(༡. ཐེག་པ་གསུམ་གྱི་ཁམས་བརྟས་པ།)

དང་པོ་རྣམ་བཤད་རིགས་པར། དད་པས་མཉན་པ་གང་གིས་ན། །མཐོ་རིས་དགའ་བའི་བསོད་ནམས་དང་། །གང་གིས་མྱ་ངན་འདས་ཐོབ་པའི། །ཤེས་རབ་ས་བོན་རྟས་པར་འགྱུར། །ཞེས་པ་

དང་། ཁམས་བརྟས་བྱེད་དང་། ཞེས་པའི་འགྲེལ་པར། ཐོས་པ་ལས་བྱུང་བའི་ཤེས་རབ་ཀྱིས་ཡིད་ལ་བྱེད་པའི་ཁམས་བརྟས་པར་འགྱུར་རོ། །ཞེས་སོ། །དེ་ཐོས་པའི་ཕན་ཡོན་ཡིན་གྱི། བཤད་པའི་ཕན་ཡོན་དུ་མི་རིགས་ཏེ། ཐོས་པ་དང་བཤད་པ་ཐ་དད་དོ་སྙམ་ན། མ་ཡིན་ཏེ། ཀུན་ལས་བཏུས་སུ། འཛིན་པ་དང་ཁ་ཏོན་བྱེད་པ་དང་བཤད་པས་ཐོས་པ་ལས་བྱུང་བར་བལྟའོ། །ཞེས་གསུངས་སོ། །