(༨. དབྱེ་བ།)

བརྒྱད་པ་ལ་དབྱེ་སྒོ་བཅུ་གཉིས་ཙམ་དུ་མཛད་དེ། དང་པོ་ཐེག་ཆེན་གྱི་ལུགས་ལ། ཐབས་ཤེས་རབ་གཉིས་ཏེ་མཚན་མར་འཛིན་པ་གཅོད་པས་ཤེས་རབ་དང་། དགེ་བའི་རྩ་བ་སྡུད་པས་ཐབས་སོ། །ག་ཡ་གོ་རིའི་མདོ་ལས། ཐབས་ནི་སྡུད་པ་ཤེས་པའོ། །ཤེས་རབ་ནི་གཅོད་པ་ཤེས་པའོ་ཞེས་སོ། །དེ་ཉིད་ཤེས་རབ་ཀྱིས་སྟོང་པ་ཉིད་ལ་དམིགས་ཤིང་རྟོགས། ཐབས་སྙིང་རྗེས་སེམས་ཅན་གྱི་དོན་བྱེད་པས་སྟོང་ཉིད་སྙིང་རྗེའི་སྙིང་པོ་ཅན་ཞེས་བཤད་དོ། །གཉིས་པ་ནི། ཕ་རོལ་ཏུ་ཕྱིན་པ་དྲུག་གིས་དགེ་ཆོས་ཐམས་ཅད་བསྡུས་ཤིང་སངས་རྒྱས་ཀྱི་ཆོས་ཡོངས་སུ་རྫོགས་པར་བྱེད་པ་ཡིན་ཏེ། དཀར་པོའི་ཆོས་ཀུན་རྣམ་པར་གཡེངས་པ་དང་། མཉམ་པར་བཞག་དང་གཉིས་ཀར་ཤེས་པར་བྱ། །ཕ་རོལ་ཕྱིན་པ་གཉིས་དང་གཉིས། །གཉིས་ཀྱིས་ཡོངས་སུ་བསྡུས་པ་ཡིན། །ཞེས་པ་དང་། ལོངས་སྤྱོད་མངོན་པར་མི་དགའ་དང་། །རབ་གུས་གཉིས་ལ་མི་སྐྱོ་དང་། །རྣལ་འབྱོར་རྣམ་པར་མི་རྟོག་པ། །ཐེག་ཆེན་མཐའ་དག་འདིར་ཟད་དོ། །ཞེས་ཐེག་ཆེན་ཐམས་ཅད་ཕྱིན་དྲུག་གིས་བསྡུས་པར་གསུངས་སོ། །འོ་ན་ཉན་རང་ལ་ཕྱིན་དྲུག་མེད་དམ་ཞེ་ན། མེད་དེ་ཐེག་བསྡུས་འགྲེལ་

༄༅།        །པར༏ བསེ་རུ་ལྟ་བུ་རྣམས་ལ་ནི། །ཕ་རོལ་ཕྱིན་དྲུག་མིང་ཡང་མེད། །བཅོམ་ལྡན་ཉག་གཅིག་ཕ་རོལ་ཕྱིན། །དྲུག་གི་སྤྱི་ལ་བཞུགས་པ་ལགས། །ཞེས་སོ། །འོ་ན་ཉན་ཐོས་ཀྱི་སྡེ་སྣོད་དུའང་ཕྱིན་དྲུག་ལ་སོགས་བྱང་ཆུབ་སེམས་དཔའི་སྤྱོད་པ་རྣམས་བསྟན་པས་བསལ་ཞེ་ན། དེ་ནི་ཅུང་ཟད་ཙམ་ཞིག་བསྟན་པ་ཡིན་གྱི་ཡོངས་སུ་རྫོགས་པ་ལྟ་ག་ལ་སྟེ། རིན་ཆེན་ཕྲེང་བར། ཉན་ཐོས་ཐེག་པ་དེ་ལས་ནི། །བྱང་ཆུབ་སེམས་དཔའི་སྨོན་ལམ་དང་། །སྤྱོད་པ་ཡོངས་བསྔོ་མ་བཤད་དེས། །བྱང་ཆུབ་སེམས་དཔར་ག་ལ་འགྱུར། །ཞེས་པ་དང་། མདོ་སྡེ་རྒྱན་ལས་ཀྱང་། མ་ཚང་བ་དང་འགལ་བ་དང་། །ཐབས་ནི་དེ་ལྟར་མ་བསྟན་ཕྱིར། །ཉན་ཐོས་ཀྱི་ནི་ཐེག་པ་འདི། །ཐེག་ཆེན་ཆོས་ཞེས་བྱ་བ་མིན། །ཞེས་པས་སོ། །གསུམ་པ་སའི་སྒོ་ནས་དབྱེ་བ་ནི། རིན་ཆེན་ཕྲེང་བར། ཇི་ལྟར་ཉན་ཐོས་ཐེག་པ་ལས། །ཉན་ཐོས་ས་ནི་བརྒྱད་བཤད་པ། །དེ་བཞིན་ཐེག་པ་ཆེན་པོ་ལ། །བྱང་ཆུབ་སེམས་དཔའི་ས་བཅུའོ། །ཞེས་པའམ། སྐྱབས་གསུམ་བདུན་ཅུ་པར། ཇི་ལྟར་དགྲ་བཅོམ་ཟད་ཡེ་ཤེས། །ས་བདུན་སྔོན་དུ་འགྲོ་བ་ཅན། །དེ་བཞིན་རྫོགས་སངས་རྒྱས་ཡེ་ཤེས། །ས་བཅུ་སྔོན་དུ་འགྲོ་བ་ཡིན། །ཞེས་པས་ཉན་ཐོས་ལ་དཀར་པོ་རྣམ་པར་མཐོང་བའི་ས་དང་། རིགས་ཀྱི་ས་དང་། བརྒྱད་པའི་ས་དང་། མཐོང་བའི་ས་དང་། བསྲབས་པའི་ས་དང་། འདོད་ཆགས་དང་བྲལ་བའི་ས་དང་། བྱས་པ་རྟོགས་པའི་ས་དང་། རང་སངས་རྒྱས་ཀྱི་ས་སྟེ་བརྒྱད་ཡོད་པ་ལྟར། ཐེག་ཆེན་ལ་རབ་ཏུ་དགའ་བ་ལ་སོགས་པའི་ས་བཅུ་རེ་རེ་ལ་ཕ་རོལ་ཏུ་ཕྱིན་པ་བཅུ་རེ་རེ་གཙོ་ཆེ་ལ་གཞན་ཕལ་བའི་ཚུལ་དུ་སྤྱོད་པས་དག་པར་བཤད་དོ། །དེ་སའི་གཙོ་བོ་ཡིན་གྱི་ཕལ་པ་ནི། དད་པའི་ས་ལ་གནས་པ་ཡིས། །ཞེས་པ་ལྟར་ཚོགས་ལམ་ལ་དད་པའི་ས་དང་། ས་ཐོབ་པ་ནི་མོས་པ་དང་། །ཞེས་པ་ལྟར། 

སྦྱོར་ལམ་མན་ཆད་མོས་སྤྱོད་ཀྱི་སའང་ཡོད་དོ། །ཡང་བྱང་སར་ས་བདུན་དུ་བཤད་པའང་ཡོད་དེ། རིགས་ཀྱི་ས་དང་། མོས་པས་སྤྱོད་པའི་ས་དང་། ལྷག་པའི་བསམ་པ་དག་པའི་ས་དང་། ངེས་པའི་ས་དང་། སྤྱོད་པའི་ས་དང་། སྤྱོད་པ་ངེས་པའི་ས་དང་། མཐར་ཐུག་པར་འགྲོ་བའི་སའོ། །བཞི་པ་བསྡུ་བ་བཞིར་དབྱེ་ན། རྒྱན་ནས། སྦྱིན་མཚུངས་དེ་སྟོན་ལེན་འཇུག་དང་། །བདག་ཉིད་རྗེས་སུ་འཇུག་རྣམས་ཀྱིས། །སྙན་པར་སྨྲ་དང་དོན་སྤྱོད་དང་། །དོན་མཐུན་ཉིད་དུ་འདོད་པ་ཡིན། །ཞེས་པས་སྦྱིན་པའི་ཕར་ཕྱིན་དང་མཚུངས་པའི་སྦྱིན་པ་དང་། གཞན་ལ་ཕྱིན་དྲུག་སྟོན་པའི་སྙན་པར་སྨྲ་བ་དང་། གཞན་དག་ཕྱིན་དྲུག་ལེན་དུ་འཇུག་པའི་དོན་སྤྱོད་པ་དང་། རང་ཉིད་ཀྱང་ཕྱིན་དྲུག་ལ་འཇུག་པ་དོན་མཐུན་པ་སྟེ་བསྡུ་བ་བཞིའོ། །ལྔ་པ་སྤྱོད་པ་བཞིར་དབྱེ་ན། རྒྱན་ལས། ལུས་ཅན་ཐེག་པ་ཆེན་པོ་དང་། །ཐེག་པ་དམན་ལ་མོས་པ་དང་། །གཉིས་ཀ་འདུན་པར་བྱ་བ་དང་། །གདུལ་བའི་ཕྱིར་ན་བརྟན་རྣམས་ཀྱི། །སྤྱོད་པ་བཞི་པོ་མདོ་བཞིན་དུ། །རྗེས་སུ་འབྲངས་ནས་བཤད་པ་ཡིན། །ཞེས་པས་ཐེག་ཆེན་ལ་མོས་པ་རྣམས་ཀྱི་ཕྱིར་ཕར་ཕྱིན་བཅུའི་ངོ་བོར་གྱུར་པ་ཕ་རོལ་ཏུ་ཕྱིན་པའི་སྤྱོད་པ། ཐེག་དམན་ལ་མོས་པ་རྣམས་ཀྱི་ཕྱིར་བྱང་ཕྱོགས་སོ་བདུན་གྱི་བདག་ཉིད་བྱང་ཆུབ་ཀྱི་ཕྱོགས་དང་མཐུན་པའི་སྤྱོད་པ། གཉིས་ཀ་ལ་མོས་པ་རྣམས་མཐུས་འདུན་པར་བྱ་བའི་ཕྱིར་མངོན་ཤེས་དྲུག་གི་རང་བཞིན་མངོན་ཤེས་ཀྱི་སྤྱོད་པ། ཐེག་པ་གསུམ་ཀའི་གདུལ་བྱ་སྨིན་པའི་ཕྱིར་གདུལ་བྱ་སྨིན་པའི་ཐབས་དཔག་ཏུ་མེད་པ་སྟོན་པ་སེམས་ཅན་ཡོངས་སུ་སྨིན་པའི་སྤྱོད་པ་སྟེ་བཞི་གཙུག་ན་རིན་ཆེན་གྱི་མདོ་བཞིན་དུ་བཤད་དོ། །བྱང་ས་ལས་ཀྱང་། བྱང་ཆུབ་སེམས་དཔའི་སྤྱོད་པ་འདི་བཞིས་ནི་བྱང་ཆུབ་སེམས་དཔའི་སྤྱོད་པ་ཐམས་ཅད་བསྡུས་པར་རིག་པར་བྱའོ་ཞེས་སོ། །དྲུག་པ་མི་ཟད་པ་བརྒྱད་ཅུར་དབྱེ་ན་དག་(ཉི་ཁྲིའི་འབྲེལ་བ་ཤཱནྟི་བས་མཛད་པ།)ལྡན་ལས། སེམས་

༄༅།        །བསྐྱེད་བསམ་སྦྱོར་ལྷག་བསམ་དང་། །ཕ་རོལ་ཕྱིན་དྲུག་ཚད་མེད་དག །མངོན་པར་ཤེས་དང་བསྡུ་དངོས་བཞི། །སོ་སོར་རིག་སྟོན་ཚོགས་གཉིས་དང་། །བྱང་ཆུབ་ཕྱོགས་མཐུན་ཞི་གནས་སོགས། །གཟུངས་སོགས་ཆོས་ཀྱི་མདོ་བཤད་དང་། །བགྲོད་གཅིག་ཐབས་ལ་མཁས་པའོ། །ཞེས་པས་སེམས་བསྐྱེད་པ་དང་། བསམ་པ་དང་། སྦྱོར་བ་དང་། ལྷག་པའི་བསམ་པ་དང་། ཕ་རོལ་ཏུ་ཕྱིན་པ་དྲུག་དང་། ཚད་མེད་པ་བཞི་དང་། མངོན་ཤེས་ལྔ་དང་། བསྡུ་བ་བཞི་དང་། སོ་སོ་ཡང་དག་པར་རིག་པ་བཞི་དང་། ཆོས་ལ་རྟོན་གྱི་གང་ཟག་ལ་མི་རྟོན། དོན་ལ་རྟོན་གྱི་ཚིག་འབྲུ་ལ་མི་རྟོན། ངེས་དོན་ལ་རྟོན་གྱི་དྲང་དོན་ལ་མི་རྟོན། ཡེ་ཤེས་ལ་རྟོན་གྱི་རྣམ་ཤེས་ལ་མི་རྟོན་བ་སྟེ་རྟོན་པ་བཞི་དང་། ཚོགས་གཉིས་དང་བྱང་ཆུབ་ཀྱི་ཕྱོགས་ཀྱི་ཆོས་སོ་བདུན་དང་། ཞི་གནས་ལྷག་མཐོང་གཉིས་དང་། གཟུངས་དང་སྤོབས་པ་གཉིས་དང་། འདུས་བྱས་ཐམས་ཅད་མི་རྟག་ཟག་བཅས་ཐམས་ཅད་སྡུག་བསྔལ་ཆོས་ཐམས་ཅད་བདག་མེད་མྱང་འདས་ཐམས་ཅད་ཞི་བ་སྟེ་ཆོས་ཀྱི་མདོ་བཞི་དང་། བགྲོད་པ་གཅིག་པ་དང་ཐམས་ལ་མཁས་པ་སྟེ་བརྒྱད་ཅུ་བློ་གྲོས་མི་ཟད་པ་བསྟན་པའི་མདོ་ལས་བཤད་ཅིང་། ཐུབ་པ་དགོངས་རྒྱན་དུ་དེ་དག་གིས་ཐེག་ཆེན་གྱི་ལམ་ཐམས་ཅད་བསྡུས་པར་ཡང་བཤད་དོ། །བདུན་བ་སེམས་བསྐྱེད་ཉི་ཤུ་རྩ་གཉིས་སུ་དབྱེ་ན་མངོན་རྟོགས་རྒྱན་ལས། དེ་ཡང་ས་གསེར་ཟླ་བ་མེ། །གཏེར་དང་རིན་ཆེན་འབྱུང་གནས་མཚོ། །རྡོ་རྗེ་རི་སྨན་བཤེས་གཉེན་དང་། །ཡིད་བཞིན་ནོར་བུ་ཉི་མ་གླུ། །རྒྱལ་པོ་མཛོད་དང་ལམ་པོ་ཆེ། །བཞོན་པ་བཀོད་མའི་ཆུ་དང་ནི། །སྒྲ་སྙན་ཆུ་བོ་སྤྲིན་རྣམས་ཀྱིས། །རྣམ་པ་ཉི་ཤུ་རྩ་གཉིས་སོ། །ཞེས་པ་ལ་དཔེ་དེ་དག་གིས་མཚོན་པའི་དོན་འཕགས་པ་རྣམ་གྲོལ་སྡེ་དང་སློབ་དཔོན་སེང་བཟང་ལྟར་ན་གྲོགས་འདུན་པ་དང་བསམ་པ་དང་ལྷག་པའི་བསམ་པ་

དང་སྦྱོར་བ་དང་ཕར་ཕྱིན་བཅུ་རེ་རེ་དང་མངོན་ཤེས་དྲུག་དང་ཚོགས་གཉིས་དང་བྱང་ཕྱོགས་སོ་བདུན་དང་སྙིང་རྗེ་ལྷག་མཐོང་དང་གཟུངས་སྤོབས་དང་ཆོས་ཀྱི་དགའ་སྟོན་དང་བགྲོད་གཅིག་ལམ་ལྡན་དང་ཆོས་ཀྱི་སྐུ་ལྡན་ཏེ་གྲོགས་དེ་དག་དང་ལྡན་པར་འདོད་ལ༏ མདོ་རྒྱན་གྱི་འགྲེལ་པ་དང་དག་ལྡན་དང་ཐུབ་དགོངས་སུ་མི་ཟད་པ་བརྒྱད་ཅུའི་ཕྱིན་དྲུག་རེ་རེར་བགྲངས་པ་གཞན་སྡེ་ཚན་རེ་བགྲངས་པ་དང་གོ་རིམ་བཞིན་སྦྱར་རོ། །དེ་ལྟ་བུའི་སེམས་སྐྱེད་ཉེར་གཉིས་ཀྱིས་ཐེག་ཆེན་གྱི་ལམ་འབྲས་བུ་དང་བཅས་པ་བསྡུས་པར་སློབ་དཔོན་སེང་གེ་བཟང་པོ་དང་འཇིགས་མེད་ལ་སོགས་པ་མང་པོས་བཞེད་ལ་ཁ་ཅིག་སློབ་ལམ་བསྡུས་པར་བཞེད་དོ། །བརྒྱད་པ་སྦྱོར་བ་བཞིར་དབྱེ་ན། རྣམ་ཀུན་མངོན་རྫོགས་དང་། རྩེ་མོའི་སྦྱོར་བ་དང་། མཐར་གྱིས་པའི་སྦྱོར་བ་དང་། སྐད་ཅིག་མའི་སྦྱོར་བའོ། །རྒྱུ་སྦྱོར་བ་བཞི་ཡི་བདག་ཉིད་དང་། །ཞེས་སོ། །ཡང་ན་གོ་ཆའི་སྒྲུབ་པ་འཇུག་པའི་སྒྲུབ་པ་ཚོགས་ཀྱི་སྒྲུབ་པ་ངེས་འབྱུང་སྒྲུབ་པ་སྟེ་སྒྲུབ་པ་བཞིའོ། །དགུ་པ་ཐེག་པ་ཐུན་མོང་གི་སྐད་དང་བསྟུན་ནས་ལམ་བཞིར་དབྱེ་ན་ཚོགས་ལམ་དང་སྦྱོར་ལམ་དང་མཐོང་ལམ་དང་སྒོམ་ལམ་སྟེ་བཞིའོ། །མཐར་ཕྱིན་པའི་ལམ་ནི་འབྲས་བུ་ཡིན་པས་མ་གཏོགས་སོ། །ཚོགས་སྦྱོར་གཉིས་ནི་དེ་ཁོ་ན་ཉིད་མོས་པས་སྤྱོད་པ་ཙམ་ཡིན་གྱི་མངོན་སུམ་དུ་མ་མཐོང་བས་མོས་པས་སྤྱོད་པའི་ས་ཡིན་ལ་མཐོང་ལམ་དང་འཇིག་རྟེན་ལས་འདས་པའི་སྒོམ་ལམ་གྱིས་དེ་ཉིད་མངོན་སུམ་དུ་མཐོང་བས་མངོན་པར་རྟོགས་པའོ། །དང་པོ་གཉིས་ནི་ཟག་བཅས་ཀུན་རྫོབ་ཤེས་པ་ཡིན་པས་ལམ་བདེན་དངོས་མིན་ནོ། །འོ་ན་བསྡུ་བར། ལམ་གྱི་བདེན་པ་གང་ཞེ་ན། ཚོགས་ཀྱི་ལམ་གང་ཡིན་པ་དང་། སྦྱོར་བའི་ལམ་གང་ཡིན་པ་དང་། རྣམ་པར་དག་པའི་ལམ་གང་ཡིན་པ་དེ་ཐམས་ཅད་གཅིག་ཏུ་བསྡུས་པ་ནི། ལམ་གྱི་བདེན་པ་ཞེས་བྱའོ། །ཞེས་པ་དང་། ཀུན་ལས་བཏུས་སུའང་ལམ་ལྔ་ལམ་བདེན་དུ་

༄༅།        །བཤད་དོ་ཞེ་ན། སྐྱོན་མེད་དེ་ལམ་བདེན་གྱི་འཁོར་ཡིན་པའམ་ལམ་བདེན་རྗེས་མཐུན་པ་ཡིན་པ་ལ་དགོངས་ཏེ་ཀུན་བཏུས་འགྲེལ་པར། ལམ་རྣམ་པ་ལྔ་ཞེས་བྱ་བ་ནི་རབ་ཏུ་དབྱེ་བ་ལྔའི་སྐབས་ཀྱིས་སོ། །རབ་ཏུ་དབྱེ་བ་འདི་ཡང་ལམ་གྱི་བདེན་པ་འཁོར་དང་བཅས་པའི་སྐབས་ཀྱིས་རིག་བར་བྱའོ། །ཞེས་ལམ་གྱི་བདེན་པའི་འཁོར་དུ་བཤད་ལ། བསྡུ་བར་ཡང་། འཇིག་རྟེན་པའི་ཆོས་གང་དག་ཡང་འབྱུང་བའི་སྲིད་པ་སུན་འབྱིན་ཅིང་དེ་ལ་མི་ཕྱོགས་པ་འཇིག་རྟེན་ལས་འདས་པའི་ལམ་བསྐྱེད་པར་བྱེད་པ་དེ་དག་ཅིའི་ཕྱིར་ཀུན་འབྱུང་བའི་བདེན་པས་བསྡུས་པ་ཡིན་ཞེ་ན། དེ་དག་ནི་ངོ་བོ་ཉིད་ཀྱིས་ཡང་འབྱུང་བའི་སྲིད་པ་ལ་མི་ཕྱོགས་པ་ཡིན་མོད་ཀྱི་འོན་ཀྱང་ཡང་འབྱུང་བའི་ལུས་དང་ངག་དང་ཡིད་ཀྱིས་ལེགས་པར་སྤྱད་པ་དང་རྗེས་སུ་མཐུན་པ་ཡིན་པས་དེའི་ཕྱིར་དེ་དག་ཀྱང་ཀུན་འབྱུང་བའི་བདེན་པས་བསྡུས་པ་ཡིན་པར་རིག་པར་བྱའོ། །ཞེས་སོ། །ཚོགས་སྦྱོར་གྱི་རང་ལྡོག་ཟག་མེད་ཡིན་ལ་ལམ་བདེན་མཚན་ཉིད་པའོ་ཞེ་(མཁའ་རག་པ།)ན། དེ་མི་འཐད་དེ་བསྡུ་བར། ཐོས་པ་དང་བསམ་པ་ལས་བྱུང་བའི་ཤེས་རབ་ཀྱིས་དྲན་པ་ཉེ་བར་གཞག་པ་དག་ལ་བརྩོན་པར་བྱེད་པ་དེ་དེ་ཡང་ཀུན་རྫོབ་ཤེས་པ་དགེ་བ་ཟག་པ་དང་བཅས་པ་ཡིན་ནོ། །དེ་དེ་ལ་བརྟེན་ནས་ངེས་པར་འབྱེད་པའི་ཆ་དང་མཐུན་པའི་སྦྱོར་བ་བསྒོམས་པ་ལས་བྱུང་བའི་དྲན་པ་ཉེ་བར་གཞག་པ་དེ་དག་ལ་བརྩོན་པར་བྱེད་དེ། དེ་ཡང་ཀུན་རྫོབ་ཤེས་པ་དགེ་བ་ཟག་པ་དང་བཅས་པ་ཡིན་ནོ། །དེ་དེ་ལ་བརྟེན་ནས་མཐོང་བའི་ལམ་གྱི་སྦྱོར་བ་ངེས་པར་འབྱེད་པའི་ཆ་དང་མཐུན་བ་དང་ལྡན་པའི་དྲན་པ་ཉེ་བར་གཞག་པ་དེ་དག་ལ་བརྩོན་པར་བྱེད་དེ། དེ་ཡང་ཀུན་རྫོབ་ཤེས་པ་དགེ་བ་ཟག་པ་དང་བཅས་པ་ཡིན་ནོ། །དེ་དེ་ལ་བརྟེན་ནས་མཐོང་བའི་ལམ་གྱི་བར་ཆད་མེད་པའི་ལམ་གྱིས་བསྡུས་པ་འཇིག་རྟེན་པའི་ཆོས་ཀྱི་མཆོག་སྐྱེད་པར་བྱེད་དེ། དེ་ཡང་

ཀུན་རྫོབ་ཤེས་པ་དགེ་བ་ཟག་པ་དང་བཅས་པ་ཡིན་ནོ་ཞེས་དེ་དག་ཟག་བཅས་སུ་བཤད་དོ། །བཅུ་པ་བསླབ་པ་གསུམ་དུ་དབྱེ་ན། ལྷག་པའི་ཚུལ་ཁྲིམས་དང་ལྷག་པའི་སེམས་དང་ལྷག་པའི་ཤེས་རབ་ཀྱི་བསླབ་པའོ། །རྒྱན་ལས་ཀྱང་། བསླབ་གསུམ་དབང་དུ་མཛད་ནས་ནི། །རྒྱལ་བས་ཕ་རོལ་ཕྱིན་པ་དྲུག །ཡང་དག་བཤད་དེ་དང་པོ་གསུམ། །ཐ་མ་གཉིས་ཀྱིས་རྣམ་པ་གཉིས། །གཅིག་ནི་གསུམ་ཅར་ལ་ཡང་རྟོགས། །ཞེས་སོ། །བཅུ་གཅིག་པ་ནི། བསོད་ནམས་བྱ་བའི་དངོས་པོ་གསུམ་སྟེ། སྦྱིན་པ་ལས་བྱུང་བའི་བསོད་ནམས་བྱ་བའི་དངོས་པོ་རྣམས་དང་། ཚུལ་ཁྲིམས་ལས་བྱུང་བའི་བསོད་ནམས་བྱ་བའི་དངོས་པོ་དང་། བསྒོམས་པ་ལས་བྱུང་བའི་བསོད་ནམས་བྱ་བའི་དངོས་པོ་སྟེ་གསུམ་མོ། །དང་པོ་ནི། སྦྱིན་པའི་ཕ་རོལ་ཏུ་ཕྱིན་པའོ། །གཉིས་པ་ནི་ཚུལ་ཁྲིམས་ཀྱི་ཕ་རོལ་ཏུ་ཕྱིན་པའོ། །གསུམ་པ་ནི་བཟོད་པ་བརྩོན་འགྲུས་བསམ་གཏན་ཤེས་རབ་ཀྱི་ཕར་ཕྱིན་རྣམས་སོ། །བཅུ་གཉིས་པ་ལམ་བདུན་ནམ་བྱང་ཕྱོགས་སུམ་ཅུ་སོ་བདུན་དུ་དབྱེ་བ་ནི་གྲགས་པ་ཉིད་དོ། །དེ་ལྟ་བུའི་ཚུལ་གྱིས་སྟོན་པའི་གསུང་རབ་ཐམས་ཅད་ཀྱང་བཤད་པར་ནུས་གསུངས་སོ། །