༢. དོན་དུ་གཉེར་བའི་འདུན་པ།

གཉིས་པ་ནི། བྱང་ཆུབ་སེམས་དཔའི་སྡེ་སྣོད་ལས། །གང་གིས་སེམས་ཅན་དག་འགྱུར་བའི། །རྒྱུ་གཉིས་དང་ནི་རྐྱེན་གཉིས་ཏེ། །གཞན་ལ་རྗེས་སུ་མཐུན་སྒྲ་དང་། །ནང་དུ་ཚུལ་བཞིན་ལྟ་བའོ། །ཞེས་གསུངས་པས་ཕྱིའི་རྐྱེན་དགེ་བའི་བཤེས་གཉེན་བསྟེན་ཅིང་འཚོ་བའི་ཡོ་བྱད་བསགས་པ་དང་། ནང་གི་མཐུན་རྐྱེན་རྣ་བ་བླགས་ཏེ་མཉན་ཅིང་ཐོས་པའི་དོན་བསམ་པ་དང་མདོ་བསྟན་བཅོས་བལྟ་བ་དང་མཁས་པ་ལ་དྲི་བས་བསྐྱང་བར་བྱ་ཞིང་དེས་ཐོས་བྱུང་མཐར་ཕྱིན་པར་འགྱུར་ཞིང་དེ་ནས་བསམ་བསྒོམ་ལ་འབད་པར་བྱའོ། །རྣམ་བཤད་རིགས་པར། རྡོ་ཐལ་གྱི་རྡོ་མེས་བསྲེགས་ཆུས་འཇིག་པར་བྱེད་པ་དང་འདྲ་བར་ཉོན་མོངས་པའི་བག་ལ་ཉལ་གྱི་རྡོ་ཤེས་རབ་ཀྱི་མེས་ཡོངས་སུ་བསྲེགས་པས་ཏིང་ངེ་འཛིན་གྱི་ཆུས་ཡོངས་སུ་སྦངས་ན་འཇིག་གོ །ཤེས་རབ་དེའང་དམ་པའི་ཆོས་མཉན་པ་མེད་པར་ནི་མ་ཡིན་པས་དེ་ལྟ་བས་ན་གུས་པར་ཆོས་ཉན་པར་བྱའོ། །ཚིག་གི་ཁུར་ཐོགས་ཀྱང་དོན་མངོན་པར་མི་ཤེས་ན་དེའི་དོན་མི་འཐོབ་སྟེ་ཁྱེའུའི་མགུལ་དུ་གཏེར་གྱི་ཁ་ཆེམས་ཀྱི་ཡི་གེ་བཏགས་པ་དང་འདྲའོ། །དེ་ལྟ་བས་ན་མང་དུ་ཐོས་པས་ཀྱང་དོན་ཤེས་པ་ཉིད་དུ་བྱ་བའི་ཕྱིར་མདོ་སྡེའི་དོན་མཉན་པ་ལ་

༄༅།        །འབད་པ་དང་ལྡན་པར་བྱའོ། །མེལ་ཚེ་བ་སོ་སོར་མི་རྟོག་པ་ནི་མ་ཉལ་ཞེས་ཟེར་བཞིན་དུ་ཆོམ་པོ་རྣམས་ཀྱིས་བཅོམ་མོ། །དེ་བཞིན་དུ་སྒྲ་ཙམ་ལ་བརྩོན་པའི་མང་དུ་ཐོས་པ་སོ་སོར་མི་རྟོག་པ་ཡང་ཉོན་མོངས་པའི་དགྲ་རྣམས་ཀྱིས་འཇོམས་སོ། །སོ་སོར་རྟོག་པ་དེ་ཡང་དོན་ཤེས་པ་ཉིད་མེད་ན་མེད་པས་དེ་ལྟ་བས་ན་དོན་གཟུང་བར་ནི་འབད་པ་དང་ལྡན་པར་བྱའོ། །དེ་བཞིན་དུ་རོལ་མོ་མཁན་རྐུན་པོས་འཇིགས་ནས་མི་ཉལ་བར་བྱ་བའི་ཕྱིར་གླུ་ལེན་བཞིན་དུ་བཅོམ་མོ། །ཞེས་བྱ་བ་ཡང་དཔེར་བརྗོད་པར་བྱའོ། །ཇི་ལྟར་ལོང་བ་མར་མེ་འཛིན་པ་ནི། གཞན་དག་ལ་ཕན་པར་འགྱུར་བ་དང་འདྲ་བར་དོན་མངོན་པར་མི་ཤེས་པའི་ཐོས་པ་འཛིན་པ་ཡང་དེ་ལྟ་བུ་ཡིན་པས་དེ་ལྟ་བས་ན་དོན་ཤེས་པ་ཉིད་དུ་བྱ་བའི་ཕྱིར་དོན་མཉན་པ་ལ་འབད་པར་བྱའོ་ཞེས་སོ། །