ཐུབ་དགའ་བ་སུན་དབྱུང་ཕྱིར། ཁྱོད་ཀྱི་ལོ་དྲུག་དཀའ་བ་སྤྱད། །རྒྱལ་པོ་ཟས་གཙང་སྔོན་རབས་ཀྱི། །མགུ་མཛད་ཁམས་དྲུག་བཤིག་ནས་བཏུལ། །རྒྱལ་པོ་ཆེན་པོ་པི་ལིནྡ། །འཁོར་ལོས་བསྒྱུར་བའི་གཟུགས་ཀྱིས་བཏུལ། །རྒྱལ་པོ་ཨུ་ཏྲ་ཡ་ན་ནི། །ཁྱོད་སྐུ་རི་མོས་བྲིས་པས་བཏུལ། །འཇམ་པའི་དབྱངས་ཀྱི་ཆོ་འཕྲུལ་གྱིས། །ལྷ་དང་བཅས་པའི་བདུད་ཀྱི་སྡེ། །བཏུལ་ནས་ཆོས་དབྱིངས་སྒྲོལ་བར་མཛད། །རྒྱལ་པོ་མ་སྐྱེས་དགྲ་ཡི་སྡིག །རས་ཡུག་ཆེན་པོས་བསྡམས་པས་སྦྱངས། །ཞེས་དང་། ཕྱག་ན་རྡོ་རྗེ་སྟོབས་ཆེན་གྱིས། །དབང་ཕྱུག་ཆེན་པོ་བསད་ནས་བཏུལ། །བདུད་ཀྱི་དཔུང་རྣམས་བསྡིགས་ནས་བཏུལ། །ལྷ་མོ་ནམ་གྲུ་བསྟོད་པས་བཏུལ། །སྤྱན་རས་གཟིགས་ཀྱི་ཐུགས་རྗེ་དང་། །རིགས་སྔགས་སྦྱོར་བའི་ཆོ་ག་དང་། །རིལ་བུ་སྨན་གྱི་སྦྱོར་བ་ཡིས། །སྡུག་བསྔལ་ཅན་རྣམས་ལེགས་པར་གསོས། །ཞེས་དང་། མཉན་ཡོད་ལ་སོགས་གདུལ་དཀའ་བ། །འདུལ་ཕྱིར་ཤཱ་རིའི་བུ་ལ་སོགས། །ཉན་ཐོས་ཆེན་པོ་བསྔགས་པ་མཛད། །རིགས་དང་བྱ་ཕྱིར་འཆར་ཀ་དང་། །ཡུལ་གཞན་རྒྱལ་པོ་འདུལ་བའི་ཕྱིར། །འཕགས་པ་ཀ་ཏ་ཡ་ན་སོགས། །གང་ལ་གང་གིས་འདུལ་གྱུར་པ། །དེ་འདྲའི་ཚུལ་གྱིས་ཐམས་ཅད་བཏུལ། །དེ་ལྟའི་ཕྲིན་ལས་བསམ་ཡས་པ། །མཐོང་ངམ་ཐོས་པར་གྱུར་ན་ཡང་། །སུ་ཞིག་ངོ་མཚར་སྐྱེ་མི་འགྱུར། །ཞེས་གསུངས་པའི་ཕྱིར།

གསོ་བ་རིག་པའི་བྱུང་ཚུལ་ལ་ཕྱི་རོལ་མུ་སྟེགས་བྱེད་ཀྱི་ལུགས་ནི། སྙན་ཚིག །མཆོད་སྦྱིན། སྲིད་སྲུང་། ངེས་བརྗོད་དེ་རིག་བྱེད་བཞི་བསླབ་པ་བརྡའ་སྤྲད་དོ།

༄༅།       །སྡེབ་སྦྱོར་སྐར་རྩིས། ཐོས་པ་རྟོག་པ་སྟེ་ཡན་ལག་དྲུག །དྲན་པ་དང་ཆོས་ཏེ་ཉེ་བའི་ཡན་ལག་གཉིས་རྣམས་ཚང་པའི་ཞལ་བཞི་ལས་བྱུང་བར་འཆད་དོ། །རིག་བྱེད་ཀྱི་བསྟན་བཅོས་ལས། གང་ཕྱིར་ཚངས་པ་ཡི་ནི་ཞལ། །དབུས་མ་ནས་ནི་ཚེའི་རིག་བྱེད། །ཅེས་སོགས་བཤད་པའི་ཕྱིར། ནང་པ་སངས་རྒྱས་པའི་ལུགས་ནི་སྔོན་ལྷ་ཆེན་པོ་རྣམས་ཀྱིས་རྒྱ་མཚོ་བསྲུབས་པ་ལས་བདུད་རྩི་བུམ་པ་གང་བྱུང་བ་དེ་བགོ་བར་བརྩམས་ནས་སྒྲ་གཅན་ན་གཞོན་པས་ལག་བདེ་བར་བསྐོས་ཏེ་བུམ་པ་གཏད་པས། སྒྲ་གཅན་གྱིས་བསམས་པ་ལ་འདི་ནི་རྙེད་པར་དཀའ་བས་རང་གིས་འཐུང་ནས་བྲོས་པ་ལེགས་སྙམ་སྟེ་དེ་བཞིན་བྱས་པས། ཚངས་པ་ལ་སོགས་པའི་ལྷ་ཆེན་པོ་རྣམས་ཀྱིས་ཕྱི་བཞིན་བསྙེགས་ཏེ་ཁྱབ་འཇུག་གི་འཁོར་ལོ་འཕངས་པས་སྒྲ་གཅན་གྱི་མགྲིན་པ་ལ་ཕོག་སྟེ་མགྲིན་པ་བཅད་པ་ན་ཁོ་ཁྲོས་ཏེ་འཁོར་ལོ་དམ་བཅའ་བཞི་ལྡན་ཕྱིར་འཕངས་པ་ཚངས་པའི་མཁུར་ཚོས་ལ་ཕོག་པའི་ཚེ་ཚངས་པ་ཚེ་ལ་དབང་བས་འཆི་བར་ཡང་མ་ནུས། འཁོར་ལོ་དམ་བཅའ་དང་ལྡན་པས་འཚོ་བ་ཡང་མ་ནུས་པའི་སྐབས་སུ། སངས་རྒྱས་ཀྱི་བྱིན་རླབས་ཀྱིས་རང་གི་མཁུར་ཚོས་ལས་ཨོཾ་ཨ་ཐ་ཞེས་པའི་སྒྲ་བྱུང་བ་ན་སྔོན་སངས་རྒྱས་ལས་གསོ་དཔྱད་འབུམ་པ་ཐོས་པ་དྲན་ཏེ་གསོ་བའི་ལས་ལ་སྦྱར་བས་བདེ་བར་གྱུར་པས་ན། སངས་རྒྱས་ཀྱི་ཐུགས་རྗེ་ལས་བྱུང་བ་ཡིན་ཞེས་འཆད་པ་ཡིན་ཏེ། ཡན་ལག་བརྒྱད་པ་ལས། སྒྲ་གཅན་བདུད་རྩི་བརྐུས་པ་ལ། །ཁྱབ་འཇུག་གིས་ནི་རྐེ་བཅད་པས། །ཞེས་དང་། ཚངས་པས་ཚེ་ཡི་རིག་བྱེད་དྲན། །ཞེས་དང་། ཡི་གེ་ཨོཾ་དང་ཨ་ཐའི་སྒྲ། །གཉིས་པོ་

འདི་དག་སྔོན་ཚངས་པའི། །མཁུར་ཚོས་རྡོལ་ཏེ་མངོན་པར་བྱུང་། །དེས་ན་འདི་གཉིས་བཀྲ་ཤིས་ཡིན། །ཞེས་གསུངས་པའི་ཕྱིར། ཚངས་པས་སྐྱེ་དགུའི་བདག་པོ་ལ་བཤད། དེས་ཐ་སྐར་གྱི་བུ་གཉིས་ལ་བཤད། དེས་བརྒྱ་བྱིན་ལ་བཤད། དེས་ལྷའི་དྲང་སྲོང་རྒྱུན་ཤེས་སོགས་གཙུག་ཕུད་ཅན་བདུན་ལ་བཤད། དྲང་སྲོང་རྒྱུན་ཤེས་ཀྱི་རང་གི་བུ་དྲུག་ལ་བཤད། དེ་ནས་དྲང་སྲོང་ལུག་ནག་འབར། །རྒྱ་སྐྱེགས་སྣ་ལ་སོགས་པས་གཞུང་མང་དུ་བྱས་ཏེ་ལྷ་ཡུལ་དུ་དར་བར་གྱུར། མི་ཡུལ་དུ་དར་ཚུལ་ནི་སྔོན་བཅུད་ཆགས་ནས་རིང་པོ་མ་ལོན་པ་ན་གཤེད་བུ་ཞིག་ས་ཞག་མ་ཞུ་བར་ན་སྟེ། སྨྲེ་སྔགས་འདོན་པ་ན་ཚངས་པ་འོངས་ཏེ་ཆུ་བསྐོལ་བཏང་བས་ཞི་སྟེ། ནད་པ་ལ་སྔ་བ་གཤེད་བུ། སྨན་པ་ལ་སྔ་བ་ཚངས་པ། སྨན་ལ་སྔ་བ་ཆུ་སྐོལ་ཞེས་གྲགས། འོ་ན་གསོ་བ་རིག་པ་ལ་བཤད་བྱའི་བཀའ་མེད་དམ་ཞེ་ན། སྨན་དཔྱད་ཁོ་ན་སྟོན་པའི་མདོ་རྒྱུད་མེད་ཀྱང་འདུལ་བ་ལུང་སྨན་གྱི་གཞི་ལས། དགེ་སློང་ནད་པས་སྨན་པ་ལ་དྲིས་ཏེ་བྱའོ། །ཞེས་དང་། སྨན་རྣམ་པ་བཞི་བསྟེན་ཚུལ་གསུངས་པ་རྣམས་དང་། གསེར་འོད་དམ་པའི་ནད་རབ་ཏུ་ཞི་བར་བྱ་བའི་ལེའུ་དང་། གསོ་དཔྱད་འབུམ་པ་དང་། དེ་བཞིན་གཤེགས་པ་བདུན་གྱི་སྨོན་ལམ་གྱི་ཁྱད་པར་རྒྱས་པའི་མདོ་ལས་དུས་མ་ཡིན་པར་འཆི་བ་དགུ་ཡོད་པ་ཁྱོད་ཀྱིས་དེ་བཞིན་གཤེགས་པ་ལས་མ་ཐོས་སམ། དེའི་ཕྱིར་སྨན་དང་སྔགས་ཀྱི་སྦྱོར་བ་རྣམས་བསྟན་ཏོ། །ཞེས་དང་། རྡོ་རྗེ་མཁའ་འགྲོའི་རྒྱུད་ལས། དེ་ནས་སེམས་ཅན་ཀུན་ཕན་ཕྱིར། །ཐམས་ཅད་སྙིང་པོར་བསྡུས་པ་ཡིན། །སྒྲུབ་པའི་སྦྱོར་བ་བདུད་རྩི་མཆོག །ཡང་དག་རབ་ཏུ་བཤད་པར་བྱ། །ག་བུར་དང་

༄༅།       །ནི་གུར་གུམ་དང་། ཞེས་སོགས་དང་། དུས་ཀྱི་འཁོར་ལོ་ལས། རླུང་འཇོམས་ལན་ཚྭ་སྐྱུར་བ་དག་ཏུ་རབ་ཏུ་འགྱུར་ཏེ། མངར་དང་བསྐ་བ་དག་ནི་མཁྲིས་པའི་དགྲ། ཞེས་སོགས་གསུངས་པ་རྣམས་ཡིན་ཏེ། སློབ་དཔོན་ཟླ་དགས། སྨན་གྱི་ལུང་དང་གསེར་འོད་དམ་པ་དང་། གསོ་དཔྱད་འབུམ་པ་ལ་སོགས་བཀའ་ཡིན་ཏེ། ཞེས་གསུངས་པའི་ཕྱིར། གཞན་ཡང་། རིན་ཆེན་སྤུངས་པར། རིག་གསུམ་མགོན་པོས་གསུངས་པའི་རྒྱུད་ལ་སོགས་པ་ཡོད་པར་བཤད། བསྟན་བཅོས་ནི་སློབ་དཔོན་ཀླུ་སྒྲུབ་ཀྱི་སྦྱོར་བ་བརྒྱད། འཚོ་བའི་མདོ་ཚིགས་སུ་བཅད་པ། རྩ་ཨ་ཝའི་ཆོ་ག །དངུལ་ཆུ་རིན་ཆེན་ཕྲེང་བ། གསེར་འགྱུར་སྦྱོར་བ་རྣམས་མཛད། བོད་སྔ་མ་ཁ་ཅིག །རེག་པ་རྩའི་མདོ། འཚོ་བ་ཟས་ཀྱི་མདོ། ཕན་པ་སྨན་གྱི་མདོ། གཏར་བསྲེག་དཔྱད་ཀྱི་མདོ། རྨ་ཆས་བཟོའི་མདོ་སྟེ་མདོ་ལྔ། བདུད་རྩི་སྙིང་པོ་སོགས་དཔྱད་གཞུང་བཅུ་དང་བཅས་པ་མཛད་ཟེར་ཡང་། དེ་དག་ལ་རྒྱ་གཞུང་གི་མཚན་ཉིད་ཅི་ཡང་མ་ཚང་བས་ཀླུ་སྒྲུབ་ཀྱི་མཛད་པ་མིན་པར་ངེས། སློབ་དཔོན་དཔའ་བོས་ཡན་ལག་བརྒྱད་པ་ཆེན་པོ། ཡན་ལག་བརྒྱད་པ་ལ་འཇུག་པ། དེའི་སྙིང་པོ་བསྡུས་པ་སོགས་མཛད། ཁྱད་པར་སྙིང་པོ་བསྡུས་པ་རྩོམ་པའི་ཚེ། ས་གསུམ་དགེ་ལེགས་འབྱུང་བ་ཡིས། །དགེ་བའི་ལྟས་ནི་སྣ་ཚོགས་འབྱུང་༑ ཞེས་བཤད་ཅིང་གཞུང་དེ་ལ་རང་འགྲེལ་ཡང་མཛད། ཁ་ཆེ་ཟླ་དགས་སྙིང་པོ་བསྡུས་པའི་འགྲེལ་པ་ཟླ་ཟེར་དང་། ཡན་ལག་བརྒྱད་པ་ཆུང་བ་ཡང་མཛད་ཟེར། འདི་སློབ་དཔོན་དཔའ་བོའི་སྲས་དང་དངོས་སློབ་ཏུ་འདོད་པ་ཡོད་ཀྱང་། དཔལ་

ཆེན་དགེ་བའི་སྲས་ཆགས་ལ་མངོན་དགའ་ཡིན་ཞིང་། དེའི་སྲས་ཟླ་དགའ་ཡིན་ལ། དེ་ཉིད་ཁ་ཆེའི་སྨན་པ་དོན་མཆོག་གི་དངོས་སློབ་ཡིན་པར་བཤད་དེ། ཟླ་ཟེར་ཉིད་ལས། བདག་གི་མེས་པོར་གྱུར་པ་ནི། །དཔལ་ཆེན་དགེ་བ་ཞེས་གྲགས་ཡིན༑ །དེ་ནི་ད་ལྟའང་ས་གསུམ་ན། །གྲགས་པ་དྲི་མེད་སྒྲོགས་པར་བྱེད། །དེ་སྲས་ཆགས་ལ་མངོན་པར་དགའ། །དེའི་བུ་ཟླ་བ་མངོན་དགའ་བདག །སློབ་དཔོན་བློ་གྲོས་ཆེན་པོ་ནི། །རྒྱུད་ཤེས་དོན་ལྡན་མིང་བཏགས་པ། །དོན་དམ་ཞེས་པ་སྨན་པའི་མཆོག །ཁ་ཆེའི་ཡུལ་དུ་སྐྱེས་པ་ཡིན། །ཞེས་གསུངས་པའི་ཕྱིར། དེ་ལ་སོགས་པ་འཕགས་པའི་ཡུལ་དུ་དར་ཞིང་རྒྱས་པར་བྱུང་། དེས་ན་འཕགས་ཡུལ་དུ་ཆོས་ཀྱི་རྒྱལ་པོ་ཙནྡྲ་བདུན། པཱ་ལ་བདུན། སེ་ན་བཞི་ལ་སོགས་པ་བྱུང་ཞིང་དེ་དག་གི་རིང་ལ་མཁས་པ་དང་གྲུབ་པའི་སློབ་དཔོན་གྲངས་མེད་པ་བྱོན་ཞིང་། དེ་དག་གིས་སངས་རྒྱས་ཀྱི་བསྟན་པ་ཆེས་ཆེར་གསལ་བར་མཛད་པ་ཡིན་ནོ། །