(༢. གསང་བ་བསམ་གྱི་མི་ཁྱབ་པ་ལ་སོགས་པའི་རྗེས་སུ་འབྲངས་ཏེ་སངས་རྒྱས་སྟོང་འབྱོན་ཚུལ།)

གཉིས་པ་ནི། སྔོན་བྱུང་བ་འདས་པའི་དུས་ན་བསྐལ་པ་མཛེས་པར་སྣང་བ་ལ་འཇིག་རྟེན་གྱི་ཁམས་རྣམ་པར་བརྒྱན་པ་ཞེས་བྱ་བར་སངས་རྒྱས་ཡོན་ཏན་མཐའ་ཡས་རིན་ཆེན་སྣ་ཚོགས་བཀོད་པའི་རྒྱལ་པོ་ཞེས་བྱ་བ་བྱུང་ངོ་། །དེའི་ཚེ་ཕོ་བྲང་རྣམ་པར་དག་པ་ཅན་དུ་གླིང་བཞི་ལ་དབང་བའི་འཁོར་ལོས་བསྒྱུར་བའི་རྒྱལ་པོ་ཡུལ་འཁོར་སྲུང་ཞེས་བྱ་བ་བཙུན་མོ་བདུན་འབུམ་དང་སྲས་སྟོང་དུ་ཚང་བ་ཡོད་དོ། །དེའི་ཚེ་རྒྱལ་པོ་དེས་སངས་རྒྱས་དགེ་སློང་གི་དགེ་འདུན་དང་བཅས་པ་ལ་ལོ་བྱེ་བ་ཚང་བར་བསྙེན་བཀུར་ཏེ། དགེ་སློང་རེ་རེ་ལའང་གཡོག་གསུམ་གསུམ་ཕུལ་ལོ། །དེའི་ཚེ་རྒྱལ་བུ་དེ་དག །སངས་རྒྱས་འབྱུང་བ་བརྒྱ་ལམ་རྙེད་པར་འགྱུར། །མིར་སྐྱེ་བ་ཡང་ཤིན་ཏུ་དཀའ་བ་རྙེད། །གྲོགས་པོ་གང་དག་དད་དང་ཆོས་ཉན་པ། །འདི་འདྲ་བསྐལ་པ་བརྒྱར་ཡང་རྙེད་པར་དཀའ། །ཞེས་པ་ལ་སོགས་པའི་ཚིགས་སུ་བཅད་པ་སྨྲ་ཞིང་ཙན་དན་སྦྲུལ་གྱི་སྙིང་པོའི་ཁང་པ་བརྩེགས་པའི་ནང་དུ་

རྒྱལ་པོ་སྲས་དང་བཙུན་མོར་བཅས་པ་ཞུགས་ཏེ་ནམཁའ་ལ་ཕྱིན་ཏེ་སངས་རྒྱས་ཀྱི་སྤྱན་སྔར་འཁོད་པ་དང་། བཅོམ་ལྡན་འདས་ཀྱིས་རྒྱལ་པོ་ཆེན་པོ། དད་པ་ནི་ཡོངས་སུ་མི་ཉམས་ཤིང་ཁྱད་པར་དུ་འགྲོ་བར་འགྱུར་བའོ། །ཞེས་པ་ལ་སོགས་པའི་ཆོས་བསྟན་པ་མཉན་ནས་རང་གི་ཁྱིམ་དུ་ཕྱིན་པ་དང་། ཟླ་བ་ཉ་ལ་བབས་པ་དང་བཙུན་མོ་མ་སྨད་པའི་པང་བར་ཁྱེའུ་ཆོས་སེམས་དང་། དཔེ་མེད་མའི་པང་བར་ཆོས་ཀྱི་བློ་གྲོས་གཉིས་རྫུས་ཏེ་བྱུང་ངོ་། །དེ་གཉིས་དང་བཅས་ཏེ་སངས་རྒྱས་ལ་ཆོས་མཉན་ནོ། །དེའི་ཚེ་རྒྱལ་པོ་འདི་སྙམ་དུ་རྒྱལ་བུ་འདི་དག་ཐམས་ཅད་བྱང་ཆུབ་ཏུ་ཞུགས་པ་ཤ་སྟག་ཡིན་ན་གང་ཐོག་མར་སངས་རྒྱ་བརྟག་པར་བྱའོ་སྙམ་སྟེ། གཞོན་ནུ་དེ་ཐམས་ཅད་ཀྱི་མིང་བྲིས་ནས་རིན་པོ་ཆེ་སྣ་བདུན་གྱི་བུམ་པར་བཅུག་སྟེ་ཞག་བདུན་དུ་མཆོད་པ་བྱས་ཏེ། བཙུན་མོའི་འཁོར་དང་སྲས་སྟོང་དང་གཞོན་ནུ་གཉིས་ཀྱི་མདུན་དུ་ནང་མིས་བུམ་པའི་ནང་ནས་མིང་རྣམས་ཕྱུང་ངོ་། །ཐོག་མར་གཞོན་ནུ་རྣམ་པར་དག་པའི་བློ་གྲོས་ཀྱི་མིང་བྱུང་བས་ས་གཡོས་ཤིང་རོལ་མོའི་སྒྲ་བྱུང་སྟེ། དེ་ནི་འཁོར་བ་འཇིག་གོ །དེ་ནས་གཞོན་ནུ་རྣམ་པར་རྒྱལ་བའི་སྡེ་གསེར་ཐུབ་བོ། །དབང་པོ་ཞི་བ་འོད་སྲུང་ངོ་། །དོན་ཐམས་ཅད་གྲུབ་པ་ནི་ཤཱཀྱ་ཐུབ་པའོ། །སྐ་རགས་ཅན་ནི་བྱམས་པའོ། །མཆོག་གི་བློ་གྲོས་ནི་སེང་གེའོ། །གློག་གི་ལྷ་ནི་ཏོག་ཅེས་བྱ་བའོ། །བཟང་པོ་ནི་མེ་ཏོག་དམ་པའོ། །འོད་ཀྱི་དཔལ་ནི་མེ་ཏོག་གོ །རྣམ་པར་སྣང་བའི་པད་མ་ནི་སྐར་རྒྱལ་ལོ། །དྲི་མ་མེད་པའི་འོད་ནི་སྤྱན་ལེགས་སོ། །རྡུལ་མེད་ནི་ལག་བཟང་ངོ་། །བློ་གྲོས་རྒྱལ་པོ་ནི་འོད་དོ། །དགེ་བ་བཀོད་པའི་རྒྱལ་པོ་ནི་སྐར་མ་ལ་དགའ་བའོ། །ཕྱོགས་འབྱོར་པ་ནི་མངོན་པར་འཕགས་པ་གཤེགས་པའོ། །རྣམ་པར་དག་པ་བཀོད་པའི་རྒྱལ་པོ་ནི་ཡོན་ཏན་མངའ་བའོ། །དཔལ་སྦས་ནི་ནོར་དཔལ་ལོ། །ལུས་ཤིན་ཏུ་རྣམ་པར་འབྱེད་པ་ནི་ཡེ་ཤེས་འབྱུང་གནས་སོ། །དྲག་ཤུལ་ཅན་ནི་རིན་ཕོ་ཆེའི་འབྱུང་གནས་སོ། །རིན་ཆེན་

༄༅།        །གྲགས་ནི་ཀུན་ཏུ་སྣང་བའོ། །དེ་བཞིན་དུ་རྒྱ་ཆེར་བྱས་ཏེ་བུ་སྟོང་གི་ནང་ནས་གཅིག་བཞག་པ་ཅོད་པན་བརྒྱན་པའི་བར་དུ་བྱུང་སྟེ། དེ་ནི་སངས་རྒྱས་ཡོན་ཏན་མཐའ་ཡས་གྲགས་པའོ། །དེ་ནས་ཐ་ཆུང་བློ་མཐའ་ཡས་ཀྱི་མིང་བྱུང་བ་དང་སྣག་གི་གཉེན་མཚམས་དང་སྤུན་རྣམས་ན་རེ། བདག་ཅག་གིས་སེམས་ཅན་ཐམས་ཅད་སྨིན་པར་བྱས་སངས་རྒྱས་ཀྱི་མཛད་པ་བྱས་པའི་འོག་ཏུ་ཁྱོད་ཀྱིས་ཅི་བྱར་ཡོད་ཅེས་སྤྱོས་པ་དང་། དེས་སྨྲས་པ། སངས་རྒྱས་ཆོས་རྣམས་འདི་དག་ནམ་མཁའ་མཚུངས་ཤིང་འདྲ། །བདག་གི་ཡིད་ལ་སེམས་ཅན་ཟད་པ་མེད་སྙམ་བགྱིད། །ཚུལ་ཁྲིམས་ཀྱིས་ནི་འདི་དག་སྨོན་ལམ་འདིར་དག་འགྱུར། །བདག་གི་སྨོན་ལམ་ཅི་འདྲར་ཐམས་ཅད་འདིར་གསོན་ཅིག །ཁྱེད་ཀྱི་ཚེ་ཚད་ཇི་ཙམ་པ་དང་བསྡོམས་པ་དག །ཚོགས་ཀྱི་རྒྱལ་པོ་ཇི་སྙེད་དེ་དག་ཀུན་བསྡོམས་པ། །ཐམས་ཅད་བསྡོམས་པ་དེ་སྙེད་བདག་གི་ཚེར་འགྱུར་ཏེ། །བདག་གི་དགེ་སློང་ཚོགས་ཀྱང་དེ་ཀུན་མ་ལུས་སྙེད་ཅེས་པ་ལ་སོགས་པ་སྨྲས་ཏེ། དེ་ནི་སྟོང་གི་ཐ་མ་པ་མོས་པ་ཞེས་བྱ་བར་འགྱུར་ཏེ་སངས་རྒྱས་དགུ་བརྒྱ་དགུ་བཅུ་གོ་དགུའི་ཚེ་ཚད་དང་ཉན་ཐོས་ཀྱི་དགེ་འདུན་ཇི་སྙེད་པ་དེ་སྙེད་དུ་འགྱུར་ཞིང་བདག་ཉིད་དེ་ལྟར་མོས་པས་མོས་པ་ཞེས་བྱ་བའོ། །དེ་ནས་རྒྱལ་བུ་སྟོང་གི་ཁྱེའུ་ཆོས་སེམས་དང་ཆོས་ཀྱི་བློ་གྲོས་ལ་ཁྱེད་གཉིས་སྨོན་ལམ་ཇི་ལྟར་འདེབས་ཞེས་དྲིས་པས། ཆོས་སེམས་ནི་ང་ཁྱེད་ཐམས་ཅད་ཀྱི་ལག་ན་རྡོ་རྗེར་གྱུར་ཏེ་ནང་ན་སྤྱོད་ཅིང་དེ་བཞིན་གཤེགས་པའི་གསང་བ་ཐམས་ཅད་ལས་ཕྱི་རོལ་ཏུ་མ་གྱུར་ལ་ཕྱི་ནང་གི་ཆོས་ཐམས་ཅད་ཉན་མོས་རྟོགས་པར་སྨོན་ལམ་བཏབ་སྟེ་དེ་ནི་ཕྱག་ན་རྡོ་རྗེ་སྟེ་སངས་རྒྱས་སྟོང་གི་བཀའ་སྡུད་པ་པོ་ཡིན་ཅིང་མ་འོངས་པ་ན་བསྐལ་པ་རྣམ་པར་སྦྱོང་བ་ཞེས་བྱ་བ་ལ་འཇིག་རྟེན་གྱི་ཁམས་ཀུན་ནས་ཡོངས་སུ་དག་པར་སངས་རྒྱས་རྡོ་རྗེས་རྣམ་པར་

གནོན་པར་ལུང་བསྟན་ནོ། །ཆོས་ཀྱི་བློ་གྲོས་ཀྱིས་ཁྱེད་ཐམས་ཅད་ལ་ཆོས་ཀྱི་འཁོར་ལོ་བསྐོར་བར་བསྐུལ་བར་གསོལ་བ་འདེབས་པར་སྨོན་ལམ་བཏབ་སྟེ་དེ་ནི་ཚངས་པ་གཙུག་ཕུད་ཅན་ནོ། །ཡུལ་འཁོར་སྲུང་ནི་མར་མེ་མཛད་དོ། །དེས་ན་སངས་རྒྱས་སྟོང་ཡིན་གྱི་སྟོང་རྩ་གཉིས་ཞེས་པ་དང་ཕྱག་རྡོར་མོས་པའོ་ཞེས་ཟེར་བ་ནི་བླུན་པོའི་ཁ་ལ་མ་རྒྱུག་ཅིག །འོ་ན་བསྐལ་པ་བཟང་པོ་ཞེས་བརྗོད་པ་ཅི་ཞེ་ན། འཇིག་རྟེན་འདི་ཆུས་འཇིག་པའི་ཚེ་མཚོ་ལས་གསེར་གྱི་པད་མ་སྟོང་བྱུང་བར་གྱུར་ཏེ། དེ་ལ་ལྷ་རྣམས་ཀྱིས་བརྟགས་པས་སངས་རྒྱས་སྟོང་འབྱུང་བའི་ལྟས་སུ་ཤེས་སྟེ་ཀྱེ་མ་བསྐལ་པ་འདི་ནི་བཟང་པོའོ། །ཞེས་བརྗོད་པས་བསྐལ་པ་བཟང་པོ་ཞེས་གྲགས་པར་གྱུར་ཏོ་ཞེས་སྙིང་རྗེ་ཆེན་པོ་པད་དཀར(ནི་སངས་རྒྱས་ཀྱི་ཞལ་ཆེམས་སོ། །)ལས་བཤད་ལ། ཡེ་ཤེས་རྒྱས་པའི་མདོ་ལས་བསྐལ་པ་བཟང་པོའི་མིང་བསྐལ་པ་པད་མ་སྟོང་མཐོང་ཞེས་བཏགས་པ་ཡོད་དོ། །དེ་ལ་སངས་རྒྱས་སྟོང་འབྱུང་བ་ལ་གནས་བསྐལ་གྱི་མར་འགྲིབ་ཀྱི་བརྒྱད་ཁྲི་པ་ནས་བརྒྱ་པའི་བར་ལ་འབྱུང་ངོ་། །བརྒྱད་ཁྲི་བས་སྔ་བར་མི་འབྱུང་སྟེ་སྐྱོ་བ་ཤས་ཆུང་བས་ཆོས་དོན་དུ་མི་གཉེར་བས་སོ། །བརྒྱ་པ་བས་ཕྱི་བར་མི་འབྱུང་སྟེ་ཚེ་དང་སེམས་ཅན་དང་ཉོན་མོངས་པ་དང་ལྟ་བ་དང་དུས་ཀྱི་སྙིགས་མ་ལྔ་བདོ་བས་སོ། །ཡར་འཕེལ་ལ་མི་འབྱུང་སྟེ་མི་དགེ་བ་ངང་གིས་སྤོང་ཞིང་དངོས་པོ་རྣམས་འཕེལ་བས་སྐྱོ་བ་མི་སྐྱེ་བས་སོ། །ཇི་སྐད་དུ།(མཛོད་ལས།) མར་ནི་བསྐལ་པ་འགྲིབ་པ་ཡི། །བརྒྱ་ཡི་བར་ལ་དེ་དག་འབྱུང་ཞེས་པས་སོ། །དེ་དག་ཀྱང་བསྐལ་པ་བཟང་པོ་འདིའི་རྣམ་གཞག་ལ་དགོངས་ཀྱི་ཐམས་ཅད་དུ་མི་བསམ་སྟེ་སྙིང་རྗེ་པད་མ་དཀར་པོར༏ འཇིག་རྟེན་གྱི་ཁམས་མཐེ་བོང་ཅན་ན་ཚེ་ལོ་བཅུ་པའི་དུས་སུ་མི་མཐེ་བོང་ཙམ་གྱི་ནང་དུ་སངས་རྒྱས་སྐར་མ་ལ་དགའ་བ་ཞེས་བྱ་བ་སྐུ་ཁྲུ་གང་སོར་བདུན་ཙམ་གྱི་ཚད་ཙམ་པ་ཡོད་པར་བཤད་ཅིང་བརྒྱད་ཁྲི་བས་སྔ་བའི་སངས་རྒྱས་

༄༅།        །མང་པོ་བཤད་པས་སོ། །འདིའི་ཚེ་ལོ་བཞི་ཁྲིའི་དུས་སུ་འཁོར་བ་འཇིག །སུམ་ཁྲིའི་དུས་སུ་གསེར་ཐུབ། ཉི་ཁྲིའི་དུས་སུ་འོད་སྲུང་། བརྒྱ་པའི་དུས་སུ་ཤཱཀྱ་ཐུབ་པ། བརྒྱད་ཁྲི་པའི་དུས་སུ་བྱམས་པ་འབྱུང་ངོ་། །མདོ་བསྐལ་བཟང་དུ་སངས་རྒྱས་རེ་རེའི་ཡུལ་དང་རིགས་དང་འོད་དང་ཡབ་དང་ཡུམ་དང་སྲས་དང་རིམ་གྲོ་པ་དང་ཤེས་རབ་ཅན་དང་རྫུ་འཕྲུལ་ཅན་གྱི་མཆོག་གཉིས་དང་འཁོར་འདུས་པ་དང་ཚེ་ཚད་དང་བསྟན་པ་གནས་པའི་ཚད་དང་སྐུ་གདུང་སྟེ་མཆོག་ཟུང་སོ་སོ་བགྲངས་པའི་དོན་བཅུ་གསུམ་བཅུ་གསུམ་གྱིས་བསྟན་ཅིང་། ཁ་ཅིག་གིས་གདུང་སྨོས་ཏེ་བཅུ་བཞིའོ། །འཁོར་འདུས་པའང་ཁ་ཅིག་ལ་རེ་རེ་དང་ཁ་ཅིག་ལ་མང་པོ་དང་སྐུ་གདུང་ལ་རྒྱས་པར་འགྱུར་བ་དང་རིལ་པོ་གཅིག་ཏུ་འདུག་པ་གཉིས་སོ། །སྟོན་པ་འདི་ལ་དཔེར་བརྗོད་ན། མཆོག་ཏུ་དགའ་བའི་རྒྱལ་པོ། ང་སྐྱེ་བའི་ཡུལ་ནི་སེར་སྐྱ་ཞེས་བྱའོ། །རིགས་ནི་རྒྱལ་རིགས་སོ། །གདུང་ནི་གོའུ་ཏ་མའོ། །འོད་ནི་འདོམ་གང་ངོ་། །ཡབ་ནི་ཟས་གཙང་མ་ཞེས་བྱའོ། །ཡུམ་ནི་སྒྱུ་འཕྲུལ་ཞེས་བྱའོ༏ ༏སྲས་ནི་སྒྲ་གཅན་འཛིན་ཞེས་བྱའོ། །རིམ་གྲོ་པ་ནི་ཀུན་དགའ་བོ་ཞེས་བྱའོ། །ཤེས་རབ་ཅན་རྣམས་ཀྱི་མཆོག་ནི་ཉེ་རྒྱལ་ཞེས་བྱའོ། །རྫུ་འཕྲུལ་ཅན་རྣམས་ཀྱི་མཆོག་ནི་པང་ནས་སྐྱེས་ཞེས་བྱའོ། །འདུས་པ་དང་པོ་ལ་ནི་དགེ་སློང་སྟོང་ཉིས་བརྒྱ་ལྔ་བཅུའོ། །སྐུ་ཚེའི་ཚད་ནི་ལོ་བརྒྱའོ། །དམ་པའི་ཆོས་ནི་ལོ་ལྔ་བརྒྱའི་བར་དུ་གནས་སོ། །ལོ་ལྔ་བརྒྱའི་བར་དུ་ནི་དམ་པའི་ཆོས་ལྟར་སྣང་ངོ་། །སྐུ་གདུང་ནི་རྒྱས་པར་འགྱུར་རོ། །ཞེས་གསུངས་སོ། །འོ་ན་སངས་རྒྱས་མོས་པ་འབྱོན་པའི་དུས་ན་མི་ཚེ་ལོ་དཔག་ཏུ་མེད་པ་ཐུབ་པར་བཤད་པ་དང་འགལ་ཏེ་མི་ཚེ་ལོ་བརྒྱད་ཁྲི་བས་སྔ་བར་མི་འབྱུང་བས་སོ་ཞེ་ན། བདེན་ཏེ་དེ་ནི་སངས་རྒྱས་ཀྱི་སྨོན་ལམ་གྱི་སྟོབས་ཡིན་པས་བསམ་གྱི་མི་ཁྱབ་བོ། །ཡང་སངས་རྒྱས་སྟོང་དུ་ངེས་ན་བརྒྱད་

སྟོང་པར་དགེ་སློང་ཁྲི་བསྐལ་པ་བཟང་པོ་འདི་ལ་མངོན་པར་རྫོགས་པར་སངས་རྒྱ་བར་བཤད་པ་དང་འགལ་ལོ་ཞེ་ན། བདེན་ཏེ་བསྐལ་པ་བཟང་པོ་ལ་སངས་རྒྱས་སྟོང་དུ་གྲགས་པས་དེ་གཙོ་བོར་སྨོས་ཀྱི་གཞན་མ་བཀག་གོ་ཞེས་འཕགས་པ་གྲོལ་སྡེ་གསུང་སྟེ། ཉི་ཁྲི་སྣང་བར་གྲངས་སྟོང་གི་ངེས་པ་ནི་འཇིག་རྟེན་གྱི་ཁམས་མི་མཇེད་དུ་བསྐལ་པ་བཟང་པོ་ལ་གྲངས་སྟོང་དུ་གྲགས་པ་འདི་ཉིད་ཀྱིས་ཐབས་ལ་མཁས་པས་གཞན་སྒྲུབ་པ་དང་དགག་པ་མེད་པར་ཤེས་པར་བྱ་བའི་དོན་དུ་ཡིན་ནོ། །ཞེས་གསུངས་སོ། །ཡང་ན་འཇིག་རྟེན་འདི་ཞིག་པའི་རྗེས་སུ་འདིར་ཆགས་པ་ལ་སངས་རྒྱ་བ་ལ་འདིར་སངས་རྒྱ་ཞེས་དགོངས་ཏེ་བསྐལ་པ་འཛིན་པ་ཞིག་པའི་ཤུལ་དུ་འདི་ཆགས་པ་ལ་འཇིག་རྟེན་གྱི་ཁམས་འདིར་བསྐལ་པ་ཆེན་པོ་འཛིན་པ་ཞེས་འབྱུང་བ་བཞིན་ནོ། །ཡང་ན་སྟོང་ངམ་སྟོང་དང་ལྔ་བཤད་པ་ནི་སངས་རྒྱས་མཛད་པ་བཅུ་གཉིས་འདིར་དངོས་སུ་སྟོན་པའི་དབང་དུ་བྱས་ལ། སངས་རྒྱས་མང་པོ་བཤད་པ་ནི་དེ་དག་བསྐལ་པ་བཟང་པོའི་རིང་ལ་བྱང་ཆུབ་འཐོབ་པའམ། ཡང་ན་སྤྲུལ་པའི་དབང་དུ་བྱས་པ་སྟེ་བྲམ་ཟེ་ཁྱེའུ་བླ་མ་ནས་སངས་རྒྱས་སུ་བཤད་པ་བཞིན་ནོ། །དེ་ལྟ་ནའང་བསྟན་པ་གཅིག་ལ་སྟོན་པ་གཉིས་སུ་མི་འགྱུར་ཏེ་སངས་རྒྱས་ཞེས་ཚུལ་བཟུང་ནས་ཆོས་མི་སྟོན་པས་སོ། །བསྐལ་པ་འདི་ལ་སྔར་སངས་རྒྱས་བཞི་ལས་མ་སོང་ན་དུས་ཀྱི་འཁོར་ལོ་ལས། བསྐལ་པ་བཟང་པོའི་སངས་རྒྱས་རྣམ་པར་གཟིགས་ལ་སོགས་པ་ཤཱཀྱ་ཐུབ་པའི་མཐར་ཐུག་པའི་དེ་བཞིན་གཤེགས་པ་བདུན་ཞེས་པ་དང་། འཇིག་རྟེན་ནའང་འདས་པའི་སངས་རྒྱས་རབས་བདུན་ཞེས་གྲགས་པ་དང་འགལ་ལོ་ཞེ་ན། སྐྱོན་མེད་དེ་ཞིང་འདིར་བྱུང་བའི་སངས་རྒྱས་ཡིན་ཅིང་འདས་པའང་ཡིན་པས་དེ་ཙམ་ལ་དགོངས་པར་ཟད་དོ། །ཡང་མདོ་ཐ་དད་ནས་སངས་རྒྱས་སྟོང་ལ་མཚན་མི་མཐུན་པ་ཏོག་ལ་རབ་གསལ་དང་། མོས་པ་ལ་སྣང་མཛད་དམ་གསལ་མཛད་ཅེས་

༄༅།        །འབྱུང་བ་ནི་མཚན་གྱི་རྣམ་གྲངས་ཡིན་ལ། འགའ་ཞིག་འགྱུར་ཁྱད་ཡིན་པས་ཐེ་ཚོམ་མི་བྱའོ། །