(༤. སེམས་བསྐྱེད་ཀྱི་དབྱེ་བ།)

བཞི་པ་ལ། ངོ་བོའི་སྒོ་ནས་ཕྱེ་ན་སྨོན་འཇུག་གཉིས། ཕྲ་རགས་ཀྱི་སྒོ་ནས་ཕྱེ་ན། བརྡ་དང་ཆོས་(བྱང་སེམས་སོ་སྐྱེ་)ཉིད་ཀྱིས་ཐོབ་པ་གཉིས། ཡུལ་གྱི་སྒོ་ནས་ཕྱེ་ན་ཀུན་རྫོབ་(སོ་སྐྱེ་)དང་དོན་དམ་(ྋའཕགས་པ།)གཉིས། ས་མཚམས་ཀྱིས་ཕྱེ་ན། སེམས་བསྐྱེད་དེ་ནི་ས་རྣམས་ལ། །མོས་དང་ལྷག་བསམ་དག་པ་དང་། །རྣམ་པར་སྨིན་པ་གཞན་དུ་འདོད། །དེ་བཞིན་སྒྲིབ་པ་སྤངས་པའོ། །ཞེས་པ་ལྟར་བཞི་དང་། གྲོགས་དང་དཔེས་ཕྱེ་བ་ཉི་ཤུ་རྩ་གཉིས་ཏེ། དེ་ཡང་ས་གསེར་ཟླ་བ་མེ། །ཞེས་པའམ། བསྐྱེད་པ་ས་དང་འདྲ་བར་འདོད། །ཅེས་པ་ལྟར་རོ། །བསྡུ་བ་རྣམ་པར་གཏན་ལ་དབབ་པར་ནི་བཅུ་གསུངས་ཏེ། སེམས་བསྐྱེད་པ་ནི་རྣམ་པ་བཅུ་སྟེ། འདི་ལྟ་སྟེ། ཡང་དག་པར་བླངས་པ་བརྡ་ལས་བྱུང་

༄༅།        །བ་དང་ཆོས་ཉིད་ཀྱིས་ཐོབ་པ་དང་། མ་ངེས་པ་དང་ངེས་པ་དང་ཡོངས་སུ་མ་དག་པ་དང་ཡོངས་སུ་དག་པ་དང་། སྟོབས་ཆུང་བ་དང་། སྟོབས་དང་ལྡན་པ་དང་། འབྲས་བུ་ཡོངས་སུ་མ་གྲུབ་པ་དང་། འབྲས་བུ་ཡོངས་སུ་གྲུབ་པའོ། །དེ་ལ་ཡང་དག་པར་བླངས་པ་བརྡ་ལས་བྱུང་པ་ནི་བྱང་ཆུབ་སེམས་དཔའ་ཡང་དག་པ་ཉིད་དུ་སྐྱོན་མེད་པ་ལ་མ་ཞུགས་པས་ཐམས་ཅད་ཀྱིའོ། །དེ་ལ་ཆོས་ཉིད་ཀྱིས་ཐོབ་པ་ནི་བྱང་ཆུབ་སེམས་དཔའ་ཡང་དག་པ་ཉིད་དུ་སྐྱོན་མེད་པ་ལ་ཞུགས་པ་རྣམས་དང་ཉན་ཐོས་བྱང་ཆུབ་ཏུ་ཡོངས་སུ་བསྔོས་པ་རྣམས་ཀྱིའོ། །མ་ངེས་པ་ནི་དེའི་རིགས་ཅན་མ་ཡིན་པ་རྣམས་དང་དེའི་རིགས་ཅན་སེམས་བསྐྱེད་པ་ལས་ཕྱིར་ལྡོག་པའི་ཆོས་ཅན་རྣམས་ཀྱི་གང་ཡིན་པའོ། །སེམས་བསྐྱེད་པ་ངེས་པ་ནི་དེ་ལས་ལྡོག་པ་ལས་རིག་པར་བྱའོ༏ ༏དེ་ལ་ཡོངས་སུ་མ་དག་པ་ནི་འདི་ལྟར་འདི་ན་ལ་ལ་གཞན་གྱི་རྗེས་སུ་ཞུགས་པའམ་རྒྱལ་བོས་འཇིགས་པའམ་རྐུན་པོས་འཇིགས་པའམ་འཛིན་ཁྲིས་འཇིགས་པའམ། ཆུ་ཀླུང་གིས་འཇིགས་པའམ་འཚོ་བའི་ཕྱིར་རམ་རྙེད་པ་དང་བཀུར་སྟིའི་ཕྱིར་རམ། ཁ་གསག་དང་གཞོགས་སློང་གི་ཕྱིར་ངེས་པར་མ་བརྟགས་ཡོངས་སུ་མ་བརྟགས་པར་གཟུ་ལུམ་དུ་སེམས་བསྐྱེད་པར་བྱེད་པ་དང་། དེ་ལྟ་བུ་དང་མཐུན་པར་སེམས་སྐྱེད་པར་བྱེད་པ་གང་ཡིན་པ་དེ་ནི་ཡོངས་སུ་མ་དག་པ་ཡིན་པར་རིག་པར་བྱའོ། །ཡོངས་སུ་དག་པ་ནི་དེ་ལས་ལྡོག་པ་ལས་རིག་པར་བྱའོ། །དེ་ལ་སྟོབས་ཆུང་བ་ནི་འདི་ལྟར་འདི་ན་བྱང་ཆུབ་སེམས་དཔའ་ལ་ལ་སེམས་བསྐྱེད་པ་ལས་འདོད་ཆགས་དང་ཞེ་སྡང་དང་གཏི་མུག་གི་ཀུན་ནས་དཀྲིས་པ་དག་གིས་ཟིལ་གྱིས་གནོན་པར་བྱེད་ཅིང་ཡང་དག་པའི་སྒྲུབ་པ་ལས་ཉམས་པར་བྱས་ནས་ལོག་པའི་སྒྲུབ་པ་ལ་ཀུན་ཏུ་སྦྱོར་བར་བྱེད་པའོ། །སྟོབས་དང་ལྡན་པ་ནི་དེ་ལས་ལྡོག་པ་ལས་རིག་པར་བྱའོ། །དེ་ལ་འབྲས་བུ་ཡོངས་སུ་མ་གྲུབ་པ་ནི་མོས་པས་སྤྱོད་པའི་ས་ནས་བཟུང་སྟེ་

ས་བཅུ་པའི་བར་གྱིའོ། །དེ་ལ་འབྲས་བུ་ཡོངས་སུ་གྲུབ་པ་ནི་དེ་བཞིན་གཤེགས་པའི་ས་ལས་ཏེ་བཅོམ་ལྡན་འདས་ཀྱིས་ང་ནི་དཀའ་བ་སྤྱོད་པ་དེ་ལས་ཐར་ཅིང་བདག་ཉིད་ཀྱི་ཡང་དག་པའི་སྨོན་ལམ་དང་བྱང་ཆུབ་དམ་པ་ཡང་ཐོབ་པ་ཡིན་ནོ། །ཞེས་ཇི་སྐད་དུ་གསུངས་པ་ལྟ་བུའོ་ཞེས་གསུངས་སོ། །